ඉත්ථං සුදං සුභා කම්මාරධීතා ථෙරී ගාථායො අභාසීති.
සුභාකම්මාරධීතුථෙරීගාථා.
වීසතිනිපාතො නිට්ඨිතො.
30. තිංසතිනිපාතො.
30. 1.
365. ජීවකම්බවනං රම්මං ගච්ඡන්තිං භික්ඛුනිං සුභං, ධුත්තකො සන්නිවාරෙසි තමෙනං අබ්රවී සුභා.
366. කිං තෙ අපරාධිතං මයා යං මං ඔවරියාන තිට්ඨසි, න හි පබ්බජිතාය ආවුසො පුරිසො සම්ඵුසනාය කප්පති.
367. ගරුකෙ මම සත්ථුසාසනෙ යා සික්ඛා සුගතෙන දෙසිතා, පරිසුද්ධපදං අනඞ්ගණං කිං මං ඔවරියාන තිට්ඨසි.
368. ආවිලචිත්තො අනාවිලං සරජො වීතරජං අනඞ්ගණං, සබ්බත්ථ විමුත්තමානසං කිං මං ඔවරියාන තිට්ඨසි.
369. දහරා ච අපාපිකා චසි කිං තෙ පබ්බජ්ජා කරිස්සති, නික්ඛිප කාසාය චීවරං එහි රමාමසෙ පුප්ඵිතෙ{1} වනෙ.
370. මධුරඤ්ච පවන්ති සබ්බසො කුසුමරජෙන සමුට්ඨිතා දුමා, පඨමවසන්තො සුඛො උතු එහි රමාමසෙ පුප්ඵිතෙ{1} වනෙ.
371. කුසුමිතසිඛරාව පාදපා අභිගච්ඡන්තිව මාලුතෙරිතා, කා තුය්හං රති භවිස්සති යදි එකා වනමොතරිස්සසි.
372. වාළමිගසඞ්ඝසෙවිතං කුඤ්ජරමත්තකරෙණුලොලිතං, අසහායිකා ගන්තුමිච්ඡසි රහිතං භිංසනකං මහාවනං.
373. තපනීයකතාව ධීතිකා විචරසි චිත්තරථෙව{2} අච්ඡරා, කාසිකසුඛුමෙහි වග්ගුහි සොභසි වසනෙහි නූපමෙ.
374. අහං තව වසානුගො සියං යදි විහරෙමසෙ කානනන්තරෙ, න හි චත්ථි තයා පියතරො පාණො කින්නරිමන්දලොචනෙ.
375. යදි මෙ වචනං කරිස්සසි සුඛිතා එහි අගාරමාවස, පාසාදනිවාතවාසිනී පරිකම්මං තෙ කරොන්ති නාරියො,
376. කාසිකසුඛුමාසි ධාරය අභිරොහෙහි{1} ච මාලවණ්ණකං, කඤ්චනමණිමුත්තකං බහුං විවිධං ආභරණං කරොමි තෙ.
377. සුධොතරජපච්ඡදං සුභං ගොණකතූලිත සන්ථතං නවං, අභිරුහ සයනං මහාරහං චන්දනමණ්ඩිත සාරගන්ධිකං.
378. උප්පලඤ්ච උදකතො උග්ගතං{2} යථා තං අමනුස්ස සෙවිතං, එවං තුවං බ්රහ්මචාරිනී සකෙසු අඞ්ගෙසු ජරං ගමිස්සසි.
379. කිං තෙ ඉධ සාරසම්මතං කුණපපූරම්හි සුසානවඩ්ඪනෙ භෙදනධම්මෙ කලෙබරෙ යං දිස්වා විමනො උදික්ඛසි.
380. අක්ඛීනි ච තුරියාරිව කින්නරියාරිව පබ්බතන්තරෙ තව මෙ නයනානුදික්ඛිය භිය්යො කාමරතී පවඩ්ඪති.
381. උප්පලසිඛරොපරානි තෙ විමලෙ හාටකසන්නිභෙ මුඛෙ තව මෙ නයනානුදික්ඛිය භිය්යො කාමගුණො පවඩ්ඪති.
382. අපි දූරගතා සරම්හසෙ ආයතපම්හෙ විසුද්ධදස්සනෙ න හි චත්ථි තයා පියතරො නයනා කින්නරිමන්දලොචනෙ.
383. අපථෙන පයාතුමිච්ඡසි චන්දං කීළනකං ගවෙස්සසි මෙරුං ලඞ්ඝෙතුමිච්ඡසි යො ත්වං බුද්ධසුතං මග්ගයසෙ.
384. නත්ථි ලොකෙ සදෙවකෙ රාගො යත්ථ’පි’දානි මෙ සියා නපි නං ජානාමි කීරිසො අථ මග්ගෙන හතො සමූලකො.
385. ඉඞ්ගාලකුයාව උජ්ඣිතො විසපත්තොරිව අග්ගතො කතො නපි නං පස්සාමි කීරිසො අථ මග්ගෙන හතො සමූලකො,
386. යස්සා සියා අපච්චවෙක්ඛිතං සත්ථා වා අනුපාසිතො සියා, ත්වං තාදිසිකං පලොහය ජානන්තිං සො ඉමං විහඤ්ඤසි.
387. මය්හං හි අක්කුට්ඨවන්දිතෙ සුඛදුක්ඛෙ ච සති උපට්ඨිතා, සඞ්ඛතමසුභන්ති ජානිය සබ්බත්ථෙව මනො න ලිප්පති.{3}
388. සාහං සුගතස්ස සාවිකා මග්ගට්ඨඞ්ගිකයානයායිනී, උද්ධටසල්ලා අනාසවා සුඤ්ඤාගාරගතා රමාමහං.
389. දිට්ඨා හි මයා සුචිත්තිතා සොම්භා දාරුකපිල්ලකානි වා තන්තීහි ච ඛීලකෙහි ච විනිබද්ධා විවිධං පනච්චකා.
390. තම්හුද්ධටෙ තන්තිඛීලකෙ විස්සට්ඨෙ විකලෙ පරිපක්ඛිතෙ අවින්දෙ ඛණ්ඩසො කතෙ කිම්හි තත්ථ මනං නිවෙසයෙ.
391. තථූපමා දෙහකානි මං තෙහි ධම්මෙහි විනා න වත්තන්ති, ධම්මෙහි විනා න වත්තති කිම්හි තත්ථ මනං නිවෙසයෙ.
392. යථා හරිතාලෙන මක්ඛිතං අද්දස චිත්තිකං භිත්තියා කතං, තම්හි තෙ විපරීත දස්සනං සඤ්ඤා මානුසිකා නිරත්ථිකා.
393. මායං විය අග්ගතො කතං සුපිනන්තෙව සුවණ්ණපාදපං, උපගච්ඡසි අන්ධරිත්තකං ජනමජ්ඣෙරිව රුප්පරූපකං,
394. වට්ටනිරිව කොටරොහිතා මජ්ඣෙ බුබ්බුලකා සඅස්සුකා පිළකොළිකා එත්ථ ජායති විවිධා චක්ඛුවිධා ච පිණ්ඩිතා.
395. උප්පාටිය චාරුදස්සනා න ච පජ්ජිත්ථ අසඞ්ගමානසා, හන්ද තෙ චක්ඛුං හරස්සු තං තස්ස නරස්ස අදාසි තාවදෙ.
396. තස්ස ච විරමාසි තාවදෙ රාගො තත්ථ ඛමාපයී ච නං, සොත්ථි සියා බ්රහ්මචාරිනී න පුනො එදිසකං භවිස්සසි,
397. ආසාදිය එදිසං ජනං අග්ගිං පජ්ජලිතං ව ලිඞ්ගිය, ගණ්හිය ආසිවිසං විය අපි නු සොත්ථි සියා ඛමෙහි නො.
398. මුත්තා ච තතො සා භික්ඛුණී අගමී බුද්ධවරස්ස සන්තිකං, පස්සිය වරපුඤ්ඤලක්ඛණං චක්ඛු ආසි යථා පුරාණකන්ති.
ඉත්ථං සුදං සුභා ජීවකම්බවනිකා ථෙරී ගාථායො අභාසීති.
ජීවකම්බවනිකසුභාථෙරීගාථා.
තිංසති නිපාතො නිට්ඨිතො.
40. චත්තාලීසතිනිපාතො.
40. 1.
399. නගරම්හි කුසුමනාමෙ පාටලිපුත්තම්හි පුථුවියා{1} මණ්ඩෙ සක්යකුලකුලීනායො ද්වෙ භික්ඛුනියො හි ගුණවතියො.
400. ඉසිදාසී තත්ථ එකා දුතියා බොධිත්ථෙරී{2} සීලසම්පන්නා ච, ඣානජ්ඣායනරතායො බහුස්සුතායො ධුතකිලෙසායො.
401. තා පිණ්ඩාය චරිත්වා භත්ථං කරිය ධොතපත්තායො, රහිතම්හි සුඛනිසින්නා ඉමා ගිරා අබ්භුදීරෙසුං.
402. පාසාදිකාසි අය්යෙ ඉසිදාසී වයොපි තෙ අපරිහීනො, කිං දිස්වාන ව්යාකුලිකං{3} අථාසි නෙක්ඛම්මමනුයුත්තා.
403. එවං අනුයුඤ්ජියමානා සා රහිතෙ ධම්මදෙසනා කුසලා, ඉසිදාසී වචනමබ්රවී සුණ බොධි යථම්හි පබ්බජිතා.
404. උජ්ජෙනියා පුරවරෙ මය්හං පිතා සීලසංවුතො සෙට්ඨි, තස්සම්හි එකධීතා පියා මනාපා ච දයිතා ච.
405. අථ මෙ සාකෙතතො වරකා{4} ආගව්ඡුමුත්තමකුලීනා{5} සෙට්ඨීපහූතරතනො තස්ස මං සුණ්හමදාසි තාතො.
406. සස්සුයා සසුරස්ස ච සායං පාතං පණාමමුපගම්ම, සිරසා කරොමි පාදෙ වන්දාමි යථම්හි අනුසිට්ඨා.
407. යා මය්හං සාමිකස්ස භගිනියො භාතුනො පටිජනො, තමෙකවරකම්පි දිස්වා උබ්බිග්ගා ආසනං දදාමි.{6}
408. අන්නෙන ච පානෙන ච ඛජ්ජෙන ච යං ච තත්ථ සන්නිහිතං, ඡාදෙමි උපනයාමි දෙමි ච යං යස්ස පතිරූපං.
409. කාලෙන උපට්ඨහිත්වා ඝරං සම්පගමාමි උම්මාරෙ, ධොවන්ති හත්ථපාදෙ පඤ්ජලිකා සාමිකං උපෙමි ච.
410. කොච්ඡං පසාදමඤ්ජනිඤ්ච{1} ආදාසකඤ්ච ගණ්හිත්වා පරිකම්මකාරිකා විය සයමෙව පතිං විභූසෙමි.
411. සයමෙව ඔදනං සාධයාමි සයමෙව භාජනං ධොවන්තී, මාතාව එකපුත්තකං තදා{2} භත්තාරං පරිචරාමි.
412. එවං මං භතිකතං{3} අනුරත්තං කාරිකං නිහතමානං උට්ඨායිකං අනලසං සීලවතිං දුස්සතෙ භත්තා.
413. සො මාතරඤ්ච පිතරඤ්ච භණති ආපුච්ඡාහං ගමිස්සාමි, ඉසිදාසියා න වච්ඡං එකාගාරෙහං සහවත්ථුං.
414. මා එවං පුත්ත අවච ඉසිදාසී වණ්ඩිතා පරිව්යත්තා, උට්ඨායිකා අනලසා කිං තුය්හං න රොචතෙ පුත්ත.
415. න ච මෙ හිංසති කිඤ්චි න චාහං ඉසිදාසියා සහ වච්ඡං දෙස්සාව මෙ අලං මෙ අපුච්ඡාහං ගමිස්සාමි.
416. තස්ස වචනං සුණිත්වා සස්සු සසුරො ච මං අපුච්ඡිංසු, කිස්ස තයා අපරද්ධං භණ විස්සත්ථා යථා භූතං.
417. නපිහං අපරජ්ඣං{4} කිඤ්චි නපි හිංසෙමි න භණාමි දුබ්බවනං, කිං සක්කා කාතුය්යෙ යං මං විද්දෙස්සතෙ{5} භත්තා.
418. තෙ මං පිතු ඝරං පති නයිංසු විමනා දුඛෙන අධිභූතා,{1} පුත්තං අනුරක්ඛමානා ජිතම්හසෙ රූපිනිං ලක්ඛිං.
419. අථ මං අදාසි තාතො අඩ්ඪස්ස සරම්හි දුතියකුලිකස්ස, තතො උපඩ්ඪසුඞ්කෙන යෙන මං වින්දථ සෙට්ඨි.
420. තස්සපි ඝරම්හි මාසං අවසී අථ සොපි මං පටිච්ඡසි, දාසීව උපට්ඨහන්ති අදූසිකං සීලසම්පන්නං.
421. භික්ඛාය ච විචරන්තං දමකං දන්තං මෙ පිතා භණති, හොහිසි මෙ ජාමාතා නික්ඛිප පොන්තිඤ්ච{2} ඝටිකඤ්ච.
422. සොපි වසිත්වා පක්ඛමථ{3} තාතං භණති දෙහි මෙ පොන්තිං{2} ඝටිකඤ්ච මල්ලකඤ්ච පුනපි භක්ඛං චරිස්සාමි.
423. අථ නං භණති තාතො අම්මා සබ්බො ච මෙ ඤාතිගණවග්ගො, කිං තෙ න කිරති ඉධ භණ ඛිප්පං තං තෙ කරිහිති.
424. එවං භණිතො භණති යදි මෙ අත්තා සක්කොති අලං මය්හං, ඉසිදාසියා න සහ වච්ඡං එකඝරෙහං සහ වත්ථුං.
425. විස්සජ්ජිතො ගතො සො අහම්පි එකාකිනී විචින්තෙමි, අපුච්ඡිතූන ගච්ඡං මරිකායෙ{4} වා පබ්බජිස්සං වා.
426. අථ අය්යා ජිනදත්තා ආගච්ඡි ගොචරාය චරමානා, තාතකුලං විනයධරී බහුස්සුතා සීලසම්පන්නා.
427. තං දිස්වානම්හාකං උට්ඨායාසනං තස්සා පඤ්ඤාපයිං, නිසින්නාය ච පාදෙ වන්දිත්වා භොජනං අදාසිං.
428. අන්නෙන ච පානෙන ච ඛජ්ජෙන ච යං ච තත්ථ සන්නිහිතං, සන්තප්පයිත්වාවොචං අය්යෙ ඉච්ඡාමි පබ්බජිතුන්ති.
429. අථ මං භණති තාතො ඉධෙව පුත්තක චරාහි ත්වං ධම්මං අන්නෙන ච පානෙන ව සන්තප්පය සමණෙ ද්විජාතී ච.
430. අථාහං භණාමි තාතං රොදන්තී අඤ්ජලිං පණාමෙත්වා, පාපං හි මයා පකතං කම්මං නං නිජ්ජරිස්සාමි.
431. අථ මං භණති තාතො පාපුණ බොධිං ච අග්ගධම්මං ච, නිබ්බානං ච ලභස්සු යං සච්ඡිකරි ද්විපදසෙට්ඨො.
432. මාතාපිතූ අභිවාදයිත්වා සබ්බං ච ඤාතිගණවග්ගං, සත්තාහං පබ්බජිතා තිස්සො විජ්ජා අඵස්සයිං.
433. ජානාමි අත්තනො සත්ත ජාතියො යස්සායං ඵලං විපාකො, තං තව ආචික්ඛිස්සං තං එකමනා නිසාමෙහි.
434. නගරම්හි එරකච්ඡෙ සුවණ්ණකාරො අහං පහූතධනො, යොබ්බනමදෙන මත්තො සො පරදාරමසෙවිහං.
435. සොහං තතො චවිත්වා නිරයම්හි අපච්චිසං චිරං, පක්කො තතො ච උට්ඨහිතිවා මක්කටියා කුච්ඡම්හි ඔක්කමිං.
436. සත්තාහජාතකං මං මහාකපියූථපො නිල්ලච්ඡෙසි, තස්සෙතං කම්මඵලං යථාපි ගන්ත්වාන පරදාරං.
437. සොහං තතො චවිත්වා කාලං කරිත්වා සින්ධවාරඤ්ඤෙ, කාණාය ච ඛඤ්ජාය ච එළකියා කුච්ඡමොක්කමිං.
438. ද්වාදසවස්සානි අහං නිල්ලච්ඡිතො දාරකෙ පරිවහිත්වා, කිමිනාවට්ටා අකල්ලො යථාපි ගන්ත්වාන පරදාරං.
439. සොහං තතො චවිත්වා ගොවාණිජකස්ස ගාවියා ජාතො, වච්ඡො ලාඛා තම්බො නිල්ලච්ඡිතො ද්වාදසෙ මාසෙ.
440. වොඪූන නඞ්ගලමහං සකටඤ්ච ධාරයාමි, අන්ධො වට්ටො අකල්ලො යථාපි ගන්ත්වාන පරදාරං.
441. සොහං තතො චවිත්වා වීථියා දාසියා ඝරෙ ජාතො, නෙව මහිලා න පුරිසො යථාපි ගන්ත්වාන පරදාරං.
442. තිංසති වස්සම්හි මතො සාකටිකකුලම්හි දාරිකා ජාතා, කපණම්හි අප්පභොගෙ ධනිකපුරිසපාතබහුලම්හි.
443. තං මං තතො සත්ථවාහො උස්සන්නාය විපුලාය වඩ්ඪියා, විකඩ්ඪති විලපන්තිං අච්ඡින්දිත්වා කුලඝරස්ස.
444. අථ සොළසමෙ වස්සෙ දිස්වාන මං පත්ත යොබ්බනං, කඤ්ඤමොරුන්ධතස්ස පුත්තො ගිරිදාසො නාම නාමෙන.
445. තස්සපි අඤ්ඤා භරියා සීලවතී ගුණවතී යසවතී ච, අනුරත්තං භත්තාරං තස්සාහං විද්දෙසනමකාසිං.
446. තස්සෙතං කම්මඵලං යං මං අපකිරිතූන ගච්ඡන්තී, දාසීව උපට්ඨහන්තිං තස්සපි අන්තො කතො මයාති.
ඉත්ථං සුදං ඉසිදාසී ථෙරී ගාථායො අභාසීති.
ඉසිදාසිථෙරීගාථා.
චත්තාලීසතිනිපාතො සමත්තො.
මහානිපාතො.
1.
447. මන්තාවතියා නගරෙ රඤ්ඤො කොඤ්චස්ස අග්ගමහෙසියා, ධීතා ආසි{1} සුමෙධා පසාදිතා{2} සාසනකරෙහි.
448. සීලවතී චිත්තකථා බහුස්සුතා බුද්ධසාසනෙ විනීතා, මාතාපිතරො උපගම්ම භණති උභයො නිසාමෙථ.
449. නිබ්බානාභිරතාහං අසස්සතං භවගතං යදිපි දිබ්බං, කිමඞ්ග පන තුච්ඡා කාමා අප්පස්සාදා බහුවිඝාතා.