ඉත්ථං සුදං ආයස්මා සන්ධිතො ථෙරො ගාථායො අභාසිත්ථා’ති.
සන්ධිතත්ථෙරගාථා.
වග්ගො පඤ්චමො.
තස්සුද්දානං:
කුමාරකස්සපො ථෙරො ධම්මපාලො ච බ්රහ්මාලි, මොඝරාජා විසාඛො ච චූළකො ච අනූපමො, වජ්ජිතො සන්ධිතො ථෙරො කිලෙසරජවාහනො’ති.
ගාථා දුකනිපාතම්හි නවුති චෙව අට්ඨ ච ථෙරා එකූනපඤ්ඤාසං භාසිතා නයකොවිදා’ති.
දුකනිපාතො නිට්ඨිතො.
3. තිකනිපාතො.
3. 1. 1.
219. අයොනි සුද්ධිමන්වෙසං අග්ගිං පරිචරිං වනෙ, සුද්ධිමග්ගං අජානන්තො අකාසිං අමරං තපං.
220. තං සුඛෙන සුඛං ලද්ධං පස්ස ධම්මසුධම්මතං, තිස්සො විජ්ජා අනුප්පත්තා කතං බුද්ධස්ස සාසනං.
221. බ්රහ්මබන්ධු පුරෙ ආසිං ඉදානි ඛොම්හි බ්රාහ්මණො, තෙවිජ්ජො නහාතකො{1} චම්හි සෙත්ථියො චම්හි වෙදගූ’ති.
ඉත්ථං සුදං ආයස්මා අග්ගිකභාරද්වාජො ථෙරො ගාථායො අභාසිත්ථා’ති.
අග්ගිකභාරද්වාජත්ථෙරගාථා.
3. 1. 2.
222. පඤ්චාහාහං පබ්බජිතො සෙඛො අප්පත්තමානසො, විහාරං මෙ පවිට්ඨස්ස චෙතසො පණිධී අහු.
223. නාසිස්සං{2} න පිවිස්සාමි විහාරතො න නික්ඛමෙ, නපි පස්සං නිපාතෙස්සං{3} තණ්හාසල්ලෙ අනූහතෙ.
224. තස්ස චෙවං විහරතො පස්ස විරියපරක්කමං, තිස්සො විජ්ජා අනුපුපත්තා කතං බුද්ධස්ස සාසන’න්ති.
ඉත්ථං සුදං ආයස්මා පච්චයො ථෙරො ගාථායො අභාසිත්ථා’ති.
පච්චයත්ථෙරගාථා.
3. 1. 3.
225. යො පුබ්බෙ කරණීයානි පච්ඡා සො කාතුමිච්ඡති, සුඛා සො ධංසතෙ ඨානා පච්ඡා ච මනුතප්පති.
226. යං හි කයිරා තං හි වදෙ යං න කයිරා න තං වදෙ, අකරොන්තං භාසමානං{4} පරිජානන්ති පණ්ඩිතා.
227. සුසුඛං වත නිබ්බානං සම්මාසම්බුද්ධදෙසිතං, අසොකං විරජං ඛෙමං යත්ථ දුක්ඛං නිරුජ්ඣතී’ති.
ඉත්ථං සුදං ආයස්මා බක්කුලො ථෙරො ගාථායො අභාසිත්ථා’ති.
බක්කුලත්ථෙරගාථා.
3. 1. 4.
228. සුඛඤ්චෙ ජීවිතුං ඉච්ඡෙ සාමඤ්ඤස්මිං අපෙක්ඛවා, සඞ්ඝිකං නාතිමඤ්ඤෙය්ය චීවරං පානභොජනං.
229. සුඛඤ්චෙ ජීවිතුං ඉච්ඡෙ සාමඤ්ඤස්මිං අපෙක්ඛවා, අහි මුසිකසොබ්භං ව සෙවෙථ සයනාසනං.
230. සුඛඤ්චෙ ජීවිතුං ඉච්ඡෙ සාමඤ්ඤස්මිං අපෙක්ඛවා, ඉතරීතරෙන තුස්සෙය්ය එකධම්මඤ්ච භාවයෙති.
ඉත්ථං සුදං ආයස්මා ධනියො ථෙරො ගාථායො අභාසිත්ථා’ති.
ධනියත්ථෙරගාථා.
3. 1. 5.
231. අතිසීතං අතිඋණ්හං අතිසායමිදං අහු, ඉති විස්සට්ඨකම්මන්තෙ ඛණා අච්චෙන්ති මාණවෙ.
232. යො ච{1} සීතඤ්ච උණ්හඤ්ච තිණා භිය්යො න මඤ්ඤති, කරං පුරිසකිච්චානි සො සුඛා න විහායති.
233. දබ්බං කුසං පොටකිලං උසීරං මුඤ්ජබබ්බජං{2} උරසා පනුදිස්සාමි{3} විවෙකමනුබ්රූහයන්ති.
ඉත්ථං සුදං ආයස්මා මාතඞ්ගපුත්තො ථෙරො ගාථායො අභාසිත්ථා’ති.
මාතඞ්ගපුත්තත්ථෙරගාථා.
3. 1. 6.
234. යෙ චිත්තකථී බහුස්සුතා සමණා පාටලිපුත්තවාසිනො, තෙසඤ්ඤතරොයමායුමා{4} ද්වාරෙ තිට්ඨති ඛුජ්ජසොභිතො.
235. යෙ චිත්තකථී බහුස්සුතා සමණා පාටලිපුත්තවාසිනො, තෙසඤ්ඤතරොයමායුවා ද්වාරෙ තිට්ඨති මාලුතෙරිතො.
236. සුයුද්ධෙන සුයිට්ඨෙන සඞ්ගාමවිජයෙන ච, බ්රහ්මචරියානුචිණ්ණෙන එවායං සුඛමෙධතී’ති.
ඉත්ථං සුදං ආයස්මා ඛුජ්ජසොභිතො ථෙරො ගාථායො අභාසිත්ථා’ති.
ඛුජ්ජසොභිතත්ථෙරගාථා.
3. 1. 7.
237. යොධ කොචි මනුස්සෙසු පරපාණානි හිංසති, අස්මා ලොකා පරම්හා ච උභයා ධංසතෙ නරො.
238. යො ච මෙත්තෙන චිත්තෙන සබ්බපාණානුකම්පති, බහුං{1} සො පසවති පුඤ්ඤං තෙන තාදිසකො{2} නරො.
239. සුභාසිතස්ස සික්ඛෙථ සමණූපාසනස්ස ච, එකාසනස්ස රහො චිත්තවූපසමස්ස චාති.
ඉත්ථං සුදං ආයස්මා වාරණො ථෙරො ගාථායො අභාසිත්ථා’ති.
වාරණත්ථෙරගාථා.
3. 1. 8.
240. එකොපි සද්ධො මෙධාවී අස්සද්ධානීධ ඤාතිනං, ධම්මට්ඨො සීලසම්පන්නො හොති අත්ථාය බන්ධුනං,
241. නිග්ගය්හ අනුකම්පාය චොදිතො ඤාතයො මයා, ඤාතිබන්ධවපෙමෙන කාරං කත්වාන භික්ඛූසු.
242. තෙ අබ්භතීතා කාලංකතා පත්තා තෙ තිවිධං සුඛං, භාතරො මයුහං මාතා ච මොදන්ති කාමකාමිනො’ති.
ඉත්ථං සුදං ආයස්මා පස්සිකො{3} ථෙරො ගාථායො අභාසිත්ථා’ති.
පස්සිකත්ථෙරගාථා.
3. 1. 9.
243. කාළපබ්බඞ්ගසඞ්කාසො{4} කිසො ධමනිසන්ථතො, මත්තඤ්ඤූ අන්නපානම්හි අදීනමනසො නරො.
244. ඵුට්ඨො ඩංසෙහි මකසෙහි අරඤ්ඤස්මිං බ්රහාවනෙ, නාගො සඞ්ගාමසීසෙව සතො තත්රාධිවාසයෙ.
245. යථා බ්රහ්මා තථා එකො යථා දෙවො තථා දුවෙ, යථා ගාමො තථා තයො කොලාහාලං තතුත්තරින්ති.
ඉත්ථං සුදං ආයස්මා යසොජො ථෙරො ගාථායො අභාසිත්ථා’ති.
යසොජත්ථෙරගාථා.
3. 1. 10.
246. අහු තුය්හං පුරෙ සද්ධා සා තෙ අජ්ජ න විජ්ජති, යං තුය්හං තුය්හමෙවෙතං නත්ථි දුච්චරිතං මම.
247. අනිච්චා හි චලා සද්ධා එවං දිට්ඨා හි සා මයා, රජ්ජන්තිපි විරජ්ජනිති තත්ථ කිං ජිය්යතෙ මුනි.
248. පච්චති මුනිනො භත්තං ථොක ථොකං කුලෙ කුලෙ, පිණ්ඩිකාය චරිස්සාමි අත්ථි ජඞ්ඝාබලං මමා’ති.
ඉත්ථං සුදං ආයස්මා සාටිමත්තියො ථෙරො ගාථායො අභාසිත්ථා’ති.
සාටිමත්තියත්ථෙරගාථා.
3. 1. 11.
249. සද්ධාය අභිනික්ඛම්ම නවපබ්බජිතො නවො, මිත්තෙ භජෙය්ය කල්යාණෙ සුද්ධාජීවෙ අතන්දිතෙ.
250. සද්ධාය අභිනික්ඛම්ම නවපබ්බජිතො නවො, සඞ්ඝස්මිං විහරං භික්ඛු සික්ඛෙථ විනයං බුධො.
251. සද්ධාය අභිනික්ඛම්ම නවපබ්බජිතො නවො, කප්පාකප්පෙසු කුසලො විහරෙය්ය{1} අපුරක්ඛතො.
ඉත්ථං සුදං ආයස්මා උපාලිත්ථෙරො ගාථායො අභාසිත්ථා’ති.
උපාලිත්ථෙරගාථා.
3. 1. 12.
252. පණ්ඩිතං වත මං සන්තං අලමත්ථවිචින්තකං, පඤ්චකාමගුණා ලොකෙ සම්මොහා පාතයිංසු මං.
253. පක්ඛන්නො{2} මාරවිසයෙ දළ්හසල්ලසමප්පිතො, අසක්ඛිං මච්චුරාජස්ස අහං පාසා පමුච්චිතුං.
254. සබ්බෙ කාමා පහීනා මෙ භවා සබ්බෙ විදාළිතා,{3} වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා උත්තරපාලත්ථෙරො ගාථායො අභාසිත්ථා’ති.
උත්තරපාලත්ථෙරගාථා.
3. 1. 13.
255. සුණාථ ඤාතයො සබ්බෙ යාවන්තෙත්ථ සමාගතා, ධම්මං වො දෙසයිස්සමි දුක්ඛා ජාති පුනප්පුනං.
256. ආරභථ නික්ඛමථ යුඤ්ජථ බුද්ධසාසනෙ, ධුනාථ මච්චුනො සෙනං නළාගාරං ව කුඤ්ජරො.
257. යො ඉමස්මිං ධම්මවිනයෙ අප්පමත්තො විහෙස්සති{1} පහාය ජාතිසංසාරං දුක්ඛස්සන්තං කරිස්සතී’ති.
ඉත්ථං සුදං ආයස්මා අභිභූතො ථෙරො ගාථායො අභාසිත්ථා’ති.
අභිභූතත්ථෙරගාථා.
3. 1. 14.
258. සංසරං හි නිරයං අගච්ඡිසං{2} පෙතලොකමගමං පුනප්පුනං, දුක්ඛමම්හි පි තිරච්ඡානයොනියං{3} නෙකධා හි වුසිතං චිරං මයා.
259. මානුසො පි ච භවොභිරාධිතො සග්ගකායමගමං සකිං සකිං, රූපධාතුසු අරූපධාතුසු නෙවසඤ්ඤිසු අසඤ්ඤීසුට්ඨිතං.
260. සම්භවා සුවිදිතා අසාරකා සඞ්ඛතා පචලිතා සදෙරිතා, තං විදිත්වා{4} මහමත්තසම්භවං, සන්තිමෙව සතිමා සමජ්ඣග’න්ති.
ඉත්ථං සුදං ආයස්මා ගොතමො ථෙරො ගාථායො අභාසිත්ථා’ති.
ගොතමත්ථෙරගාථා.
3. 1. 15.
261. යො පුබ්බෙ කරණීයානි පච්ඡා සො කාතුමිච්ඡති, සුඛා සො ධංසතෙ ඨානා පච්ඡා ච මනුතප්පති.
262. යඤ්හි කයිරා තඤ්හි වදෙ යං න කයිරා න තං වදෙ, අකරොන්තං භාසමානං{5} පරිජානන්ති පණ්ඩිතා.
263. සුසුඛං වත නිබ්බානං සම්මාම්බුද්ධදෙසිතං, අසොකං විරජං ඛෙමං යත්ථ දුක්ඛං නිරුජ්ඣතී’ති.
ඉත්ථං සුදං ආයස්මා හාරිතො ථෙරො ගාථායො අභාසිත්ථා’ති.
හාරිතත්ථෙරගාථා.
3. 1. 16.
264. පාපමිත්තෙ විවජ්ජෙත්වා භජෙය්යුත්තමපුග්ගලෙ ඔවාදෙ චස්ස තිට්ඨෙය්ය පත්ථෙන්තො අචලං සුඛං.