1261. ඉමෙ සිරීසූපවනා ච{2} තාතා දිබ්බා{3} ගන්ධා සුරභිං{4} සම්පවන්ති තෙ සම්පවායන්ති ඉමං විමානං දිවා ච රත්තො ච තමං නිහන්ත්වා.
1262. ඉමෙසං ච ඛො වස්සසතච්චයෙන සිපාටිකා ඵලති එකමෙකා මානුස්සකං වස්සසතා අතීතං යදග්ගෙ කායම්හි ඉධූපපන්නො.
1263. දිස්වානහං වස්සසතානි පඤ්ච අස්මිං විමානෙ ඨත්වාන තාතා ආයුක්ඛයා පුඤ්ඤඛයා චවිස්සං තෙනෙව සොකෙන පමුච්ඡිතොස්මීති{5}.
1264. කථං නු සොචෙය්ය තථාවිධො සො ලද්ධා විමානං අතුලං චිරාය යෙ චාපි ඛො ඉත්තරමුපපන්නා තෙ නූන සොවෙය්යුං පරිත්තපුඤ්ඤාති.
1265. අනුච්ඡවිං ඔවදියඤ්ච මෙතං යං මං තුම්හෙ පෙය්යවාචං වදෙථ තුම්හෙ ච ඛො තාතා මයානුගුත්තා යෙනිච්ඡකං තෙන පලෙථ සොත්ථින්ති.
1266. ගන්ත්වා මයං සින්ධු සොවීරභූමිං ධනත්ථිකා උද්දයං පත්ථයානා යථා පයොගා පරිපුණ්ණචාගා කාහාම සෙරිස්සමහං උළාරන්ති.
1267. මා චෙව සෙරිස්සමහං අකත්ථ සබ්බඤ්ච වො භවිස්සති යං වදෙථ පාපානි කම්මානි විවජ්ජයාථ ධම්මානුයොගඤ්ච අධිට්ඨාහාථාති.
1268. උපාසකො අත්ථි ඉමම්හි සඞ්ඝෙ බහුස්සුතො සීලවතූපපන්නො සද්ධො ච චාගී ච සුපෙසලො ච විචක්ඛණො සන්තුසිතො මුතීමා.
1269. සඤ්ජානමානො න මුසා භණෙය්ය පරූපඝාතාය න චෙතයෙය්ය වෙභූතිකං පෙසුනං නො කරෙය්ය සණ්හඤ්ච වාචං සඛිලං භණෙය්ය.
1270. සගාරවො සප්පතිස්සො විනීතො අපාපකො අධිසීලෙ විසුද්ධො සො මාතරං පිතරං චාපි ජන්තු ධම්මෙන පොසෙති අරියවුත්ති.
1271. මඤ්ඤෙ සො මාතාපිතුන්නං කාරණා භොගානි පරියෙසති න අත්තහෙතු මාතාපිතුන්නඤ්ච යො අච්චයෙන නෙක්ඛම්මපොණො චරිස්සති බ්රහ්මචරියං.
1272. උජු අවඞ්කො අසඨො අමායො න ලෙසකප්පෙන ච වොහරෙය්ය සො තාදිසො සුක්කතකම්මකාරී{1} ධම්මෙ ඨිතො කින්ති ලභෙථ දුක්ඛං.
1273. තං කාරණා පාතුකතොම්හි අත්තනා තස්මා ධම්මං පස්සථ වාණිජාසෙ අඤ්ඤත්ර තෙනීහ භස්මි{1} භවෙථ අන්ධාකුලා විප්පනට්ඨා අරඤ්ඤෙ තං ඛිප්පමානෙන ලහුං පරෙන සුඛො භවෙ සප්පුරිසෙන සඞ්ගමොති.
1274. කිං නාම සො කිඤ්චි කරොති කම්මං කිං නාමධෙය්යං කිං පන තස්ස ගොත්තං මයම්පි නං දට්ඨුකාමම්හ යක්ඛ යස්සානුකම්පාය ඉධාගතොසි ලාභා හි තස්ස යස්ස තුවං පිහෙසීති.
1275. යො කප්පකො සම්භව නාමධෙය්යො උපාසකො කොච්ඡඵලූපජීවී{2} ජානාථ නං තුම්හාකං පෙසියො සො මා ඛො නං හීළිත්ථ සුපෙසලො සොති.
1276. ජානමසෙ යං ත්වං වදෙසි යක්ඛ න ඛො නං ජානාම ස ඊදිසොති මයම්පි තං පූජයිස්සාම යක්ඛ සුත්වා{3} තුය්හං වචනං උළාරන්ති.
1277. යෙ කෙචිමස්මිං සත්ථෙ මනුස්සා දහරා මහන්තා අථවාපි මජ්ඣිමා සබ්බෙව තෙ ආලම්බන්තු විමානං පස්සන්තු පුඤ්ඤාන ඵලං කදරීයාති.
1278. තෙ තත්ථ සබ්බෙව අහං පුරෙති තං කප්පකං තත්ථ පුරක්ඛිපිත්වා{4} සබ්බෙව තෙ ආලම්බිංසු විමානං මසක්කසාරං විය වාසවස්ස.
1279. තෙ තත්ථ සබ්බෙව අහං පුරෙති උපාසකත්තං පටිවෙදයිංසු පාණාතිපාතා විරතා අහෙසුං ලොකෙ අදින්නං පරිවජ්ජයිංසු.
1280. අමජ්ජා නො ච මුසා භණිංසු සකෙන දාරෙන ච අහෙසුං තුට්ඨා තෙ තත්ථ සබ්බෙව අහං පුරෙති උපාසකත්තං පටිවෙදයිත්වා පක්කාමි සත්ථො අනුමොදමානො යක්ඛිද්ධියා අනුමතො පුනප්පුනං.
1281. ගන්ත්වාන තෙ සින්ධුසොවීරභූමිං ධනත්ථිකා උද්දයං{1} පත්ථයානා යථා පයොගා පරිපුණ්ණලාභා පච්චාගමුං පාටලිපුත්තමක්ඛතං.
1282. ගන්ත්වාන තෙ සඞ්ඝරං සොත්ථිවන්තො පුත්තෙහි දාරෙහි සමඞ්ගිභූතා ආනන්දි චිත්තා{2} සුමනා පතීතා අකංසු සෙරිස්සමහං උළාරං.
1283. සෙරීස්සකා තෙ පරිවෙණං මාපයිංසු එතාදිසා සප්පුරිසාන සෙවනා මහත්ථිකා ධම්මගුණාන සෙවනා එකස්ස අත්ථාය උපාසකස්ස සබ්බෙව සත්තා සුඛිතා{3} අහෙසුන්ති.
සෙරිස්සකවිමානං.
7. 11.
1284. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්හා රුචකත්ථතා සුභා
1285. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡන්නා.
1286. කෙන තෙ තාදිසො වණ්ණො කෙන තෙ ඉධමිජ්ඣති උප්පජ්ජන්ති ච තෙ භොගා යෙ කෙචි මනසො පියා
1287. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
1288. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං.
1289. දුන්නීක්ඛිත්තං මාලං සුනික්ඛිපිත්වා පතිට්ඨපෙත්වා සුගතස්ස ථූපෙ මහිද්ධිකො චම්හි මහානුභාවො දිබ්බෙහි කාමෙහි සමඞ්ගිභූතො.
1290. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
1291. අක්ඛාමි තෙ භික්ඛු මහානුභාව මනුස්සභූතො යමහං අකාසිං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
සුනික්ඛිත්තවිමානං.
සුනික්ඛිත්තවග්ගො සත්තමො.
තස්සුද්දානං:
ද්වෙ දළිද්දා ද්වෙ විහාරා{1} භතකො ගොපාලකන්ථකා{2} අනෙකවණ්ණා මට්ටකුණ්ඩලී සෙරිස්සකො සුනික්ඛිත්තං පුරිසානං තතියො වග්ගොති.{3}
භාණවාරං චතුත්ථං.
විමානවත්ථු නිට්ඨිතං