1012. සුජාතො නාමහං භත්තෙ රාජපුත්තො පුරෙ අහුං, ත්වඤ්ච මං අනුකම්පාය සඤ්ඤමස්මිං නිවෙසයි.
1013. ඛීණායුකඤ්ච මං ඤත්වා සරීරං පාදාසි සත්ථුනො, ඉමං සුජාත පූජෙහි තං තෙ අත්ථාය හෙහිති.
1014. තාහං ගන්ධෙහි මාලෙහි පූජයිත්වා සමුය්යුතො, පහාය මානුසං දෙහං උපපන්නොම්හි නන්දනං.
1015. නන්දනොපවනෙ{1} රම්මෙ නානාදිජගණායුතෙ, රමාමි නච්චගීතෙහි අච්ඡරාහි පුරක්ඛතොති.
චූළරථවිමානං.
5. 14.
1016. සහස්සයුත්තං හයවාහනං සුභං ආරුය්හි මං සන්දනං නෙකචිත්තං උය්යානභූමිං අභිතො අනුක්කමං පුරින්දදො භූතපතීව වාසවො
1017. සොවණ්ණමයා තෙ රථකුබ්බරා උභො ථලෙහි{2} අංසෙහි අතීව සඞ්ගතා{3} සුජාතගුම්බා නරවීර නිට්ඨිතා විරොචති පණ්ණරසෙව චන්දො.
1018. සුවණ්ණජාලාවතතො{4} රථො අයං බහූහි නා නා රතනෙහි චිත්තිතො සුනන්දිඝොසො ච සුභස්සරො ච විරොචති චාමරහත්ථ බාහුහි
1019. ඉමා ච නාභ්යො මනසාභිනිම්මිතා රථස්ස පාදන්තර මජ්ඣභූසිතා ඉමා ච නාභ්යො{5} සතරාජි චිත්තිතො සතෙරතා විජ්ජුරිවප්පභාසරෙ
1020. අනෙකචිත්තාවතතො රථො අයං පුථූ ච නෙමී ච සහස්සරංසිකො තෙසං සරො සූයති{1} වග්ගුරූපො පඤ්චඞ්ගිකං තුරියමිවප්පවාදිතං
1021. සිරස්මිං චිත්තං මණිචන්දකප්පිතං සදා විසුද්ධං රුචිරං පභස්සරං සුවණ්ණරාජීහි අතීව සඞ්ගතං වෙළුරියරාජීව අතීව සොභති
1022. ඉමෙ ච වාළී මණිචන්දකප්පිතා ආරොහකම්බූ සුජවා බහූපමා බ්රහා මහන්තා බලිනො මහාජවා මනො තවඤ්ඤාය තථෙව සිංසරෙ
1023. ඉමෙ ච සබ්බෙ සහිතා චතුක්කමා මනො තවඤ්ඤාය තථෙව සිංසරෙ සමං වහන්ති මුදුකා අනුද්ධතා අමොදමානා තුරගානමුත්තමා
1024. ධුනන්ති වග්ගන්ති පතන්ති{2} චම්බරෙ අබ්භුද්ධුනන්තා සුකතෙ පිළන්ධනෙ තෙසං සරො සූයති වග්ගුරූපො පඤ්චඞ්ගිකං තුරියමිවප්පවාදිතං
1025. රථස්ස ඝොසො අපිළන්ධනාන ච{3} ඛුරස්ස නාදො අභිහිංසනාය{4} ච ඝොසො සුවග්ගු සමිතස්ස සූයති ගන්ධබ්බතුරියානි විචිත්රසංවනෙ{5}
1026. රථෙ ඨිතා තා මිගමන්දලොචනා ආළාරපම්හා හසිතා පියංවදා වෙළුරියජාලාවතතා තනුච්ඡවා සදෙව ගන්ධබ්බ සුරග්ගපූජිතා
1027. තා රත්තරත්තම්බර පීතවාසසා විසාලනෙත්තා අභිරත්තලොචනා කුලෙ සුජාතා සුතනු සුචිම්හිතා රථෙ ඨිතා පඤ්ජලිකා උපට්ඨිතා
1028. තා කම්බුකෙයූරධරා සුවාසසා සුමජ්ඣිමා ඌරුථනූපපන්නා වට්ටඞ්ගුලියො සුමුඛා සුදස්සනා රථෙ ඨිතා පඤ්ජලිකා උපට්ඨිතා
1029. අඤ්ඤා සුවෙණී සුසු මිස්සකෙසියො සමං විභත්තාහි පභස්සරාහි ච අනුබ්බතා තා තව මානසෙ රතා රථෙ ඨිතා පඤ්ජලිකා උපට්ඨිතා
1030. ආවෙළිනියො පදුමුප්පලච්ඡදා අලඞ්කතා චන්දනසාරවාසිතා{1} අනුබ්බතා තා තව මානසෙ රතා රථෙ ඨිතා පඤ්ජලිකා උපට්ඨිතා
1031. තා මාලිනියො පදුමුප්පලච්ඡදා අලඞ්කතා චන්දනසාරවාසිතා අනුබ්බතා තා තව මානසෙ රතා රථෙ ඨිතා පඤ්ජලිකා උපට්ඨිතා
1032. කණ්ඨෙසු තෙ යානි පිළන්ධනානි හත්ථෙසු පාදෙසු තථෙව සීසෙ ඔහාසයන්තී දස සබ්බසො දිසා අබ්භුද්දයං සාරදිකොව භානුමා
1033. වාතස්ස වෙගෙන ච සම්පකම්පිතා භුජෙසු මාලා අපිළන්ධනානි ච මුඤ්චන්ති ඝොසං රුචිරං සුචිං සුභං සබ්බෙහි විඤ්ඤූහි සුතබ්බරූපං
1034. උය්යානභූම්යා ච දුවද්ධතො{2} ඨිතා රථා ච නාගා තුරියානි චස්සරො තමෙව දෙවින්ද පමොදයන්ති වීණා යථා පොක්ඛරපත්තබාහුහි
1035. ඉමාසු වීණාසු බහූසු වග්ගුසු මනුඤ්ඤරූපාසු හදයෙරිතං පති{3} පවජ්ජමානාසු අතීව අච්ඡරා භමන්ති කඤ්ඤා පදුමෙසු සික්ඛිතා
1036. යදා ච ගීතානි ච වාදිතානි ච නච්චානි චෙමානි{1} සමෙන්ති එකතො අථෙත්ථ නච්චන්ති අථෙත්ථ අච්ඡරා ඔභාසයන්තී උභතො වරිත්ථියො
1037. සො මොදසි තුරියගණප්පබොධනො මහීයමානො වජිරාවුධොරිව{2} ඉමාසු වීණාසු බහුසූ වග්ගුසු මනුඤ්ඤරූපාසු හදයෙරිතං පති
1038. කිං ත්වං පුරෙ කම්මමකාසි අත්තනා මනුස්සභූතො පුරිමාය ජාතියා උපොසථං කං{3}වා තුවං උපාවසි කං ධම්මචරියං වතමාභිරොචයි{4}
1039. නයිදං අප්පස්ස{5} කතස්ස කම්මුනො පුබ්බෙ සුචිණ්ණස්ස උපොසථස්ස වා ඉද්ධානුභාවො විපුලො අයං තව යං දෙවසඞ්ඝං අභිරොචසෙ භුසං
1040. දානස්ස තෙ ඉදං ඵලං අථො සීලස්ස වා පන, අථො අඤ්ජලිකම්මස්ස තං මෙ අක්ඛාහි පුච්ඡිතොති
1041. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං
1042. ජිතින්ද්රියං බුද්ධමනොමනික්කමං නරුත්තමං කස්සපමග්ගපුග්ගලං අවාපුරං තං අමතස්ස ද්වාරං දෙවාතිදෙවං සතපුඤ්ඤලක්ඛණං
1043. තමද්දසං කුඤ්ජරමොඝතිණ්ණං සුවණ්ණසිඞ්ගීනදඛීම්බසාදිසං දිස්වාන තං ඛිප්පමහුං සුචීමනො තමෙව දිස්වාන සුභාසිතද්ධජං
1044. තම්භන්නපානං{6} අථවාපි චීවරං සුචිං පණීතං රසසා උපෙතං පුප්ඵාභිකිණ්ණම්හි සකෙ නිවෙසනෙ පතිට්ඨපෙසිං ස අසඞ්ගමානසො
1045. තමන්නපානෙන ච චීවරෙන ච ඛජ්ජෙන භොජ්ජෙන ච සායනෙන ච සත්තප්පයිත්වා ද්විපදානමුත්තමං සො සග්ගසො දෙවපුරෙ රමාමහං
1046. එතෙනුපායෙන ඉමං නිරග්ගළං යඤ්ඤං යජිත්වා තිවිධං විසුද්ධං පහායහං මානුසකං සමුස්සයං ඉන්දූපමො{1} දෙවපුරෙ රමාමහං
1047. ආයුඤ්ච වණ්ණඤ්ච සුඛං බලඤ්ච පණීතරූපං අභිකඞ්ඛතා මුනි අන්නඤ්ච පානඤ්ච බහුං සුසඞ්ඛතං පතිට්ඨපෙතබ්බමසඞ්ගමානසෙ
1048. නයිමස්මිං ලොකෙ පරස්මිං{2} වා පන බුද්ධෙන සෙට්ඨොව සමොව විජ්ජති ආහුනෙය්යතං පරමාහුතිං ගතො පුඤ්ඤත්ථිකානං විපුලඵලෙ ඨිතන්ති
මහාරථවිමානං.
මහාරථවග්ගො පඤ්චමො.
තස්සුද්දානං:
මණ්ඩුකො රෙවතී ඡත්තො කක්කටො ද්වාරපාලකො ද්වෙ කරණීයා ද්වෙ සූචි තයො නාගා ච ද්වෙ රථා පුරිසානං පඨමො වග්ගො පවුච්චතී ති.
භාණවාරො තතියො.
6. පායාසිවග්ගො
6. 1.
1049. යථා වනං චිත්තලතං පභාසති උය්යානසෙට්ඨං තිදසානමුත්තමං තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1050. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1051. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදංඵලන්ති
1052. අහඤ්ච භරියා ච මනුස්සලොකෙ ඔපානභූතා ඝරමාවසිම්භ අන්නඤ්ච පානඤ්ච පසන්නචිත්තා සක්කච්ච දානං විපුලං අදම්හ
1053. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1054. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
අගාරියවිමානං.
6. 2.
1055. යථා වනං චිත්තලතං පභාසති උය්යානසෙට්ඨං තිදසානමුත්තමං තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1056. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසති
1057. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1058. අහඤ්ච භරියා ච මනුස්සලොකෙ ඔපානභූතා ඝරමාවසිම්හ අන්නඤ්ච පානඤ්ච පසන්නචිත්තා සක්කච්ච දානං විපුලං අදම්හ
1059. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1060. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
දුතියඅගාරියවිමානං.
6. 3.
1061. උච්චමිදං මණිථූණං විමානං සමන්තතො සොළස යොජනානි කූටාගාරා සත්තසතා උළාරා වෙළුරියත්ථම්හා රුචකත්ථතා සුභා
1062. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං අට්ඨට්ඨකා සික්ඛිතා සාධුරූපා දිබ්බා ච කඤ්ඤා තිදසචරා උළාරා නච්චන්ති ගායන්ති පමොදයන්තී
1063. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1064. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1065. ඵලදායී ඵලං විපුලං ලභති දදමුජ්ජුගතෙසු{1} පසන්නමානසො සො හි මොදති{2} සග්ගගතො තිදිවෙ අනුභොති ච පුඤ්ඤඵලං විපුලං තථෙවාහං{3} මහාමුනි අදාසිං චතුරො ඵලෙ
1066. තස්මාහි ඵලං අලමෙව දාතුං නිච්චං මනුස්සෙන සුඛත්ථිකෙන දිබ්බානි වා පත්ථයතා සුඛානි මනුස්සසොභග්ගතමිච්ඡතා වා
1067. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
1068. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
ඵලදායකවිමානං
6. 4.
1069. චන්දො යථා විගතවලාහකෙ නභෙ ඔභාසයං ගච්ඡති අන්තළික්ඛෙ තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1070. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1071. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1072. අහඤ්ච භරියා ච මනුස්සලොකෙ උපස්සයං අරහතො අදම්හ අන්නඤ්ච පානඤ්ච පසන්නචිත්තා සක්කච්ච දානං විපුලං අදම්හ
1073. තෙන මෙ තාදිසො වණ්ණො තෙන මෙ ඉධමිජ්ඣති උප්පජ්ජන්ති ච මෙ භොගා යෙ කෙචි මනසො පියා
1074. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
පඨමඋපස්සයදායකවිමානං.
6. 5.
1075. සුරියො යථා විගතවලාහකෙ නභෙ ඔභාසයං ගච්ඡති අන්තළික්ඛෙ තථූපමං තුය්හමිදං විමානං ඔභාසයං තිට්ඨති අන්තළික්ඛෙ
1076. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1077. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1078. අහඤ්ච භරියා ච මනුස්සලොකෙ උපස්සයං අරහතො අදම්හ අන්නඤ්ච පානඤ්ච පසන්නචිත්තා සක්කච්ච දානං විපුලං අදම්හ
1079. තෙන මෙ තාදිසො වණ්ණො තෙන මෙ ඉධමිජ්ඣති උප්පජ්ජන්ති ච මෙ භොගා යෙ කෙචි මනසො පියා
1080. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
දුතිය උපස්සයදායකවිමානං.
6. 6.
1081. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා සුභා වෙළුරියත්ථම්භා රුචකත්ථතා සුභා
1082. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1083. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති
1084. අහං මනුස්සෙසු මනුස්සභූතො දිස්වාන භික්ඛුං තසිතං කිලන්තං එකාහං භික්ඛුං පටිපාදයිස්සං සමඞ්ගිභත්තෙන තදා අකාසිං
1085. තෙන මෙ තාදිසො වණ්ණො තෙන මෙ ඉධමිජ්ඣති උප්පජ්ජන්ති ච මෙ භොගා යෙ කෙචි මනසො පියා
1086. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති
භික්ඛාදායකවිමානං.
6. 7.
1087. උච්චමිදං මණිථූණං විමානං සමන්තතො සොළස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා
1088. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං අට්ඨට්ඨකා සික්ඛිතා සාධුරූපා දිබ්බා ච කඤ්ඤා තිදසචරා උළාරා නච්චන්ති ගායන්ති පමොදයන්ති
1089. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති
1090. සො දෙවපුත්තා අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං