28. සඞ්ඝාටිං නික්ඛිපිත්වාන පත්තකං ච නිකුජ්ජිය, සෙලෙ ඛම්භෙසිමත්තානං තමොක්ඛන්ධං{2} පදාලියාති.
ඉත්ථං සුදං චිත්තා ථෙරී ගාථායො අභාසිත්ථා’ති.
චිත්තාථෙරීගාථා.
2. 6.
29. කිඤ්චාපි ඛොම්හි දුක්ඛිතා දුබ්බලා ගතයොබ්බනා, දණ්ඩමොලුබ්භ ගච්ඡාමි පබ්බතං අභිරූහිය.
30. නික්ඛිපිත්වාන සඞ්ඝාටිං පත්තකං ච නිකුජ්ජිය නිසින්නා චම්හි සෙලම්හි අථ චිත්තං විමුච්චි මෙ, තිස්සො විජ්ජා අනුප්පත්තා කතං බුද්ධස්ස සාසනන්ති.
ඉත්ථං සුදං මෙත්තිකා ථෙරී ගාථායො අභාසිත්ථා’ති.
මෙත්තිකාථෙරීගාථා.
2. 7.
31. චාතුද්දසිං පඤ්චදසිං යා ච පක්ඛස්ස අට්ඨමී පාටිහාරියපක්ඛඤ්ච අට්ඨඞ්ගසුසමාගතං, උපොසථං උපාගඤ්ඡිං දෙවකායාභිනන්දිනී.
32. සාජ්ජ එකෙන භත්තෙන මුණ්ඩා සඞ්ඝාටිපාරුතා දෙවකායං න පත්ථෙහං විනෙය්ය හදයෙ දරන්ති.
ඉත්ථං සුදං මෙත්තා{3} ථෙරී ගාථායො අභාසිත්ථා’ති.
මෙත්තාථෙරීගාථා.
2. 8.
33. උද්ධං පාදතලා අම්ම අධො වෙ කෙසමත්ථකා, පච්චවෙක්ඛස්සු’මං කායං අසුචි පූතිගන්ධිකං.
34. එවං විහරමානාය සබ්බො රාගො සමූහතො, පරිළාහො සමුච්ඡින්නො සීතිභූතාම්හි නිබ්බුතාති.
ඉත්ථං සුදං අභයමාතා ථෙරී ගාථායො අභාසිත්ථා’ති.
අභයමාතාථෙරීගාථා.
2. 9.
35. අභයෙ භිදුරො කායො යත්ථ සත්තා පුථුජ්ජනා, නික්ඛිපිප්පාමිමං දෙහං සම්පජානා සතීමතී.
36. බහූහි දික්ඛධම්මෙහි අප්පමාදරතාය මෙ, තණ්හක්ඛයො අනුප්පත්තො කතං බුද්ධස්ස සාසනන්ති.
ඉත්ථං සුදං අභයාථෙරී ගාථායො අභාසිත්ථා’ති.
අභයාථෙරීගාථා.
2. 10.
37. චතුක්ඛත්තුං පඤ්චක්ඛත්තුං විහාරා උපනික්ඛමිං, අලද්ධා චෙතසො සන්තිං චිත්තෙ අවසවත්තිනී.
38. තස්සා මෙ අට්ඨමී රත්ති යතො තණ්හා සමූහතා, බහූහි දුක්ඛධම්මෙහි අප්පමාදරතාය මෙ, තණ්හක්ඛයො අනුප්පත්තො කතං බුද්ධස්ස සාසනන්ති.
ඉත්ථං සුදං සාමා ථෙරී ගාථායො අභාසිත්ථා’ති.
සාමාථෙරීගාථා.
දුකනිපාතො නිට්ඨිතො.
3. තිකනිපාතො.
3. 1.
39. පණ්ණවීසතිවස්සානි යතො පබ්බජිතාය මෙ නාභිජානාමි චිත්තස්ස සමං ලද්ධං කුදාචනං.
40. අලද්ධා චෙතසො සන්තිං චිත්තෙ අවසවත්තිනී තතො සංවෙගමාපාදිං සරිත්වා ජිනසාසනං.
41. බහූහි දුක්ඛධම්මෙහි අප්පමාදරතාය මෙ තණ්හක්ඛයො අනුප්පත්තො කතං බුද්ධස්ස සාසනං අජ්ජ මෙ සත්තමී රත්ති යතො තණ්හා විසොසිතාති.
ඉත්ථං සුදං සාමා ථෙරී ගාථායො අභාසිත්ථා’ති.
සාමාථෙරීගාථා.
3. 2.
42. චතුක්ඛත්තුං පඤ්චක්ඛත්තුං විහාරා උපනික්ඛමිං අලද්ධා චෙතසො සන්තිං චිත්තෙ අවසවත්තිනී.
43. සා භික්ඛුනිං උපගඤ්ඡිං{1} යා මෙ සද්ධායිකා අහු සා මෙ ධම්මමදෙසෙසි ඛන්ධායතනධාතුයො.
44. තස්සා ධම්මං සුණිත්වාන යථා මං අනුසාසි සා සත්තාහං එකපල්ලඞ්කෙ නිසීදිං සුඛසමප්පිතා අට්ඨමියා පාදෙ පසාරෙසිං තමොක්ඛන්ධං{2} පදාලියාති.
ඉත්ථං සුදං උත්තමා ථෙරී ගාථායො අභාසිත්ථා’ති.
උත්තමාථෙරීගාථා.
3. 3.
45. යෙ ඉමෙ සත්තබොජ්ඣඞ්ගා මග්ගා නිබ්බානපත්තියා භාවිතා තෙ මයා සබ්බෙ යථා බුද්ධෙන දෙසිතා.
46. සුඤ්ඤතස්සානිමිත්තස්ස ලාභිනීහං යදිච්ඡකං ඔරසා ධීතා බුද්ධස්ස නිබ්බානාභිරතා සදා.
47. සබ්බෙ කාමා සමුච්ඡින්නා යෙ දිබ්බා යෙ ච මානුසා වික්ඛීණො ජාතිසංසාරො නත්ථිදානි පුනබ්භවොති.
ඉත්ථං සුදං අපරා උත්තමා ථෙරී ගාථායො අභාසිත්ථා’ති.
උත්තමාථෙරීගාථා.
3. 4.
48. දිවාවිහාරා නික්ඛම්ම ගිජ්ඣකූටම්හි පබ්බතෙ නාගමොගාහමුත්තිණ්ණං නදීතීරම්හි අද්දසං.
49. පුරිසො අඞ්කුසමාදාය දෙහි පාදන්ති යාචති නාගො පසාරයී පාදං පුරිසො නාගමාරුහි.
50. දිස්වා අදන්තං දමිතං මනුස්සානං වසං ගතං, තතො චිත්තං සමාධෙසිං ඛලු තාය වනං ගතාති.
ඉත්ථං සුදං දන්තිකා ථෙරී ගාථායො අභාසිත්ථා’ති.
දන්තිකාථෙරීගාථා.
3. 5.
51. අම්ම ජීවතීති{1} වනම්හි කන්දසි අත්තානං අධිගච්ඡ උබ්බිරී චූළාසීති සහස්සානි සබ්බා ජීව සනාමිකා එතම්හාළානෙ දඩ්ඪා තාසං කමනුසොචසි.
52. අබ්බහී වත මෙ සල්ලං දුද්දසං හදයනිස්සිතං{2} යං මෙ සොකපරෙතාය ධීතුසොකං ව්යපානුදී.
53. සාජ්ජ අබ්බූළ්හසල්ලාහං නිච්ඡාතා පරිනිබ්බුතා බුද්ධං ධම්මඤ්ච සඞ්ඝඤ්ච උපෙමි සරණං මුනින්ති.
ඉත්ථං සුදං උබ්බරී ථෙරී ගාථායො අභාසිත්ථා’ති.
උබ්බිරීථෙරීගාථා.
3. 6.
54. කිමෙ{3} කතා රාජගහෙ මනුස්සා මධුපීතාව{4} අච්ඡරෙ යෙ සුක්කං න උපාසන්ති දෙසෙන්තිං බුද්ධසාසනං.
55. තඤ්ච අප්පටිවානීයං අසෙචනකමොජවං පිවන්ති මඤ්ඤෙ සප්පඤ්ඤා වලාහකමිවද්ධගු.
56. සුක්කා සුක්කෙහි ධම්මෙහි වීතරාගා සමාහිතා ධාරෙති අන්තිමං දෙහං ඡෙත්වා මාරං සවාහිනින්ති.{5}
ඉත්ථං සුදං සුක්කා ථෙරී ගාථායො අභාසිත්ථා’ති.
සුක්කාථෙරීගාථා.
3. 7.
57. නත්ථි නිස්සරණං ලොකෙ කිං විවෙකෙන කාහසි භුඤ්ජාහි කාමරතියො මාහු පච්ඡානුතාපිනී.
58. සත්තිසූලූපමා කාමා ඛන්ධාසං අධිකුට්ටනා යං ත්වං කාමරතිං බ්රූසි අරතී දානි සා මම.
59. සබ්බත්ථ විහතා නන්දී තමොක්ඛන්ධො පදාලිතො එවං ජානාහි පාපිම නිහතො ත්වමසි අන්තකාති.
ඉත්ථං සුදං සෙලා ථෙරී ගාථායො අභාසිත්ථා’ති.
සෙලාථෙරීගාථා.
3. 8.
60. යං තං ඉසීහි පත්තබ්බං ඨානං දුරභිසම්භවං න තං ද්වඞ්ගුලපඤ්ඤාය{1} සක්කා පප්පොතුමිත්ථියා.
61. ඉත්ථිභාවො නො කිං කයිරා චිත්තම්හි සුසමාහිතෙ ඤාණම්හි වත්තමානම්හි සම්මා ධම්මං විපස්සතො.
62. සබ්බත්ථ විහතා නන්දි තමොක්ඛන්ධො පදාලිතො එවං ජානාහි පාපිම නිහතො ත්වමසි අන්තකාති.
ඉත්ථං සුදං සොමා ථෙරී ගාථායො අභාසිත්ථා’ති.
සොමාථෙරීගාථා.
තිකනිපාතො නිට්ඨිතො.
4. චතුක්කනිපාතො.
4. 1.
63. පුත්තො බුද්ධස්ස දායාදො කස්සපො සුසමාහිතො, පුබ්බෙනිවාසං යො වෙදී සග්ගාපායඤ්ච පස්සති.
64. අථො ජාතික්ඛයං පත්තො අභිඤ්ඤාවොසිතො මුනි, එතාහි තීහි විජ්ජාහි තෙවිජ්ජො හොති බ්රාහ්මණො.
65. තථෙව භද්දාකාපිලානි තෙවිජ්ජා මච්චුහායිනී, ධාරෙති අන්තිමං දෙහං ඡෙත්වා{1} මාරං සවාහිනිං.{2}
66. දිස්වා ආදීනවං ලොකෙ උභො පබ්බජිතා මයං, ත්යම්හා ඛීණාසවා දන්තා සීතිභූතාම්හ නිබ්බුතාති.
ඉත්ථං සුදං භද්දාකාපිලානී ථෙරී ගාථායො අභාසිත්ථා’ති.
භද්දාකාපිලානීථෙරීගාථා.
චතුක්කනිපාතො නිට්ඨිතො.
5. පඤ්චකනිපාතො.
5. 1.
67. පණ්ණවීසතිවස්සානි යතො පබ්බජිතා අහං නච්ඡරාසඞ්ඝතමත්තම්පි{1} චිත්තස්සූපසමජ්ඣගං.
68. අලද්ධා චෙතසො සන්තිං කාමරාගෙනවස්සුතා, බාහාපග්ගය්හ කන්දන්තී විහාරං පාවිසිං අහං.
69. තං භික්ඛුනීමුපාගඤ්ජිං{2} යා මෙ සද්ධායිකා අහු, සා මෙ ධම්මමදෙසෙසි ඛන්ධායතනධාතුයො.
70. තස්සා ධම්මං සුණිත්වාන එකමන්තෙ උපාවිසිං, පුබ්බෙනිවාසං ජානාමි දිබ්බචක්ඛුං විසොධිතං.
71. චෙතොපරියඤාණඤ්ච සොතධාතු විසොධිතා, ඉදිධිපි මෙ සච්ඡිකතා පත්තො මෙ ආවක්ඛයො, ඡළභිඤ්ඤා සච්ඡිකතා කතං බුද්ධස්ස සාසනන්ති.
ඉත්ථං සුදං අඤ්ඤතරා ථෙරී ගාථායො අභාසිත්ථා’ති.
අඤ්ඤතරාථෙරීගාථා.
5. 2.
72. මත්තා වණ්ණෙන රූපෙන සොභග්ගෙන යසෙන ච, යොබ්බනෙන චූපත්ථද්ධා අඤ්ඤාසමතිමඤ්ඤිහං.
73. විභූසිත්වා{3} ඉමං කායං සුචිත්තං බාලලාපනං, අට්ඨාසිං වෙසිද්වාරම්හි ලුද්දො පාසමිවොඩ්ඩිය.