සුත්තන්තපිටකෙ
ඛුද්දකනිකායො
(පඨමො ගන්ථො)
ඛුද්දකපාඨපාළි
නමො තස්ස භගවතො අරහතො සම්මාසම්බුද්ධස්ස.
1. සරණගමනං{1}
බුද්ධං සරණං ගච්ඡාමි.
ධම්මං සරණං ගච්ඡාමි.
සඞ්ඝං සරණං ගච්ඡාමි.
දුතියම්පි බුද්ධං සරණං ගච්ඡාමි.
දුතියම්පි ධම්මං සරණං ගච්ඡාමි.
දුතියම්පි සඞ්ඝං සරණං ගච්ඡාමි.
තතියම්පි බුද්ධං සරණං ගච්ඡාමි.
තතියම්පි ධම්මං සරණං ගච්ඡාමි.
තතියම්පි සඞ්ඝං සරණං ගච්ඡාමි.
සරණගමනං.{1}
2. දසසික්ඛාපදං
පාණාතිපාතා වෙරමණීසික්ඛාපදං සමාදියාමි.
අදින්නාදානා වෙරමණීසික්ඛාපදං සමාදියාමි.
අබ්රහ්මචරියා වෙරමණීසික්ඛාපදං සමාදියාමි.
මුසාවාදා වෙරමණීසික්ඛාපදං සමාදියාමි.
සුරාමෙරයමජ්ජපමාදට්ඨානා වෙරමණීසික්ඛාපදං සමාදියාමි .
විකාලභොජනා වෙරමණීසික්ඛාපදං සමාදියාමි.
නච්චගීතවාදිතවිසූකදස්සනා වෙරමණීසික්ඛාපදං සමාදියාමි.
මාලාගන්ධවිලෙපනධාරණමණ්ඩනවිභූසනට්ඨානා වෙරමණීසික්ඛාපදං සමාදියාමි.
උච්චාසයනමහාසයනා වෙරමණීසික්ඛාපදං සමාදියාමි.
ජාතරූපරජතපටිග්ගහණා වෙරමණීසික්ඛාපදං සමාදියාමි.
දසසික්ඛාපදං.
3. ද්වත්තිංසාකාරං
අත්ථි ඉමස්මිං කායෙ කෙසා ලොමා නඛා දන්තා තචො මංසං නහාරූ අට්ඨි අට්ඨිමිඤ්ජං{1} වක්කං හදයං යකනං කිලොමකං පිහකං පප්ඵාසං අන්තං අන්තගුණං උදරියං කරීසං පිත්තං සෙම්හං පුබ්බො ලොහිතං සෙදො මෙදො අස්සු වසා ඛෙළො සිඞ්ඝානිකා ලසිකා මුත්තං මත්ථකෙ මත්ථලුඞ්ගන්ති.
ද්වත්තිංසාකාරං.
4. කුමාරපඤ්හා
එකං නාම{2} කිං? සබ්බෙ සත්තා ආහාරට්ඨිතිකා.
ද්වෙ නාම කිං? නාමඤ්ච රූපඤ්ච.
තීණි නාම කිං? තිස්සො වෙදනා.
චත්තාරි නාම කිං? චත්තාරි අරියසච්චානි.
පඤ්ච නාම කිං? පඤ්චුපාදානක්ඛන්ධා.
ඡ නාම කිං? ඡ අජ්ඣත්තිකානි ආයතනානි.
සත්ත නාම කිං? සත්ත බොජ්ඣඞ්ගා.
අට්ඨ නාම කිං? අරියො අට්ඨඞ්ගිකො මග්ගො.
නව නාම කිං? නව සත්තාවාසා.
දස නාම කිං? දසහඞ්ගෙහි සමන්නාගතො අරහා’ති වුච්චතීති.
කුමාරපඤ්හා.
5. මඞ්ගලසුත්තං
එවං මෙ සුත: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
1. බහූ දෙවා මනුස්සා ච මඞ්ගලානි අචින්තයුං, ආකඞ්ඛමානා සොත්ථානං බ්රූහි මඞ්ගලමුත්තමං.
2. අසෙවනා ච බාලානං පණ්ඩිතානං ච සෙවනා, පූජා ච පූජනීයානං එතං මඞ්ගලමුත්තමං.
3. පතිරූපදෙසවාසො ච පුබ්බෙ ච කතපුඤ්ඤතා අත්තසම්මාපණිධි ච එතං මඞ්ගලමුත්තමං.
4. බාහුසච්චඤ්ච සිප්පඤ්ච විනයො ච සුසික්ඛිතො සුභාසිතා ච යා වාචා එතං මඞ්ගලමුත්තමං.
5. මාතාපිතුඋපට්ඨානං පුත්තදාරස්ස සඞ්ගහො අනාකුලා ච කම්මන්තා එතං මඞ්ගලමුත්තමං.
6. දානං ච ධම්මචරියා ච ඤාතකානඤ්ච සඞ්ගහො අනවජ්ජානි කම්මානි එතං මඞ්ගලමුත්තමං.
7. ආරති විරති පාපා මජ්ජපානා ච සඤ්ඤමො අප්පමාදො ච ධම්මෙසූ එතං මඞ්ගලමුත්තමං.
8. ගාරවො ච නිවාතො ච සන්තුට්ඨි ච කතඤ්ඤුතා කාලෙන ධම්මසවණං එතං මඞ්ගලමුත්තමං.
9. ඛන්තී ච සොවචස්සතා සමණානඤ්ච දස්සනං කාලෙන ධම්මසාකච්ඡා එතං මඞ්ගලමුත්තමං.
10. තපො ච බ්රහ්මචරියඤ්ච අරියසච්චානදස්සනං නිබ්බාණසච්ඡිකිරියා ච එතං මඞ්ගලමුත්තමං.
11. පුට්ඨස්ස ලොකධම්මෙහි චිත්තං යස්ස න කම්පති අසොකං විරජං ඛෙමං එතං මඞ්ගලමුත්තමං.
12. එතාදිසානි කත්වාන සබ්බත්ථ මපරාජිතා සබ්බත්ථ සොත්ථිං ගච්ඡන්ති තං තෙසං මඞ්ගලමුත්තමන්ති.
මඞ්ගලසුත්තං.
6. රතනසුත්තං
1. යානීධ භූතානි සමාගතානි භුම්මානි වා යානි ව අන්තළික්ඛෙ{1} සබ්බෙව භූතා සුමනා භවන්තු අථො’පි සක්කච්ච සුණන්තු භාසිතං.
2. තස්මා හි භූතා නිසාමෙථ සබ්බෙ, මෙත්තං කරොථ මානුසියා පජාය. දිවා ච රත්තො ච හරන්ති යෙ බලිං තස්මා හි නෙ රක්ඛථ අප්පමත්තා.
3. යං කිඤ්චි විත්තං ඉධ වා හුරං වා{2} සග්ගෙසු වා යං රතනං පණීතං න නො සමං අත්ථි තථාගතෙන ඉදම්පි බුද්ධෙ රතනං පණීතං එතෙන සච්චෙන සුවත්ථි හොතු.
4. ඛයං විරාගං අමතං පණීතං යදජ්ඣගා සක්යමුනී සමාහිතො න තෙන ධම්මෙන සමත්ථි කිඤ්චි ඉදම්පි ධම්මෙ රතනං පණීතං එතෙන සච්චෙන සුවත්ථි හොතු.
5. යම්බුද්ධසෙට්ඨො පරිවණ්ණයී සුචිං{3} සමාධිමානන්තරිකඤ්ඤමාහු සමාධිනා තෙන සමො න විජ්ජති ඉදම්පි ධම්මෙ රතනං පණීතං එතෙන සච්චෙන සුවත්ථි හොතු
6. යෙ පුග්ගලා අට්ඨසතම්පසත්ථා චත්තාරි එතානි යුගානි හොන්ති තෙ දක්ඛිණෙය්යා සුගතස්ස සාවකා එතෙසු දින්නානි මහප්ඵලානි ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{1}
7. යෙ සුප්පයුත්තා මනසා දළ්හෙන නික්කාමිනො ගොතමසාසනම්හි තෙ පත්තිපත්තා අමතං විගය්හ ලද්ධා මුධා නිබ්බුතිං භුඤ්ජමානා. ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{2}
8. යථින්දඛීලො පඨවිංසිතො සියා චතුබ්භි වාතෙභි අසම්පකම්පියො තථූපමං සප්පුරිසං වදාමි යො අරියසච්චානි අවෙච්ච පස්සති. ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{3}
9. යෙ අරියසච්චානි විභාවයන්ති ගම්භීරපඤ්ඤෙන සුදෙසිතානි කිඤ්චාපි තෙ හොන්ති භූසප්පමත්තා න තෙ භවං අට්ඨමං ආදියන්ති ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{4}
10. සහාවස්ස දස්සනසම්පදාය තයස්සු ධම්මා ජහිතා භවන්ති සක්කායදිට්ඨී විචිකිච්ඡිතඤ්ච සීලබ්බතං වාපි යදත්ථි කිඤ්චී චතූහපායෙහි ච විප්පමුත්තො ඡ චාභිඨානානි අභබ්බො කාතුං ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{1}
11. කිඤ්චාපි සො කම්මං කරොති පාපකං කායෙන වාචා උද චෙතසා වා අභබ්බො සො තස්ස පටිච්ඡාදාය අභබ්බතා දිට්ඨපදස්ස වුත්තා. ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{2}
12. වනප්පගුම්බෙ යථා ඵුස්සිතග්ගෙ ගිම්හාණමාසෙ පඨමස්මිං ගිම්හෙ තථූපමං ධම්මවරං අදෙසයී නිබ්බාණගාමිං පරමං හිතාය. ඉදම්පි බුද්ධෙ රතනං පණීතං එතෙන සච්චෙන සුවත්ථි හොතු.{3}
13. වරො වරඤ්ඤූ වරදො වරාහරො අනුත්තරො ධම්මවරං අදෙසයී. ඉදම්පි බුද්ධෙ රතනං පණීතං එතෙන සච්චෙන සුවත්ථි හොතු.
14. ඛීණං පුරාණං නවං නත්ථි සම්භවං විරත්තචිත්තා ආයතිකෙ භවස්මිං. තෙ ඛීණබීජා අවිරූළ්හිච්ඡන්දා නිබ්බන්ති ධීරා යථායම්පදීපො. ඉදම්පි සඞ්ඝෙ රතනං පණීතං එතෙන සච්චෙන සුවත්ථි හොතු.{4}
15. යානීධ භූතානි සමාගතානි භුම්මානි වා යානි ව අන්තළික්ඛෙ තථාගතං දෙවමනුස්සපූජිතං බුද්ධං නමස්සාම සුවත්ථි හොතු.{1}
16. යානීධ භූතානි සමාගතානි භුම්මානි වා යානි ව අන්තළික්ඛෙ. තථාගතං දෙවමනුස්සපූජිතං ධම්මං නමස්සාම සුවත්ථි හොතු.{1}
17. යානීධ භූතානි සමාගතානි භුම්මානි වා යානි ව අන්තළික්ඛෙ තථාගතං දෙවමනුස්සපූජිතං සඞ්ඝං නමස්සාම සුවත්ථි හොතු.{1}
රතනසුත්තං.
7. තිරොකුඩ්ඩසුත්තං
1. තිරොකුඩ්ඪෙසු තිට්ඨන්ති සන්ධිසිඞ්ඝාටකෙසු ච ද්වාරබාහාසු තිට්ඨන්ති ආගන්ත්වාන සකං ඝරං.
2. පහූතෙ අන්නපානම්හි ඛජ්ජභොජ්ජෙ උපට්ඨිතෙ න තෙසං කොචි සරති සත්තානං කම්මපච්චයා.
3. එවං දදන්ති ඤාතීනං යෙ හොන්ති අනුකම්පකා සුචිං පණීතං කාලෙන කප්පියං පානභොජනං.
4. ඉදං වො ඤාතීනං හොතු, සුඛිතා හොන්තු ඤාතයො තෙ ච තත්ථ සමාගන්ත්වා ඤාතිපෙතා සමාගතා
5. පහූතෙ අන්නපානම්හි සක්කච්චං අනුමොදරෙ. “චිරං ජීවන්තු නො ඤාතී යෙසං හෙතු ලභාමසෙ අම්හාකං ච කතා පූජා” දායකා ච අනිප්ඵලා.
6. න හි තත්ථ කසී අත්ථි ගොරක්ඛෙත්ථ න විජ්ජති වණිජ්ජා ත දීසි නත්ථි හිරඤ්ඤෙන [කයාක්කයං ඉතො දින්නෙන යාපෙන්ති පෙතා කාලකතා තහිං.
7. උන්නමෙ උදකං වට්ඨං{2} යථා නින්නං පවත්තති එවමෙව ඉතො දින්නං පෙතානං උපකප්පති.
8. යථා වාරිවහා පූරා පරිපූරෙන්ති සාගරං එවමෙව ඉතො දින්නං, පෙතානං උපකප්පති.
9. අදාසි මෙ අකාසි මෙ ඤාතිමිත්තා සඛා ච මෙ පෙතානං දක්ඛිණං දජ්ජා පුබ්බෙ කතමනුස්සරං.
10. න හි රුන්නං ව සොකො වා යා චඤ්ඤා පරිදෙවනා න තං පෙතානමත්ථාය එවං තිට්ඨන්ති ඤාතයො.
11. අයං ඛො දක්ඛිණා දින්නා සඞ්ඝම්හි සුප්පතිට්ඨිතා, දීඝරත්තං හිතායස්ස ඨානසො උපකප්පති.
12. සො ඤාතිධම්මො ච අයං නිදස්සිතො පෙතාන පූජා ච කතා උළාරා. බලඤ්ච භික්ඛූනමනුප්පදින්නං තුම්හෙහි පුඤ්ඤං පසුතං අනප්පකං.
තිරොකුඩ්ඩසුත්තං.
8. නිධිකණ්ඩසුත්තං
1. නිධිං නිධෙති පුරිසො ගම්භීරෙ ඔදකන්තිකෙ අත්ථෙ කිච්චෙ සමුප්පන්නෙ අත්ථාය මෙ භවිස්සති.
2. රාජතො වා දුරුත්තස්ස චොරතො පීළිතස්ස වා ඉණස්ස වා පමොක්ඛාය දුබ්භික්ඛෙ ආපදාසු වා, එතදත්ථාය ලොකස්මිං නිධි නාම නිධීයති.
3. තාව සුනිහිතො{1} සන්තො ගම්භීරෙ ඔදකන්තිකෙ න සබ්බො සබ්බදා එව තස්ස තං උපකප්පති.
4. නිධි වා ඨානා චවති සඤ්ඤා වාස්ස විමුය්හති. නාගා වා අපනාමෙන්ති යක්ඛා වාපි හරන්ති නං.
5. අප්පියා වාපි දායාදා උද්ධරන්ති අපස්සතො යදා පුඤ්ඤක්ඛයො හොති සබ්බමෙතං විනස්සති
6. යස්ස දානෙන සීලෙන සංයමෙන දමෙන ච නිධී සුනිහිතො හොති ඉත්ථියා පුරිසස්ස වා
7. චෙතියම්හි{1} ච සඞ්ඝෙ වා පුග්ගලෙ අතිථීසු වා මාතරි පිතරි වාපි අථො ජෙට්ඨම්හි භාතරි
8. එසො නිධි සුනිහිතො අජෙය්යො අනුගාමිකො පහාය ගමනීයෙසු එතං ආදාය ගච්ඡති.