274. චිරස්සං වත මං තාතං සමණානං පරිපුච්ඡසි තෙසං තෙ කිත්තයිස්සාමි පඤ්ඤාසීලපරක්කමං.
275. කම්මකාමා අනලසා කම්මසෙට්ඨස්ස කාරකා රාගං දොසං පජහන්ති තෙන මෙ සමණා පියා.
276. තීණි පාපස්ස මූලානි ධුනන්ති සුචි කාරිනො සබ්බපාපං පහීනෙසං තෙන මෙ සමණා පියා.
277. කායකම්මං සුචි නෙසං වචීකම්මං ච තාදිසං මනොකම්මං සුචි නෙසං තෙන මෙ සමණා පියා.
278. විමලා සඞ්ඛමුත්තා’ව සුද්ධා සන්තරබාහිරා පුණ්ණා සුක්කෙහි ධම්මෙහි තෙන මෙ සමණා පියා.
279. බහුස්සුතා ධම්මධරා අරියා ධම්මජීවිනො අත්ථං ධම්මඤ්ච දෙසෙන්ති තෙන මෙ සමණා පියා.
280. බහුස්සුතා ධම්මධරා අරියා ධම්මජීවිනො එකග්ගචිත්තා සතිමන්තො තෙන මෙ සමණා පියා.
281. දූරඞ්ගමා සතිමන්තො මන්තභාණී අනුද්ධතා දුක්ඛස්සන්තං පජානන්ති තෙන මෙ සමණා පියා.
282. යස්මා ගාමා පක්කමන්ති නෙ විලොකෙන්ති කිඤ්චනං අනපෙක්ඛාව ගච්ඡන්ති තෙන මෙ සමණා පියා.
283. න තෙසං කොට්ඨෙ ඔපෙන්ති න කුම්භිං න ඛලොපියං පරිනිට්ඨිතමෙසානා තෙන මෙ සමණා පියා.
284. න තෙ හිරඤ්ඤං ගණ්හන්ති න සුවණ්ණං න රූපියං පච්චුප්පන්නෙන යාපෙන්ති තෙන මෙ සමණා පියා.
285. නානාකුලා පබ්බජිතා නානාජනපදෙහි ච අඤ්ඤමඤ්ඤං පියායන්ති තෙන මෙ සමණා පියා.
286. අත්ථාය වත නො භොති කුලෙ ජාතාසි රොහිණී සද්ධා බුද්ධෙ ච ධම්මෙ ච සඞ්ඝෙ ච තිබ්බගාරවා.
287. තුවං හෙතං පජානාසි පුඤ්ඤක්ඛෙත්තං අනුත්තරං අම්හම්පි ච තෙ සමණා පතිගණ්හන්ති දක්ඛිණං පතිට්ඨිතො හෙත්ථ යඤ්ඤො විපුලො නො භවිස්සති.
288. සචෙ භායසි දුක්ඛස්ස සචෙ තෙ දුක්ඛමප්පියං උපෙහි සරණං බුද්ධං ධම්මං සඞ්ඝඤ්ච තාදිනං, සමාදියාහි සීලානි තං තෙ අත්ථාය හෙහිති.
289. උපෙහි සරණං බුද්ධං ධම්මං සඞ්ඝඤ්ච තාදිනං, සමාදියාමි සීලානි තං මෙ අත්ථාය හෙහිති.
290. බ්රහ්මබන්ධු පුරෙ ආසිං සො ඉදානිම්හි බ්රාහ්මණො තෙවිජ්ජො සොත්ථියො චම්හි වෙදගූ චම්හි න්හාතකොති.
ඉත්ථං සුදං රොහිණී ථෙරී ගාථායො අභාසීති.
රොහිණීථෙරීගාථා.
20. 3.
291. ලට්ඨිහත්ථො පුරෙ ආසී සො දානි මිගලුද්දකො, ආසාය පලිපා ඝොරා නාසක්ඛි පාරමෙතවෙ.
292. සුමුත්තං මං මඤ්ඤමානා චාපා පුත්තමතොසයී, චාපාය බන්ධනං ඡෙත්වා පබ්බජිස්සං පුනොපහං.{1}
293. මා මෙ කුජ්ඣි මහාවීර මා මෙ කුජ්ඣි මහාමුනී, න හි කොධපරෙතස්ස සුද්ධි අත්ථි කුතො තපො.
294. පක්කමිස්සං ච නාලාතො කොධ නාලාය වච්ඡති, බන්ධන්තී{2} ඉත්ථිරූපෙන සමණෙ ධම්මජීවිනො.
295. එහි කාළ නිවත්තස්සු භුඤ්ජකාමෙ යථා පුරෙ අහඤ්ච තෙ වසී කතා යෙ ච මෙ සන්ති ඤාතකා.
296. එත්තො චාපි චතුබ්භාගං යථා භාසසි ත්වං ච මෙ තයි රත්තස්ස පොසස්ස උළාරං වත තං සියා.
297. කාළඞ්ගිනිං ව තක්කාරිං පුප්ඵිතං ගිරිමුද්ධනී ඵුල්ලං දාළිමයට්ඨිංව අන්තො දීපෙව පාටළිං.
298. හරිචන්දනලිත්තඞ්ගිං කාසිකුත්තමධාරිණිං තං මං රූපවතිං සන්තිං කස්ස ඔහාය ගච්ඡසි.
299. සාකුන්තිකොව සකුණිං යථා බන්ධිතුමිච්ඡති, ආහරිමෙන රූපෙන න මං ත්වං බාධයිස්සසි.
300. ඉමං ච මෙ පුත්තඵලං කාළ උප්පාදිතං තයා, තං මං පුත්තවතිං සන්තිං කස්ස ඔහාය ගච්ඡසි.
301. ජහන්ති පුත්තෙ සප්පඤ්ඤා තතො ඤාතී තතො ධනං, පබ්බජන්ති මහාවීරා නාගො ඡෙත්වාව බන්ධනං.
302. ඉදානි තෙ ඉමං පුත්තං දණ්ඩෙන ඡුරිකාය වා, භූමියං වා නිසුම්භෙය්යං පුත්තසොකා න ගච්ඡසි.
303. සචෙ පුත්තං සිගාලානං කුක්කුරානං පදාහිසි, න මං පුත්තකතෙ{1} ජම්මී, පුනරාවත්තයිස්සසි.
304. හන්ද ඛො දානි භද්දන්තෙ කුහිං කාළ ගමිස්සසි, කතමං ගාමං නිගමං නගරං රාජධානියො.
305. අහුම්හ පුබ්බෙ ගණිනො අස්සමණා සමණමානිනො, ගාමෙන ගාමං විචරිම්හ නගරෙ රාජධානියො.
306. එසො හි භගවා බුද්ධො නදිං නෙරඤ්ජරං පති, සබ්බදුක්ඛප්පහානාය ධම්මං දෙසෙති පාණිනං තස්සාහං සන්තිකෙ ගච්ඡං සො මෙ සත්ථා භවිස්සති.
307. වන්දනං දානි වජ්ජාසි ලොකනාථං අනුත්තරං පදක්ඛිණං ච කත්වාන ආදිසෙය්යාසි දක්ඛිණං.
308. එතං ඛො ලබ්භමම්හෙහි යථා භාසසි ත්වං ච මෙ වන්දනං දානි තෙ වජ්ජං ලොකනාථං අනුත්තරං, පදක්ඛිණං ච කත්වාන ආදිසිස්සාමි දක්ඛිණං.
309. තතොව කාලො පක්කාමි නදිං නෙරඤ්ජරං පති, සො අද්දසාසි සම්බුද්ධං දෙසෙන්තං අමතං පදං.
310. දුක්ඛං දුක්ඛසමුප්පාදං දුක්ඛස්ස ච අතික්කමං, අරියඤ්චට්ඨඞ්ගිකං මග්ගං දුක්ඛූපසමගාමිනං.
311. තස්ස පාදානි වන්දිත්වා කත්වාන තං පදක්ඛිණං, චාපාය ආදිසිත්වාන පබ්බජි අනගාරියං තිස්සො විජ්ජා අනුප්පත්තා කතං බුද්ධස්ස සාසනන්ති.
ඉත්ථං සුදං චාපා ථෙරී ගාථායො අභාසීති.
චාපාථෙරීගාථා.
20. 4.
312. පෙතානි භොති පුත්තානි ඛාදමානා තුවං පුරෙ තුවං දිවා ච රත්තො ච අතීව පරිතප්පසි.
313. සාජ්ජ සබ්බානි ඛාදිත්වා සතපුත්තානි බ්රාහ්මණී, වාසෙට්ඨි කෙන වණ්ණෙන න බාළ්හං පරිතප්පසි.
314. බහූනි පුත්තසතානි ඤාතිසඞ්ඝසතානි ච ඛාදිතානි අතීතංසෙ මම තුය්හං ච බ්රාහ්මණ.
315. සාහං නිස්සරණං ඤත්වා ජාතියා මරණස්ස ච න සොචාමි න රොදාමි න චාපි පරිතප්පයිං.
316. අබ්භුතං වත වාසෙට්ඨි වාචං භාසසි එදිසිං, කස්ස ත්වං ධම්මමඤ්ඤාය ථිරං භාසසි එදිසං.
317. එස බ්රාහ්මණ සම්බුද්ධො නගරං මිථිලං පති, සබ්බදුක්ඛප්පහානාය ධප්පං දෙසෙසි පාණිනං.
318. තස්ස බ්රාහ්මණ{1} අරහතො’ධම්මං සුත්වා නිරූපධිං, තත්ථ විඤ්ඤාතසද්ධම්මා පුත්තසොකං ව්යපානුදිං.
319. සො අහම්පි ගමිස්සාමි නගරං මිථිලං පති, අප්පෙව මං සො භගවා සබ්බදුක්ඛා පමොචයෙ, අද්දස බ්රාහ්මණො බුද්ධං විප්පමුත්තං නිරූපධිං.
320. සොස්ස ධම්මමදෙසෙසි මුනි දුක්ඛස්ස පාරගූ, දුක්ඛං දුක්ඛසමුප්පාසං දුක්ඛස්ස ච අතික්කමං, අරියඤ්චට්ඨඞ්ගිනං මග්ගං දුක්ඛූපසමගාමිනං.
321. තත්ථ විඤ්ඤාතසද්ධම්මො පබ්බජ්ජං සමරොචයිං, සුජාතො තීහි රත්තිහි තිස්සො විජ්ජා අඵස්සයී.
322. එහි සාරථි ගච්ඡාහි රථං නීයාදියාහි’මං, ආරොග්යං බ්රාහ්මණිං වජ්ජා පබ්බජිතොදානි බ්රාහ්මණො, සුජාතො තීහි රත්තිහි තිස්සො විජ්ජා අඵස්සයී.
323. තතො ච රථමාදාය සහස්සං චාපි සාරථි, ආරොග්යං බ්රාහ්මණිංවොච පබ්බජිතොදානි බ්රාහ්මණො, සුජාතො තීහි රත්තිහි තිස්සො විජ්ජා අඵස්සයී.
324. එතං චාහං අස්සරථං සහස්සං චාපි සාරථි, තෙවිජ්ජං බ්රාහ්මණං ඤත්වා{1} පුණ්ණපත්තං දදාමි තෙ.
325. තුය්හෙව හොත්වස්සරථො{2} සහස්සං චාපි බ්රාහ්මණී, අහම්පි පබ්බජිස්සාමි වරපඤ්ඤස්ස සන්තිකෙ.
326. හත්ථි ගවස්සං මණිකුණ්ඩලඤ්ච ඵීතඤ්චිමං ගහවිභවං පහාය, පිතා පබ්බජිතො තුය්හං භුඤ්ජ භොගානි සුන්දරී තුවං දායාදිකා කුලෙ.
327. හත්ථි ගවස්සං මණිකුණ්ඩලඤ්ච රම්මං චිමං ගහවිභවං පහාය, පිතා පබ්බජිතො මය්හං පුත්තසොකෙන අට්ටිතො අහම්පි පබ්බජිස්සාමි භාතුසොකෙන අට්ටිතා.
328. සො තෙ ඉජ්ඣතු සඞ්කප්පො යං ත්වං පත්ථෙසි සුන්දරී, උත්තිට්ඨපිණ්ඩො උඤ්ඡා ච පංසුකූලං ච චීවරං, එතානි අභිසම්භොන්ති පරලොකෙ අනාසවා.
329. සික්ඛමානාය මෙ අය්යෙ දිබ්බචක්ඛුං{3} විසොධිතං, පුබ්බෙනිවාසං ජානාමි යත්ථ මෙ වුසිතං පුරෙ.
330. තුවං නිස්සාය කල්යාණී ථෙරී සඞ්ඝස්ස සොභනෙ, තිස්සො විජ්ජා අනුප්පත්තා කතං බුද්ධස්ස සාසනං.
331. අනුජානාහි මෙ අය්යෙ ඉච්ඡෙ සාවත්ථි ගන්තවෙ, සීහනාදං නදිස්සාමි බුද්ධසෙට්ඨස්ස සන්තිකෙ.
332. පස්ස සුන්දරී සත්ථාරං හෙමවණ්ණං හරිත්තවං, අදන්තානං දමෙතාරං සම්බුද්ධමකුතොභායං.
333. පස්ස සුන්දරිමායන්තිං විප්පමුත්තං නිරූපධිං, වීතරාගං විසංයුත්තං කතකිච්චං අනාසවං.
334. බාරාණසිතො නික්ඛම්ම තව සන්තිකමාගතා, සාවිකා තෙ මහාවීර පාදෙ වන්දති සුන්දරී.
335. තුවං බුද්ධො තුවං සත්ථා තුය්හං ධීතාම්හි බ්රාහ්මණ, ඔරසා මුඛතො ජාතා කතකිච්චා අනාසවා.
336. තස්සා තෙ ස්වාගතං භද්දෙ තතො තෙ අදුරාගතං, එවං හි දන්තා ආයන්ති සත්ථුපාදානි වන්දිතා, වීතරාගා විසංයුත්තා කතකිච්චා අනාසවා’ති.
ඉත්ථං සුදං සුන්දරී ථෙරී ගාථායො අභාසීති.
සුන්දරීථෙරීගාථා.
20. 5.
337. දහරා අහං සුද්ධවසනා යං පුරෙ ධම්මමස්සුණිං, තස්සා මෙ අප්පමත්තාය සච්චාභිසමයො අහු.
338. තතොහං සබ්බකාමෙසු භුසං අරතිමජ්ඣගං, සක්කායස්මිං භයං දිස්වා නෙක්ඛම්මඤ්ඤෙව{1} පීහයෙ.
339. හිත්වානහං ඤාතිගණං දාසකම්මකරානි ච, ගාමක්ඛෙත්තානි ඵීතානි රමණීයෙ පමොදිතෙ.
340. පහායාහං පබ්බජිතා සාපතෙය්යමනප්පකං, එවං සද්ධාය නික්ඛම්ම සද්ධම්මෙ සුප්පවෙදිතෙ න මෙතං{2} අස්ස පතිරූපං ආකිඤ්චඤ්ඤං හි පත්ථයෙ.
341. යො ජාතරූපං රජතං ඡඩ්ඩෙත්වා පුනරාගමෙ රජතං ජාතරූපං වා න බොධාය න සන්තියා නෙතං සමණ සාරුප්පං න එතං අරියං ධනං.{3}
342. ලොභනං මදනං චෙතං මොහනං රජවඩ්ඪනං, සාසඞ්කං බහු ආයාසං නත්ථි චෙත්ථ ධුවං ඨිති.
343. එත්ථ රත්තා පමත්තා ච සංකිලිට්ඨමනා නරා, අඤ්ඤමඤ්ඤෙන ව්යාරුද්ධා පුථුපුබ්බන්ති මෙධගං.
344. වධො බන්ධො පරික්ලෙසො ජානි සොකපරිද්දවො, කාමෙසු අධිපන්නානං දිස්සතෙ ව්යසනං බහුං.
345. තං මං ඤාතී අමිත්තාව කිං වො කාමෙසු යුඤ්ජථ, ජානාථ මං පබ්බජිතං කාමෙසු භයදස්සනිං.
346. න හිරඤ්ඤසුවණ්ණෙන පරික්ඛීයන්ති ආසවා අමිත්තා වධකා කාමා සපත්තා සල්ලබන්ධනා.
347. තං මං ඤාතී අමිත්තාව කිං වො කාමෙසු යුඤ්ජථ, ජානාථ මං පබ්බජිතං මුණ්ඩං සඞ්ඝාටිපාරුතං.
348. උත්තිට්ඨපිණ්ඩො උඤ්ඡො ච පංසුකූලං ච චීවරං, එතං ඛො මම සාරුප්පං අනාගාරූපනිස්සයො.
349. වන්තා මහෙසීහි කාමා යෙ දිබ්බා යෙ ච මානුසා ඛෙමට්ඨානෙ විමුත්තා තෙ පත්තා තෙ අචලං සුඛං.
350. සාහං කාමෙහි සඞ්ගච්ඡිං යෙසු තාණං න විජ්ජති, අමිත්තා වධකා කාමා අග්ගික්ඛන්ධසමා{1} දුඛා.
351. පරිපන්ථො එස භයො සවිඝාතො සකණ්ටකො, ගෙධො සුවිසමො ලෙපො මහන්තො මොහනාමුඛො.
352. උපසග්ගො භීමරූපො කාමා සප්පසිරූපමා, යෙ බාලා අභිනන්දන්ති අන්ධභූතා පුථුජ්ජනා.
353. කාමපඞ්කෙන සත්තාහි බහූ ලොකෙ අවිද්දසූ, පරියන්තං නාභිජානන්ති ජාතියා මරණස්ස ච.
354. දුග්ගතිගමනං මග්ගං මනුස්සා කාමහෙතුකං, බහුං වෙ පටිපජ්ජන්ති අත්තනො රොගමාවහං.
355. එවං අමිත්තජනනා තාපනා සංකිලෙසිකා, ලොකාමිසා බන්ධනීයා{2} කාමා මරණබන්ධනා.
356. උම්මාදනා උල්ලපනා කාමා චිත්තප්පමාථිනො{3} සත්තානං සංකිලෙසාය ඛිපං{4} මාරෙන ඔඩ්ඩිතං.
357. අනන්තාදීනවා කාමා බහුදුක්ඛා මහාවිසා, අප්පස්සාදා රණකරා සුක්කපක්ඛවිසොසනා.
358. සාහං එතාදිසං කත්වා ව්යසනං කාමහෙතුකං, න තං පච්චාගමිස්සාමි නිබ්බානාභිරතා සදා.
359. රණං තරිත්වා{1} කාමානං සීතිභාවාභිකඞ්ඛිනී, අප්පමත්තා විහස්සාමි තෙසං සංයොජනක්ඛෙයෙ.
360. අසොකං විරජං ඛෙමං අරියඤ්චට්ඨඞ්ගිකං උජුං, තං මග්ගං අනුගච්ඡාමි යෙන තිණ්ණා මහෙසිනො.
361. ඉමං පස්සථ ධම්මට්ඨං සුභං කම්මාරධීතරං, අනෙජං උපසම්පජ්ජ රුක්ඛමූලම්හි ඣායති.
362. අජ්ජට්ඨමී පබ්බජිතා සද්ධා සද්ධම්මසොභනා, විනීතුප්පලවණ්ණාය තෙවිජ්ජා මච්චුහායිනී.
363. සායං භුජිස්සා අනණා භික්ඛුනී භාවිතින්ද්රියා, සබ්බයොගවිසංයුත්තා කතකිච්චා අනාසවා.
364. තං සක්කො දෙවසඞ්ඝෙන උපසඞ්කම්ම ඉද්ධියා, නමස්සති භූතපති සුභං කම්මාරධීතරන්ති.