136. සචිත්තං{7} පටිලද්ධාන වන්දිත්වාන උපාවිසිං සො මෙ ධම්මමදෙසෙසි අනුකම්පාය ගොතමො.
137. තස්ස ධම්මං සුණිත්වාන පබ්බජිං අනගාරියං යුඤ්ජන්තී සත්ථු වචනෙ සච්ඡාකාසිං පදං සිවං.
138. සබ්බෙ සොකා සමුච්ඡින්නා පහීනා එතදන්තීකා පරිඤ්ඤාතා හි මෙ වත්ථු යතො සොකානසම්භවො.
ඉත්ථං සුදං වාසෙට්ඨි ථෙරී ගාථායො අභාසීති.
වාසෙට්ඨිථෙරිගාථා.
6. 3.
139. දහරා ත්වං රූපවතී අහම්පි දහරො යුවා, පඤ්චඞ්ගිකෙන තුරුයෙන එහි ඛෙමෙ රමාමසෙ.
140. ඉමිනා පූතිකායෙන ආතුරෙන පභඞ්ගුනා අට්ටියාමි{1} හරායාමි කාමතණ්හා සමූහතා.
141. සත්තිසූලූපමාකාමා ඛන්ධාසං{2} අධිකුට්ටනා යං ත්වං කාමරතිං බ්රූසි අරති දානි සා මම.{3}
142. සබ්බත්ථ විහතා නන්දි තමොක්ඛන්ධො පදාලිතො එවං ජානාහි පාපිම නිහතො ත්වමසි අන්තක.
143. නක්ඛත්තානි නමස්සන්තා අග්ගිං පරිචරං වනෙ යථාභුච්චං අජානන්තා බාලා සුද්ධිං අමඤ්ඤථ.
144. අහඤ්ච ඛො නමස්සන්තී සම්බුද්ධං පුරිසුත්තමං පරිමුත්තා සබ්බදුක්ඛෙහි සත්ථුසාසනකාරිකාති.
ඉත්ථං සුදං ඛෙමා ථෙරී ගාථායො අභාසීති.
ඛෙමාථෙරීගාථා.
6. 4.
145. අලඞ්කතා සුවසනා මාලිනී චන්දනුක්ඛිතා සබ්බාභරණසඤ්ඡන්නා දාසීගණපුරක්ඛතා.
146. අන්නං පානඤ්ච ආදාය ඛජ්ජභොජ්ජමනප්පකං ගෙහතො නික්ඛමිත්වාන උය්යානමභිහාරයිං.
147. තත්ථ රමිත්වා කීළිත්වා ආගච්ඡන්ති සකං ඝරං විහාරං දට්ඨුං{4} පවිසිං සාකෙතෙ අඤ්ජනං වනං.
148. දිස්වාන ලොකපජ්ජොතං වන්දිත්වාන උපාවිසිං. සෙ මෙ ධම්මමදෙසෙසි අනුකම්පාය චක්ඛුමා.
149. සුත්වා ච ඛො මහෙසිස්ස සච්චං අප්පටිවිජ්ඣහං තත්ථෙව විරජං ධම්මං ඵුස්සයිං අමතං පදං.
150. තතො විඤ්ඤාත සද්ධම්මා පබ්බජිං අනගාරියං තිස්සො විජ්ජා අනුප්පත්තා අමොඝං බුද්ධසාසනං.
ඉත්ථං සුදං සුජාතා ථෙරී ගාථායො අභාසීති.
සුජාතාථෙරීගාථා.
6. 5.
151. උච්චෙ කුලෙ අහං ජාතා බහුවිත්තෙ මහද්ධනෙ වණ්ණරූපෙන සම්පන්නා ධීතා මෙඝස්ස අත්රජා.
152. පත්ථිතා රාජපුත්තෙහි සෙට්ඨිපුත්තෙහි භිජ්ඣිතා{1} පිතු මෙ පෙසයී දූතං දෙථ මය්හං අනොපමං.
153. යත්තකං තුලිතා එසා තුය්හං ධීතා අනූපමා. තතො අට්ඨගුණං දස්සං හිරඤ්ඤං රතනානි ච.
154. සාහං දිස්වාන සම්බුද්ධං ලොකජෙට්ඨං අනුත්තරං තස්ස පාදානි වන්දිත්වා එකමන්තං උපාවිසිං.
155. සො මෙ ධම්මමදෙසෙසි අනුකම්පාය ගොතමො නිසින්නා ආසනෙ තස්මිං ඵුස්සයිං{2} තතියං ඵලං.
156. තතො කෙසානි ඡෙත්වාන පබ්බජිං අනගාරියං අජ්ජ මෙ සත්තමී රත්ති යතො තණ්හා විසොසිතා.
ඉත්ථං සුදං අනොපමා ථෙරී ගාථායො අභාසීති.
අනොපමාථෙරීගාථා.
6. 6.
157. බුද්ධවීර නමොත්යත්ථු සබ්බසත්තානමුත්තම යො මං දුක්ඛා පමොචෙසි අඤ්ඤඤ්ච බහුකං ජනං
158. සබ්බදුක්ඛං පරිඤ්ඤාතං හෙතුතණ්හා විසොසිතා භාවිතො අට්ඨඞ්ගිකො{3} මග්ගො නිරොධෙ ඵුසිතො මයා
159. මාතා පුත්තො පිතා භාතා අය්යකා ච පුරෙ අහුං යථාභුච්චං අජානන්තී සංසරීහං අනිබ්බිසං.
160. දිට්ඨො හි මෙ සො භගවා අන්තිමො’යං සමුස්සයො වික්ඛීණො ජාතිසංසාරො නත්ථි දානි පුනබ්භවො.
161. ආරද්ධවිරියෙ පහිතත්තෙ නිච්චං දළ්හපරක්කමෙ සමග්ගෙ සාවකෙ පස්සෙ එසා බුද්ධාන වන්දනා.
162. බහුන්නං{4} වත අත්ථාය මායා ජනයි ගොතමං ව්යාධිමරණතුන්නානං දුක්ඛක්ඛන්ධ ව්යපානුදී’ති
ඉත්ථං සුදං මහාපජාපතිගොතමි ථෙරී ගාථායො අභාසීති.
මහාපජාපතීගොතමීථෙරීගාථා.
6. 7.
163. ගුත්තෙ යදත්ථං පබ්බජ්ජා හිත්වා පුත්තං පසුං පියං තමෙව අනුබ්රූහෙහි මා චිත්තස්ස වසං ගමී.
164. චිත්තෙන චඤ්චිතා සත්තා මාරස්ස විසයෙ රතා අනෙකජාතිසංසාරං සන්ධාවන්ති අවිද්දසූ.
165. කාමච්ඡන්දඤ්ච ව්යාපාදං සක්කායදිට්ඨිමෙව ච සීලබ්බතපරාමාසං විචිකිච්ඡඤ්ච පඤ්චමං.
166. සඤ්ඤොජනානි එතානි පජහිත්වාන භික්ඛුනී, ඔරමාගමනීයානි නයිදං පුනරෙහිසි.
167. රාගං මානං අවිජ්ජඤ්ච උද්ධච්චඤ්ච විවජ්ජිය, සඤ්ඤොජනානි ඡෙත්වාන දුක්ඛස්සන්තං කරිස්සසි.
168. ඛෙපෙත්වා ජාතිසංසාරං පරිඤ්ඤාය පුනබ්භවං දිට්ඨෙව ධම්මෙ නිච්ඡාතා උපසන්තා චරිස්සසීති.
ඉත්ථං සුදං ගුත්තා ථෙරී ගාථායො අභාසීති.
ගුත්තාථෙරීගාථා.
6. 8.
169. චතුක්ඛත්තුං පඤ්චක්ඛත්තුං විහාරා උපනික්ඛමිං අලද්ධා චෙතසො සන්තිං චිත්තෙ අවසවත්තිනී.
170. භික්ඛුනිං උපසඞ්කම්ම සක්කච්චං පරිපුච්ඡහං, සා මෙ ධම්මමදෙසෙසි ධාතු ආයතනානි ච.
171. චත්තාරි අරියසච්චානි ඉන්ද්රියානි බලානි ච බොජ්ඣඞ්ගට්ඨඞ්ගිකං මග්ගං උත්තමත්ථස්ස පත්තියා.
172. තස්සාහං වචනං සුත්වා කරොන්තී අනුසාසනිං, රත්තියා පුරිමෙ යාමෙ පුබ්බජාතිමනුස්සරිං.
173. රත්තියා මජ්ඣිමෙ යාමෙ දිබ්බචක්ඛුං විසොධයිං, රත්තියා පච්ඡිමෙ යාමෙ තමොක්ඛන්ධං පදාලයිං.
174. පීතිසුඛෙන ච කායං ඵරිත්වා විහරිං තදා, සත්තමියා පාදෙ පසාරෙසිං තමොක්ඛන්ධං පදාලියාති.
ඉත්ථං සුදං විජයා ථෙරී ගාථායො අභාසීති.
විජයාථෙරිගාථා.
ඡක්කනිපාතො නිට්ඨිතො.
7. සත්තකනිපාතො
7. 1.
175. මුසලානි ගහෙත්වාන ධඤ්ඤං කොට්ටෙන්ති මානවා, පුත්තදාරානි පොසෙන්තා ධනං වින්දන්ති මානවා.
176. ඝටෙථ බුද්ධසාසනෙ යං කත්වා නානුතප්පති, ඛිප්පං පාදානි ධොවිත්වා එකමන්තං නිසීදථ.
177. චිත්තං උපට්ඨපෙත්වාන එකග්ගං සුසමාහිතං, පච්චවෙක්ඛථ සඞ්ඛාරෙ පරතො නො ච අත්තතො.
178. තස්සාහං වචානං සුත්වා පටාචාරානුසාසනිං, පාදෙ පක්ඛාලයිත්වාන එකමන්තෙ උපාවිසිං.
179. රත්තියා පුරිමෙ යාමෙ පුබ්බජාතිමනුස්සරිං. රත්තියා මජ්ඣිමෙ යාමෙ දිබ්බචක්ඛුං විසොධයිං.
180. රත්තියා පච්ඡිමෙ යාමෙ තමොක්ඛන්ධං පදාලයිං, තෙවිජ්ජා අථ වුට්ඨාසිං කතා තෙ අනුසාසනී
181. සක්කංව දෙවා තිදසා සඞ්ගාමෙ අපරාජිතා, පුරක්ඛත්වා විහරාමි තෙවිජ්ජම්හි අනාසවාති.
ඉත්ථං සුදං උත්තරා ථෙරී ගාථායො අභාසීති.
උත්තරාථෙරීගාථා.
7. 2.
182. සතිං උපට්ඨපෙත්වාන භික්ඛුනී භාවිතින්ද්රියා, පටිවිජ්ඣි පදං සන්තං සඞ්ඛාරූපසමං සුඛං,
183. කන්නු උද්දිස්ස මුණ්ඩාසි සමණී විය දිස්සසි, න ච රොචෙසි පාසණ්ඩෙ නිමිදං චරසි මොමුහා.
184. ඉතො බහිද්ධා පාසණ්ඩා දිට්ඨියො උපනිස්සිතා, න තෙ ධම්මං විජතන්ති න තෙ ධම්මස්ස කොවිදා.
185. අත්ථි සක්යකුලෙ ජාතො බුද්ධො අප්පටිපුග්ගලො, සො මෙ ධම්මවදෙසෙසි දිට්ඨිනං සමතික්කමං.
186. දුක්ඛං දුක්ඛසමුප්පාදං දුක්ඛස්ස ච අතික්කමං, අරියඤ්චට්ඨඞ්ගිකං මග්ගං දුක්ඛූපසමගාමිනං.
187. තස්සාහං වචනං සුත්වා විහරිං සාසනෙ රතා, තිස්සො විජ්ජා අනුප්පත්තා කතං බුද්ධස්ස සාසනං
188. සබ්බත්ථ විහතා නන්දී තමොක්ඛන්ධෙ පදාලිතො. එවං ජානාහි පාපිම නිහතො ත්වමසි අන්තකාති.
ඉත්ථං සුදං චාලා ථෙරී ගාථායො අභාසීති.
චාලාථෙරීගාථා.
7. 3.
189. සතිමතී චක්ඛුමතී භික්ඛුනී භාවිතින්ද්රියා, පටිවිජ්ඣි පදං සන්තං අකාපුරිසසෙවිතං.
190. කින්නු ජාතිං න රොචෙසි ජාතො කාමානි භුඤ්ජති, භුඤ්ජාහි කාමරතියො මාහු පච්ඡානුතාපිනී.
191. ජාතස්ස මරණං හොති හත්ථපාදානඡෙදනං. වධබන්ධපරික්ලෙසං ජාතො දුක්ඛං නිගච්ඡති.
192. අත්ථ සක්යකුලෙ ජාතො සම්බුද්ධො අපරාජිතො, සො මෙ ධම්මමදෙසෙසි ජාතියා සමතික්කමං.
193. දුක්ඛං දුක්ඛසමුප්පාදං දුක්ඛස්ස ච අතික්කමං, අරියඤ්චට්ඨඞ්ගිකං මග්ගං දුක්ඛූපසමගාමිනං,
194. තස්සාහං වචනං සුත්වා විහරං සාසනෙ රතා. සිස්සො විජ්ජා අනුප්පත්තා කතං බුද්ධස්ස සාසනං.
195. සබ්බත්ථ විහතා නන්දි තමොක්ඛන්ධො පදාලිතො, එවං ජානාහි පාපිම නිහතො ත්වමසි අන්තකාති.
ඉත්ථං සුදං උපචාලාථෙරී ගාථායො අභාසීති.
උපචාලාථෙරිගාථා
සත්තකනිපාතො නිට්ඨිතො.
8. අට්ඨකනිපාතො.
8. 1.
196. භික්ඛුනී සූලසම්පන්නා ඉන්ද්රියෙසු සුසංවුතා, අධිගච්ඡෙ පදං සන්තං අසෙචනකමොජවං.
197. තාවතිංසා ච යාමා ච තුසිතා චාපි දෙවතා. නිම්මාණරතිනො දෙවා යෙ දෙවා වසවත්තිනො, තත්ථ චිත්තං පණිධෙහි තත්ථ තෙ වුසිතං පුරෙ.
198. තාවතිංසා ච යාමා ච තුසිතා චාපි දෙවතා, නිම්මාණරතිනො දෙවා යෙ දෙවා වසවත්තිනො.
199. කාලං කාලං භවාභවං සක්කායස්මිං පුරක්ඛතා, අවීතිවත්තා සක්කායං ජාතිමරණසාරිනො.
200. සබ්බො ආදිපිතො ලොකො සබ්බො ලොකො පදීපිතො, සබ්බො පජ්ජලිතො ලොකො සබ්බො ලොකො පකම්පිතො.
201. අකම්පියං අතුලියං අපුථුජ්ජනසෙවිතං, බුද්ධො ච ධම්මං දෙසෙසි තත්ථ මෙ නිරතො මනො.