විහාරවිමානං.
භාණවාරං දුතියං.
4. 7.
756. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා
757. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
758. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
759. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං
760. ඉන්දීවරානං හත්ථකං අහමදාසිං භික්ඛුනො පිණ්ඩාය චරන්තස්ස එසිකානං උන්නතස්මිං නගරවරෙ පණ්ණකතෙ රම්මෙ
761. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
762. අක්ඛාමි තෙ භික්ඛු මහානුභාව මනුස්සභූතා යමහං අකාසිං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති. (ඉන්දීවරදායිකා)
763. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා
764. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
765. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
766. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵල’න්ති.
767. නීලුප්පලහත්ථකං අහමදාසිං භික්ඛුනො පිණ්ඩාය චරන්තස්ස එසිකානං උන්නතස්මිං නගරවරෙ පණ්ණකතෙ රම්මෙ
768. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
769. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති. (නීල්ලුප්පලදායිකා)
770. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා
771. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
772. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
773. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලන්ති
774. ඔදාතමූලකං හරිතපත්තං උදකස්මිං සරෙ ජාතං අහමදාසිං භික්ඛුනො පිණ්ඩාය චරන්තස්ස එසිකානං උන්නතස්මිං නගරවරෙ පණ්ණකතෙ රම්මෙ
775. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
776. අක්ඛාමි තෙ භික්ඛු මහානුභාව මනුස්සභූතා යමහං අකාසි තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති. (ඔදාතමූලදායිකා)
777. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා
778. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
779. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
780. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵල’න්ති
781. අහං සුමනා සුමනස්ස සුමනමකුළානි දන්තවණ්ණානි අහමදාසිං භික්ඛුනො පිණ්ඩාය චරන්තස්ස එසිකානං උන්නතස්මිං නගරවරෙ පණ්ණකතෙ රම්මෙ
782. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
783. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති (සුමනමකුළදායිකා)
චතුරිත්ථිවිමානං.
4. 8.
784. දිබ්බංතෙ අම්බවනං රම්මං පාසාදෙත්ථ මහල්ලකො, නානා තුරියසඞ්ඝුට්ඨො අච්ඡරාගණ ඝොසිතො
785. පදීපො චෙත්ථ ජලති නිච්චං සොවණ්ණමයො මහා, දුස්සඵලෙහි රුක්ඛෙහි සමන්තා පරිවාරිතො
786. කෙන තෙ තාදිසො වණ්ණො තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
787. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
788. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵල’න්ති
789. අහං මනුස්සෙසු මනුස්සභූතා පුරිමාය ජාතියා මනුස්සලොකෙ විහාරං සඞ්ඝස්ස කාරෙසිං අම්බෙහි පරිවාරිතං
790. පරියොසිතෙ විහාරෙ කාරෙන්තෙ නිට්ඨිතෙ මහෙ, අම්බෙ අච්ඡාදයිත්වාන{1} කත්වා දුස්සමයෙ ඵලෙ
791. පදීපං තත්ථ ජාලෙත්වා භොජයිත්වා ගණුත්තමං, නීයාදෙසිං තං සඞ්ඝස්ස පසන්නා හොති පාණිහි
792. තෙන මෙ අම්බවනං රම්මං පාසාදෙත්ථ මහල්ලකො, නානාතුරිය සඞ්ඝුට්ඨො අච්ඡරාගණ ඝොසිතො
793. පදීපො චෙත්ථ ජලති නිච්චං සොවණ්ණමයො මහා, දුස්සඵලෙහි රුක්ඛෙහි සමන්තා පරිවාරිතො
794. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
795. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති
අම්බවිමානං.
4. 9.
796. පීතවත්ථෙ පීතධජෙ පීතාලඞ්කාරභූසිතෙ, පීතචන්දනලිත්තඞ්ගෙ පීතඋප්පලමාලිනි{1}
797. පීතපාසාදසයනෙ පීතාසනෙ පීතභාජනෙ, පීතඡත්තෙ පීතරථෙ පීතස්සෙ පීතවීජනෙ.
798. කිං කම්මමකරී භද්දෙ පුබ්බෙ මානුසකෙ භවෙ, දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති.
799. කොසාතකී නාම ලතත්ථි භන්තෙ කිත්තිතා අනභිජ්ඣිතා,{2} තස්සා චත්තාරි පුප්ඵානි ථූපං අභිහරිං අහං.
800. සත්ථු සරීරමුද්දිස්ස විප්පසන්නෙන චෙතසා, නාස්ස මග්ගං අවෙක්ඛිස්සං තදග්ගමනසා{3} සති.
801. තතො මං අවධී ගාවී ථූපං අප්පත්තමානසං, තඤ්චාහං අභිසඤ්චෙය්යං භීයො නූන ඉතො සියා.
802. තෙන කම්මෙන දෙවින්ද මඝවා දෙවකුඤ්ජර, පහාය මානුසං දෙහං තව සහව්යතමාගතා, ති{4}
803. ඉදං සුත්වා තිදසාධිපති මඝවා දෙවකුඤ්ජරො, තාවතිංසෙ පසාදෙන්තො මාතලිං එතදබ්රවී, ති.
804. පස්ස මාතලි අච්ඡෙරං චිත්තං කම්මඵලං ඉදං, අප්පකම්පි කතං දෙය්යං පුඤ්ඤං හොති මහප්ඵලං
805. නත්ථි චිත්තෙ පසන්නම්හි අප්පිකා{1}නාම දක්ඛිණා, තථාගතෙ වා සම්බුද්ධෙ අථවා තස්ස සාවකෙ.
806. එහි මාතලි අම්හෙපි භිය්යො භිය්යො මහෙමසෙ, තථාගතස්ස ධාතුයො සුඛො පුඤ්ඤානමුච්චයො.
807. තිට්ඨන්තෙ නිබ්බුතෙ චාපි සමෙ චිත්තෙ සමං ඵලං, චෙතොපණිධිහෙතූහි සත්තා ගච්ඡන්ති සුග්ගතිං.
808. බහුන්නං{2} වත අත්ථාය උප්පජ්ජන්ති තථාගතා, යත්ථ කාරං කරිත්වාන සග්ගං ගච්ඡන්ති දායකා, ති.
පීත විමානං.
4. 10.
809. ඔභාසයිත්වා පඨවිං සදෙවකං අතිරොචසි චන්දිමසුරියා විය සිරියා ච වණ්ණෙන යසෙන තෙජසා බ්රහ්මා ව දෙවෙ තිදසෙ සඉන්දකෙ.
810. පුච්ඡාමි තං උප්පලමාලධාරිණී ආවෙළිනී කඤ්චන සන්තිභත්තචෙ අලඞ්කතෙ උත්තමවත්ථධාරිණී කා ත්වං සුභෙ දෙවතෙ වන්දසෙ මමං
811. කිං ත්වං පුරෙ කම්මමකාසි අත්තනා මනුස්සභූතා පුරිමාය ජාතියා දානං සුචිණ්ණං අථ සීලසඤ්ඤමං කෙනූපපන්නා සුගතිං යසස්සිනී. දෙවතෙ පුච්ඡිතාචික්ඛ කිස්ස කම්මසිදං ඵල’න්ති.
812. ඉදානි භන්තෙ ඉමමෙව ගාමං පිණ්ඩාය අම්හාක ඝරං උපාගමි තතො තෙ උච්ඡුස්ස අදාසිං ඛණ්ඩිකං පසන්නචිත්තා අතුලාය පීතියා.
813. සස්සු ච පච්ඡා අනුයුඤ්ජතෙ මමං කහං නු උච්ඡු වධකෙ අවාකිරි නච්ඡඩ්ඪිතං නො පන ඛාදිතං මයා සන්තස්ස භික්ඛුස්ස සයං අදාසහං.
814. තුය්හංනවිදං ඉස්සරියං අථො මම ඉතිස්සා{1} සස්සු පරිහාසතෙ මමං ලෙඩ්ඩුං ගහෙත්වා පහාරං අදාසි මෙ තතො චුතා කාලකතාම්භි දෙවතා.
815. තදෙව කම්මං කුසලං කතං මයා සුඛඤ්ච කම්මං අනුභොමි අත්තනා දෙවෙහි සද්ධිං පරිචාරයාමහං මොදාමහං කාමගුණෙහි පඤ්චහි.
816. තදෙව කම්මං කුසලං කතං මයා සුඛඤ්ච කම්මං අනුභොමි අත්තනා දෙවින්ද ගුත්තා තිදසෙහි රක්ඛිතා සමප්පිතා කාමගුණෙහි පඤ්චහි
817. එතාදිසං පුඤ්ඤඵලං අනප්පකං මහාවිපාකා මම උච්ඡුදක්ඛිණා දෙවෙහි සද්ධිං පරිචාරයාමහං මොදාමහං කාමගුණෙහි පඤ්චහි.
818. එතාදිසං පුඤ්ඤඵලං අනප්පකං මහාජුතීකා මම උච්ඡුදක්ඛිණා දෙවින්දගුත්තා තිදසෙහි රක්ඛිතා සහස්සනෙත්තොරිව{2} නන්දනෙ වනෙ.
819. තුවඤ්ච භන්තෙ අනුකම්පකං විදුං උපෙච්ච වන්දිං කුසලඤ්ච පුච්ඡිසං තතො තෙ උච්ඡුස්ස අදාසිං ඛණ්ඩිකං පසන්නචිත්තා අතුලාය පීතියාති.
උච්ඡු විමානං.
4. 11.
820. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
821. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
822. පුච්ඡාමි තං දෙවි මහානුභාවෙ, මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති.
823. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
824. අහං මනුස්සෙසු මනුස්සභූතා දිස්වාන සමණෙ සීලවන්තෙ පාදානි වන්දිත්ව මනං පාසාදයිං චිත්තාමහං අඤ්ජලිකං අකාසිං.
825. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
826. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති.
චන්දන විමානං.
4. 12.
827. අභික්කන්තෙන වණ්ණෙන යා ත්වං තිට්ඨසි දෙවතෙ, හත්ථෙ පාදෙ ච{1} විග්ගය්හ නච්චසි සුප්පවාදිතෙ.
828. තස්සා තෙ නච්චමානාය අඞ්ගමඞ්ගෙහි සබ්බසො, දිබ්බා සද්දා නිච්ඡරන්තී සවනීයා මනොරමා.
829. තස්සා තෙ නච්චමානාය අඞ්ගමඞ්ගෙහි සබ්බසො, දිබ්බා ගන්ධා පවායන්තී පුචිගන්ධා මනොරමා.
830. විවත්තමානා කායෙන යා වෙණීසු පිළන්ධනා, තෙසං සූයති නිග්ඝොසො තුරියෙ පඤ්චඞ්ගිකෙ යථා.
831. වටංසකා වාතධූතා වාතෙන සම්පකම්පිතා, තෙසං සූයති නිග්ඝොසො තුරියෙ පඤ්චඞ්ගිකෙ යථා.
832. යාපි තෙ සිරස්මිං මාලා සුචිගන්ධා මනොරමා, වාති ගන්ධො දිසා සබ්බා රුක්ඛො මඤ්ජුසකො යථා.
833. ඝායසෙ තං සුචිගන්ධං රූපං පස්සසි අමානුසං, දෙවතෙ පුච්ඡිකාචික්ඛ කිස්ස කම්මස්සිදං ඵලන්ති.
834. දාසී අහං පුරෙ ආසිං ගයායං බ්රාහ්මණස්සහං, අප්පපුඤ්ඤා අලක්ඛිකා රජ්ජුමාලාති මං විදුං{1}.
835. අක්කොසානං වධානං ච තජ්ජනාය ච උක්කතා,{2} කූටං ගහෙත්වා නික්ඛම්ම ගච්ඡිං{3} උදකහාරියා.
836. විපථෙ කුටං නික්ඛිපිත්වා වනසණ්ඩං උපාගමිං, ඉධෙවාහං මරිස්සාමි කො අත්ථො{4} ජීවිතෙන මෙ.
837. දළ්හං පාසං කරිත්වාන ආසුම්හිත්වාන{5} පාදපෙ, තතො දිසා විලොකෙසිං කො නු ඛො වනමස්සිතො.
838. තත්ථද්දසාසිං සම්බුද්ධං සබ්බලොකහිතං මුනිං, නිසින්නං රුක්ඛමූලස්මිං ඣායත්තමකුතොභයං.
839. තස්සා මෙ අහු සංවෙගො අබ්භුතො ලොමහංසනො, කො නු ඛො වනමස්සිතො මනුස්සො උදාහු දෙවතා.
840. පාසාදිකං පසාදනීයං වනා නිබ්බානමාගතං, දිස්වා මනො මෙ පසීදි නායං යාදිස කීදිසො.
841. ගුත්තින්ද්රියො ඣානරතො අබ්භිග්ගතමානසො, හිතො සබ්බස්ස ලොකස්ස බුද්ධො සො{6}යං භවිස්සති.
842. භයභෙරවො දුරාසදො සීහොව ගුහමස්සිතො, දුල්ලභායං දස්සනාය පුප්ඵං ඔදුම්බරං යථා.