ඛුද්දකනිකායෙ
ථෙරීගාථාපාළි
නමො තස්ස භගවතො අරහතො සම්මාසම්බුද්ධස්ස.
1. එකකනිපාතො.
1. 1.
1. සුඛං සුපාහි ථෙරිකෙ කත්වා චොළෙන පාරුතා, උපසන්තො හි තෙ රාගො සුක්ඛඩාකං ව කුම්භියන්ති.
ඉත්ථං සුදං අඤ්ඤතරා ථෙරී අපඤ්ඤාතා භික්ඛුනී ගාථං අභාසිත්ථා’ති.
අඤ්ඤතරථෙරීගාථා.
1. 2.
2. මුත්තෙ මුච්චස්සු යොගෙහි චන්දො රාහුග්ගහා ඉව, විප්පමුත්තෙන චිත්තෙන අනණා භුඤ්ජ පිණ්ඩකන්ති.
ඉත්ථං සුදං භගවා මුත්තං සික්ඛමානං ඉමාය ගාථාය අභිණ්හං ඔවදතී’ති.
මුත්තාථෙරීගාථා.
1. 3.
3. පුණ්ණො පූරස්සු ධම්මෙහි චන්දො පණ්ණරසොරිව,{1} පරිපුණ්ණාය පඤ්ඤාය තමොක්ඛන්ධං{2} පදාලයාති.
ඉත්ථං සුදං පුණ්ණා ථෙරී ගාථං අභාසිත්ථා’ති.
පුණ්ණාථෙරීගාථා.
1. 4.
4. තිස්සෙ සික්ඛස්සු සික්ඛාය මා තං යොගා උපච්චගුං, සබ්බයොගවිසංයුත්තා චර ලොකෙ අනාසවා’ති.
ඉත්ථං සුදං තිස්සා ථෙරී ගාථං අභාසිත්ථා’ති.
තිස්සාථෙරීගාථා.
1. 5.
5. තිස්සෙ යුඤ්ජස්සු ධම්මෙහි ඛණො තං මා උපච්චගා, ඛණාතීතා හි සොචන්ති නිරයම්හි සමප්පිතා’ති.
ඉත්ථං සුදං තිස්සා ථෙරී ගාථං අභාසිත්ථා’ති.
තිස්සාථෙරීගාථා.
1. 6.
6. ධීරෙ නිරොධං ඵුස්සෙහි{1} සඤ්ඤා වූපසමං සුඛං, ආරාධයාහි නිබ්බානං යොගක්ඛෙමං අනුත්තරං.{2}
ඉත්ථං සුදං ධීරා ථෙරී ගාථං අභාසිත්ථා’ති.
ධීරාථෙරීගාථා.
1. 7.
7. වීරා වීරෙහි ධම්මෙහි භික්ඛුනී භාවිතින්ද්රියා, ධාරෙහි අන්තිමං දෙහං ඡෙත්වා{3} මාරං සවාහිනින්ති.{4}
ඉත්ථං සුදං වීරා ථෙරී ගාථං අභාසිත්ථා’ති.
වීරාථෙරීගාථා.
1. 8.
8. සද්ධාය පබ්බජිත්වාන මිත්තෙ මිත්තරතා භව, භාවෙහි කුසලෙ ධම්මෙ යොගක්ඛෙමස්ස පත්තියාති.
ඉත්ථං සුදං මිත්තාථෙරී ගාථං අභාසිත්ථා’ති.
මිත්තාථෙරීගාථා.
1. 9.
9. සද්ධාය පබ්බජිත්වාන භද්රෙ භද්රරතා භව, භාවෙහි කුසලෙ ධම්මෙ යොගක්ඛෙමං අනුත්තරන්ති.
ඉත්ථං සුදං භද්රා ථෙරී ගාථං අභාසිත්ථා’ති.
භද්රාථෙරීගාථා.
1. 10.
10. උපසමෙ තරෙ ඔඝං මච්චුධෙය්යං සුදුත්තරං, ධාරෙහි අන්තිමං දෙහං ජෙත්වා{1} මාරං සවාහිනින්ති.{2}
ඉත්ථං සුදං උපසමා ථෙරී ගාථං අභාසිත්ථා’ති.
උපසමාථෙරීගාථා.
1. 11.
11. සුමුත්තා සාධු මුත්තාම්හි තීහි ඛුජ්ජෙහි මුත්තියා, උදුක්ඛලෙන මුසලෙන පතිනා ඛුජ්ජකෙන ච, මුත්තාම්හි ජාතිමරණා භවනෙත්ති සමූහතාති.
ඉත්ථං සුදං මුත්තාථෙරී ගාථං අභාසිත්ථා’ති.
මුත්තාථෙරීගාථා.
1. 12.
12. ඡන්දජාතා අවසායී මනසා ච ඵුඨා{3} සියා, කාමෙසු අප්පටිබද්ධචිත්තා උද්ධංසොතාති වුච්චතීති.{4}
ඉත්ථං සුදං ධම්මදින්නා ථෙරී ගාථං අභාසිත්ථා’ති.
ධම්මදින්නාථෙරීගාථා.
1. 13.
13. කරොථ බුද්ධසාසනං යං කත්වා නානුතප්පති, ඛිප්පං පාදානි ධොවිත්වා එකමන්තෙ නිසීදථාති.
ඉත්ථං සුදං විසාඛාථෙරී ගාථං අභාසිත්ථා’ති.
විසාඛාථෙරීගාථා.
1. 14.
14. ධාතුයො දුක්ඛතො දිස්වා මා ජාතිං පුනරාගමි, භවෙ ඡන්දං විරාජෙත්වා උපසන්තා චරිස්සසීති.
ඉත්ථං සුදං සුමනාථෙරී ගාථං අභාසිත්ථා’ති.
සුමනාථෙරීගාථා.
1. 15.
15. කායෙන සංවුතා ආසිං වාචාය උද චෙතසා, සමූලං තණ්හං අබ්බුය්හ{1} සීතිභූතම්හි නිබ්බුතාති.
ඉත්ථං සුදං උත්තරාථෙරී ගාථං අභාසිත්ථා’ති.
උත්තරාථෙරීගාථා.
1. 16.
16. සුඛං ත්වං වුඩ්ඪිකෙ සෙහි කත්වා චොළෙන පාරුතා, උපසන්තො හි තෙ රාගො සීතිභූතාසි නිබ්බුතාති.
ඉත්ථං සුදං සුමනා බුඩ්ඪපබ්බජිතා ථෙරී ගාථං අභාසිත්ථා’ති.
සුමනාබුඩ්ඪපබ්බජිතාථෙරීගාථා.
1. 17.
17. පිණ්ඩපාතං චරිත්වාන දණ්ඩමොලුබ්භ දුබ්බලා, වෙධමානෙහි ගත්තෙහි තත්ථෙව නිපතිං ඡමා, දිස්වා ආදීනවං කායෙ අථ චිත්තං විමුච්චි මෙති.
ඉත්ථං සුදං ධම්මා ථෙරී ගාථං අභාසිත්ථා’ති.
ධම්මාථෙරීගාථා.
1. 18.
18. හිත්වා ඝරෙ පබ්බජිතා{2} හිත්වා පුත්තං පසුං පියං, හිත්වා රාගඤ්ච දොසඤ්ච අවිජ්ජඤ්ච විරාජිය, සමූලං තණ්හං අබ්බුය්හ උපසන්තම්හි නිබ්බුතාති.
ඉත්ථං සුදං සඞ්ඝාථෙරී ගාථං අභාසිත්ථා’ති.
සඞ්ඝාථෙරීගාථා.
එකකනිපාතො නිට්ඨිතො.
2. දුකනිපාතො.
2. 1.
19. ආතුරං අසුචිං පූතිං පස්ස නන්දෙ සමුස්සයං, අසුභාය චිත්තං භාවෙහි එකග්ගං සුසමාහිතං.
20. අනිමිත්තඤ්ච භාවෙහි මානානුසයමුජ්ජහ, තතො මානාභිසමයා උපසන්තා චරිස්සසීති.
ඉත්ථං සුදං භගවා අභරූපනන්දං සික්ඛමානං ඉමාහි ගාථාහි අභිණ්හං ඔවදතීති.
අභිරූපනන්දාථෙරීගාථා.
2. 2.
21. යෙ ඉමෙ සත්තබොජ්ඣඞ්ගා මග්ගා නිබ්බානපත්තියා, භාවිතා තෙ මයා සබ්බෙ යථා බුද්ධෙන දෙසිතා.
22. දිට්ඨො හි මෙ සො භගවා අන්තිමොයං සමුස්සයො, වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ජෙන්තා ථෙරී ගාථායො අභාසිත්ථා’ති.
ජෙන්තාථෙරීගාථා.
2. 3.
23. සුමුත්තිකෙ සුමුත්තිකෙ{1} සාධු මුත්තිකාම්හි මුසලස්ස, අහිරිකො මෙ ඡත්තකං වාපි{2} උක්ඛලිකා මෙ දෙඩ්ඪුභං වාති.
24. රාගඤ්ච අහං දොසඤ්ච චිච්චිටි චිච්චිටීති විහනාමි, සා රුක්ඛමූලමුපගම්ම අහොසුඛන්ති සුඛතො ඣායාමීති.
ඉත්ථං සුදං සුමඞ්ගලමාතාථෙරී ගාථායො අභාසිත්ථා’ති.
සුමඞ්ගලමාතාථෙරීගාථා.
2. 4.
25. යාව කාසිජනපදො සුඞ්කො මෙ තත්තකො අහු, තං කත්වා නෙගමො අග්ඝං අඩ්ඪෙනග්ඝං{1} ඨපෙසි මං.
26. අථ නිබ්බින්දහං රූපෙ නිබ්බින්දං ච විරජ්ජහං, මා පුන ජාතිසංසාරං සන්ධාවෙය්යං පුනප්පුනං, තිස්සො විජ්ජා අච්ඡිකතා කතං බුද්ධස්ස සාසනන්ති.
ඉත්ථං සුදං අඩ්ඪකාසීථෙරී ගාථායො අභාසිත්ථා’ති.
අඩ්ඪකාසීථෙරීගාථා.
2. 5.
27. කිඤ්චාපි ඛොම්හි කිසිකා ගිලානා බාළ්හදුබ්බලා, දණ්ඩමොලුබ්භ ගච්ඡාමි පබ්බතං අභිරූහිය.