843. සො මං මුදූහි වාචාහි ආලපිත්වා තථාගතො, රජ්ජුමාලෙති මං අවොච{7} සරණං ගච්ඡ තථාගතං.
844. තාහං ගිරං සුණිත්වාන නෙලං අත්ථවතිං සුචිං, සණ්හං මුදුං ච වග්ගුං ච සබ්බසොකා පනූදනං.
845. කල්ලචිත්තං ච මං ඤත්වා පසන්නං සුද්ධමානසං, හිතො සබ්බස්ස ලොකස්ස අනුසාසි තථාගතො.
846. ඉදං දුක්ඛන්ති මං අවොච අයං දුක්ඛස්ස සම්භවො, අයං නිරොධො{8} මග්ගො ච අඤ්ජසො අමතොගධො.
847. අනුකම්පකස්ස කුසලස්ස ඔවාදම්හි අහං ඨිතා, අජ්ඣගා අමතං සන්තිං නිබ්බාන{9} පදමච්චුතං.
848. සාහං අවට්ඨිතා පෙමා දස්සනෙ අවිකම්පිනී, මූලජාතාය සද්ධාය ධීතා බුද්ධස්ස ඔරසා.
849. සාහං රමාමි කීළාමි මොදාමි අකුකොභයා, දිබ්බං මාලං ධාරයාමි පිවාමි මධුමද්දවං.
850. සට්ඨිං තුරියසහස්සානි{1} පටිබොධං කරොන්ති මෙ, ආළම්බො ගග්ගරො භීමො සාධුවාදී ච සංසයො.
851. පොක්ඛරො ච සුඵස්සොච වීණා මොක්ඛා ච නාරියො, නන්දා චෙව සුනන්දා ච සොණදින්නා සුවිම්හිතා.
852. අලම්බුසා මිස්සකෙසී ච පුණ්ඩරීකාතිචාරුණී,{2} එණිඵස්සා සුඵස්සා ච සුභද්දා{3} මුදුවාදිනී.
853. එතා චඤ්ඤා ච සෙය්යසා අච්ඡරානං පබොධිකා, තා මං කාලෙනුපාගන්ත්වා අභිභාසන්ති දෙවතා.
854. හන්ද නච්චාම ගායාම හන්ද තං රමයාමසෙ නයිදං අකතපුඤ්ඤානං කතපුඤ්ඤානමෙවිදං අසොකං නන්දනං රම්මං තිදසානං මහාවනං
855. සුඛං අකතපුඤ්ඤානං ඉධ නත්ථි පරත්ථ ච, සුඛං ච කතපුඤ්ඤානං ඉධ චෙව පරත්ථ ච.
856. තෙසං සහව්යකාමානං කත්තබ්බං කුසලං බහුං, කතපුඤ්ඤා හි මොදන්ති සග්ගෙ භොගසමඞ්ගිනො.
857. බහුන්නං වත අත්ථාය උප්පජ්ජන්ති තථාගතා දක්ඛිණෙය්යා මනුස්සානං පුඤ්ඤක්ඛෙත්තානමාකරා යත්ථ කාරං කරිත්වාන සග්ගෙ මොදන්ති දායකාති.
රජ්ජුමාලා විමානං.
මඤ්ජෙට්ඨක වග්ගො චතුත්ථො.
තස්සුද්දානං:
මඤ්ජෙට්ඨා පභස්සරා නාගා අලොමා කඤ්ජිකදායිකා විහාරචතුරිත්ථම්බා පීතුච්ඡු වන්දනරජ්ජුමාලා වග්ගො තෙන පවුච්චතීති.
ඉත්ථිවිමානං සමත්තං.
5. මහාරථවග්ගො
5. 1.
858. කො මෙ වන්දති පාදානි ඉද්ධියා යසසා ජලං, අභික්කන්තෙන වණ්ණෙන සබ්බා ඔභාසයං දිසාති.
859. මණ්ඩුකොහං පුරෙ ආසිං උදකෙ වාරිගොචරො, තව ධම්මං සුණන්තස්ස අවධී වච්ඡපාලකො.
860. මුහුත්තං චිත්තප්පසාදස්ස ඉද්ධිං පස්ස යසඤ්ච මෙ, අනුභාවං ච මෙ පස්ස වණ්ණං පස්ස ජුතිඤ්ච මෙ.
861. යෙ ච තෙ දීඝමද්ධානං ධම්මං අස්සොසුං ගොතම, පත්තා තෙ අචලට්ඨානං යත්ථ ගන්ත්වා න සොචරෙති.
මණ්ඩූකදෙවපුත්තවිමානං.
5. 2.
862. චිරප්පවාසිං පුරිසං දූරතො සොත්ථිමාගතං, ඤාතිමිත්තා සුහජ්ජා ච අභිනන්දන්ති ආගතං.
863. තථෙව කතපුඤ්ඤම්පි අස්මා ලොකා පරං ගතං, පුඤ්ඤානි පතිගණ්හන්ති පියං ඤාතිං ව{1} ආගතන්ති.
864. උට්ඨෙහි රෙවතෙ සුපාපධම්මෙ අපාරුතං ද්වාරං{2} අදානසීලෙ නෙස්සාම තං යත්ථ ථුනන්ති දුග්ගතා සමජ්ජතා{3} නෙරයිකා දුඛෙන.
865. ඉච්වෙච{4} වත්වාන යමස්ස දූතා තෙ ද්වෙ යක්ඛා ලොහිතක්ඛා බ්රහන්තා පච්චෙකබාහාසු ගහෙත්වාන රෙවතං පක්කාමයුං දෙවගණස්ස සන්තිකෙති.
866. ආදිච්චවණ්ණං රුචිරං පභස්සරං ව්යම්හං සුභං කඤ්චනජාලඡන්නං කස්සෙතමාකිණ්ණජනං විමානං සුරියස්ස රංසීරිව ජොතමානං
867. නාරීගණා චන්දනසාරලිත්තං{5} උභතො විමානං උපසොභයන්ති තං දිස්සති සුරියසමානවණ්ණං කො මොදති සග්ගප්පත්තො විමානෙති.
868. බාරාණසියං නන්දියො නාමාසි උපාසකො අමච්ඡරී දානපතී වදඤ්ඤූ තස්සෙතමාකිණ්ණජනං විමානං සුරියස්ස රංසීරිව ජොතමානං.
869. නාරීගණා චන්දනසාරලිත්තා උභතො විමානං උපසොභයන්තී තං දිස්සති සුරියසමානවණ්ණං සො මොදති සග්ගප්පත්තො විමානෙති.
870. නන්දියස්සාහං භරියා අගාරිනී සබ්බකුලස්ස ඉස්සරා භත්තුවිමානෙ රමිස්සාමි දානහං න පත්ථයෙ නිරයං දස්සනායාති.
871. එසො තෙ නිරයො සුපාපධම්මෙ පුඤ්ඤං තයා අකතං ජීවලොකෙ න හි මච්ඡරී රොසකො පාපධම්මො සග්ගූපගානං ලභති සහව්යතන්ති.
872. කින්නු ගූථඤ්ච මුත්තඤ්ච අසුචි{1} පතිදිස්සති, දුග්ගන්ධං කිමිදං මීළ්හං කිමෙතං උපවායතීති.
873. එස සංසවකො නාම ගම්භීරො සතපොරිසො, යත්ථ වස්සසහස්සානි තුවං පච්චසි රෙවතෙති.
874. කින්නු කායෙන වාචාය මනසා දුක්කතං කතං. කෙන සංසවකො ලද්ධො ගම්භීරො සතපොරිසොති.
875. සමණෙ බ්රාහ්මණෙචාපි අඤ්ඤෙවාපි වණිබ්බකෙ, මුසාවාදෙන වඤ්චෙසි තං පාපං පකතං තයා.
876. තෙන සංසවකො ලද්ධො ගම්භීරො සතපොරිසො, තත්ථ වස්සසහස්සානි තුවං පච්චසි රෙවතෙ.
877. හත්ථෙපි ඡින්දන්ති අථොපි පාදෙ කණ්ණෙපි ඡින්දන්ති අථොපි තාසං අථොපි කාකොළගණා සමෙච්ච සඞ්ගම්ම ඛාදන්ති විඵන්දමානන්ති.
878. සාධු ඛො මං පටිනෙථ කාහාමි කුසලං බහුං දානෙන සමචරියාය සඤ්ඤමෙන දමෙන ච යං කත්වා සුඛිතා හොන්ති න ච පච්ඡානුතප්පරෙති.
879. පුරෙ තුවං පමජ්ජිත්වා ඉදානි පරිදෙවසි, සයං කතානං කම්මානං විපාකං අනුභොස්සසීති.
880. කො දෙවලොකතො මනුස්සලොකං, ගන්ත්වාන පුට්ඨො මෙ එවං වදෙය්ය නික්ඛිත්තදණ්ඩෙසු දදාථ දානං අච්ඡාදනං සයන{1}මථන්නපානං න හි මච්ඡරී රොසකො පාපධම්මො සග්ගූපගානං ලභති සහව්යතං.
881. සාහං නූන ඉතො ගන්ත්වා යොනිං ලද්ධාන මානුසිං වදඤ්ඤූ සීලසම්පන්නා කාහාමි කුසලං බහුං දානෙන සමචරියාය සඤ්ඤමෙන දමෙන ච.
882. ආරාමානි ච රොපිස්සං දුග්ගෙ සඞ්කමනානි ච, පපඤ්ච උදපානඤ්ච විප්පසන්නෙන චෙතසා.
883. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං.
884. උපොසථං උපවසිස්සං සදා සීලෙසු සංවුතා, න ච දානෙ පමජ්ජීස්සං සාමං දිට්ඨමිදං මයාති.
885. ඉච්චෙවං විප්පලපන්තිං ඵන්දමානං තතො තතො, ඛිපිංසු නිරයෙ ඝොරෙ උද්ධපාදං අවංසිරන්ති.
886. අහං පුරෙ මච්ඡරිනී අහොසිං පරිභාසිකා සමණබ්රාහ්මණානං විතථෙන ච සාමිකං වඤ්චයිත්වා පච්චාමහං නිරයෙ ඝොරරූපෙති.
රෙවතීවිමානං.
5. 3.
887. යො වදතං පවරො මනුජෙසු සක්යමුනී භගවා කතකිච්චො පාරගතො බලවිරියසමඞ්ගී තං සුගතං සරණත්ථමුපෙහි.
888. රාගවිරාගමනෙජමසොකං ධම්මමසඞ්ඛතමප්පටිකූලං මධුරමිමං පගුණං සුවිභත්තං ධම්මමිමං සරණත්ථමුපෙහි
889. යත්ථ ච දින්නමහප්ඵලමාහු චතුසු සුචීසු පුරිසයුගෙසු අට්ඨ ච පුග්ගල ධම්මදසා තෙ සඞ්ඝමිමං සරණත්ථමුපෙහීති.
890. න තථා තපති නභස්මිං{1} සුරියො චන්දො ච න භාසති න ඵුස්සො යථා අතුලමිදං මහප්පභාසං කො නු ත්වං තිදිවා මහිං උපගා.
891. ඡින්දති ච{2} රංසි පභඞ්කරස්ස සාධිකං{3} වීසති යොජනානි ආභා රත්තිම්පි ච යථා දිවං කරොති පරිසුද්ධං විමලං සුභං විමානං.
892. බහු පදුම විචිත්ත පුණ්ඩරීකං වොකිණ්ණං කුසුමෙහි නෙකචිත්තං අරජවිරජහෙමජාලච්ඡන්නං ආකාසෙ තපති යථාපි සුරියො.
893. රත්තම්බරපීතවාසසාහි අගරුපියඞ්ගුචන්දනුස්සදාහි කඤ්චනතනුසන්නිභත්තචාහි පරිපූරං ගගනංව තාරකාහි
894. නරනාරියො බහුකෙත්ථනෙකවණ්ණා කුසුමවිභූසිතා භරණෙත්ථ සුමනා අනිලපමුඤ්චිකා පවන්ති සුරභිං තපනීයවිතතා සුවණ්ණනච්ඡදනා{4}.
895. කිස්ස සමදමස්ස{5} අයං විපාකො කෙනාසි කම්මඵලෙනිධූපපන්නො යථා ච තෙ අධිගතමිදං විමානං තදනුපදං අවචාසි ඉඞ්ඝ පුට්ඨොති
896. යමිධපථෙ{6} සමෙච්ච මාණවෙන සත්ථානුසාසි අනුකම්පමානො තව රතනවරස්ස ධම්මං සුත්වා කරිස්සාමීති ච බ්රවිත්ථ ඡත්තො.
897. ජිනවරපවරං{1} උපෙහි{2} සරණං ධම්මඤ්චාපි තථෙව භික්ඛුසඞ්ඝං නොති පඨමං අවොචාහං{3} භන්තෙ පච්ඡා තෙ වචනං තථෙවකාසිං.
898. මා ච පාණවධං විවිධං චරස්සු අසුචිං න හි පාණෙසු අසඤ්ඤතං අවණ්ණයිංසු සප්පඤ්ඤා නොති පඨමං අවොචාහං භන්තෙ පච්ඡා තෙ වචනං තථෙවකාසිං.
899. මා ච පරජනස්ස රක්ඛිතම්පි ආදාතබ්බමමඤ්ඤිත්ථ{4} අදින්නං නොති පඨමං අවොචාහං භන්තෙ පච්ඡා තෙ වචනං තථෙවකාසිං.
900. මා ච පරජනස්ස රක්ඛිතායො පරිභරියා අගමා අනරියමෙතං නොති පඨමං අවොචාහං භන්තෙ පච්ඡා තෙ වචනං තථෙවකාසිං.
901. මා ච විතථං අඤ්ඤථා අභාණී නහි මුසාවාදං අවණ්ණයිංසු සප්පඤ්ඤා නොති පඨමං අවොචාහං භන්තෙ පච්ඡා තෙ වචනං තථෙවකාසිං.
902. යෙන ච පුරියස්ස අපෙති සඤ්ඤා තං මජ්ජං පරිවජ්ජයස්සු සබ්බං නො ච පඨමං අවොචාහං භන්තෙ පච්ඡා තෙ වචනං තථෙවකාසිං.
903. සාහං ඉධ පඤ්චසික්ඛා කරිත්වා පටිපජ්ජිත්වා තථාගතස්ස ධම්මෙ ද්වෙපථමගමාසිං චොරමජ්ඣෙ තෙ මං තත්ථ වධිංසු භොගහෙතු.
904. එත්තකමිදං අනුස්සරාමි කුසලං තතො පරං න මෙ විජ්ජති අඤ්ඤං තෙන සුචරිතෙන කම්මුනාහං උප්පන්නො{5} තිදිවෙසු කාමකාමී.
905. පස්ස ඛණමුහුත්තං සඤ්ඤමස්ස අනුධම්මපටිපත්තියා විපාකං ජලමිව යසසා සමෙක්ඛමානා බහුකා මං පිහයන්ති හීනකම්මා.
906. පස්ස කතිපයාය දෙසනාය සුගතිං චම්හි ගතො සුඛඤ්ච පත්තො යෙ ච තෙ සතතං සුණන්ති ධම්මං මඤ්ඤෙ තෙ අමතං ඵුසන්ති ඛෙමං
907. අප්පම්පි{1} කතං මහාවිපාකං විපුලං හොති තථාගතස්ස ධම්මෙ පස්ස කතපුඤ්ඤතාය ඡත්තො ඔභාසෙති පඨවිං යථාපි සුරියො
908. කිමිදං කුසලං කිමාචරෙම ඉච්වෙකෙහි සමෙච්ච මන්තයන්ති තෙ මයං පුනරෙව ලද්ධමානුසත්තං පටිපන්නා විහරෙමු සීලවන්තො.
909. බහුකාරො මනුකම්පකො ච සත්ථා ඉති මෙ සති අගමා දිවාදිවස්ස ස්වාහං උපගතොම්හි සච්චනාමං අනුකම්පස්සු පුනපි සුණොම{2} ධම්මං
910. යෙ චිධ{3} පජහන්ති කාමරාගං භවරාගානුසයං පහාය මොහං න ච තෙ පුන උපෙන්ති{4} ගබ්භසෙය්යං පරිනිබ්බානගතා හි සීතිභූතාති.
ඡත්තමාණවකවිමානං.
5. 4.
911. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්හා රුචකත්ථතා{5} සුභා.
912. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡන්නා.
913. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
914. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
915. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං.
916. සතිං සමුප්පාදකරො{1} ද්වාරෙ කක්කටකො ඨිතො, නිට්ඨිතො ජාතරූපස්ස සොභති දසපාදකො.
917. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
918. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
කක්කටකරසදායකවිමානං.
5. 5.
919. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා.
920. තත්ථච්ඡසි පිවසි ඛාදසිච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡන්නා.
921. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
922. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
923. සො දෙවපුත්තා අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං.
924. දිබ්බං මමං වස්සසහස්සමායු වාචාභිගීතං මනසා පවත්තිතං එත්තාවතා ඨස්සති පුඤ්ඤකම්මො දිබ්බෙහි කාමෙහි සමඞ්ගිභූතො.
925. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
926. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
ද්වාරපාලකවිමානං.