74. පිලන්ධනං විදංසෙන්තී ගුය්හං පකාසිකං බහුං, අකාසිං විවිධං මායං උජ්ඣග්ඝන්තී බහුං ජනං.
75. සාජ්ජ පිණ්ඩං චරිත්වාන මුණ්ඩා සඞ්ඝාටිපාරුතා, නිසින්නා රුක්ඛමූලම්හි අවිතක්කස්ස ලාභිනී.
76. සබ්බෙ යොගා සමුච්ඡින්නා යෙ සිබ්බා යෙ ච මානුසා, ඛෙපෙත්වා ආසවෙ සබ්බෙ සීතිභූතාම්හි නිබ්බුතාති.
ඉත්ථං සුදං විමලාථෙරී ගාථායො අභාසිත්ථා’ති.
විමලාථෙරීගාථා.
5. 3.
77. අයොනිසො මනසිකාරා කාමරාගෙන අට්ටිතා,{1} අහොසිං උද්ධතා පුබ්බෙ චිත්තෙ අවසවත්තිනී.
78. පරියුට්ඨිතා කිලෙසෙහි{2} සුභසඤ්ඤානුවත්තිනී,{3} සමං චිත්තස්ස නාලභිං{4} රාගචිත්තවසානුගා.
79. කිසා පණ්ඩු විවණ්ණා ච සත්තවස්සානි චාරි’හං, නාහං දිවා වා රත්තිං වා සුඛං වින්දිං සුදුක්ඛිතා.
80. තතො අජ්ජුං ගහෙත්වාන පාවිසිං වනමන්තරං, වරං මෙ ඉධ උබ්බන්ධං යඤ්ච හීනං පුනාචරෙ.
81. දළ්හං පාසං කරිත්වාන රුක්ඛසාඛාය බන්ධිය, පක්ඛිපිං පාසං ගීවාය{5} අථ චිත්තං විමුච්චි මෙති.
ඉත්ථං සුදං සීහා ථෙරී ගාථායො අභාසිත්ථා’ති.
සීහාථෙරීගාථා.
5. 4.
82. ආතුරං අසුචිං පූතිං පස්ස නන්දෙ සමුස්සයං අසුභාය චිත්තං භාවෙහි එකග්ගං සුසමාහිතං.
83. යඡා ඉදං තථා එතං යථා එතං තථා ඉදං දුග්ගන්ධං පූතිකං වාති බාලානං අභිනන්දිතං.
84. එවමෙතං අවෙක්ඛන්තී රත්තින්දිවමතන්දිතා තතො සකාය පඤ්ඤාය අභිනිබ්භිජ්ජ{6} දක්ඛිසං.{7}
85. තස්සා මෙ අප්පමත්තාය විචිනන්තියා යොනිසො යථාභූතං අයං කායො දිට්ඨො සන්තරබාහිරො.
86. අථ නිබ්බින්දහං{8} කායෙ අජ්ඣත්තඤ්ච විරජ්ජහං අප්පමත්තා විසංයුත්තා උපසන්තාම්හි නිබ්බුතාති.
ඉත්ථං සුදං සුන්දරීනන්දාථෙරී ගාථායො අභාසිත්ථා’ති.
සුන්දරීනන්දාථෙරීගාථා.
5. 5.
87. අග්ගිං චන්දඤ්ච{1} සුරියඤ්ච{1} දෙවතා ච නමස්සිහං නදීතිත්ථානි ගන්ත්වාන උදකං ඔරුහාමිහං.
88. බහුවතසමාදානා අඩ්ඪං සීසස්ස ඔලිඛිං, ඡමාය සෙය්යං කප්පෙමි රත්තිං භත්තං න භුඤ්ජිහං{2}
89. විභූසාමණ්ඩනරතා නහාපනුච්ඡාසනෙහි ච උපාකාසිං ඉමං කායං කාමරාගෙන අට්ටිතා.
90. තතො සද්ධං ලභිත්වාන පබ්බජිං අනගාරියං, දිස්වා කායං යථාභූතං{3} කාමරාගො සමූහතො.
91. සබ්බෙ භවා සමුච්ඡින්නා ඉච්ඡා ච පත්ථනාපි ච, සබ්බයොගවිසංයුත්තා සන්තිං පාපුණි{4} චෙතසොති.
ඉත්ථං සුදං නන්දුත්තරා ථෙරී ගාථායො අභාසිත්ථා’ති.
නන්දුත්තරාථෙරීගාථා.
5. 6.
92. සද්ධාය පබ්බජිත්වාන අගාරස්මානගාරියං විචරිහං තෙන තෙන ලාභසක්කාර උස්සුකා.
93. රිඤ්චිත්වා පරමං අත්ථං හීනං අත්ථමසෙවිහං කිලෙසානං වසං ගන්ත්වා සාමඤ්ඤත්ථං න බුජ්ඣිහං.
94. තස්සා මෙ අහු සංවෙගො නිසින්නාය විහාරකෙ උම්මග්ගපටිපන්නම්හි තණ්හාය වසමාගතා.
95. අප්පකං ජීවිතං මය්හං ජරා ව්යාධි ච මද්දති, ජරාය භිජ්ජතෙ කායො න මෙ කාලො පමජ්ජිතුං.
96. යථාභූතං අවෙක්ඛන්තී ඛන්ධානං උදයබ්බයං, විමුත්තචිත්තා උට්ඨාසිං කතං බුද්ධස්ස සාසනන්ති.
ඉත්ථං සුදං මිත්තා කාළී ථෙරී ගාථායො අභාසිත්ථා’ති.
මිත්තාකාළිථෙරීගාථා.
5. 7.
97. අගාරස්මිං වසන්තීහං ධම්මං සුත්වාන භික්ඛුනො, අද්දසං විරජං ධම්මං නිබ්බානං පදමච්චුතං.
98. සාහං පුත්තං ධීතරඤ්ච{1} ධනධඤ්ඤඤ්ච ඡඩ්ඩිය කෙසෙ ඡෙදාපයිත්වාන පබ්බජිං අනගාරියං.
99. සික්ඛමානා අහං සන්තී භාවෙන්තී මග්ගමඤ්ජසං, පහාසිං රාගදොසඤ්ච තදෙකට්ඨෙ ච ආසවෙ.
100. භික්ඛුනී උපසම්පජ්ජ පුබ්බෙ ජාතිමනුස්සරිං විසොධිතං දිබ්බචක්ඛුං විමලං සාධුභාවිතං.
101. සඞ්ඛාරෙ පරතො දිස්වා හෙතුජාතෙ පලොකිතෙ පහාසිං ආසවෙ සබ්බෙ සීතිභූතාම්හි නිබ්බුතාති.
ඉත්ථං සුදං සකුලා ථෙරී ගාථායො අභාසිත්ථාති.
සකුලාථෙරීගාථා.
5. 8.
102. දස පුත්තෙ විජායිත්වා අස්මිං රූපසමුස්සයෙ තතොහං දුබ්බලා ජිණ්ණා භික්ඛුනිං උපසඞ්කමිං.
103. සා මෙ ධම්මමදෙසෙසි ඛන්ධායතනධාතුයො තස්සා ධම්මං සුණිත්වාන කෙසෙ ඡෙත්වාන පබ්බජිං.
104. තස්සා මෙ සික්ඛමානාය දිබ්බචක්ඛු විසොධිතං, පුබ්බෙනිවාසං ජානාමි යත්ථ මෙ වුසිතං පුරෙ.
105. අනිමිත්තඤ්ච භාවෙමි එකග්ගා සුසමාහිතා, අනන්තරා විමොක්ඛාසිං අනුපාදාය නිබ්බුතා.
106. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා, ධී තවත්ථු ජරෙ ඡම්මෙ{2} නත්ථි දානි පුනබ්භවොති.
ඉත්ථං සුදං සොණා ථෙරී ගාථායො අභාසිත්ථාති.
සොණථෙරීගාථා.
5. 9.
107. ලුනකෙසි පඞ්කධරී වකසාටී පුරෙ චරිං, අවජ්ජෙ වජ්ජමතිනී වජ්ජෙ චාවජ්ජදස්සිනී.
108. දිවාවිහාරා නික්ඛම්ම ගිජ්ඣකූටම්හි පබ්බතෙ අද්දසං විරජං බුද්ධං භික්ඛුසඞ්ඝපුරක්ඛතං.
109. නිහච්ච ජාණුං වන්දිත්වා සම්මුඛා පඤ්ජලිං අකං, එහි භද්දෙති මං අවච සා මෙ ආසූපසම්පදා.
110. චිණ්ණා අඞ්ගා ච මගධා වජ්ජී කාසී ච කොසලා, අනණා පණ්ණාසවස්සානි රට්ඨපිණ්ඩමභුඤ්ජිහං.
111. පුඤ්ඤං වත පසවී බහුං සප්පඤ්ඤො වතායං උපාසකො, යො භද්දාය චීවරං අදාසි විප්පමුත්තාය සබ්බගන්ථෙහීති.
ඉත්ථං සුදං භද්දා කුණ්ඩලකෙසා ථෙරී ගාථායො අභාසිත්ථාති.
භද්දාකුණ්ඩලකෙසාථෙරීචගාථා.
5. 10.
112. නඞ්ගලෙහි කසං ඛෙත්තං බීජානි පවපං ඡමා, පුත්තදාරානි පොසෙන්තා ධනං වින්දන්ති මානවා.
113. කිමහං සීලසම්පන්නා සත්ථුසාසනකාරිකා, නිබ්බානං නාධිගච්ඡාමි අකුසිතා අනුද්ධතා.
114. පදෙ පක්ඛාලයිත්වාන උදකෙසු කරොමහං, පදොදකඤ්ච දිස්වාන ථලතො නින්නමාගතං.
115. තතො චිත්තං සමාධෙසිං අස්සං භද්දං’වජානියං, තතො දීපං ගහෙත්වාන විහාරං පාවිසිං අහං.
116. සෙය්යං ඔලොකයිත්වාන මඤ්චකම්හි උපාවිසිං, තතො සූචිං ගහෙත්වාන වට්ටිං ඔකස්සයාමහං පදීපස්සෙව නිබ්බානං විමොක්ඛො අහු චෙතසොති.
ඉත්ථං සුදං පටාචාරා ථෙරී ගාථායො අභාසිත්ථාති.
පටාචාරාථෙරීගාථා.
5. 11.
117. මූසලානි ගහෙත්වාන ධඤ්ඤං කොට්ටෙන්ති මානවා{1} පුත්තදාරානි පොසෙන්තා ධනං වින්දන්ති මානවා{1}:
118. කරොථ බුද්ධසාසනං යං කත්වා නානුතප්පති, ඛිප්පං පාදානි ධොවිත්වා එකමන්තෙ නිසීදථ, චෙතොසමථමනුයුත්තා කරොථ බුද්ධසාසනං.
119. තස්සා තා වචනං සුත්වා පටාචාරාය සාසනං, පාදෙ පක්ඛාලයිත්වාන එකමන්තං උපාවිසුං, චෙතොසමථමනුයුත්තා අකංසු බුද්ධසාසනං.
120. රත්තියා පුරිමෙ යාමෙ පුබ්බජාතිං අනුස්සරුං, රත්තියා මජ්ඣිමෙ යාමෙ දිබ්බචක්ඛුං විසොධයුං, රත්තියා පච්ඡිමෙ යාමෙ තමොක්ඛන්ධං පදාලයුං.
121. උට්ඨාය පාදෙ වන්දිංසු කතා තෙ අනුසාසනී, ඉන්දංව තිදසා දෙවා සඞ්ගාමෙ අපරාජිතං, පුරක්ඛත්වා විහරියාම තෙවිජ්ජම්හ අනාසවාති.
ඉත්ථං සුදං තිංසමත්තා ථෙරී භික්ඛුනියො ගාථායො අභාසිත්ථාති.
තිංසමත්තාථෙරී භික්ඛූනීගාථා.
5. 12.
122. දුග්ගතාහං පුරෙ ආසිං විධවා ච අපුත්තිකා, විනා මිත්තෙහි ඤාතීහි භත්තචොළස්ස නාධිගං.
123. පත්තං දණ්ඩඤ්ච ගණ්හිත්වා භික්ඛමානා කුලාකුලං, සීතුණ්හෙන ච ඩය්හන්තී සත්තවස්සානි චාරිහං.
124. භික්ඛුනිං පුන දිස්වාන අන්නපානස්ස ලාභිනිං, උපසඞ්කම්මාවොචං පබ්බජ්ජං අනගාරියං.
125. සා ච මං අනුකම්පාය පබ්බාජෙසි පටාචාරා, තතො මං ඔවදිත්වාන පරමත්ථෙ නියොජයී.
126. තස්සාහං වචනං සුත්වා අකාසිං අනුසාසනිං, අමොඝොය්යාය ඔවාදො තෙවිජ්ජම්හි අනාසවාති.
ඉත්ථං සුදං චන්දා ථෙරී ගාථායො අභාසිත්ථාති.
චන්දාථෙරීගාථා.
පඤ්චකනිපාතො නිට්ඨිතො.
6. ඡක්කනිපාතො.
6. 1.
127. යස්ස මග්ගං න ජානාති ආගතස්ස ගතස්ස වා තං කුතො ආගතං සත්තං මම පුත්තොති රොදසි.
128. මග්ගඤ්ච ඛොස්ස ජානාසි ආගතස්ස ගතස්ස වා න නං සමනුසොචෙසි එවං ධම්මා හි පාණිනො.
129. අයාචිතො තතාගච්ඡි අනනුඤ්ඤාතො{1} ඉතො ගතො කුතොචි නූන ආගන්ත්වා වසිත්වා කතිපාහකං ඉතො’පි අඤ්ඤෙන ගතො තතො අඤ්ඤෙන{2} ගච්ඡති.
130. පෙතො මනුස්සරූපෙන ස සරන්තො ගමිස්සති, යථාගතො තථා ගතො කා තත්ථ පරිදෙවනා.
131. අබ්බහී වත මෙ සල්ලං දුද්දසං හදයනිස්සිතං{3} යා මෙ සොකපරෙතාය පුත්තසොකං ව්යපානුදි.
132. සාජ්ජ අබ්බූළ්හසල්ලාහං නිච්ඡාතා පරිනිබ්බුතා බුද්ධං ධම්මඤ්ච සඞ්ඝඤ්ච උපෙමි සරණං මුනිං.
ඉත්ථං සුදං පඤ්චසතමත්තා ථෙරී භික්ඛුනියො ගාථායො අභාසිත්ථාති.
පඤ්චසතමත්තානං ථෙරීනං ගාථා.
6. 2.
133. පුත්තසොකෙනහං අට්ටා ඛිත්තචිත්තා විසඤ්ඤිනී, නග්ගා පකිණ්ණකෙසි ච තෙන තෙන විචාරිහං.
134. වසිං{4} සඞ්කාරකූටෙසු සුසානෙ රථියාසු ච අචරිං තීණි වස්සානි ඛුප්පිපාසා සමප්පිතා.
135. අථද්දසාසිං{5} සුගතං නගරං මිථිලං පති,{6} අදන්තානං දමෙතාරං සම්බුද්ධමකුතොභයං.