2. 8.
245. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
246. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
247. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
248. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
249. සද්ධාති මං අඤ්ඤිංසු රාජගහස්මිං උපාසිකා, සද්ධාසීලෙන සම්පන්නා සංවිභාගරතා සදා.
250. අච්ඡාදනඤ්ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා.
251. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං.
252. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං.
253. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
254. පඤ්ච සික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
255. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
256. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
සද්ධාවිමානං.{1}
2. 9.
257. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
258. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
259. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
260. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්සකම්මස්සිදං ඵලං.
261. සුනන්දාති මං අඤ්ඤිංසු{1} රාජගහස්මිං උපාසිකා, සද්ධා සීලෙන සම්පන්නා සංවිභාගරතා සදා.
262. අච්ඡාදනඤ්ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා.
263. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං.
264. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං.
265. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
266. පඤ්ච සික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
267. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
268. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
සුනන්දා විමානං.{2}
2. 10.
269. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
270. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
271. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
272. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
273. අහං මනුස්සෙසු මනුස්සභූතා පුරිමාය ජාතියා මනුස්සලොකෙ අද්දසං විරජං බුද්ධං විප්පසන්නමනාවිලං තස්ස අදාසහං භික්ඛං පසන්නා සෙහි පාණිහි
274. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
275. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
භික්ඛාදායිකා විමානං.
2. 11.
276. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
277. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
278. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
279. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
280. අහං මනුස්සෙසු මනුස්සභූතා පුරිමාය ජාතියා මනුස්සලොකෙ අද්දසං විරජං භික්ඛුං විප්පසන්නමනාවිලං තස්ස අදාසහං භික්ඛං පසන්නා සෙහි පාණිහි.
281. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
282. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
දුතියභික්ඛාදායිකා විමානං.
චිත්තලතාවග්ගො දුතියො
තස්සුද්දානං:
දාසී චෙව ලඛුමා ච අථ ආචාමදායිකා චණ්ඩාලී භද්දිත්ථි චෙව{1} සොණදින්නා උපොසථා නන්දා චෙව සුනන්දා ච{2} දෙව ච භික්ඛාය දායිකා වග්ගො තෙන පවුච්චතීති.
භාණවාරං පඨමං.
3. පාරිච්ඡත්තකවග්ගො
3. 1.
283. උළාරො තෙ යසො වණ්ණො සබ්බා ඔභාසතෙ දිසා, නාරියො නච්චන්ති ගායන්ති දෙවපුත්තා අලඞ්කතා.
284. මොදෙන්ති පරිවාරෙන්ති තව පූජාය දෙවතෙ, සොවණ්ණානි විමානානි තවිමානි සුදස්සනෙ.
285. තුවංසි ඉස්සරා තෙසං සබ්බකාමසමිද්ධිනී, අභිජාතා මහන්තාසි දෙවකායෙ පමොදසි, දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
286. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
287. පුච්ඡාමි තං දෙවි මහානුභාවෙ, මනුස්සලොකෙ කිමකාසි පුඤ්ඤං කෙනාසි එවං ජලිතානුභාවා, වණ්ණො ච තෙ සබ්බදිසා පභාසතීති.
288. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
289. අහං මනුස්සෙසු මසුස්සභූතා පුරිමාය ජාතියා මනුස්සලොකෙ දුස්සීලකුලෙ සුණිසා අහොසිං අස්සද්ධෙසු කදරියෙසු අහං.
290. සද්ධා සීලෙන සම්පන්නා සංවිභාගරතා සදා, පිණ්ඩාය චරමානස්ස අපූවං තෙ අදාසහං.
291. තදාහං සස්සුයාචික්ඛිං සමණො ආගතො ඉධ, තස්ස අදාසහං පූවං පසන්නා සෙහි පාණිහි.
292. ඉති සා සස්සු පරිභාසි අවිනීතා{1} තුවං වධූ, න මං සම්පුච්ඡිතුං ඉච්ඡි සමණස්ස දදාමහං.
293. තතො මෙ සස්සු කුපිතා පහාසි මුසලෙන මං, කූටඞ්ගච්ඡි අවධි මං නාසක්ඛිං ජීවිතුං චිරං.
294. සා අහං කායස්ස භෙදා විප්පමුත්තා තතො චුතා, දෙවානං තාවතිංසානං උපපන්නා සහව්යතං.
295. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
296. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
උළාර විමානං.
3. 2.
297. ඔභාසයිත්වා පඨවිං සදෙවකං අතිරොචසි චන්දිමසූරියා විය සිරියා ච වණ්ණෙන යසෙන තෙජසා බ්රහ්මා ව දෙවෙ තිදසෙ සඉන්දකෙ.{1}
298. පුච්ඡාමි තං උප්පලමාලධාරිණී ආවෙළිනී කඤ්චනසන්නිභත්තවෙ අලඞ්කතෙ උත්තමවත්ථධාරිණී කා ත්වං සුභෙ දෙවතෙ වන්දසෙ මමං.
299. කිං ත්වං පුරෙ කම්මමකාසි අත්තනා මනුස්සභූතා පුරිමාය ජාතියා දානං සුචිණ්ණං අථ සීලසඤ්ඤමං කෙනූපපන්නා සුගතිං යසස්සිනී. දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
300. ඉදානි භන්තෙ ඉමමෙව ගාමං{2} පිණ්ඩාය අම්හාක ඝරං උපාගමි තතො තෙ උච්ඡුස්ස අදාසි ඛණ්ඩිකං පසන්නචිත්තා අතුලාය පීතියා.
301. සස්සු ච පච්ඡා අනුයුඤ්ජතෙ මමං කහන්නු{3} උච්ඡුං වධුකෙ අවාකිරී{4} නච්ඡඩ්ඪිතං න ච පන ඛාදිතං{5} මයා සන්තස්ස භික්ඛුස්ස සයං අදාසහං.
302. තුය්හං නචිදං{1} ඉස්සරියං අථො මම ඉතිස්සා සස්සු පරිභාසතෙ මමං, පීඨං ගහෙත්වා පහාරං අදාසි මෙ තතො චුතා කාලකතාම්හි දෙවතා.
303. තදෙව කම්මං කුසලං කතං මයා සුඛඤ්ච කම්මං අනුභොමි අත්තනා, දෙවෙහි සද්ධිං පරිචාරයාමහං මොදාමහං කාමගුණෙහි පඤ්චහි.
304. තදෙව කම්මං කුසලං කතං මයා සුඛඤ්ච කම්මං අනුභොමි අත්තනා දෙවින්දගුත්තා තිදසෙහි රක්ඛිතා සමප්පිතා කාමගුණෙහි පඤ්චහි.
305. එතාදිසං පුඤ්ඤඵලං අනප්පකං මහාවිපාකා මම උච්ඡුදක්ඛිණා, දෙවෙහි සද්ධිං පරිචාරයාමහං මොදාමහං කාමගුණෙහි පඤ්චහි.
306. එතාදිසං පුඤ්චඵලං අනප්පකං මහාජුතීකා මම උච්ඡුදක්ඛිණා, දෙවින්දගුත්තා තිදසෙහි රක්ඛිතා සහස්සනෙත්තො ඉව නන්දනෙ වනෙ.
307. තුවඤ්ච භන්තෙ අනුකම්පකං විදුං උපෙච්ච වන්දිං කුසලඤ්ච පුච්ඡිසං තතො තෙ උච්ඡුස්ස අදාසිං ඛණ්ඩිකං පසන්නචිත්තා අතුලාය පීතියාති.
උච්ඡුදායිකාවිමානං.
3. 3.
308. පල්ලඞ්කසෙට්ඨෙ මණිසොණ්ණචිත්තෙ පුප්ඵාභිකිණ්ණෙ සයනෙ උළාරෙ තත්ථච්ඡසි දෙවි මහානුභාවෙ උච්චාවචා ඉද්ධි විකුබ්බමානා.
309. ඉමා ච තෙ අච්ඡරායො සමන්තතො නච්චන්ති ගායන්ති පමොදයන්ති දෙවිද්ධිපත්තාසි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
310. අහං මනුස්සෙසු මනුස්සභූතා අඩ්ඪෙ කුලෙ සුණිසා අහොසිං අක්කොධනා භත්තුවසානුවත්තිනී අහොසිං අප්පමත්තා උපොසථෙ.
311. මනුස්සභූතා දහරාස’පාපිකා{1} පසන්නචිත්තා පතිමාභිරාධයිං දිවා ච රත්තො ච මනාපචාරිණී අහං පුරෙ සීලවතී අහොසිං.
312. පාණාතිපාතා විරතා අචොරිකා සංසුද්ධකායා සුචිබ්රහ්මචාරිණී අමජ්ජපා නො ච මුසා අභාණිං සික්ඛාපදෙසු පරිපූරකාරිණී.
313. චාතුද්දසිං පඤ්චදසිං යා ච පක්ඛස්ස අට්ඨමී පාටිහාරියපක්ඛඤ්ච පසන්නමනසා අහං අට්ඨඞ්ගුපෙතං අනුධම්මචාරිණී උපොසථං පීතිමනා උපාවසිං.
314. ඉමඤ්චාරියට්ඨඞ්ගවරෙහුපෙතං{2} සමාදියිත්වා කුසලං සුඛුද්රයං පතිම්හි කල්යාණි වසානුවත්තිනී අහොසිං පුබ්බෙ සුගතස්ස සාවිකා
315. එතාදිසං කුසලං ජීවලොකෙ කම්මං කරිත්වාන විසෙසභාගිනී කායස්ස භෙදා අභිසම්පරායං දෙවිද්ධිපත්තා සුගතිම්හි ආගතා.
316. විමාන පාසාදවරෙ මනොරමෙ පරිවාරිතා අච්ඡරාසඞ්ගණෙන සයංපභා දෙවගණා රමෙන්ති මං දීඝායුකිං දෙවවිමානමාගතන්ති.
පල්ලඞ්කවිමානං.
3. 4.
317. ලතා ච සජ්ජා පවරා ච දෙවතා අච්චිමුඛී{3} රාජවරස්ස සිරීමතො සුතා ච රඤ්ඤො වෙස්සවණස්ස ධීතා රාජීමතී ධම්මගුණෙහි සොභථ.
318. පඤ්චෙත්ථ නාරියො අගමංසු නහායිතුං සීතොදිකං උප්පලිනිං සිවං නදිං තා තත්ථ නහායිත්ව රමෙත්ව දෙවතා නච්චිත්ව{4} ගායිත්ව{5} සුතා ලතං බ්රුවී.
319. පුච්ඡාමි තං උප්පලමාලධාරිණී ආවෙළිනී කඤ්චනසන්නිභත්තචෙ තිමීරතමබක්ඛි නභෙව සොභනෙ දීඝායුකී කෙන කතො යසො තව.
320. කෙනාසි භද්දෙ පතිනො පියතරා විසිට්ඨකල්යාණිතරස්සු රූපතො පදක්ඛිණා නච්චනගීතවාදිතෙ ආචික්ඛ නො ත්වං නරනාරිපුච්ඡිතා ති.
321. අහං මනුස්සෙසු මනුස්සභූතා උළාරභොගෙ කුලෙ සුණිසා අහොසිං අක්කොධනා භත්තුවසානුවත්තිනී උපොසථෙ අප්පමත්තා අහොසිං.
322. මනුස්සභූතා දහරාස’පාපිකා පසන්නචිත්තා පතිමාභිරාධයිං සදෙවරං සස්සසුරං සදාසකං අභිරාධයිං තම්හි කතො යසො මම.
323. සාහං තෙන කුසලෙන කම්මුනා චතුබ්භි ඨානෙහි විසෙසමජ්ඣගා ආයුඤ්ච වණ්ණඤ්ච සුඛං බලඤ්ච ඛිඩ්ඩාරතිං පච්චනුභොමනප්පකං.
324. සුතං නු තං භාසති යං අයං ලතා යං නො අපුච්ඡිම්හ අකිත්තයී නො පතිනො කිරම්හාකං විසිට්ඨනාරිනං ගතී ච තාසං පවරා ච දෙවතා.