1091. අහං මනුස්සෙසු මනුස්සභූතො අහොසිං යවපාලකො අද්දසං විරජං භික්ඛුං විප්පසන්නමනාවිලං
1092. තස්ස අදාසහං භාගං පසන්නො සෙහි පාණිහි, කුම්මාසපිණ්ඩං දත්වාන මොදාමි නන්දනෙ වනෙ
1093. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1094. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
යවපාලකවිමානං.
6. 8.
1095. අලඞ්කතො මල්යධරො සුවත්ථො සුකුණ්ඩලී කප්පිතකෙසමස්සු ආමුත්තහත්ථාභරණො යසස්සී දිබ්බෙ විමානම්හි යථාසි{1} චන්දිමා
1096. දිබ්බා ච වීණා පවදන්ති වග්ගුං අට්ඨට්ඨකා සික්ඛිතා සාධුරූපා දිබ්බා ච කඤ්ඤා තිදසචරා උළාරා නච්චන්ති ගායන්ති පමොදයන්ති
1097. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1098. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1099. අහං මනුස්සෙසු මනුස්සභූතො දිස්වාන සමණෙ සීලවන්තෙ සම්පන්නවිජ්ජාචරණෙ යසස්සී බහුස්සුතෙ තණ්හක්ඛයූපපන්නෙ අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං
1100. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1101. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
පඨමකුණ්ඩලීවිමානං
6. 9.
1102. අලඞ්කතො මල්යධරො සුවත්ථො සුකුණ්ඩලී කප්පිතකෙසමස්සු ආමුත්තහත්ථාභරණො යසස්සී දිබ්බෙ විමානම්හි යථාසි චන්දිමා
1103. දිබ්බා ච වීණා පවදන්ති වග්ගුං අට්ඨට්ඨකා සික්ඛිතා සාධුරූපා දිබ්බා ච කඤ්ඤා තිදසචරා උළාරා නච්චන්ති ගායන්ති පමොදයන්ති
1104. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1105. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1106. අහං මනුස්සෙසු මනුස්සභූතො දිස්වාන සමණෙ සාධුරූපෙ සම්පන්නවිජ්ජාචරණෙ යසස්සී බහුස්සුතෙ සීලවතූපපන්නෙ{1} අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං
1107. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1108. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
දුතියකුණ්ඩලීවිමානං.
6. 10.
1109. යා දෙවරාජස්ස සභා සුධම්මා යත්ථච්ඡති දෙවසඞ්ඝො සමග්ගො තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1110. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1111. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1112. අහං මනුස්සෙසු මනුස්සභූතො රඤ්ඤො පායාසිස්ස අහොසිං මාණවො ලද්ධා ධනං සංවිභාගං අකාසිං පියා ච මෙ සීලවන්තො අහෙසුං අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං
1113. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1114. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
උත්තරවිමානං{1}.
පායාසි වග්ගො ඡට්ඨො.
තස්සුද්දානං:
ද්වෙ අගාරිනො ඵලදායී ද්වෙ උපස්සයදායී භික්ඛායදායි යවපාලකො චෙව ද්වෙ කුණ්ඩලිනො පායාසීති පුරිසානං දුතියො වග්ගො පවුච්චතීති.
7. සුනික්ඛිත්තවග්ගො
7. 1.
1115. යථා වනං චිත්තලතං පභාසති උය්යානසෙට්ඨං තිදසානමුත්තමං තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1116. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1117. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1118. අහං මනුස්සෙසු මනුස්සභූතො දළිද්දො අතාණො කපණො කම්මකරො අහොසිං ජිණ්ණො ච මාතාපිතරො අභරිං{1} පියා ච මෙ සීලවන්තො අහෙසුං අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං
1119. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
1120. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
චිත්තලතාවිමානං
7. 2.
1121. යථා වනං නන්දනං චිත්තලතං{2} පභාසති උය්යානසෙට්ඨං තිදසානමුත්තමං තදූපමං තුය්හමිදං විමානං ඔභාසයං තිට්ඨති අන්තළික්ඛෙ
1122. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණොච තෙ සබ්බදිසා පභාසතීති
1123. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං
1124. අහං මනුස්සෙසු මනුස්සභූතො දළිද්දො අතාණො කපණො කම්මකරො අහොසිං ජිණ්ණො ච මාතාපිතරො අභරිං පියා ච මෙ සීලවන්තො අහෙසුං අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං
1125. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
1126. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
නන්දනවිමානං.
7. 3.
1127. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා
1128. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණ ඡන්නා
1129. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
1130. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
1131. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං
1132. අහං මනුස්සෙසු මනුස්සභූතො විවනෙ පථෙ චඞ්කමනං{1} අකාසිං ආරාමරුක්ඛානි ච රොපයිස්සං පියා ච මෙ සීලවන්තො අහෙසුං අන්නං ච පානං ච පසන්නචිත්තො සක්කච්චදානං විපුලං අදාසිං
1133. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1134. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
මණිථූණවිමානං.
7. 4.
1135. සොවණ්ණමයෙ පබ්බතස්මිං විමානං සබ්බතො පභං හෙමජාලකපච්ඡන්නං{2} කිඞ්කිණිජාල{3}කප්පිතං
1136. අට්ඨංසා සුකතා ථම්භා සබ්බෙ වෙළුරියාමයා එකමෙකාය අංසියා රතනා සත්ත නිම්මිතා
1137. වෙළුරියසුවණ්ණස්ස ඵළිකා රූපියස්ස ච මසාරගල්ලමුත්තාහි ලොහිතඞ්කමණීහි ච
1138. චිත්රා මනොරමා භූමි න තත්ථුද්ධංසතී රජො ගොපාණසීගණා පීතා කූටං ධාරෙන්ති නිම්මිතා
1139. සොපානානි ච චත්තාරි නිම්මිතා චතුරො දිසා නානා රතනගබ්භෙහි ආදිච්චොව විරොචති
1140. වෙදියා{4} චතස්සො තත්ථ විභත්තා භාගසො මිතා, දද්දල්ලමානා ආභන්ති සමන්තා චතුරො දිසා
1141. තස්මිං විමානෙ පවරෙ දෙවපුත්තො මහප්පභො අතිරොචති වණ්ණෙන උදයන්තොව භානුමා{5}
1142. දානස්ස තෙ ඉදං ඵලං අථො සීලස්ස වා පන අථො අඤ්ජලි කම්මස්ස තං මෙ අක්ඛාහි පුච්ඡිතො ති.
1143. සො දෙවපුත්තො අත්තමනො මොග්ගල්ලානෙන පුච්ඡිතො පඤ්හං පුට්ඨො වියාකාසි යස්ස කම්මස්සිදං ඵලං
1144. අහං අන්ධකවින්දස්මිං බුද්ධස්සාදිච්චබන්ධුනො විහාරං සත්ථු කාරෙසිං පසන්නො සෙහි පාණිහි
1145. තත්ථ ගන්ධඤ්ච මාලඤ්ච පච්චග්ඝඤ්ච{1} විලෙපනං විහාරං සත්ථුනො දාසිං{2} විප්පසන්නෙන චෙතසා
1146. තෙන මය්හමිදං ලද්ධං වසං වත්තෙමි නන්දනෙ නන්දනෙ පවනෙ{3} රම්මෙ නානාදිජගණායුතෙ රමාමි නච්චගීතෙහි අච්ඡරාහි පුරක්ඛතොති.
සුවණ්ණවිමානං.
7. 5.
1147. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා
1148. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡන්නා
1149. කෙන තෙ තාදිසො වණ්ණො කෙන තෙ ඉධ මිජ්ඣති, උප්පජ්ජන්ති ච තෙ භොගා යෙ කෙචි මනසො පියා
1150. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
1151. සො දෙවපුත්තො මොග්ගල්ලානෙන පුච්ඡිතො. පඤ්හං පුට්ඨො වියාකාසි යස්ස කම්මස්සිදං ඵලං
1152. ගිම්හානං පච්ඡිමෙ මාසෙ පතපන්තෙ{1} දිවාකරෙ{2} පරෙසං භතකො පොසො අම්බාරාමමසිඤ්චති{3}
1153. අථ තෙනාගමා භික්ඛු සාරිපුත්තොති විස්සුතො කිලන්තරූපො කායෙන අකිලන්තොව චෙතසා
1154. තඤ්ච දිස්වාන ආයන්තං අවොචං අම්බසිඤ්චකො, සාධු තං භන්තෙ නහාපෙය්යං යං මමස්ස සුඛාවහං
1155. තස්ස මෙ අනුකම්පාය නික්ඛිපි පත්තචීවරං නිසීදි රුක්ඛමූලස්මිං ඡායාය එකචීවරො
1156. තඤ්ච අච්ඡෙන වාරිනා පසන්නමානසො නරො නහාපයී රුක්ඛමූලස්මිං ඡායාය එකචීවරං
1157. අම්බො ච සිත්තො සමණො ච නහාපිතො මයා ච පුඤ්ඤං පසුතං අනප්පකං ඉති සො පීතියා කායං සබ්බං ඵරති අත්තනො
1158. තදෙව එත්තකං කම්මං අකාසිං තාය ජාතියා පහාය මානුසං දෙහං උපපන්නොම්හි නන්දනං
1159. නන්දනෙ පවනෙ රම්මෙ නානාදිජගණායුතෙ රමාමි නච්චගීතෙහි අච්ඡරාහි පුරක්ඛතොති.
අම්බවිමානං.
7. 6.
1160. දිස්වාන දෙවං පටිපුච්ඡි භික්ඛු උච්චෙ විමානම්හි චිරට්ඨිතිකෙ ආමුත්තහත්ථාභරණං යසස්සිං{4} දිබ්බෙ විමානම්හි යථාපි චන්දිමා.
1161. අලඞ්කතො මාලභාරී{5} සුවත්ථො සුකුණ්ඩලී කප්පිතකෙසමස්සු ආමුත්තහත්ථාභරණො යසස්සී දිබ්බෙ විමානම්හි යථාපි චන්දිමා.
1162. දිබ්බා ච වීණා පවදන්ති වග්ගුං අට්ඨට්ඨකා සික්ඛිතා සාධුරූපා දිබ්බා ච කඤ්ඤා තිදසචරා උළාරා නච්චන්ති ගායන්ති පමොදයන්ති
1163. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
1164. සො දෙවපුත්තො අත්තමනො මොග්ගල්ලානෙන පුච්ඡිතො පඤ්හං පුට්ඨො වියාකාසි යස්ස කම්මස්සිදං ඵලං
1165. අහං මනුස්සෙසු මනුස්සභූතො සඞ්ගම්ම රක්ඛිස්සං පරෙසං ධෙනුයො තතො ච ආගා සමණො මමන්තිකෙ ගාවො ච මාසෙ අගමංසු ඛාදිතුං
1166. ද්වයජ්ජ කිච්චං උභයඤ්ච කාරියං ඉච්චෙවහං භන්තෙ තදා විචින්තයිං තතො ච සඤ්ඤං පටිලද්ධ යොනිසො දදාමි භන්තෙති ඛිපිං අනන්තකං
1167. සො මාසඛෙත්තං තුරිතො අවාසරිං පුරා අයං භඤ්ජති{1} යස්සිදං ධනං තතො ච කණ්හො උරගො මහාවිසො අදංසි පාදෙ තුරිතස්ස මෙ සතො
1168. ස්වාහං අට්ටොම්හි දුක්ඛෙන පීළිතො භික්ඛු ච තං සාමං මුඤ්චිත්වා නන්තකං{2} අහාසි කුම්මාසං මමානුකම්පයා{3} තතො චුතො කාලකතොම්හි දෙවතා