325. පතීසු ධම්මං පචරාම සබ්බා පතිබ්බතා යත්ථ භවන්ති ඉත්ථියො පතීසු ධම්මා පචරිත්ථ සබ්බා ලච්ඡාමසෙ භාසති යං අයං ලතා.
326. සීහො යථා පබ්බතසානු ගොචරො මහින්ධරං පබ්බතමාවසිත්වා පසය්හ හන්ත්වා ඉතරෙ චතුප්පදෙ ඛුද්දෙ මිගෙ ඛාදති මංසභොජනො.
327. තථෙව සද්ධා ඉධ අරියසාවිකා භත්තාරං නිස්සාය පතිං අනුබ්බතා කොධං වධිත්වා අභිභුය්හ මච්ඡරං සග්ගම්හි සා මොදති ධම්මචාරිනීති.
ලතාවිමානං.
3. 5.
328. සත්තතන්තිං සුමධුරං රාමණෙය්යං අවාචයිං, සො මං රඞ්ගම්හි අව්හෙති සරණං මෙ හොති කොසියාති.
329. අහං තෙ සරණං හොමි අහමාචරියපූජකො, න තං ජයිස්සති සිස්සො සිස්සමාචරිය ජෙස්සසීති.
330. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
331. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
332. පුච්ඡාමි තං දෙවි මහානුභාවෙ, මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
333. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
334. වත්ථුත්තමදායිකා නාරී පවරා හොති නරෙසු නාරීසු එවං පියරූපදායිකා මනාපං දිබ්බං සා ලභතෙ උපෙච්ච ඨානං.
335. තස්සා මෙ පස්ස විමානං අච්ඡරා කාමවණ්ණිනීහමස්මි අච්ඡරා සහස්සස්සාහං{1} පවරා පස්ස පුඤ්ඤානං{2} විපාකං.
336. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
337. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
(යථා ච එත්ථ එවං උපරි සබ්බවිමානෙසු විත්ථාරෙතබ්බං.)
338-341. අභික්කන්තෙන වණ්ණෙන -පෙ- වණ්ණො ච තෙ සබ්බදිසා පභාසතීති.
342. පුප්ඵුත්තමදායිකා නාරී පවරා හොති නරෙසු නාරීසු එවං පියරූපදායිකා මනාපං දිබ්බං සා ලභතෙ උපෙච්ච ඨානං
343. තස්සා මෙ පස්ස විමානං අච්ඡරා කාමවණ්ණිනීහමස්මි අච්ඡරා සහස්සස්සාහං පවරා පස්ස පුඤ්ඤානං විපාකං.
344-349. තෙන මෙ තාදිසො වණ්ණො -පෙ- වණ්ණො ච මෙ සබ්බදිසා පභාසතී’ති.
350-373. ගන්ධුත්තමදායිකා නාරී පවරා හොති නරෙසු නාරීසු -පෙ- එලුත්තමදායිකා නාරී -පෙ- රසුත්තමදායිකා නාරී -පෙ-
374-381. ගන්ධපඤ්චඞ්ගුලිකං අහමදාසිං කස්සපස්ස භගවතො ථූපස්මිං{1} -පෙ- තස්සා මම පස්ස විමානං -පෙ- වණ්ණො ච මෙ සබ්බදිසා පභාසතී’ති.
382-389. භික්ඛූ චහං භික්ඛුනියො ච අද්දසාසිං පන්ථපටිපන්නෙ තෙසාහං ධම්මං සුත්වාන එකූපොසථං උපවසිස්සං තස්සා මෙ පස්ස විමානං -පෙ- වණ්ණො ච මෙ සබ්බදිසා පභාසතී’ති.
390-397. උදකෙ ඨිතා උදකමදාසිං භික්ඛුනො චිත්තෙන විප්පසන්නෙන තස්සා මෙ පස්ස විමානං -පෙ- වණ්ණො ච මෙ සබ්බදිසා පභාසතී’ති.
398-405. සස්සුඤ්චා’හං සසුරඤ්ච චණ්ඩිකෙ කොධනෙ ච ඵරුසෙ ච අනුස්සූයිකා සූපට්ඨාසිං අප්පමත්තා සකෙන සීලෙන -පෙ-
406-413. පරකම්මකරී{2} ආසිං අත්ථෙනාතන්දිතා දාසී අක්කොධනා අනතිමානී{3} සංවිභාගිනී සකස්ස භාගස්ස -පෙ-
414-421. ඛීරොදනං අහමදාසිං භික්ඛුනො පිණ්ඩාය චරන්තස්ස එවං කරිත්වා කම්මං සුගතිං උප්පජ්ජ මොදාමි -පෙ-
422-609. ඵාණිතං අහමදාසිං -පෙ- උච්ඡුඛණ්ඩකං අහමදාසිං -පෙ- තිම්බරූසකං අහමදාසිං -පෙ- කක්කාරිකං අහමදාසිං -පෙ- එළාලුකං අහමදාසිං -පෙ- වල්ලීඵලං අහමදාසිං -පෙ- ඵාරුසකං අහමදාසිං -පෙ- හත්ථප්පතාපකං අහමදාසිං -පෙ- සාකමුට්ඨිං අහමදාසිං -පෙ- පුප්ඵකමුට්ඨිං අහමදාසිං -පෙ- මූලකං අහමදාසිං -පෙ- නිම්බමුට්ඨිං අහමදාසිං -පෙ- අම්බකඤ්ජිකං අහමදාසිං -පෙ- දොණිනිම්මජ්ජනිං අහමදාසිං -පෙ- කායබන්ධනං අහමදාසිං -පෙ- අංසවට්ටකං අහමදාසිං -පෙ- ආයොගපට්ටං අහමදාසිං -පෙ- විධූපනං අහමදාසිං -පෙ- තාලවණ්ටං අහමදාසිං -පෙ- මොරහත්ථං අහමදාසිං -පෙ- ඡත්තං අහමදාසිං -පෙ- උපාහනං අහමදාසිං -පෙ- පූවං අහමදාසිං -පෙ- මොදකං අහමදාසිං -පෙ-
610. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
611. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
612. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
613. සා දෙවතා අත්තමනා මොග්ගල්ලානෙන පුච්ඡිතා පඤ්හං පුට්ඨා වියාකාසි යස්ස කම්මස්සිදං ඵලං.
614. සක්ඛලිං අහමදාසිං භික්ඛුනො පිණ්ඩාය චරන්තස්ස එවං කරිත්වා කම්මං සුගතිං උපපජ්ජ මොදාමි.
615. තස්සා මෙ පස්ස විමානං අච්ඡරා කාමවණ්ණිනීහමස්මි අච්ඡරා සහස්සස්සාහං පවරා පස්ස පුඤ්ඤානං විපාකං.
616. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
617. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
618. ස්වාගතං වත මෙ අජ්ජ සුප්පභාතං සුවුට්ඨිතං{1} යං අද්දසං{2} දෙවතායො අච්ඡරා කාමවණ්ණියො
619. ඉමාහං{3} ධම්මං සුත්වා{4} කාහාමි කුසලං බහුං දානෙන සමචරීයායං සඤ්ඤමෙන දමෙන ච ස්වාහං තත්ථ ගමිස්සාමි{5} යත්ථ ගන්ත්වා න සොචරෙති.
ගුත්තිල විමානං පඤ්චමං.
3. 6.
620. දද්දල්ලමානා වණ්ණෙන යස්සා ච යසස්සිනී, සබ්බෙ දෙවෙ තාවතිංසෙ වණ්ණෙන අතිරොචසි.
621. දස්සනං නාභිජානාමි ඉදං පඨමදස්සනං, කස්මා කායා නු ආගම්ම නාමෙන භාසසෙ මමන්ති.
622. අහං භද්දෙ සුභද්දාසිං පුබ්බෙ මානුසකෙ භවෙ, සහ භරියා ච තෙ ආසිං භගිනී ච කණිට්ඨිකා.
623. සා අහං කායස්ස භෙදා විප්පමුත්තා තතොචුතා, නිම්මානරතීනං දෙවානං උපපන්නා සහව්යතන්ති.
624. පහූතකතකල්යාණා තෙ දෙවෙ යන්ති පාණිනො, යෙසං ත්වං කිත්තයිස්සසි සුභද්දෙ ජාතිමත්තනො.
625. කථං{6} ත්වං කෙන වණ්ණෙන කෙන වා අනුසාසිතා, කීදිසෙනෙව දානෙන සුබ්බතෙන යසස්සිනී.
626. යසං එතාදිසං පත්තා විසෙසං විපුලමජ්ඣගා, දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
627. අට්ඨෙව පිණ්ඩපාතානි යං දානං අද්දං පුරෙ, දක්ඛිණෙය්යස්ස සඞ්ඝස්ස පසන්නා සෙහි පාණිහි.
628. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
629. අක්ඛාමි තෙ දෙවි මහානුභාවෙ මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
630. අහං තයා බහුතරෙ භික්ඛූ සඤ්ඤතෙ බ්රහ්මචාරිනො{1} කප්පෙසිං අන්නපානෙන පසන්නා සෙහි පාණිහි තයා බහුතරං දත්වා හීනකායූපගා අහං{2}
631. කථං ත්වං අප්පතරං දත්වා විසෙසං විපුලමජ්ඣගා, දෙවතෙ පුච්ඡිතාචික්ඛ යස්සකම්මස්සිදං ඵලන්ති.
632. මනොභාවනීයො භික්ඛු සන්දිට්ඨො මෙ පුරෙ අහු, තාහං භත්තෙන නිමන්තෙසිං රෙවතං අත්තනට්ඨමං.
633. සො මෙ අත්ථපුරෙක්ඛාරො අනුකම්පාය රෙවතො, සඞ්ඝෙ දෙහීති මං අවොච{3} තස්සාහං වචනං කරිං.
634. සා දක්ඛිණා සඞ්ඝගතා අප්පමෙය්යෙ පතිට්ඨිතා, පුග්ගලෙසු තයා දින්නං න තං තව මහප්ඵලන්ති.
635. ඉදානෙවාහං ජානාමි සඞ්ඝෙ දින්නං මහප්ඵලං සාහං ගන්ත්වා මනුස්සත්තං වදඤ්ඤූ වීතමච්ඡරා සඞ්ඝෙ දානානි දස්සාමි{4} අප්පමත්තා පුනප්පුනන්ති.
636. කා එසා දෙවතා භද්දෙ තයා මන්තයතෙ සහ, සබ්බෙ දෙවෙ තාවතිංසෙ වණ්ණෙන අතිරොචතීති.
637. මනුස්සභූතා දෙවින්ද පුබ්බෙ මානුසකෙ භවෙ සහභරියා ච මෙ ආසි භගිනී ච කනිට්ඨිකා සඞ්ඝෙ දානානි දත්වාන කතපුඤ්ඤා විරොචතීති.
638. ධම්මෙන පුබ්බෙ භගිනී තයා භද්දෙ විරොචති, යං සඞ්ඝස්මිං අප්පමෙය්යෙ පතිට්ඨාපෙසි දක්ඛිණං.
639. පුච්ඡිතො හි මයා බුද්ධො ගිජ්ඣකූටම්හි පබ්බතෙ, විපාකං සංවිභාගස්ස යත්ථ දින්නං මහප්ඵලං.
640. යජමානානං මනුස්සානං පුඤ්ඤපෙක්ඛාන පාණිනං, කරොතං ඔපධිකං පුඤ්ඤං යත්ථ දින්නං මහප්ඵලං.
641. තං මෙ බුද්ධො වියාකාසි ජානං කම්මඵලං සකං, විපාකං සංවිභාගස්ස යත්ථ දින්නං මහප්ඵලං.
642. චත්තාරො ච පටිපන්නා චත්තාරො ච ඵලෙ ඨිතා, එස සඞ්ඝෙ උජුභූතො පඤ්ඤාසීලසමාහිතො.
643. යජමානානං මනුස්සානං පුඤ්ඤපෙක්ඛාන පාණිනං, කරොතං ඔපධිකං පුඤ්ඤං සඞ්ඝෙ දින්නං මහප්ඵලං.
644. එසො හි සඞ්ඝො විපුලො මහග්ගතො එසප්පමෙය්යො උදධීව සාගරො එතෙහි සෙට්ඨා නරවීරසාවකා පභඞ්කරා ධම්මමුදීරයන්ති{1}.
645. තෙසං සුදින්නං සුහුතං සුයිට්ඨං, යෙ සඞ්ඝමුද්දිස්ස දදන්ති දානං සා දක්ඛිණා සඞ්ඝගතා පතිට්ඨිතා මහප්ඵලා ලොකවිදූහි වණ්ණිතා.
646. එතාදිසං යඤ්ඤමනුස්සරන්තා{2} යෙ වෙදජාතා විචරන්ති ලොකෙ විනෙය්ය මච්ඡෙරමලං සමූලං අනින්දිතා සග්ගමුපෙන්තී ඨානන්ති.
දද්දල්ල විමානං.
3. 7.
647. ඵලිකරජතහෙමජාලච්ඡන්නං විවිධවිචිත්රතලමද්දසං සුරම්මං ව්යම්හං සුනිම්මිතං තොරණූපපන්නං රුචකුපකිණ්ණමිදං සුභං විමානං.
648. භාති ච දසදිසා නභෙව සුරියො සරදෙ තමොනුදො සහස්සරංසි තථා තපතිමිදං තව විමානං ජලමිව ධූමසිඛො නිසෙ නභග්ගෙ.
649. මුසතීව නයනං සතෙරතාව{1} ආකාසෙ ඨපිතමිදං මනුඤ්ඤං වීණාමුරජසම්මතාලඝුට්ඨං ඉද්ධං ඉන්දපුරං තථා තවෙදං.
650. පදුම කුමුදුප්පල කුවලයං යූධික{2} බන්ධුකනොජකා ච සන්ති සාලකුසුමිත පුප්ඵිතා අසොකා විවිධ දුමග්ග සුගන්ධ සෙවිතමිදං.
651. සළල ලබුජ භුජක{3} සඤ්ඤතා{4} කුසකසුඵුල්ලිත ලතාවලම්බිනීහි මණිජාල සදිසා යසස්සිනී රම්මා පොක්ඛරණී උපට්ඨිතා තෙ.
652. උදකරුහා ච යෙත්ථි පුප්ඵජාතා ථලජා යෙ ච සන්ති රුක්ඛජාතා මානුසකාමානුසකා ච දිබ්බා සබ්බෙ තුය්හං නිවෙසනම්හි ජාතා.
653. කිස්ස සංයමදමස්සයං{5} විපාකො කෙනාසි කම්මඵලෙනිධූපපන්නා යථා ච තෙ අධිගතමිදං විමානං තදනුපදං අවචාසු’ළාරපඛුමෙති.{6}
654. යථා ච මෙ අධිගතමිදං විමානං කොඤ්චමයූරචකොර සඞ්ඝචරිතං දිබ්බපිලවහංසරාජචිණ්ණං ද්විජකාරණ්ඩව කොකිලාභිනදිතං.
655. නානා සන්තානක පුප්ඵරුක්ඛවිවිධා පාටලි ජම්බු අසොක රුක්ඛවන්තං යථා ච මෙ අධිගතමිදං විමානං තන්තෙ පවදිස්සාමි{7} සුණොහි භන්තෙ.
656. මගධවරපුරත්ථිමෙන නාළකගාමො නාම අත්ථි භන්තෙ තත්ථ අහොසිං පුරෙ සුණිසා සෙසවතී{8} තත්ථ ජානිංසු මමං.
657. සාහං අපචිතත්ථධම්මකුසලං දෙවමනුස්සපූජිතං මහන්තං උපතිස්සං නිබ්බුතං අප්පමෙය්යං මුදීතමනා කුසුමෙහි අබ්භොකිරිං{1}.
658. පරමගතිගතඤ්ච පූජයිත්වා අන්තිමදෙහධරං ඉසිං උළාරං, පහාය මානුසකං සමුසස්යං තිදසගතා ඉධමාවසාමි ඨානන්ති.
සෙසවතී විමානං.
3. 8.
659. පීතවත්ථෙ පීතධජෙ පීතාලඞ්කාරභූසිතෙ, පීතන්තරාහි වග්ගුහි අපිළන්ධාව සොභසි.
660. කා කම්බුකෙයූරධරෙ{2} කඤ්චනාවෙළභූසිතෙ, හෙමජාලක පච්ඡන්නෙ{3} නානාරතනමාලිනි.
661. සොවණ්ණමයා ලොහිතඞ්කමයා ච{4} මුත්තාමයා වෙළුරියමයා ච මසාරගල්ලා සහ ලොහිතඞ්කා පාරාවතක්ඛීහි{5} මණීහි චිත්තිතා.
662. කොචි කොචි එත්ථ මයූරසුස්සරො හංසස්සරඤ්ඤො කරවීකසුස්සරො තෙසං සරො සූයති වග්ගුරූපො පඤ්චඞ්ගිකං තුරියමිවප්පවාදිතං.
663. රථො ච තෙ සුභො වග්ගු නානාරතනචිත්තිතො{6} නානාවණ්ණාභි ධාතූහි සුචිභත්තො ච සොභති.
664. තස්මිං රථෙ කඤ්චනබිම්බවණ්ණෙ යා ත්වං ඨිතා{7} භාසසිමං පදෙසං දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
665. සොවණ්ණජාලං මණිසොණ්ණචිත්තිතං{1} මුත්තාචිතං හෙමජාලෙන ඡන්නං{2} පරිනිබ්බුතෙ ගොතමෙ අප්පමෙය්යෙ පසන්නචිත්තා අහමාභිරොපයිං.
666. තාහං කම්මං කරිත්වාන කුසලං බුද්ධවණ්ණිතං, අපෙතසොකා සුඛිතා සම්පමොදාමනාමයා’ති.
මල්ලිකා විමානං.
3. 9.
667. කා නාම ත්වං විසාලක්ඛි රම්මෙ චිත්තලතාවනෙ, සමන්තා අනුපරියාසි නාරීගණපුරක්ඛතා.{3}
668. යදා දෙවා තාවතිංසා පවිසන්ති ඉමං වනං, සයොග්ගා සරථා සබ්බෙ චිත්රා හොන්තී ඉධාගතා.
669. තුය්හඤ්ච ඉධ පත්තාය උය්යානෙ විචරන්තියා, කායෙ න දිස්සති චිත්තං කෙනරූපං තවෙදිසං දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
670. යෙන කම්මෙන දෙවින්ද රූපං මය්හං ගතී ච මෙ, ඉද්ධි ච අනුභාවො ච තං සුණොහි පුරීන්දද.
671. අහං රාජගහෙ රම්මෙ සුනන්දානාමුපාසිකා, සද්ධා සීලෙන සම්පන්නා සංවිභාගරතා සදා.
672. අච්ඡාදනඤ්ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා.
673. චාතුද්දසිං පඤ්චදසිං යාච පක්ඛස්ස අට්ඨමී, පාටිහාරිය පක්ඛඤ්ච අට්ඨඞ්ගසුසමාගතං.