81. යො අන්ධකාරම්හි තිමීසිකායං පදීපකාලම්හි දදාති දීපං, උප්පජ්ජති ජොතිරසං විමානං පහූතමාල්යං බහුපුණ්ඩරීකං.
82. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
83. තෙනාහං විමලොභාසා අතිරොචාමි දෙවතා, තෙන මෙ සබ්බගත්තෙහි සබ්බා ඔභාසරෙ දිසා.
84. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
දීපවිමානං.
1. 10.
85. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
86. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
87. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
88. සා දෙවතා අත්තමනා මොග්ගල්ලානෙන පුච්ඡිතා. පඤ්හං පුට්ඨා වියාකාසි යස්ස කම්මස්සිදං ඵලං.
89. අහං මනුස්සෙසු මනුස්සභූතා පුරිමාය ජාතියා මනුස්සලොකෙ. අද්දසං විරජං බුද්ධං විප්පසන්නමනාවිලං
90. ආසජ්ජ දානං අදාසිං අකාමා තිලදක්ඛිණං දක්ඛිණෙය්යස්ස බුද්ධස්ස පසන්නා සෙහි පාණිහි.
91. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
92. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං, තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
තිලදක්ඛිණාවිමානං.
1. 11.
93. කොඤ්චා මයූරා දිවියා ච හංසා වග්ගුස්සරා කොකිලා සම්පතන්ති, පුප්ඵාභිකිණ්ණං රම්මමිදං විමානං අනෙකචිත්තං නරනාරිසෙවිතං.
94. තත්ථච්ඡසි දෙවි මහානුභාවෙ ඉද්ධි{1} විකුබ්බන්තී අනෙකරූපා, ඉමා ච තෙ අච්ඡරායො සමන්තතො නච්චන්ති ගායන්ති පමොදයන්ති{2}.
95. දෙවිද්ධිපත්තාසි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
96. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
97. අහං මනුස්සෙසු මනුස්සභූතා පතිබ්බතා නාඤ්ඤමනා{3} අහොසිං, මාතාව පුත්තං අනුරක්ඛමානා කුද්ධාපහං{4} නප්ඵරුසං අවොචං.
98. සච්චෙ ඨිතා මොසවජ්ජං පහාය දානෙ රතා සඞ්ගහිතත්තභාවා, අන්නං ච පානං ච පසන්නචිත්තා සක්කච්ච දානං විපුලං අදාසිං.
99. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
100. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
පතිබ්බතාවිමානං.
1. 12.
101. වෙළුරීයත්ථම්භං රුචිරං පභස්සරං විමානමාරුය්හ අනෙකචිත්තං තත්ථච්ඡසි දෙවි මහානුභාවෙ උච්චාවචා ඉද්ධිවිකුබ්බමානා ඉමා ච තෙ අච්ඡරායො සමන්තතො නච්චන්ති ගායන්ති පමොදයන්ති{1}
102. දෙවිද්ධිපත්තාසි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති
103. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං
104. අහං මනුස්සෙසු මනුස්සභූතා උපාසිකා චක්ඛුමතො අහොසිං පාණාතිපාතා විරතා අහොසිං ලොකෙ අදින්නං පරිවජ්ජයිස්සං
105. අමජ්ජපා නො ච{2} මුසා අභාසිං{3} සකෙන සාමිනාව{4} අහොසිං තුට්ඨා අන්නඤ්ච පානඤ්ච පසන්නචිත්තා සක්කච්ච දානං විපුලං අදාසිං
106. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා
107. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති
දුතිය පතිබ්බතාවිමානං.
1. 13.
108. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
109. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
110. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
111. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
112. අහං මනුස්සෙසු මනුස්සභූතා සුණිසා අහොසිං සසුරස්ස ගෙහෙ{1} අද්දසං විරජං භික්ඛුං විප්පසන්නමනාවිලං
113. තස්ස අදාසහං පූවං පසන්නා සෙහි පාණිහි භාගඩ්ඪභාගං දත්වාන මොදාමි නන්දනෙ වනෙ
114. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
115. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
සුණිසාවිමානං.
1. 14.
116. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
117. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
118. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
119. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
120. අහං මනුස්සෙසු මනුස්සභූතා සුණිසා අහොසිං සසුරස්ස ගෙහෙ අද්දසං විරජං භික්ඛුං විප්පසන්නමනාවිලං
121. තස්ස අදාසහං භාගං පසන්නා සෙහි පාණිහි කුම්මාසපිණ්ඩං දත්වාන මොදාමි නන්දනෙ වනෙ.
122. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
123. අක්ඛාමි තෙ භික්ඛු මහානුභාව මනුස්සභූතා යමකාසි පුඤ්ඤං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
දුතිය සුණිසාවිමානං.
1. 15.
124. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
125. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
126. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
127. සා දෙවතා අත්තමනා මොග්ගල්ලානෙන පුච්ඡිතා, පඤ්හං පුට්ඨා වියාකාසි යස්ස කම්මස්සිදං ඵලං.
128. ඉස්සා ච මච්ඡෙරමථො පළාසො, නාහොසි මය්හං ඝරමාවසන්නියා අක්කොධනා භත්තුවසානුවත්තිනී උපොසථෙ නිච්චහමප්පමත්තා.
129. චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං
130. උපොසථං උපවසිස්සං සදා සීලෙසු සංවුතා, සංයමා සංවිභාගා ච විමානං ආවසාමහං{1}
131. පාණාතිපාතා විරතා මුසාවාදා ච සඤ්ඤතා, ථෙය්යා ච අතිචාරා ච මජ්ජපානා ච ආරකා.
132. පඤ්ච සික්ඛාපදෙ රතා අරියසච්චාන කොවිදා, උපාසිකා චක්ඛුමතො ගොතමස්ස යසස්සිනො.
133. සාහං සකෙන සීලෙන යසසා ච යසස්සිනී, අනුභොමි සකං පුඤ්ඤං සුඛිතා චම්හි අනාමයා.
134. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
135. අක්ඛාමි තෙ භික්ඛු මහානුභාව මනුස්සභූතා යමහං අකාසිං තෙනම්හි එවං ජලිතානුභාවා වණ්ණො ච මෙ සබ්බදිසා පභාසතීති.
මම ච භන්තෙ වචනෙන භගවතො පාදෙ සිරසා වන්දෙය්යාසි, උත්තරා නාම භන්තෙ උපාසිකා භගවතො පාදෙ සිරසා වන්දතීති අනච්ඡරියං ඛො පනෙතං භන්තෙ යං මං භගවා අඤ්ඤතරස්මිං සාමඤ්ඤඵලෙ ව්යාකරෙය්ය. තං භගවා සකදාගාමිඵලෙ වියාකාසීති.
උත්තරාවිමානං.
1. 16.
136. යුත්තා ච තෙ පරම අලඞ්කතා හයා අධොමුඛා අඝසිගමා බලී ජවා අභිනිම්මිතා පඤ්චරථා සතා ච තෙ අන්වෙන්ති තං සාරථිචොදිතා හයා.
137. සා තිට්ඨසි රථවරෙ අලඞ්කතා ඔභාසයං ජලමිව ජොතිපාවකො පුච්ඡාමි තං වරතනු{2} අනොමදස්සනෙ කස්මා නු කායා අනධිවරං උපාගමීති.
138. කාමග්ගපත්තානං යමාහුනුත්තරං{1} නිම්මාය නිම්මාය රමන්ති දෙවතා තස්මා කායා අච්ඡරා කාමවණ්ණිනී ඉධාගතා අනධිවරං නමස්සිතුන්ති.
139. කිං ත්වං පුරෙ සුචරිතමාචරීධ කෙනච්ඡසි ත්වං අමිතයසා සුඛෙධිතා ඉද්ධී ච තෙ අනධිවරා විහඞ්ගමා වණ්ණො ච තෙ දසදිසා විරොචති.
140. දෙවෙහි තං පරිවුතා සක්කතා චසි කුතො චුතා සුගතිගතාසි දෙවතෙ කස්ස වා ත්වං වචනකරානුසාසනිං ආචික්ඛ මෙ ත්වං යදි බුද්ධසාවිකාති.
141. නගන්තරෙ නගරවරෙ සුමාපිතෙ පරිචාරිකා රාජවරස්ස සිරීමතො නච්චෙ ගීතෙ පරමසුසික්ඛිතා අහුං සිරිමාති මං රාජගහෙ අවෙදිසුං.{2}
142. බුද්ධො ච මෙ ඉසිනිසභො විනායකො අදෙසයී සමුදයදුක්ඛනිච්චතං අසඞ්ඛතං දුක්ඛනිරොධසස්සතං මග්ගඤ්චිමං අකුටිලමඤ්ජසං සිවං.
143. සුත්වානහං අමතපදං අසඞ්ඛතං තථාගතස්සනධිවරස්ස සාසනං සීලෙස්වහං පරමසුසංවුතා අහුං ධම්මෙ ඨිතා නරවරබුද්ධභාසිතෙ.{3}
144. ඤත්වානහං විරජපදං අසඞ්ඛතං තථාගතෙන නධිවරෙන දෙසිතං තත්ථෙවහං සමථසමාධිමාඵුසිං සා යෙව මෙ පරමනියාමතා අහු.
145. ලද්ධානහං අමතවරං විසෙසනං එකංසිකා අභිසමයෙ විසෙසිය අසංසයා බහුජනපූජිතා අහං ඛිඩ්ඩාරතිං{4} පච්චනුභොමනප්පකං.
146. එවං අහං අමතදස්සම්හි දෙවතා තථාගතස්සනධිවරස්ස සාවිකා ධම්මද්දසා පඨමඵලෙ පතිට්ඨිතා සොතාපන්නා න ච පන මත්ථිදුග්ගති.
147. සා වන්දිතුං අනධිවරං උපාගමිං පාසාදිකෙ කුසලරථෙ ච භික්ඛවො නමස්සිතුං සමණසමාගමං සිවං සගාරවා සිරිමතො ධම්මරාජිනො.
148. දිස්වා මුනිං මුදිතමනම්හි පීණිතා තථාගතං නරවරදම්මසාරථිං තණ්හච්ඡිදං කුසලරතං විනායකං වන්දාමහං පරහිතානුකම්පකන්ති.
සිරිමාවිමානං.
1. 17.
149. ඉදං විමානං රුචිරං පභස්සරං වෙළුරියත්ථම්හං සතතං සුනිම්මිතං සොවණ්ණරුක්ඛෙහි{1} සමන්තමොත්ථතං ඨානං මමං කම්මවිපාකසම්භවං.
150. තත්රූපපන්නා පුරිමච්ඡරා ඉමා සතං සහස්සානි සකෙන කම්මුනා තුවංසි අජ්ඣුපගතා යසස්සිනී ඔභාසයං තිට්ඨසි පුබ්බදෙවතා.
151. සසී අධිග්ගය්හ යථා විරොචති නක්ඛත්තරාජාරිව තාරකාගණං තථෙව ත්වං අච්ඡරාසඞ්ගමං{2} ඉමං දද්දල්ලමානා යසසා විරොචසි.
152. කුතො නු ආගම්ම අනොමදස්සනෙ උප්පන්නා ත්වං භවනං මමං ඉදං බ්රහ්මංව දෙවා තිදසා සඉන්දකා සබ්බෙ න තප්පාමසෙ දස්සනෙන තන්ති.{3}
153. යමෙතං සක්ක අනුපුච්ඡසෙ මමං කුතො චුතා ත්වං ඉධ ආගතාති{4} බාරාණසී නාම පුරත්ථි කාසිනං තත්ථ පුරෙ අහොසිං කෙසකාරිකා.
154. බුද්ධෙ ච ධම්මෙ ච පසන්නමානසා සඞ්ඝෙ ච එකන්තගතා අසංසයා අඛණ්ඩසික්ඛාපදා ආගතප්ඵලා සම්බොධිධම්මෙ නියතා අනාමයාති.
155. තනත්යාභිනන්දමසෙ සාගතඤ්ච{1} තෙ ධම්මෙන ච ත්වං යස්සා විරොචසි බුද්ධෙ ච ධම්මෙ ච පසන්නමානසෙ සඞ්ඝෙ ච එකන්තගතෙ අසංසයෙ අඛණ්ඩ සික්ඛාපදෙ ආගතප්ඵලෙ සම්බොධිධම්මෙ නියතෙ අනාමයෙති.
කෙසකාරීවිමානං.
පීඨවග්ගො පඨමො.
තස්සුද්දානං:
පඤ්චපීඨා තයො නාවා දීපතිලදක්ඛිණා දුවෙ පති ද්වෙ සුණිසා උත්තරා සිරිමා කෙසකාරිකා වග්ගො තෙන පවුච්චතීති.
2. චිත්තලතාවග්ගො
2. 1.
156. අපි සක්කො’ව දෙවින්දො රම්මෙ චිත්තලතා වනෙ සමන්තා අනුප්පියාසි නාරීගණපුරක්ඛතා ඔභාසෙන්තී දිසා සබ්බා ඔසධී විය තාරකා.
157. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.