202. තස්සාහං වචනං සුත්වා විහරිං සාසනෙ රතා, තිස්සො විජ්ජා අනුප්පත්තා කතං බුද්ධස්ස සාසනං.
203. සබ්බත්ථ විහතා නන්දි තමොක්ඛන්ධො පදාලිතො, එවං ජානාහි පාපිම නිහතො ත්වමසි අන්තකාති.
ඉත්ථං සුදං සීසූපචාලා ථෙරී ගාථායො අභාසීති.
සීසූපචාලාථෙරිගාථා
අට්ඨකනිපාතො නිට්ඨිතො.
9. නවකනිපාතො
9. 1.
204. මා සු තෙ වඩ්ඪ ලොකම්හි වනථො අහු කුදාචනං, මා පුත්තක පුනප්පුනං අහු දුක්ඛස්ස භාගිමා,
205. සුඛං හි වඩ්ඪ මුනයො අනෙජා ඡින්නසංසයා, සීතිභූතා දමප්පත්තා විහරන්ති අනාසවා.
206. තෙහානුවිණ්ණං ඉසීහි මග්ගං දස්සනපත්තියා. දුක්ඛස්සන්තකිරියාය ත්වං වඩ්ඪ අනුබ්රූහය.
207. විසාරදාව භණසි එතමත්ථං ජනෙත්ති මෙ, මඤ්ඤාමි නූන මාමිකෙ වනථො තෙ න විජ්ජති.
208. යෙ කෙචි වඩ්ඪ සංඛාරා හීනා උක්කට්ඨමජ්ඣිමා’ අණූපි අණුමත්තොපි වනථො මෙ න විජ්ජති.
209. සබ්බෙ මෙ ආසවා ඛීණා අප්පමත්තස්ස ඣායතො, තිස්සො විජ්ජා අනුප්පත්තා කතං බුද්ධස්ස සාසනං.
210. උළාරං වත මෙ මාතා පතො දං සමවස්සරී. පරමත්ථසංහිතා ගාථා යථාපි අනුකම්පිකා.
211. තස්සාහං වචනං සුත්වා අනුසිට්ඨිං ජනෙත්තියා, ධම්මසංවෙගමාපාදිං යොගක්ඛෙමස්ස පත්තියා.
212. සොහං පධානපහිතත්තො රත්තින්දිවමතන්දිතො, මාතරා චොදිතො සන්තො අඵුසිං සන්තිමුත්තමන්ති.
ඉත්ථං සුදං වඩ්ඪමාතා ථෙරී ගාථායො අභාසීති.
වඩ්ඪමාතාථෙරිගාථා.
නවකනිපාතො නිට්ඨිතො.
11. එකාදසනිපාතො.
11. 1.
213. කල්යාණමිත්තතා මුනිනා ලොකං ආදිස්ස වණ්ණිතා, කල්යාණමිත්තෙ භජමානො අපි බාලො පණ්ඩිතො අස්ස.
214. භජිතබ්බා සප්පුරිසා පඤ්ඤා තථා වඩ්ඪති{1} භජන්තානං, භජමානො සප්පුරිසෙ සබ්බෙහිපි දුක්ඛෙහි පමුච්චෙය්ය.{2}
215. දුක්ඛඤ්ච විජානෙය්ය දුක්ඛස්ස ච සමුදයං නිරොධං අට්ඨඞ්ගිකඤ්ච මග්ගං චත්තාරිපි අරියසච්චානි.
216. දුක්ඛො ඉත්ථිභාවො අක්ඛාතො පුරිසදම්මසාරථිනා, සපත්තිකම්පි දුක්ඛං අප්පෙකච්චා{3} සකිං විජාතායො.
217. ගලකෙ අපි කන්තන්ති සුඛුමාලිනියො විසානි ඛාදන්ති, ජනමාරකමජ්ඣගතා උභොපි ව්යසනානි අනුභොන්ති.
218. උපවිජඤ්ඤා ගච්ඡන්ති අද්දසාහං පතිං මතං පන්ථම්හි විජායිත්වාන අප්පත්තාව සකං ඝරං.
219. ද්වෙ පුත්තා කාලකතා පතී ච පන්ථෙ මතො කපණිකාය, මාතා පිතා ච භාතා ඩය්හන්ති ච එකචිතකායං.
220. ඛීණකුලීනෙ කපණෙ අනුභූතං තෙ දුක්ඛං අපරිමාණං අස්සු ච තෙ පවත්තං බහූනි ජාතිසහස්සානි,
221. වසිතා සුසානමජ්ඣෙ අථොපි ඛාදිතානි පුත්තමංසානි හතකුලිකා සබ්බගරහිතා මතපතිකා අමතං අධිගච්ඡි.
222. භාවිතො මෙ මග්ගො අරියො අට්ඨඞ්ගිකො අමතගාමි. නිබ්බානං සච්ඡිකතං ධම්මාදාසං අපෙක්ඛිහං.
223. අහමම්හි කන්තසල්ලා ඔහිතභාරා කතං හි කරණීයං, කිසාගොතමී ථෙරී විමුත්තචිත්තා ඉමං අභණිති.
ඉත්ථං සුදං කිසාගොතමී ථෙරී ගාථායො අභාසීති.
කිසාගොතමීථෙරීගාථා.
එකාදසනිපාතො නිට්ඨිතො
12. ද්වාදසනිපාතො.
12. 1.
224. උභො මාතා ච ධීතා ච මයං ආසුං{1} සපත්තියො. තස්සා මෙ අහු සංවෙගො අබ්භුතො ලොමහංසනො.
225. ධිරත්ථු කාමා අසුචී දුග්ගන්ධා බහු කණ්ටකා, යත්ථ මාතා ච ධීතා ච සභරියා මයං අහුං.
226. කාමෙස්වාදීනවං දිස්වා නෙක්ඛම්මං දට්ඨු ඛෙමතො, සා පබ්බජි රාජගහෙ අගාරස්මානගාරියං.
227. පුබ්බෙනිවාසං ජානාමි දිබ්බචක්ඛුං{2} විසොධිතං, චෙතොපරිච්චඤාණඤ්ච සොතධාතු විසොධිතා.
228. ඉද්ධිපි මෙ සච්ඡිකතා පත්තො මෙ ආසවක්ඛයො, ඡළභිඤ්ඤා සච්ඡිකතා කතං බුද්ධස්ස සාසනං.
229. ඉද්ධියා අභිනිම්මිත්වා චතුරස්සරථං අහං, බුද්ධස්ස පාදෙ වන්දිත්වා ලොකනාථස්ස තාදිනො.
230. සුපුප්ඵිතග්ගං උපගම්ම පාදපං, එකා තුවං තිට්ඨසි සාලමූලෙ, න චාපි තෙ දුතියො අත්ථි කොචි න ත්වං බාලෙ භායසි ධුත්තකානං.
231. සතං සහස්සානපි ධුත්තකානං සමාගතා එදිසකා භවෙය්යුං ලොමං න ඉඤ්ජෙ නපි සම්පවෙධෙ කිං මෙ තුවං මාර කරිස්සසෙකො.
232. එසා අන්තරධායාමි කුච්ඡිං වා පවිසාමි තෙ භමුකන්තරෙ වා තිට්ඨාමි තිට්ඨන්තිං මං න දක්ඛසි.
233. චිත්තම්හි වසීභූතාහං ඉද්ධිපාදා සුභාවිතා, ඡ මෙ අභිඤ්ඤා සච්ඡිකතා කතං බුද්ධස්ස සාසනං.
234. සත්තිසූලූපමා කාමා ඛන්ධාසං අධිකුට්ටනා, යං ත්වං කාමරතිං බ්රූසි අරතීදානි සා මම.
235. සබ්බත්ථ විහතා නන්දි තමොක්ඛන්ධො පදාලිතො, එවං ජානාහි පාපිම නිහතො ත්වමසි අන්තකාති.
ඉත්ථං සුදං උප්පලවණ්ණා ථෙරී ගාථායො අභාසීති.
උප්පලවණ්ණාථෙරීගාථා.
ද්වාදසනිපාතො නිට්ඨිතො.
16. සොළසනිපාතො.
16. 1.
236. උදකමාහරිං{1} සීතෙ සදා උදකමොතරිං, අය්යානං දණ්ඩභයභීතා වාචාදොසභයට්ටිතා.
237. කස්ස බ්රාහ්මණ ත්වං භීතො සදා උදකමොතරි, වෙධමානෙහි ගත්තෙහි සීතං වෙදයසෙ භුසං.
238. ජානන්තී වත මං හොති පුණ්ණිකෙ පරිපුච්ඡසි, කරොන්තං කුසලං කම්මං රුන්ධන්තං කත පාපකං.
239. යො ච වුද්ධො දහරො වා පාපකම්මං පකුබ්බතී, දකාභිසෙචනා සොපි පාපකම්මා පමුච්චති.
240. කොනු තෙ ඉදමක්ඛාසි අජානන්තස්ස අජානකො, දකාභිසෙචනා නාම පාපකම්මා පමුච්චති.
241. සග්ගං නූන ගමිස්සන්ති සබ්බෙ මණ්ඩුකකච්ඡපා, නක්කා ච සුංසුමාරා ච යෙ චඤ්ඤෙ උදකෙ චරා.
242. ඔරබ්භිකා සූකරිකා මච්ඡකා මිගබන්ධකා, චොරා ච වජ්ඣඝාතා ච යෙචඤ්ඤෙපාපකම්මිනො, දකාභිසෙචනා තෙපි පාපකම්මා පමුච්චරෙ.
243. සචෙ ඉමා නදියො තෙ පාපං පුබ්බෙ කතං වහුං, පුඤ්ඤානිමානි වහෙය්යුං තෙන ත්වං පරිබාහිරො.
244. යස්ස බ්රාහ්මණ ත්වං භීතො සදා උදකමොතරි, තමෙව බ්රහ්මෙ මාකාසි මා තෙ සීතං ඡවිං හනී.
245. කුම්මග්ගං පටිපන්නං මං අරියමග්ගං සමානයි, උදකාභිසෙචනා භොති ඉමං සාටං දදාමි තෙ.
246. තුය්හෙව සාටකො හොතු නාහං ඉච්ඡාමි සාටකං, සචෙ භායසි දුක්ඛස්ස සචෙ තෙ දුක්ඛමප්පියං.
247. මාකාසි පාපකං කම්මං ආවී වා යදි වා රහො, සචෙ ච පාපකං කම්මං කරිස්සසි කරොසි වා.
248. න තෙ දුක්ඛා පමුත්ත්යත්ථි උපෙච්චාපි පලායතො, සචෙ භාසසි දුක්ඛස්ස සචෙ තෙ දුක්ඛමප්පියං.
249. උපෙහි සරණං බුද්ධං ධම්මං සඞ්ඝඤ්ච තාදිනං, සමාදියාහි සීලානි තං තෙ අත්ථාය හෙහිති.
250. උපෙමි සරණං බුද්ධං ධම්මං සඞ්ඝඤ්ච තාදිනං, සමාදියාමි සීලානි තම්මෙ අත්ථාය හෙහිති.
251. බ්රහ්මබන්ධු පුරෙ ආසිං අජ්ජම්හි සච්ච බ්රාහ්මණො, තෙවිජ්ජො වෙදසම්පන්නො සොත්ථියො චම්හි නහාතකොති.
ඉත්ථං සුදං පුණ්ණා ථෙරී ගාථායො අභාසීති.
පුණ්ණාථෙරීගාථා.
සොළසනිපාතො නිට්ඨිතො.
20. වීසතිනිපාතො.
20. 1.
252. කාළකා භමරවණ්ණසාදිසා වෙල්ලිතග්ගා මම මුද්ධජා අහු, තෙ ජරාය සාණවාකසාදිසා{1} සච්චවාදිවචනං අනඤ්ඤථා.
253. වාසිතොව සුරභීකරණ්ඩකො පුප්ඵපූර{2} මම උත්තමඞ්ගජො, තං ජරාය සසලොමගන්ධිකං සච්චවාදිවචනං අනඤ්ඤථා.
254. කානනං’ව සහිතං සුරොපිතං කොච්ඡසූචිවිචිතග්ගසොභිතං, තං ජරාය විරලං තහිං තහිං සච්චවාදිවචනං අනඤ්ඤථා.
255. කණ්හඛන්ධනසුවණ්ණමණ්ඩිතං සොභතෙ{3} සුවෙණීහි ලඞ්කතං, තං ජරාය ඛජිතං සිරං කතං සච්චවාදිවචනං අනඤ්ඤථා.
256. චිත්තකාරසුකතාව ලෙඛිකා සොභරෙ සුභමුකා පුරෙ මම, තා ජරාය වලීහි පලම්බිතා සච්චවාදිවචනං අනඤ්ඤථා.
257. භස්සරා සුරුචිරා යථා මණි නෙත්තා’හෙසුං අභිනීලමයතා, තෙ ජරාය’භිහතා න සොභරෙ සච්චවාදිවචනං අනඤ්ඤථා.
258. සණ්හතුඞ්ගසදිසී ච නාසිකා සොභතෙ{4} සු අභියොබ්බනං පති සා ජරාය උප්පකූලිතා විය සච්චවාදිවචනං අනඤ්ඤථා.
259. කඞ්කණං’ව සුකතං සුනිට්ඨිතං සොභරෙ සු මම කණ්ණපාලියො තා ජරාය වලීහි පලම්බිතා සච්චවාදිවචනං අනඤ්ඤථා.
260. පත්තලීමකුලවණ්ණසාදිසා සොභරෙ සුදන්තා පුරෙ මම තෙ ජරාය ඛණ්ඩිතා ච පීතකා{5} සච්චවාදිවචනං අනඤ්ඤථා.
261. කානනම්හි වනසණ්ඩචාරිනී කොකිලාව මධුරං නිකූජිහං තං ජරාය ඛලිතං තහිං තහිං සච්චවාදිවචනං අනඤ්ඤථා.
262. සණ්හකම්බුරිව සුප්පමජ්ජිතා සොභතෙව සුගීවා පුරෙ මම සා ජරාය භග්ගා විනාමිතා සච්චවාදිවචනං අනඤ්ඤථා.
263. වට්ටපලිඝසදිසොපමා උභො සුසොභරෙ සුබාහා පුරෙ මම තා ජරාය යථා පාටලිප්පලිතා සච්චවාදිවචනං අනඤ්ඤථා.
264. සණ්හමුද්දිකසුවණ්ණමණ්ඩිතා සොභරෙ සුහත්ථා පුරෙ මම තෙ ජරාය යථ මූලමූලිකා සච්චවාදිවචනං අනඤ්ඤථා.
265. පීනවට්ට සහිතුග්ගතා උභො සොභරෙ සුථනකා පුරෙ මම ථෙවිකීව ලම්බන්ති නොදකා සච්චවාදිවචනං අනඤ්ඤථා.
266. කඤ්චනස්ස ඵලනංව සුමට්ටං සොභතෙ සුකායො පුරෙ මම සො වලීහි සුඛුමාහි ඔතතො සච්චවාදිවචනං අනඤ්ඤථා.
267. නාගභොගසදිසොපමා උභො සොභරෙ සුඌරු පුරෙ මම තෙ ජරාය යථ වෙළුනාළියො සච්චවාදීවචනං අනඤ්ඤථා.
268. සණ්හනූපුරසුවණ්ණමණ්ඩිතා සොභරෙ සුජඞ්ඝා පුරෙ මම තා ජරාය තිලදණ්ඩකාරිව සච්චවාදිවචනං අනඤ්ඤථා.
269. තූලපුණ්ණසදිසොපමා උභො සොභරෙ සුපාදා පුරෙ මම තෙ ජරාය ඵුටිතා වලීමතා සච්චවාදිවචනං අනඤ්ඤථා.
270. එදිසො අහු අයං සමුස්සයො ජජ්ජරො බහු දුඛානමාලයො සොපලෙපපතිතො ජරාඝාරො සච්චවාදිවචනං අනඤ්ඤථා.
ඉත්ථං සුදං අම්බපාලී ථෙරී ගාථායො අභාසීති.
අම්බපාලිථෙරීගාථා.
20. 2.
271. සමණාති භොති ත්වං සයසි{1} සමණාති පටිබුජ්ඣසි{2} සමණානමෙව{3} කිත්තෙසි සමණී නූන භවිස්සසි.
272. විපුලං අන්නඤ්ච පානඤ්ච සමණානං පයච්ඡසි{4} රොහිණී’දානි පුච්ඡාමි කෙන තෙ සමණා පියා?
273. අකම්මකාමා අලසා පරදත්තොපජීවිනො ආසංසුකා සාදුකාමා කෙන තෙ සමණා පියා?