158. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
159. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
160. අහං මනුස්සෙසු මනුස්සභූතා දාසී අහොසිං පරපෙස්සියා කුලෙ උපාසිකා චක්ඛුමතො ගොතමස්ස යසස්සිනො තස්සා මෙ නික්ඛමො ආසි සාසනෙ තස්ස තාදිනො.
161. කාමං භිජ්ජතු’යං කායො නෙව අත්ථෙත්ථ සන්ථනං{1} සික්ඛාපදානං පඤ්චන්නං මග්ගො සොවත්ථිකො සිවො. 162. අකණ්ටකො අගහනො උජු සබ්භි පවෙදිතො නික්ඛමස්ස ඵලං පස්ස යථිදං පාපුණිත්ථිකා.
163. ආමන්තනිකා රඤ්ඤොම්හි සක්කස්ස වසවත්තිනො සට්ඨිතුරියසහස්සානි පටිබොධං කරොන්ති මෙ.
164. ආලම්බො ගග්ගරො{2} භීමො සාධුවාදී ච සංසයො, පොක්ඛරො ච සුඵස්සො ච වීණාමොක්ඛා ච නාරියො.
165. නන්දා චෙව සුනන්දා ච සොණදින්නා සුචිම්හිතා{3} අලම්බුසා මිස්සකෙසී ච පුණ්ඩරීකාතිදාරුණී.
166. එණිඵස්සා සුඵස්සා ච සුභද්දා මුදුවාදිනී, එතා චඤ්ඤා ච සෙය්යසා{4} අච්ඡරානං පබොධිකා.
167. කාමං කාලෙනුපාගන්ත්වා අභිභාසන්ති දෙවතා, හන්ද නච්චාම ගායාම හන්ද තං රමයාමසෙ.
168. නයිදං අකතපුඤ්ඤානං කතපුඤ්ඤානමෙවිදං අසොකං නන්දානං රම්මං තිදසානං මහාවනං.
169. සුඛං අකතපුඤ්ඤානං ඉධ නත්ථි පරත්ථ ච, සුඛඤ්චෙ කතපුඤ්ඤානං ඉධ චෙව පරත්ථ ච.
170. තෙසං සහව්යකාමානං කත්තබ්බං කුසලං බහුං කතපුඤ්ඤා හි මොදන්ති සග්ගෙ භොසසමඞ්ගිනොති.
දාසීවිමානං.
2. 2.
171. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරාකා.
172. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
173. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
174. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
175. කෙවට්ටද්වාරා නික්ඛම්ම අහු මය්හං නිවෙසනං, තත්ථ සඤ්චරමානානං සාවකානං මහෙසිනං.
176. ඔදනං කුම්මාසං සාකං{1} ලොණසොවීරකඤ්චහං, අදාසිං උජුභූතෙසු විප්පසන්නෙන චෙතසා.
177. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං
178. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං
179. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා
180. පඤ්චසික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො
181. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
182. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
මම ච භන්තෙ වචනෙන භගවතො පාදෙ සිරසා වන්දෙය්යාසි, ලඛුමා නාම භන්තෙ උපාසිකා භගවතො පාදෙ සිරසා වන්දතීති. අනච්ඡරියං ඛො පනෙතං භන්තෙ යං මං භගවා අඤ්ඤතරස්මිං සාමඤ්ඤඵලෙ ව්යාකරෙය්ය තං භගවා සකදාගාමිඵලෙ ව්යාකාසීති.
ලඛුමාවිමානං.
2. 3.
183. පිණ්ඩාය තෙ චරන්තස්ස තුණ්හීභූතස්ස තිට්ඨතො, දළිද්දා කපණා නාරී පරාගාරං අවස්සිතා{1}
184. යා තෙ අදාසි ආචාමං පසන්නා සෙහි පාණිහි, සා හිත්වා මානුසං දෙහං කන්නු සා දිසතං ගතා
185. පිණ්ඩාය මෙ චරන්තස්ස තුණ්හීභූතස්ස තිට්ඨතො, දළිද්දා කපණා නාරී පරාගාරං අවස්සිතා
186. යා මෙ අදාසි ආචාමං පසන්නා සෙහි පාණිහි, සා හිත්වා මානුසං දෙහං විප්පමුත්තා ඉතො චුතා
187. නිම්මාණරතිනො නාම සන්ති දෙවා මහිද්ධිකා, තත්ථ සා සුඛිතා නාරී මොදතාචාමදායිකාති
188. අභො දානං වරාකියා කස්සපෙ සුපතිට්ඨිතං, පරාභතෙන දානෙන ඉජ්ඣිත්ථ වත දක්ඛිණා
189. යා මහෙසිත්තං කාරෙය්ය චක්කවත්තිස්ස රාජිනො නාරී සබ්බඞ්ගකල්යාණී භත්තු චානොමදස්සිකා එතස්සාචාමදානස්ස කලං නාග්ඝති සොළසිං.
190. සතං නික්ඛා සතං අස්සා සතං අස්සතරීරථා සතං කඤ්ඤා සහස්සානි ආමුත්තමණිකුණ්ඩලා එතස්සාචාමදානස්ස කලං නාග්ඝන්ති සොළසිං
191. සතං හෙමවතා නාගා ඊසා දන්තා උරූළ්හවා සුවණ්ණකච්ඡා මාතඞ්ගා හෙමකප්පනවාසසා{1} එතස්සාචාමදානස්ස කලං නාග්ඝන්ති සොළසිං
192. චතුන්නම්පි{2}ච දීපානං ඉස්සරං යොධ කාරයෙ, එතස්සාචාමදානස්ස කලං නාග්ඝති සොළසින්ති
ආචාමදායිකාවිමානං.
2. 4.
193. චණ්ඩාලී වන්ද පාදානි ගොතමස්ස යසස්සිනො, තවෙව{3} අනුකම්පාය අට්ඨාසි ඉසිසත්තමො{4}
194. අභිප්පසාදෙහි මනං අරහත්තම්හි තාදිනී{5}, ඛිප්පං පඤ්ජලිකා වන්ද පරිත්තං තව ජීවිතන්ති
195. චොදිතා භාවිතත්තෙන සරීරන්තිමධාරිනා, චණ්ඩාලී වන්දි පාදානි ගොතමස්ස යසස්සිනො
196. තමෙනමවධී ගාවී චණ්ඩාලිං පඤ්ජලිං ඨිතං, නමස්සමානං සම්බුද්ධං අන්ධකාරෙ පභඞ්කරන්ති
197. ඛීණාසවං විගතරජං අනෙජං එකං අරඤ්ඤම්හි රහො නිසින්නං දෙවිද්ධිපත්තා උපසඞ්කමිත්වා වන්දාමි තං වීර මහානුභාවාති{6}
198. සුවණ්ණවණ්ණා ජලිතා මහායසා විමානමොරුය්හ අනෙකචිත්තා පරිවාරිතා අච්ඡරානං ගණෙන{7} කා ත්වං සුභෙ දෙවතෙ වන්දසෙ මමන්ති.
199. අහං භදන්තෙ{1} චණ්ඩාලී තයා වීරෙන පෙසිතා, වන්දිං අරහතො පාදෙ ගොතමස්ස යසස්සිනො
200. සාහං වන්දිත්ව{2} පාදානි චුතා චණ්ඩාලයොනියා, විමානං සබ්බතො භද්දං උපපන්නම්භි නන්දනං{3}
201. අච්ඡරානං සතසහස්සං පුරක්ඛත්වාන{4} තිට්ඨති, තාසාහං පවරා සෙට්ඨා වණ්ණෙන යස්සා යුතා.
202. පහූතකතකල්යාණා සම්පජානා පතිස්සතා, මුනිං කාරුණිකං ලොකෙ තං භන්තෙ වන්දිතුමාගතාති.
203. ඉදං වත්වාන චණ්ඩාලී කතඤ්ඤූ කතවෙදිනී, වන්දිත්වා අරහතො පාදෙ තත්ථෙවන්තරධායථාති.{5}
චණ්ඩාලීවිමානං.
2. 5.
204. නීලා පීතා ච කාළා ච මඤ්ජෙට්ඨා{6} අථ ලොහිතා, උච්චාවචානං වණ්ණානං කිඤ්ජක්ඛපරිවාරිතා.
205. මන්දාරවානං පුප්ඵානං මාලං ධාරෙසි මුද්ධනි, නයිමෙ අඤ්ඤෙසු කායෙසු රුක්ඛා සන්ති සුමෙධසෙ.
206. කෙන කායං උපපන්නා තාවතිංසං යසස්සිනී, දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති
207. භද්දිත්ථිති{7} මං අඤ්ඤිංසු කිම්බිලායං උපාසිකා, සද්ධා සීලෙන සම්පන්නා සංවිභාගරතා සදා.
208. අච්ඡාදනඤ්ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා
209. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං.
210. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං.
211. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
212. පඤ්ච සික්ඛාපදෙ රතා අරියසච්චාන කොවිදා, උපාසිකා චක්ඛුමතො අප්පමාදවිහාරිණී.
213. භික්ඛු චහං පරමහිතානුකම්පකෙ අභොජයං තපස්සියුගං මහාමුනිං කතාවාසා කතකුසලා තතො චුතා සයංපභා අනුවිචරාමි නන්දනං.
214. අට්ඨඞ්ගිකං අපරිමිතං සුඛාවහං උපොසථං සත්තමුපාවසිං අහං කතාවාසා කතකුසලා තතො චුතා සයංපභා අනුවිචරාමි නන්දනන්ති.
භද්දිත්ථිවිමානං.
2. 6.
215. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
216. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
217. කෙන ත්වං විමලොභාසා අතිරොචසි දෙවතෙ, කෙන තෙ සබ්බගත්තෙහි සබ්බා ඔභාසරෙ දිසා.
218. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති.
219. {*}සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්සකම්මස්සිදං ඵලං.
220. සොණදින්නාති මං අඤ්ඤිංසු{1} නාලන්දායං උපාසිකා, සද්ධා සීලෙන සම්පන්නා සංවිභාගරතා සදා.
221. අච්ඡාදනඤ්ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා
222. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරිය පක්ඛඤ්ච අට්ඨඞ්ගසුසමාගතං.
223. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං.
224. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
225. පඤ්චසික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
226. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
227. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතී’ති.
සොණදින්නා විමානං.
2. 7.
228. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
229. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
230. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’ති.
231. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
232. උපොසථාති මං අඤ්ඤිංසු සාකෙතායං උපාසිකා, සද්ධා සීලෙන සම්පන්නා සංවිභාගරතා සදා.
233. අච්ඡාදනං ච භත්තඤ්ච සෙනාසනං පදීපියං, අදාසිං උජුභූතෙසු විප්පසන්නෙන චෙතසා.
234. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං.
235. උපොසථං උපවසිස්සං සදා සීලෙසු සංවුතා, සඤ්ඤමා සංවිභාගා ච විමානං ආවසාමහං.
236. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
237. පඤ්ච සික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
238. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
239. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
240. අභික්ඛණං නන්දනං සුත්වා ඡන්දො මෙ උදපජ්ජථ{1} තත්ථ චිත්තං පණිධාය උපපන්නම්හි නන්දනං.
241. නාකාසිං සන්ථුවචනං බුද්ධස්සාදිච්චබන්ධුනො, හීනෙ චිත්තං පණිධාය සාම්හි පච්ඡානුතාපිනීති.
242. කීව චිරං විමානස්මිං ඉධ වච්ඡසුපොසථෙ, දෙවතෙ පුච්ඡිතාචික්ඛ යදි ජානාසි ආයුනොති.
243. සට්ඨිවස්සසහස්සානි තිස්සො ච වස්සකොටියො ඉධ ඨත්වා මහාමුනි ඉතො චුතා ගමිස්සාමි මනුස්සානං සහව්යතන්ති.
244. මා ත්වං උපොසථෙ භායි සම්බුද්ධෙනාපි ව්යාකතා සොතාපන්නා විසෙසයි පහීනා තව දුග්ගතීති.
උපොසථා විමානං.