5. 6.
927. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා.
928. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡත්තා.
929. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
930. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
931. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්සකම්මස්සිදං ඵලං
932. කරණීයානි පුඤ්ඤානි පණ්ඩිතෙන විජානතා, සම්මග්ගතෙසු බුද්ධෙසු යත්ථ දින්නං මහප්ඵලං.
933. අත්ථාය වත මෙ බුද්ධො අරඤ්ඤා ගාමමාගතො, තත්ථ චිත්තං පසාදෙත්වා තාවතිසූපගො අහං{1}
934. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
935. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
කරණීයවිමානං.
5. 7.
936. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා.
937. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණඡත්තා.
938. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
939. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
940. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්සකම්මස්සිදං ඵලං.
941. කරණීයානි පුඤ්ඤානි පණ්ඩිතෙන විජානතා, සම්මග්ගතෙසු භික්ඛූසූ යත්ථ දින්නං මහප්ඵලං.
942. අත්ථාය වත මෙ භික්ඛු අරඤ්ඤා ගාමමාගතො, තත්ථ චිත්තං පසාදෙත්වා තාවතිංසොපගො අහං.
943. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
944. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
දුතියකරණීයවිමානං.
5. 8.
945. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා.
946. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණ ඡත්තා.
947. කෙන තෙ තාදිසො වණ්ණො කෙන තෙ ඉධමිජ්ඣති උප්පජ්ජන්ති ච තෙ භොගා යෙ කෙචි මනසො පියා.
948. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
949. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං.
950. යං දදාති න තං හොති යඤ්චෙව දජ්ජා තඤ්චෙව සෙය්යො සූචි දින්නා සූචිමෙව සෙය්යො.
951. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
952. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
සූචීවිමානං.
5. 9.
953. උච්චමිදං මණිථූණං විමානං සමන්තතො ද්වාදස යොජනානි කූටාගාරා සත්තසතා උළාරා වෙළුරියත්ථම්භා රුචකත්ථතා සුභා.
954. තත්ථච්ඡසි පිවසි ඛාදසි ච දිබ්බා ච වීණා පවදන්ති වග්ගුං දිබ්බා රසා කාමගුණෙත්ථ පඤ්ච නාරියො ච නච්චන්ති සුවණ්ණ ඡන්නා.
955. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
956. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
957. සො දෙවපුත්තො අත්තමනො මොග්ගල්ලානෙන පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලන්ති.
958. අහං මනුස්සෙසු මනුස්සභූතො. පුරිමාය ජාතියා මනුස්සලොකෙ.
959. අද්දසං විරජං භික්ඛුං විප්පසන්නමනාවිලං, තස්ස අදාසහං සූචිං පසන්නො සෙහි පාණිහි.
960. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
961. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
දුතියසූචිවිමානං.
5. 10.
962. සුසුක්කඛන්ධං අභිරුය්හං නාගං අකාචිතං දන්තිං බලිං මහාජවං අභිරුය්හ ගජවරං{1} සුකප්පිතං ඉධාගමා වෙහාසයමන්තළික්ඛෙ.
963. නාගස්ස දන්තෙසු දුවෙසු නිම්මිතා අච්ඡොදිකා{2} පදුමිනියො සුඵුල්ලා පදුමෙසු ච තුරියගණා පවජ්ජරෙ ඉමා ච නච්චන්ති මනොභරායො.
964. දෙවිද්ධිපත්තොසි මහානුභාවො මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
965. සො දෙවපුත්තො අත්තමනො මොග්ගල්ලානෙන පුච්ඡෙතා, පඤ්හං පුට්ඨො වියාකාසි යස්ස කම්මස්සිදං ඵලං.
966. අට්ඨෙව මුත්තපුප්ඵානි කස්සපස්ස මහෙසිනො{3} ථූපස්මිං අභිරොපෙසිං පසන්නො සෙහි පාණිහි.
967. තෙන මෙ තාදිසො වණ්ණො තෙන මෙ ඉධමිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
968. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
නාගවිමානං.
5. 11.
969. මහන්තං නාගං අභිරුය්හ සබ්බසෙතං ගජුත්තමං වනාවනං අනුපරියාසි නාරීගණපුරක්ඛතො ඔභාසෙන්තො දිසා සබ්බා ඔසධී විය තාරකා.
970. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
971. පුච්ඡාමි තං දෙව මහානුභාව මනුස්සභූතො කිමකාසි පුඤ්ඤං කෙනාසි එවං ජලිතානුභාවො වණ්ණො ච තෙ සබ්බදිසා පභාසතීති.
972. සො දෙවපුත්තො අත්තමනො වඞ්ගීසෙනෙව පුච්ඡිතො, පඤ්හං පුට්ඨො වියාකාසි යස්ස කම්මස්සිදං ඵලං.
973. අහං මනුස්සෙසු මනුස්සභූතො. උපාසකො චක්ඛුමතො අහොසිං පාණාතිපාතා විරතො අහොසිං ලොකෙ අදින්නං පරිවජ්ජයිස්සං.
974. අමජ්ජපො නො ච මුසා අභාණිං සකෙන දාරෙන ච තුට්ඨො අහොසිං. අන්නං ච පානං ච පසන්නචිත්තො සක්කච්ච දානං විපුලං අදාසිං.
975. තෙන මෙ තාදිසො වණ්ණො තෙන මෙ ඉධ මිජ්ඣති, උප්පජ්ජන්ති ච මෙ භොගා යෙ කෙචි මනසො පියා.
976. අක්ඛාමි තෙ භික්ඛු මහානුභාව මනුස්සභූතො යමකාසි පුඤ්ඤං තෙනම්හි එවං ජලිතානුභාවො වණ්ණො ච මෙ සබ්බදිසා පභාසතීති.
දුතියනාගවිමානං.
5. 12.
977. කොනු දිබ්බෙන යානෙන සබ්බසෙතෙන හත්ථිනා, තුරියතාළිත නිග්ඝොසො අන්තළික්ඛෙ මහීයති.
978. දෙවතානුසි ගන්ධබ්බො ආදු{1} සක්කො පුරින්දදො, අජානන්තා තං පුච්ඡාම කථං ජානෙමු තං මයන්ති.
979. නම්හි දෙවො න ගන්ධබ්බො නාපි සක්කො පුරින්දදො, සුධම්මා නාම යෙ දෙවා තෙසං අඤ්ඤතරො අහන්ති.
980. පුච්ඡාම දෙවං සුධම්මං{1} පුථුං කත්වාන අඤ්ජලිං, කිං කත්වා මානුසෙ කම්මං සුධම්මං උපපජ්ජතීති.
981. උච්ඡාගාරං තිණාගාරං වත්ථාගාරඤ්ච යො දදෙ, තිණ්ණමඤ්ඤතරං දත්වා සුධම්මං උපපජ්ජතීති.
තතියනාගවිමානං
5. 13.
982. දළ්හධම්මා නිසාරස්ස ධනුං ඔලුබ්භ තිට්ඨසි, ඛත්තියො නු සි රාජඤ්ඤො ආදු ලුද්දො වනෙ චරොති.{2}
983. අස්සකාධිපස්සාහං භන්තෙ පුත්තො වනෙ චරො, නාමං මෙ භික්ඛු තෙ බ්රූමි සුජාතො ඉති මං විදුං.{3}
984. මිගෙ ගවෙසමානොහං ඔගාහන්තො බ්රහාවනං, මිගං කඤ්චෙව{4} නාද්දක්ඛිං තඤ්ච දිස්වා ඨිතො අහන්ති.
985. ස්වාගතං තෙ මහාපුඤ්ඤ අථො තෙ අදුරාගතං, එත්තො උදකමාදාය පාදෙ පක්ඛාලයස්සු තෙ.
986. ඉදම්පි පානීයං සීතං ආභතං ගිරිගබ්භරා, රාජපුත්ත තතො පීත්වා සත්ථතස්මිං උපාවිසාති.
987. කල්යාණී වත තෙ වාචා සවණීයා මහාමුනි, නෙලා චත්ථවතී{5} වග්ගු මන්ත්වා{6} අත්ථංච භාසසෙ{7}
988. කා තෙ රති වනෙ විහරතො ඉසිනිසභ වදෙහි පුට්ඨො තව වචනපථං නිසාමයිත්වා අත්ථධම්මපදං සමාචරෙමසෙති.
989. අහිංසා සබ්බපාණිනං කුමාරම්හාක රුච්චති. ථෙය්යා ච අතිචාරාව මජ්ජපානා ච ආරති.
990. ආරති සමචරියා ච බාහුසච්චං කතඤ්ඤුතා, දිට්ඨෙව ධම්මෙ පාසංසා ධම්මා එතෙ පසංසියාති.
991. සන්තිකෙ මරණං තුය්හං ඔරං මාසෙහි පඤ්චහි, රාජපුත්ත විජානාහි අත්තානං පරිමොචයාති.
992. කතමං ස්වාහං ජනපදං ගන්ත්වා කිං කම්මං කිඤ්ච පොරිසං, කාය වා පන විජ්ජාය භවෙය්යං අජරාමරොති.
993. න විජ්ජතෙ සො පදෙසො කම්මං විජ්ජාච පොරිසං, යත්ථ ගන්ත්වා භවෙ මච්චො රාජපුත්තාජරාමරො.
994. මහද්ධනා මහාභොගා රට්ඨවන්තොපි ඛත්තියා, පහූතධනධඤ්ඤාසෙ න තෙපි අජරාමරා.{1}
995. යදි තෙ සුතා අන්ධක වෙණ්හුපුත්තා,{2} සූරා වීරා වික්කත්තප්පහාරිනො. තෙපි ආයුක්ඛයං පත්තා විද්ධස්තා සස්සතීසමා.
996. ඛත්තියා බ්රාහ්මණා වෙස්සා සුද්දා චණ්ඩාලපුක්කුසා, යෙ කෙචඤ්ඤෙ ච ජාතියා තෙපිනො අජරාමරා.
997. යෙ මන්තං පරිවත්තෙන්ති ඡළඞ්ගං බ්රහ්මචින්තිතං, එතෙ චඤ්ඤෙ ච විජ්ජාය තෙපි නො අජරාමරා.
998. ඉසයො චාපි යෙ සත්තා සඤ්ඤතත්තා තපස්සිනො, සරීරං තෙපි කාලෙන විජහන්ති තපස්සිනො.
999. භාවිතත්තාපි අරහත්තො කතකිච්චා අනාසවා, නික්ඛිපන්ති ඉමං දෙහං පුඤ්ඤපාපපරික්ඛයාති.
1000. සුභාසිතා අත්ථවතී ගාථායො තෙ මහාමුනි, නිජ්ඣත්තොම්හි{3} සුභට්ඨෙන ත්වඤ්ච මෙ සරණං භවාති.
1001. මා මං ත්වං සරණං ගච්ඡ තමෙව සරණං වජ, සක්යපුත්තං මහාවීරං යමහං සරණං ගතොති.
1002. කතරස්මිං සො ජනපදෙ සත්ථා තුම්හාක මාරිස, අහම්පි දට්ඨුං ගච්ඡිස්සං ජිනං අප්පටිපුග්ගලන්ති.
1003. පුරත්ථිමස්මිං ජනපදෙ ඔක්කාකකුලසම්භවො. තත්ථාසි පුරිසාජඤ්ඤො සො ච ඛො පරිනිබ්බුතොති.
1004. සචෙ හි බුද්ධො තිට්ඨෙය්ය සත්ථා තුම්හාක මාරිස, යොජනානි සහස්සානි ගච්ඡෙය්යං{1} පයිරුපාසිතුං.
1005. යතො ච ඛො{2} පරිනිබ්බුතො සත්ථා තුම්හාක මාරිස, නිබ්බුතම්පි{3} මහාවීරං ගච්ඡාමි සරණං අහං.
1006. උපෙමි සරණං බුද්ධං ධම්මඤ්චාපි අනුත්තරං, සඞ්ඝඤ්ච නරදෙවස්ස ගච්ඡාමි සරණං අහං.
1007. පාණාතිපාතා විරමාමි ඛිප්පං ලොකෙ අදින්නං පරිවජ්ජයාමි අමජ්ජපො නොච මුසා භණාමී සකෙන දාරෙන ච හොමි තුට්ඨොති
1008. සහස්සරංසීව යථා මහප්පභො දිසං යථාභාති නභෙ අනුක්කමං තථප්පකාරො{4} තවයං{5} මහාරථො. සමන්තතො යොජනසත්තමායතො.
1009. සුවණ්ණපට්ටෙහි සමන්තමොත්ථටො උරස්ස මුත්තාහි මණීහි චිත්තිතො ලෙඛා සුවණ්ණස්ස ච රූපියස්ස ච සොභෙන්ති වෙළුරියමයා සුනිම්මිතා.
1010. සීසඤ්චිදං වෙළුරියස්ස නිම්මිතං යුගඤ්චිදං ලොහිතකාය චිත්තිතං යුත්තා සුවණ්ණස්ස ච රූපියස්ස ච සොභන්ති අස්සා ච පිමෙ මනොජවා.{6}
1011. සො තිට්ඨසි හෙමරථෙ අධිට්ඨිතො දෙවානමින්දොව සහස්සවාහනො පුච්ඡාමි තාහං යසවන්ත කොවිදං කථං තයා ලද්ධො අයං උළාරොති.