674. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං
675. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
676. පඤ්චසික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
677. තස්සා මෙ ඤාතිකුලා දාසී{4} සදා මාලාභිහාරතී, තාහං භගවතො ථූපෙ සබ්බමෙවාභිරොපයිං.
678. උපොසථෙ චහං ගන්ත්වා මාලාගන්ධවිලෙපනං, ථූපස්මිං අභිරොපෙසිං පසන්නා සෙහි පාණිහි.
679. තෙන කම්මෙන දෙවින්ද රූපං මය්හං ගතී ච මෙ, ඉද්ධි ච අනුභාවො ච යං මාලං අභිරොපයිං.
680. යඤ්ච සීලවතී ආසිං න තං තාව විපච්චතී, ආසා ච පන මෙ දෙවින්ද සකදාගාමිනී සියන්ති.
විසාලක්ඛී විමානං.
3. 10.
681. පාරිච්ඡත්තකෙ කොවිළාරෙ රමණීයෙ මනොරමෙ, දිබ්බං මාලං ගන්ථමානා ගායන්තී සම්පමොදසී.
682. තස්සා තෙ නච්චමානාය අඞ්ගමඞ්ගෙහි සබ්බසො, දිබ්බා සද්දා නිච්ඡරන්ති සවණීයා මනොරමා.
683. තස්සා තෙ නච්චමානාය අඞ්ගමඞ්ගෙහි සබ්බසො, දිබ්බා ගන්ධා පවායන්ති සුචිගන්ධා මනොරමා.
684. විවත්තමානා කායෙන යා වෙණීසු පිළන්ධනා, තෙසං සූයති නිග්ඝොසො තුරියෙ පඤ්චඞ්ගිකෙ යථා.
685. වටංසකා වාතධූතා වාතෙන සම්පකම්පිතා, තෙසං සූයති නිග්ඝොසො තුරියෙ පඤ්චඞ්ගිකෙ යථා.
686. යාපි තෙ සිරස්මිං මාලා සුචිගන්ධා මනොරමා, වාති ගන්ධො දිසා සබ්බා රුක්ඛො මඤ්ජුස්සකො{1} යථා.
687. ඝායසෙ තං සුචිං ගන්ධං රූපං පස්සසි අමානුසං, දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
688. පභස්සරං අච්චිමන්තං වණ්ණගන්ධෙන සඤ්ඤුතං{2}, අසොකපුප්ඵමාලාහං බුද්ධස්ස උපනාමයිං.
689. තාහං කම්මං කරිත්වාන කුසලං බුද්ධවණ්ණිතං, අපෙතසොකා සුඛිතා සම්පමොදාමනාමයාති.
පාරිච්ඡත්තක විමානං.
පාරිච්ඡත්තකවග්ගො තතියො.
තස්සුද්දානං:
උළාරං{3} උච්ඡුපල්ලඞ්කං{4} ලතා ච ගුත්තිලෙන ච දද්දල්ල සෙසවතී මල්ලී{5} විසාලක්ඛි පාරිච්ඡත්තකො වග්ගො තෙන පවුච්චතීති.
4. මඤ්ජෙට්ඨකවග්ගො
4. 1.
690. මඤ්ජෙට්ඨකෙ{1} විමානස්මිං සොණ්ණ වාලුක සන්ථතෙ, පඤ්චඞ්ගිකෙන තුරියෙන රමසි සුප්පවාදිතෙ.
691. තස්මා විමානා ඔරුය්හ නිම්මිතා රතනාමයා, ඔගාහසි සාලවනං පුප්ඵිතං සබ්බකාලිකං
692. යස්ස යස්සෙව සාලස්ස මූලෙ තිට්ඨසි දෙවතෙ, සො සො මුඤ්චති පුප්ඵානි ඔනමිත්වා දුමුත්තමො
693. වාතෙරිතං සාලවනං ආධූතං දිජසෙවිතං, වාති ගන්ධො දිසා සබ්බා රුක්ඛො මඤ්ජූසකො යථා
694. ඝායසෙ තං සුචිං ගන්ධං රූපං පස්සසි අමානුසං, දෙවතෙ පුච්ඡිතාචික්ඛ කිස්ස කම්මස්සිදං ඵලන්ති
695. අහං මනුස්සෙසු මනුස්සභූතා දාසී අයිරකුලෙ අහුං, බුද්ධං නිසින්නං දිස්වාන සාලපුප්ඵෙහි ඔකිරිං
696. වටංසකං ච සුකතං සාලපුප්ඵමයං අහං, බුද්ධස්ස උපනාමෙසිං පසන්නා සෙහි පාණිහි.
697. තාහං කම්මං කරිත්වාන කුසලං බුද්ධවණ්ණිතං, අපෙතසොකා සුඛිතා සම්පමොදාමනාමයාති.
මඤ්ජෙට්ඨක විමානං.
4. 2.
698. පභස්සර වරවණ්ණනිභෙ සුරත්තවත්ථ නිවාසනෙ{2} මහිද්ධිකෙ චන්දනරුචිරගත්තෙ කා ත්වං සුභෙ දෙවතෙ වන්දසෙ මමං
699. පල්ලඞ්කො ව තෙ මහග්ඝො නානාරතනචිත්තිතො රුචිරො යත්ථ ත්වං නිසින්නා විරොචසි දෙවරාජාරිව{3} නන්දනෙ වනෙ
700. කිං ත්වං පුරෙ සුචරිතමාචරි භද්දෙ කිස්ස කම්මස්ස විපාකං අනුභොසි දෙවලොකස්මිං දෙවතෙ පුච්ඡිතාචික්ඛ කිස්සකම්මස්සිදං ඵලන්ති
701. පිණ්ඩාය තෙ චරන්තස්ස මාලං ඵාණිතඤ්ච අදදං භන්තෙ තස්ස කම්මස්සිදං විපාකං අනුභොමි දෙවලොකස්මිං
702. හොති ච මෙ අනුතාපො අපරද්ධං{1} දුක්කතඤ්ච මෙ භන්තෙ සාහං ධම්මං නාස්සොසිං සුදෙසිතං ධම්මරාජෙන
703. තං තං වදාමි භද්දන්තෙ යස්ස මෙ අනුකම්පියො කොචි ධම්මෙසු තං සමාදපෙථ{2} සුදෙසිතං ධම්මරාජෙන
704. යෙසං අත්ථි සද්ධා බුද්ධෙ ධම්මෙ ච සඞ්ඝරතනෙ ච, තං{3} තෙ මං අතිවිරොචන්ති ආයුනා යසසා සිරියා
705. පතාපෙන වණ්ණෙන උත්තරිතරා අඤ්ඤෙ මහිද්ධිකතරා මයා දෙවාති
පභස්සර විමානං.
4. 3.
706. අලඞ්කතා මණිකඤ්චනාචිතං සුවණ්ණජාල චිත්තං{4} මහන්තං අභිරුය්හ ගජවරං සුකප්පිතං ඉධාගමා වෙහාසයං{5} අන්තළික්ඛෙ
707. නාගස්ස දන්තෙසු දුවෙසු නිම්මිතා අච්ඡොදිකා පදුමිනියො සුඵුල්ලා පදුමෙසු ච තුරියගණා පභිජ්ජරෙ ඉමා ච නච්චන්ති මනොහරායො
708. දෙවිද්ධිපත්තාසි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති
709. බාරාණසියං උපසඞ්කමිත්වා බුද්ධස්සහං වත්ථයුගං අදාසිං පාදානි වන්දිත්ව ඡමා නිසීදිං චිත්තා චහං අඤ්ජලිකං අකාසිං
710. බුද්ධො ච මෙ කඤ්චනසන්නිභත්තවො අදෙසයී සමුදයදුක්ඛනිච්චතං අසඞ්ඛතං දුක්ඛනිරොධසස්සතං මග්ගං අදෙසෙසි{1} යතො විජානියං
711. අප්පායුකී කාලකතා තතො චුතා උපපන්නා තිදසගණං යසස්සිනී සක්කස්සාහං{2} අඤ්ඤතරා පජාපතී යසුත්තරා නාම දිසාසු විස්සුතා’ති.
නාග විමානං.
4. 4.
712. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා
713. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා
714. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
715. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵල’න්ති
716. අහං ච බාරාණසියං බුද්ධස්සාදිච්චබන්ධුනො, අදාසිං සුක්ඛකුම්මාසං පසන්නා සෙහි{3} පාණිහි
717. සුක්ඛාය අලොණිකාය ච පස්ස ඵලං කුමාමාසපිණ්ඩියා, අලොමං සුඛිතං දිස්වා කො පුඤ්ඤං න කරිස්සති
718. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
719. අක්ඛාමි තෙ භික්ඛු මහානුභාවෙ මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති.
අලොමා විමානං{1}.
4. 5.
720. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා
721. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසොපියා
722. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති
723. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං
724. අහං අන්ධකවින්දස්මිං බුද්ධස්සාදිච්චබන්ධුනො, අදාසිං කොලසම්පාකං කඤ්ජිකං{2} තෙලධූපිතං
725. පිප්ඵල්යා ලසුනෙන ච මිස්සං ලාමඤ්ජකෙන ච, අදාසිං උජුභූතස්මිං{3} විප්පසන්නෙන චෙතසා
726. යා මහෙසිත්තං කාරෙය්ය චක්කවත්තිස්ස රාජිනො නාරී සබ්බඞ්ගකල්යාණී භත්තුචානොමදස්සිකා එතස්ස කඤ්ජිකදානස්ස කලං නාග්ඝති සොළසිං
727. සතං නික්ඛා සතං අස්සා සතං අස්සතරී රථා සතං කඤ්ඤාසහස්සානි ආමුත්තමණිකුණ්ඩලා එතස්ස කඤ්ජිකදානස්ස කලං නාග්ඝන්ති සොළසිං
728. සතං හෙමවතා නාගා ඊසා දන්තා උරූළ්හවා සුවණ්ණකච්ඡා මාතඞ්ගා හෙමකප්පන වාසසා{1} එතස්ස කඤ්ජිකදානස්ස කලං නාග්ඝන්ති සොළසිං
729. චතුන්නම්පි{2} දීපානං ඉස්සරං යොධ කාරයෙ, එතස්ස කඤ්ජිකදානස්ස කලං නාග්ඝති සොළසි’න්ති.
කඤ්ජිකදායිකා විමානං.
4. 6.
730. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී{3} දිසා සබ්බා ඔසධී විය තාරකා
731. තස්සා තෙ නච්චමානාය අඞ්ගමඞ්ගෙහි සබ්බසො, දිබ්බා සද්දා නිච්ඡරන්ති සවණීයා මනොරමා
732. තස්ස තෙ නච්චමානාය අඞ්ගමඞ්ගෙහි සබ්බසො, දිබ්බා ගන්ධා පවායන්ති සුචිගන්ධා මනොරමා
733. විවත්තමානා කායෙන යා වෙණීසු පිළන්ධනා, තෙසං සූයති නිග්ඝොසො තුරියෙ පඤ්චඞ්ගිකෙ යථා
734. වටංසකා වාතධූතා වාතෙන සම්පකම්පිතා, තෙසං සූයති නිග්ඝොසො තුරියෙ පඤ්චඞ්ගිකෙ යථා
735. යාපි තෙ සිරස්මිං මාලා සුචිගන්ධා මනොරමා, වාති ගන්ධො දිසා සබ්බා රුක්ඛො මඤ්ජුසකො යථා
736. ඝායසෙ තං සුචිං ගන්ධං රූපං පස්සසි අමානුසං, දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති
737. සාවත්ථියං මය්හං සඛී භදන්තෙ සඞ්ඝස්ස කාරෙසි මහාවිහාරං තත්ථප්පසන්නා අහමනුමොදිං දිස්වා අගාරඤ්ච පියඤ්ච මෙතං
738. තායෙව මෙ සුද්ධනුමොදනාය ලද්ධං විමානං අබ්භුතං දස්සනෙය්යං සමන්තතො සොළස යොජනානි වෙහාසයං ගච්ඡති ඉද්ධියා මම
739. කූටාගාරා නිවෙසා මෙ විභත්තා භාගසො මිතා, දද්දල්ලමානා ආභන්ති සමන්තා සතයොජනං
740. පොක්ඛරඤ්ඤො ච මෙ එත්ථ පුථුලොමනිසෙවිතා, අච්ඡොදිකා විප්පසන්නා සොණ්ණවාලුකසන්ථතා
741. නානාපදුමසඤ්ඡන්නා පුණ්ඩරීකසමොතතා, සුරභී සම්පවායන්තී මනුඤ්ඤා මාළුතෙරිතා
742. ජම්බුයො පනසා තාලා නාළිකෙරවනානි ච, අන්තො නිවෙසනෙ ජාතා නානා රුක්ඛා අරොපිමා
743. නානා තුරියසඞ්ඝුට්ඨං අච්ඡරාගණඝොසිතං, යො’පි මං සුපිනෙ පස්සෙ සො’පි චිත්තො සියා නරො
744. එතාදිසං අබ්භුතං දස්සනීයං{1} විමානං සබ්බතො පභං, මම කම්මෙහි නිබ්බත්තං අලං පුඤ්ඤානි කාතවෙති
745. තායෙව තෙ සුද්ධනුමොදනාය ලද්ධං විමානං අබ්භුතං දස්සනීයං යා චෙව සා දානමදාසි නාරී තස්සා ගතිං බ්රූහි කුහිං උපපන්නා සා ති
746. යා සා අහු මය්හං සඛී භදන්තෙ සඞ්ඝස්ස කාරෙසි මහාවිහාරං විඤ්ඤාතධම්මා සා අදාසි දානං උප්පන්නා{2} නිම්මාණරතීසු දෙවෙසු
747. පජාපතී තස්ස සුනිම්මිතස්ස අචින්තියො කම්මවිපාකො තස්සා යමෙතං පුච්ඡසි කුහිං උපපන්නා සා’ති තං තෙ වියාකාසිං අනඤ්ඤථා අහං
748. තෙනහි අඤ්ඤෙපි{3} සමාදපෙථ සඞ්ඝස්ස දානානි දදාථ විත්තා ධම්මඤ්ච සුණාථ පසන්න මානසා සුදුල්ලභො ලද්ධො මනුස්සලාභො
749. යං මග්ගං මග්ගාධිපන්ත්යදෙසයී{4} බ්රහ්මස්සරො කඤ්චන සන්නිභත්තවො සඞ්ඝස්ස දානානි දදාථ විත්තා මහප්ඵලා යත්ථ භවන්ති දක්ඛිණා
750. යෙ පුග්ගලා අට්ඨ සතං පසත්ථා චත්තාරි එතානි යුගානි හොන්ති තෙ දක්ඛිණෙය්යා සුගතස්ස සාවකා එතෙසු දින්නානි මහප්ඵලානි
751. චත්තාරො ච පටිපන්නා චත්තාරො ච ඵලෙ ඨිතා, එස සඞ්ඝො උජුභූතො පඤ්ඤාසීලසමාහිතො
752. යජමානානං මනුස්සානං පුඤ්ඤපෙක්ඛාන පාණිනං, කරොතං ඔපධිකං පුඤ්ඤං සඞ්ඝෙ දින්නං මහප්ඵලං
753. එසො හි සඞ්ඝො විපුලො මහග්ගතො එසප්පමෙය්යො උදධීව සාගරො එතෙහි සෙට්ඨා නරවීරසාවකා පභඞ්කරා ධම්මමුදීරයන්ති
754. තෙසං සුදින්නං සුහුතං සුයිට්ඨං යෙ සඞ්ඝමුද්දිස්ස දදන්ති දානං සා දක්ඛිණා සඞ්ඝගතා පතිට්ඨිතා පහප්ඵලා ලොකවිදූන වණ්ණිතා
755. එතාදිසං යඤ්ඤමනුස්සරන්තා යෙ වෙදජාතා විචරන්ති ලොකෙ විනෙය්ය මච්ඡෙරමලං සමූලං අනින්දිතා සග්ගමුපෙන්ති ඨානන්ති