සුත්තන්තපිටකෙ
විමානවත්ථුපාළි
නමො තස්ස භගවතො අරහතො සම්මා සම්බුද්ධස්ස.
1. පීඨවග්ගො
1. 1.
1. පීඨං තෙ සොවණ්ණමයං උළාරං මනොජවං ගච්ඡති යෙන කාමං, අලඞ්කතෙ මාල්යධරෙ{1} සුවත්ථෙ ඔභාසසි විජ්ජුරිවබ්භකූටං.
2. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
3. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
4. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
5. අහං මනුස්සෙසු මනුස්සභූතා අබ්භාගතානාසනකං{2} අදාසිං, අභිවාදයිං අඤ්ජලිකං අකාසිං යථානුභාවඤ්ච අදාසි දානං.
6. තෙන මෙ තාදිසො වණ්ණො තෙන මෙ ඉධමිජ්ඣති උප්පජ්ජන්ති ච මෙ භොගා යෙ කෙචි මනසො පියා.
7. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
පඨමපීඨවිමානං.
1. 2.
8. පීඨං තෙ වෙළුරියමයං උළාරං මනොජවං ගච්ඡති යෙන කාමං, අලඞ්කතෙ මාල්යධරෙ සුවත්ථෙ ඔභාසසි විජ්ජුරිවබ්භකූටං.
9. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
10. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
11. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
12. අහං මනුස්සෙසු මනුස්සභූතා අබ්භාගතානාසනකං අදාසිං, අභිවාදයිං අඤ්ජලිකං අකාසිං යථානුභාවඤ්ච අදාසි දානං.
13. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
14. අක්ඛාමි තෙ භික්ඛු මහානුභාව මනුස්සභූතා යමකාසිපුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
දුතියපීඨවිමානං.
1. 3.
15. පීඨං තෙ සොවණ්ණමයං උළාරං මනොජවං ගච්ඡති යෙන කාමං, අලඞ්කතෙ මාල්යධරෙ සුවත්ථෙ ඔභාසසි විජ්ජුරිවබ්භකූටං
16. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
17. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
18. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
19. අප්පස්ස කම්මස්ස ඵලං මමෙදං{1} යෙනම්හි{2} එවං ජලිතානුභාවා, අහං මනුස්සෙසු මනුස්සභූතා පුරිමාය ජාතියා මනුස්සලොකෙ
20. අද්දසං විරජං භික්ඛුං විප්පසන්නමනාවිලං, තස්ස අදාසහං පීඨං පසන්නා සෙහි පාණිහි
21. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
22. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බාදිසා පභාසතීති.
තතියපීඨවිමානං.
1. 4.
23. පීඨං තෙ වෙළුරියමයං උළාරං මනොජවං ගච්ඡති යෙන කාමං, අලඞ්කතෙ මාල්යධරෙ සුවත්ථෙ ඔභාසසි විජ්ජුරිවබ්භකූටං.
24. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
25. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
26. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
27. අප්පස්ස කම්මස්ස ඵලං මමෙදං යෙනම්හි එවං ජලිතානුභාවා අයං මනුස්සෙසු මනුස්සභූතා පුරිමාය ජාතියා මනුස්සලොකෙ.
28. අද්දසං විරජං භික්ඛුං විප්පසන්නමනාවිලං, තස්ස අදාසහං පීඨං පසන්නා සෙහි පාණිහි.
29. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
30. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
චතුත්ථපීඨවිමානං.
1. 5.
31. කුඤ්ජරො තෙ වරාරොහො නානා රතනකප්පනො, රුචිරො ථාමවා ජවසම්පන්නො{1} ආකාසම්හි සමීහති. 32. පදුමී පදුමපත්තක්ඛී{2} පදුමුප්පලජුතින්ධරො,{3} පදුම චුණ්ණාභිකිණ්ණඞ්ගො සොණ්ණපොක්ඛරමාලවා{4}
33. පදුමානුසටං මග්ගං පදුමපත්තවිභූසිතං, ඨීතං වග්ගුමනුග්ඝාති මිතං ගච්ඡති වාරණො
34. තස්ස පක්කමමානස්ස සොණ්ණකංසා රතිස්සරා, තෙසං සූය්යති නිග්ඝොසො තුරියෙ පඤ්චඞ්ගිකෙ යථා
35. තස්ස නාගස්ස ඛන්ධස්මිං සුචිවත්ථා අලඞ්කතා, මහන්තං අච්ඡරාසඞ්ඝං වණ්ණෙන අතිරොචසි{5}
36. දානස්ස තෙ ඉදං ඵලං අථො සීලස්ස වා පන, අථො අඤ්ජලිකම්මස්ස තං මෙ අක්ඛාහි පුච්ඡිතාති.
37. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලන්ති.
38. දිස්වාන ගුණසම්පන්නං ඣායිං ඣානරතං සතං, අදාසිං පුප්ඵාභිකිණ්ණං ආසනං දුස්සසන්ථතං.
39. උපඩ්ඪපදුමමාලාහං ආසනස්ස සමන්තතො, අබ්භොකිරිස්සං පත්තෙහි පසන්නා සෙහි පාණීහි.
40. තස්ස කම්මස්ස කුසලස්ස{1} ඉදං මෙ ඊදිසං ඵලං, සක්කාරො ගරුකාරො ච දෙවානං අපචිතා අහං.
41. යො චෙ සම්මාවිමුත්තානං සත්තානං බ්රහ්මචාරිනං, පසන්නො ආසනං දජ්ජා එවං නන්දො යථා අහං.
42. තස්මාහි අත්ථකාමෙන මහන්තම්භිකඞ්ඛතා, ආසනං දාතබ්බං හොති සරීරන්තිමධාරිනන්ති.
කුඤ්ජරවිමානං.
1. 6.
43. සුවණ්ණච්ඡදනං නාවං නාරී ආරුය්හ තිට්ඨසි, ඔගාහසි පොක්ඛරණිං පදුමං ඡින්දසි පාණිනා.
44. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
45. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති,
46. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්සකම්මස්සිදං ඵලන්තී.
47. අහං මනුස්සෙසු මනුස්සභූතා පුරිමාය ජාතියා මනුස්සලොකෙ, දිස්වාන භික්ඛූ තසිතෙ කිලන්තෙ උට්ඨාය පාතුං උදකං අදාසිං.
48. යො වෙ කිලන්තාන පිපාසිතානං උට්ඨාය පාතුං උදකං දදාති, සීතොදකා තස්ස භවන්ති නජ්ජො පහූතමාල්යා බහුපුණ්ඩරීකා.
49. තමාපගා අනුපරියන්ති සබ්බදා සීතොදිකා වාලුකසන්ථතා නදී, අම්බා ච සාලා තිලකා ච ජම්බුයො උද්දාලකා පාටලියො ච ඵුල්ලා.
50. තං භූමිභාගෙහි උපෙතරූපං විමානසෙට්ඨං භුසසොභමානං, තස්සීධ{1} කම්මස්ස අයං විපාකො එතාදිසං කතපුඤ්ඤා{2} ලභන්ති.
51. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
52. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
පඨමනාවාවිමානං.
1. 7.
53. සුවණ්ණච්ඡදනං නාවං නාරී ආරුය්හ තිට්ඨසි, ඔගාහසි පොක්ඛරණිං පදුමං ඡින්දසි පාණිනා.
54. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
55. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
56. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
57. අහං මනුස්සෙසු මනුස්සභූතා පුරිමාය ජාතියා මනුස්සලොකෙ, දිස්වාන භික්ඛුං තසිතං කිලන්තං උට්ඨාය පාතුං උදකං අදාසිං.
58. යො චෙ කිලන්තස්ස පිපාසිතස්ස උට්ඨාය පාතුං උදකං දදාති, සීතොදකා තස්ස භවන්ති නජ්ජො පහූතමාල්යා බහුපුණ්ඩරීකා.
59. තමාපගා අනුපරියන්ති සබ්බදා සීතොදකා වාලුකසන්ථතා නදී, අම්බා ච සාලා තිලකා ච ජම්බුයො උද්දාලකා පාටලියො ච ඵුල්ලා.
60. තං භූමිභාගෙහි උපෙතරූපං විමානසෙට්ඨං භුසසොභමානං, තස්සීධ කම්මස්ස අයං විපාකො එතාදිසං කතපුඤ්ඤා ලභන්ති.
61. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
62. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං,{*} තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
දුතියනාවාවිමානං.
1. 8.
63. සුවණ්ණච්ඡදනං නාවං නාරී ආරුය්හ තිට්ඨසි, ඔගාහසි පොක්ඛරණිං පදුමං ඡින්දසි පාණිනා.
64. කූටාගාරා නිවෙසා තෙ විභත්තා භාගසො මිතා, දද්දල්ලමානා ආභන්ති සමන්තා චතුරො දිසා.
65. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
66. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
67. සා දෙවතා අත්තමනා සම්බුද්ධෙනෙව පුච්ඡිතා පඤ්හං පුට්ඨා වියාකාසි යස්ස කම්මස්සිදං ඵලන්ති.
68. අහං මනුස්සෙසු මනුස්සභූතා පුරිමාය ජාතියා මනුස්සලොකෙ, දිස්වාන භික්ඛූ තසිතෙ කිලන්තෙ උට්ඨාය පාතුං උදකං අදාසිං.
69. යො වෙ කිලන්තාන පිපාසිතානං උට්ඨාය පාතුං උදකං දදාති, සීතොදකා තස්ස භවන්ති නජ්ජො පහූතමාල්යා බහු පුණ්ඩරීකා.
70. තමාපගා අනුපරියන්ති සබ්බදා සීතොදකා වාලුකසන්ථතා නදී, අම්බා ච සාලා තිලකා ච ජම්බුයො උද්දාලකා පාටලියො ච ඵුල්ලා.
71. තං භූමිභාගෙහි උපෙතරූපං විමානසෙට්ඨං භුසසොභමානං, තස්සීධ කම්මස්ස අයං විපාකො එතාදිසං කතපුඤ්ඤා ලභන්ති.
72. කූටාගාරා නිවෙසා මෙ විභත්තා භාගසො මිතා, දද්දල්ලමානා ආභන්ති සමන්තා චතුරො දිසා.
73. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
74. තෙනම්හි එවං ජලිතානුභාවා වණ්ණො ච මෙ සබ්බදිසා පභාසති, එතස්ස කම්මස්ස ඵලං මමෙදං අත්ථාය බුද්ධො උදකං අපායීති{1}.
තතියනාවා විමානං.
1. 9.
75. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
76. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
77. කෙන ත්වං විමලොභාසා අතිරොචසි දෙවතෙ{2}, කෙන තෙ සබ්බගත්තෙහි සබ්බා ඔභාසරෙ{3} දිසා.
78. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
79. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
80. අහං මනුස්සෙසු මනුස්සභූතා පුරිමාය ජාතියා මනුස්සලොකෙ, තමන්ධකාරම්හි තිමීසිකායං පදීපකාලම්හි අදං පදීපං{1}