450. කාමා කටුකා ආසී- විසූපමා යෙසු මුච්ඡිතා බාලා, තෙ දීඝරත්තං නිරයෙ සමප්පිතා හඤ්ඤන්තෙ දුක්ඛිතා.
451. සොචන්ති පාපකම්මා විනිපාතෙ පාපබුද්ධිතො, සදා කායෙන වාචාය මනසා ච අසංවුතා.
452. බාලා තෙ දුප්පඤ්ඤා අචෙතනා දුක්ඛසමුදයො රුද්ධා දෙසෙන්තෙ අජානන්තා න බුජ්ඣතෙ අරියසච්චානි.
453. සච්චානි අම්ම බුද්ධවර- දෙසිතානි තෙ බහුතරා අජානන්තා, යෙ අභිනන්දන්ති භවගතං පිහෙන්ති{4} දෙවෙසු උපපත්තිං.
454. දෙවෙසුපි උපපත්ති අසස්සතා භවගතෙ අනිච්චම්හි, න ච සන්තසන්ති බාලා පුනප්පුනං ජායිතබ්බස්ස.
455. චත්තාරො විනිපාතා ද්වෙ ච ගතියො කථඤ්චි ලබ්භන්ති න ච විනිපාතගතානං පබ්බජ්ජා අත්ථි නිරයෙසු.
456. අනුජානාථ මං උභයො පබ්බජිතුං දසබලස්ස පාවචනෙ අප්පොස්සුක්කා ඝටිස්සං ජාතිමරණප්පහානාය.
457. කිං භවගතෙන{1} අභිනන්දිතෙන කායකලිනා අසාරෙන, භවතණ්හාය නිරොධා අනුජානාථ පබ්බජිස්සාමි.
458. බුද්ධානං උප්පාදො විවජ්ජිතො අක්ඛණො ඛණො ලද්ධො, සීලානි බ්රහ්මචරියං යාවජීවං න දූසෙය්යං.
459. එවං භණති සුමෙධා මාතාපිතරො න තාව ආහාරං, ආහරියාමි{2} ගහට්ඨා මරණවසං ගතාව හෙස්සාමි.
460. මාතා දුක්ඛිතා රොදති පිතා ච අස්සා සබ්බසො සමභිහතො,{3} ඝටෙන්ති සඤ්ඤාපෙතුං{4} පාසාදතලෙ ඡමාපතිතං.
461. උට්ඨෙහි පුත්තක කිං සොචිතෙන දින්නාසි වාරණවතිම්හි රාජා අණීකදත්තො{5} අභිරූපො තස්ස ත්වං දින්නා.
462. අග්ගමහෙසී භවිස්සසි අණීකදත්තස්ස රාජිනො භරියා, සීලානි බ්රහ්මචරියං පබ්බජ්ජා දුක්කරා පුත්තක.
463. රජ්ජෙ ආණා ධනමිස්සරියං භොගා සුඛා දහරිකාසි,{6} භුඤ්ජාහි කාමභොගෙ වාරෙය්යං හොතු තෙ පුත්ත.
464. අථ නෙ භණති සුමෙධා මා ඊදිසිකානං භවගතං අසාරං, පබ්බජ්ජා වා හෙහිති, මරණං වා මෙ නචෙව වාරෙය්යං.
465. කිමිව පූතිකායමසුචිං සවනගන්ධං භයානකං කුණපං අභිසංවිසෙය්යං භස්තං අසකිං පග්ඝරණං{7} අසුචිපුණ්ණං.
466. කිමිව තාහං ජානන්තී විකූලකං මංසසොණිතුපලිත්තං,{1} කිමිකුලාලයං සකුණභත්තං කලෙබරං කිස්ස දීයතීති.
467. නිබ්බුය්හති සුසානං අචිරං කායො අපෙතවිඤ්ඤාණො ඡුද්ධො{2} කලිඞ්ගරං විය ජිගුච්ඡමානෙහි ඤාතීහි.
468. ඡුද්ධුන තං සුසානෙ පරභත්තං නහායන්ති ජිගුච්ඡන්තා, නියකා මාතාපිතරො කිං පන සාධාරණා ජනතා.
469. අජ්ඣොසිතා අසාරෙ කලෙබරෙ අට්ඨිනහාරුසඞ්ඝාතෙ, ඛෙලස්සුච්චාරපස්සව පරිපුණ්ණෙ පූතිකායම්හි.
470. යො න විනිබ්භුජිත්වා අබ්භන්තරමස්ස බාහිරං කයිරා, ගන්ධස්ස අසහමානා සකාපි මාතා ජිගුච්ඡෙය්ය.
471. ඛන්ධදාතුආයතනං සඞ්ඛතං ජාතිමූලකං දුක්ඛං, යොනිසො අනුවිචිනන්තී{3} වාරෙය්යං කිස්ස ඉච්ඡෙය්යං.
472. දිවසෙ දිවසෙ තිසත්ති සතානි නව නවා පතෙය්යුං කායම්හි, වස්සසතම්පි ච ඝාතො සෙය්යො දුක්ඛස්ස චෙවං{4} ඛයො.
473. අජ්ඣපගච්ඡෙ ඝාතං යො විඤ්ඤායෙවං{5} සත්ථුනො වචනං, දීඝො තෙසං සංසාරො පුනප්පුනං හඤ්ඤමානානං.
474. දෙවෙසු මනුස්සෙසු ච තිරච්ඡානයොනියා අසුරකායෙ, පෙතෙසු ච නිරයෙසු ච අපරිමිතා දිස්සරෙ{6} ඝාතා.
475. ඝාතා නිරයෙසු බහූ විනිපාතගතස්ස පීළියමානස්ස{7} දෙවෙසුපි අත්තාණං නිබ්බානසුඛා පරං නත්ථි.
476. පත්තා තෙ නිබ්බානං යෙ යුත්තා දසබලස්ස පාවචනෙ, අප්පොස්සුක්කා ඝටෙන්ති ජාතිමරණප්පහානාය.
477. අජ්ජෙව තාතභිනික්ඛමිස්සං භොගෙහි කිං අසාරෙහි, නිබ්බින්නා මෙ කාමා වන්තසමා තාලාවත්ථුකතා.
478. සාචෙවං භණති පිතරං අණීකදත්තො ච යස්ස සා දින්නා{1} උපයාස වාරණවතෙ වාරෙය්යං උපට්ඨිතෙ කාලෙ.
479. අථ අසිත නිචිතමුදුකෙ කෙසෙ ඛග්ගෙන ඡින්දිය සුමෙධා, පාසාදං ච පිධෙත්වා{2} පඨමජ්ඣානං සමාපජ්ජි.
480. සා ච තහිං සමාපන්නා අණීකදත්තො{3} ච ආගතො නගරං, පාසාදෙව සුමෙධා අනිච්චසඤ්ඤා සුභාවෙති.
481. සා ච මනසිකරොති අණීකදත්තො{3} ච ආරුහි තුරිතං මණිකනකභූසිතඞ්ගො කතඤ්ජලී යාචති සුමෙධං.
482. අජ්ජෙ ආණාධනමිස්සරියං භොගා සුඛා දහරිකාසි,{4} භුඤ්ජාහි කාමභොගෙ කාමසුඛා සුදුල්ලභා ලොකෙ.
483. නිස්සට්ඨං තෙ රජ්ජං භොගෙ භුඤ්ජස්සු දෙහි දානානි, මා දුම්මනා අහොසි මාතාපිතරො තෙ දුක්ඛිතා.
484. තං තං භණති සුමෙධා කාමෙහි අනත්ථිකා විගතමොහා, මා කාමෙ අභිනන්දි කාමෙස්වාදීනවං පස්ස.
485. චාතුද්දීපො රාජා මන්ධාතා ආසි කාමභොගීනමග්ගො අතිත්තො කාලං කතො න චස්ස පරිපූරිතා ඉච්ඡා.
486. සත්තරතනානි වස්සෙය්ය වුට්ඨිමා දසදිසා සමන්තෙන න චත්ථි තිත්ති කාමානං අතිත්තාව මරන්ති නරා.
487. අසිසූනූපමා කාමා කාමා සප්පසිරූපමා, උක්කූපමා අනුදහන්ති අට්ඨිකඞ්කල සන්නිභා.
488. අනිච්චා අද්ධුවා කාමා බහුදුක්ඛා මහාවිසා, අයොගුලොව සන්තත්තො අඝමූලා දුමප්ඵලා.{1}
489. රුක්ඛඵලූපමා කාමා මංසපෙසූපමා දුඛා, සුපිනොපමා වඤ්චනියා කාමා යාචිතකූපමා.
490. සත්තිසූලූපමා කාමා රොගො ගණ්ඩො අඝං නිඝං, අඞ්ගාරකාසුසදිසා අඝමූලං භයං වධො.
491. එවං බහුදුඛා කාමා අක්ඛාතා අන්තරායිකා, ගච්ඡථ න මෙ භවගතෙ විස්සාසො අත්ථි අත්තනො.
492. කිං මම පරො කරිස්සති අත්තනො සීසම්හි ඩය්හමානම්හි, අනුබන්ධෙ ජරාමරණෙ තස්ස ඝාතාය ඝටිතබ්බං.
493. ද්වාරං අවාපුරිත්වාහං මාතාපිතරො අනීකදත්තඤ්ච දිස්වාන ඡමං නිසින්නෙ රොදන්තෙ ඉදමවොචං.
494. දීඝො බාලානං සංසාරො පුනප්පුනඤ්ච රොදතං, අනමතග්ගෙ පිතු මරණෙ භාතු වධෙ අත්තනො ච වධෙ.
495. අස්සු ථඤ්ඤං රුධිරං සංසාරං අනමතග්ගතො සරතං,{2} සත්තානං සංසරතං සරාහි අට්ඨීනඤ්ච සන්නිචයං.
496. සර චතුරොදධි උපනීතෙ අස්සු ථඤ්ඤ රුධිරම්හි සර එකකප්පමට්ඨීනං සඤ්චයං විපුලෙන සමං.
497. අනමතග්ගෙ සංසරතො මහිං ජම්බුදීපමුපනීතං, කෙ ළට්ඨිමත්තගුලිකා මාතාමාතුස්වෙව නප්පහොන්ති.
498. සර තිණකට්ඨසාඛාපලාසං උපනීතං අනමතග්ගතො,{1} චතුරඞ්ගුලිකා ඝටිකා පිතුපිතුස්වෙව නප්පහොන්ති.
499. සර{2} කාණකච්ඡපං පුබ්බසමුද්දෙ අපරතො ච යුගච්ඡිද්දං සර තස්ස ච පටිමුක්කං මනුස්සලාභම්හි ඔපම්මං.
500. සර රූපං ඵෙණපිණ්ඩොපමස්ස කායකලිකො අසාරස්ස ඛන්ධෙ පස්ස අනිච්චෙ සරාහි නිරයෙ බහුවිඝාතෙ.{3}
501. සර කටසීවඩ්ඪන්තෙ පුනප්පුනං තාසු තාසු ජාතිසු, සර කුම්භීගභයානි ච සරාහි චත්තාරි සච්චානි.
502. අමතම්හි විජ්ජමානෙ කිං තව පඤ්චකටුකෙන පීතෙන, සබ්බා හි කාමරතියො කටුකතරා පඤ්චකටුකෙන.
503. අමතම්හි විජ්ජමානෙ කිං තව කාමෙහි යෙ සපරිළාහා{4} සබ්බා හි කාමරතියො ජලිතා කුථිතා කම්පිතා සන්තපිතා.
504. අසපත්තම්හි සමානෙ කිං තව කාමෙහි යෙ බහුසපත්තා, රාජග්ගිචොරඋදකප්පියෙහි සාධාරණා කාමා බහූසපත්තා.
505. මොක්ඛම්හි විජ්ජමානෙ කිං තව කාමෙහි යෙසු{5} වධබන්ධො, කාමෙසු හි අසතා කාමා{6} වධබන්ධනදුක්ඛානි{7} අනුභොන්ති.
506. ආදීපිතා තිණුක්කා ගණ්හන්තං දහන්ති නෙව මුඤ්චන්තං, උක්කොපමා හි කාමා දහන්ති යෙ තෙ න මුඤ්චන්ති.
507. මා අප්පකස්ස හෙතු කාමසුඛස්ස විපුලං ජහී සුඛං, මා පුථුලොමොව බලිසං ගිලිත්වා පච්ඡා විහඤ්ඤසි.
508. කාමං කාමෙසු දමස්සු තාව සුනඛොව සඞ්ඛලාබද්ධො කාහින්ති ඛු තං කාමා ඡාතා සුනඛං ව චණ්ඩාලා.
509. අපරිමිතං ච දුක්ඛ බහූනි ච චිත්තදොමනස්සානි, අනුභොහිසි කාමෙසු යුත්තො පටිනිස්සජ අද්ධුවෙ කාමෙ.
510. අජරම්හි විජ්ජමානෙ කිං තව කාමෙහි යෙසු ජරාමරණව්යාධිගහිතා සබ්බා සබ්බත්ථ ජාතියො.
511. ඉදමජරමිදමමරං ඉදමජරාමරපදමසොකං, අසපත්තමසම්බාධං අඛලිතමභයං නිරුපතාපං.
512. අධිගතමිදං බහූහි අමතමජ්ජාපි ච ලභනීයමිදං, යො යොනිසො පයුඤ්ජති න ච සක්කා අඝටමානෙන.
513. එවං භණති සුමෙධා සඞ්ඛරගතෙ රතිමලභමානා, අනුනෙන්ත්යණීකදත්තං කෙසෙ ච ඡමං ඛිපි සුමෙධා.
514. උට්ඨාය අණීකදත්තො පඤ්ජලිකො යාචි තස්සා පිතරං සො, විස්සජ්ජෙථ සුමෙධං පබ්බජිතුං විමොක්ඛසච්චදස්සා.
515. විස්සජ්ජිතා මාතාපිතූහි පබ්බජි සොකභයභීතා, ඡ අභිඤ්ඤා සච්ඡිකතා අග්ගඵලං සික්ඛමානාය.
516. අච්ඡරියං අබ්භුතං තං නිබ්බානං ආසි රාජතඤ්ඤාය, පුබ්බෙනිවාසචරිතං යථා බ්යාකරි පච්ඡිමෙ කාලෙ.
517. භගවති කොණාගමනෙ සඞ්ඝාරාමම්හි නවනිවෙසම්හි සඛියො තිස්සො ජනියො විහාරදානං අදාසිම්හාසෙ.{1}
518. දසක්ඛත්තුං සතක්ඛත්තුං දසසතක්ඛත්තුං සතානි ච සතක්ඛත්තුං, දෙවෙසු උපපජ්ජිම්හ කො පන වාදො මනුස්සෙසු.
519. දෙවෙසු මහිද්ධිකා අහුම්හ මානුසකම්හි කො පන වාදො, සත්තරතනස්ස මහෙසී ඉත්ථිරතනං අහං ආසිං.
520. සො හෙතු සො පභවො තං මූලං සාව සාසනෙ ඛන්ති, තං පඨමං සමොධානං තං ධම්මරතාය නිබ්බානං.
521. එවං කරොන්ති යෙ සද්දහන්ති වචනං අනොමපඤ්ඤස්ස නිබ්බින්දන්ති භවගතෙ නිබ්බින්දිත්වා විරජ්ජන්තීති.
ඉත්ථං සුදං සුමෙධා ථෙරී ගාථායො අභාසිත්ථාති.
සුමෙධාථෙරීගාථා.
මහානිපාතො නිට්ඨිතො.
ගාථාසතානි චත්තාරි අසීති පුන චුද්දස ථෙරියෙකුත්තරසතා සබ්බා තා ආසවක්ඛයාති.
ථෙරීගාථා සමත්තා.