එකධම්මසවනීයත්ථෙරගාථා.
1. 7. 8.
68. අධිචෙතසො අප්පමජ්ජතො මුනිනො මොනපථෙසු සික්ඛතො සොකා න භවන්ති තාදිනො උපසන්තස්ස සදා සතීමතො’ති.
ඉත්ථං සුදං ආයස්මා එකුදානියො ථෙරො ගාථං අභාසිත්ථා’ති.
එකුදානියත්ථෙරගාථා.
1. 7. 9.
69. සුත්වාන ධම්මං මහතො මහාරසං සබ්බඤ්ඤුතඤ්ඤණවරෙන දෙසිතං මග්ගං පපජ්ජිං අමතස්ස පත්තියා සො යොගක්ඛෙමස්ස පථස්ස කොවිදො’ති.
ඉත්ථං සුදං ආයස්මා ඡන්නො ථෙරො ගාථං අභාසිත්ථා’ති.
ඡන්නත්ථෙරගාථා.
1. 7. 10.
70. සීලමෙව ඉධ අග්ගං පඤ්ඤවා පන උත්තමො මනුස්සෙසු ච දෙවෙ සු සීලපඤ්ඤාණතො ජය’න්ති.
ඉත්ථං සුදං ආයස්මා පුණ්ණො ථෙරො ගාථං අභාසිත්ථා’ති.
පුණ්ණත්ථෙරගාථා.
සත්තමො වග්ගො.
තස්සුද්දානං:
වප්පො ච වජ්ජිපුත්තො ච පක්ඛො විමලකොණ්ඩඤ්ඤො උක්ඛෙපකටවච්ඡො ච මෙඝියො එකධම්මිකො එකුදානියච්ඡන්නා ච පුණ්ණත්ථෙරො මහබ්බලො’ති.
අට්ඨමො වග්ගො
1. 8. 1.
71. සුසුඛුමනිපුණත්ථදස්සිනා මතිකුසලෙන නිවාතවුත්තිනා සංසෙවිත වුද්ධසීලිනා{1} නිබ්බානං න හි තෙන දුල්ලභ’න්ති.
ඉත්ථං සුදං ආයස්මා වච්ඡපාලො ථෙරො ගාථං අභාසිත්ථා’ති.
වච්ඡපාලත්ථෙරගාථා.
1. 8. 2.
72. යථා කළීරො සුසු වඩ්ඪිතග්ගො දුන්නික්ඛමො හොති පසාඛජාතො එවං අහං භරියායානීතාය අනුමඤ්ඤ මං පබ්බජිතොම්හි දානී’ති.
ඉත්ථං සුදං ආයස්මා ආතුමො ථෙරො ගාථං අභාසිත්ථා’ති.
ආතුමත්ථෙරගාථා.
1. 8. 3.
73. ජිණ්ණං ච දිස්වා දුඛිතං ච{2} බ්යාධිතං මතං ච දිස්වා ගතමායුසඞ්ඛයං තතො අහං නික්ඛමිතූන පබ්බජිං පහාය කාමානි මනොරමානී’ති.
ඉත්ථං සුදං ආයස්මා මාණවො ථෙරො ගාථං අභාසිත්ථා’ති.
මාණවත්ථෙරගාථා.
1. 8. 4.
74. කාමච්ඡන්දො ච බ්යාපාදො ථීනමිද්ධං ච භික්ඛුනො උද්ධච්චං විචිකිච්ඡා ච සබ්බසො’ව න විජ්ජතී’ති.
ඉත්ථං සුදං ආයස්මා සුයාමො{3} ථෙරො ගාථං අභාසිත්ථා’ති.
සුයාමත්ථෙරගාථා.
1. 8. 5.
75. සාධු සුවිහිතාන දස්සනං කඞ්ඛා ඡිජ්ජති බුද්ධි වඩ්ඪති බාලම්පි කරොන්ති පණ්ඩිතං තස්මා සාධු සතං සමාගමො’ති.
ඉත්ථං සුදං ආයස්මා සුසාරදො ථෙරො ගාථං අභාසිත්ථා’ති.
සුසාරදත්ථෙරගාථා.
1. 8. 6.
76. උප්පතන්තෙසු නිපතෙ නිපතන්තෙසු උප්පතෙ වසෙ අවසමානෙසු රමමානෙසු නො රමෙ’ති.
ඉත්ථං සුදං ආයස්මා පියඤ්ජහො ථෙරො ගාථං අභාසිත්ථා’ති.
පියඤ්ජහත්ථෙරගාථා.
1. 8. 7.
77. ඉදං පුරෙ චිත්තමචාරි චාරිකං යෙනිච්ඡකං යත්ථකාමං යථාසුඛං තදජ්ජහං නිග්ගහෙස්සාමි{1} යොනිසො හත්ථිප්පභින්නං විය අඞ්කුසග්ගහො’ති.
ඉත්ථං සුදං ආයස්මා හත්ථාරොහපුත්තො ථෙරො ගාථං අභාසිත්ථා’ති.
හත්ථාරොහපුත්තත්ථෙරගාථා.
1. 8. 8.
78. අනෙකජාතිසංසාරං සන්ධාවිස්සං අනිබ්බිසං තස්ස මෙ දුක්ඛජාතස්ස දුක්ඛක්ඛන්ධො අපරද්ධො’ති.
ඉත්ථං සුදං ආයස්මා මෙණඩසිරො ථෙරො ගාථං අභාසිත්ථා’ති.
මෙණ්ඩසිරත්ථෙරගාථා.
1. 8. 9.
79. සබ්බො රාගො පහීනො මෙ සබ්බො දොසො සමූහතො සබ්බො මෙ විගතො මොහො සීතිභූතොස්මි නිබ්බුතො’ති.
ඉත්ථං සුදං ආයස්මා රක්ඛිතො ථෙරො ගාථං අභාසිත්ථා’ති.
රක්ඛිතත්ථෙරගාථා.
1. 8. 10.
80. යං මයා පකතං කම්මං අප්පං වා යදි වා බහුං{2} සබ්බමෙතං පරික්ඛීණං නත්ථි දානි පුනබ්භවො’ති.
ඉත්ථං සුදං ආයස්මා උග්ගො ථෙරො ගාථං අභාසිත්ථා’ති.
උග්ගත්ථෙරගාථා.
අට්ඨමො වග්ගො.
තස්සුද්දානං:
වච්ඡපාලො ච යො ථෙරො ආතුමො මාණවො ඉසි සුයාමො ච සුසාරදො ථෙරො යො ච පියඤ්ජහො ආරොහපුත්තො මෙණ්ඩසිරො රක්ඛිතො උග්ගසව්හයො’ති.
නවමො වග්ගො.
1. 9. 1.
81. යං මයා පකතං පාපං පුබ්බෙ අඤ්ඤාසු ජාතිසු ඉධෙව තං වෙදනීයං වත්ථු අඤ්ඤං න විජ්ජතී’ති.
ඉත්ථං සුදං ආයස්මා සමිතිගුත්තො ථෙරො ගාථං අභාසිත්ථා’ති.
සමිතිගුත්තත්ථෙරගාථා.
1. 9. 2.
82. යෙන යෙන සුභික්ඛානි සිවානි අභයානි ච තෙන පුත්තක ගච්ඡස්සු මා සොකාපහතො භවා’ති.
ඉත්ථං සුදං ආයස්මා කස්සපො ථෙරො ගාථං අභාසිත්ථා’ති.
කස්සපත්ථෙරගාථා.
1. 9. 3.
83. සීහප්පමත්තා විහර රත්තින්දිවමතන්දිතො භාවෙහි කුසලං ධම්මං ජහ සීඝං සමුස්සයන්ති.
ඉත්ථං සුදං ආයස්මා සීහො ථෙරො ගාථං අභාසිත්ථා’ති.
සීහත්ථෙරගාථා.
1. 9. 4.
84. සබ්බරත්තිං සුපිත්වාන දිවා සඞ්ගණිකෙ රතො, කුදස්සු{1} නාම දුම්මෙධො දුක්ඛස්සන්තං කරිස්සතී’ති.
ඉත්ථං සුදං ආයස්මා නීතො ථෙරො ගාථං අභාසිත්ථා’ති.
නීතත්ථෙරගාථා.
1. 9. 5.
85. චිත්තනිමිත්තස්ස කොවිදො පවිවෙකරසං විජානිය, ඣායං නිපකො පතිස්සතො අධිගච්ඡෙය්ය සුඛං නිරාමිසන්ති.
ඉත්ථං සුදං ආයස්මා සුනාගො ථෙරො ගාථං අභාසිත්ථා’ති.
සුනාගත්ථෙරගාථා.
1. 9. 6.
86. ඉතො බහිද්ධා පුථු අඤ්ඤවාදිනං මග්ගො න නිබ්බානගමො යථා අයං, ඉතිස්සු සඞ්ඝං භගවානුසාසති සත්ථා සයං පාණිතලෙව දස්සය’න්ති.
ඉත්ථං සුදං ආයස්මා නාගිතො ථෙරො ගාථං අභාසිත්ථා’ති.
නාගිතත්ථෙරගාථා.
1. 9. 7.
87. ඛන්ධා දිට්ඨා යථාභූතං භවා සබ්බෙ පදාලිතා වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා පවිට්ඨො ථෙරො ගාථං අභාසිත්ථා’ති.
පවිට්ඨත්ථෙරගාථා.
1. 9. 8.
88. අසක්ඛිං වත අත්තානං උද්ධාතුං උදකා ජලං වුය්හමානො මහොඝෙව සච්චානි පටිවිජ්ඣහ’න්ති.
ඉත්ථං සුදං ආයස්මා අජ්ජුනො ථෙරො ගාථං අභාසිත්ථා’ති.
අජ්ජුනත්ථෙරගාථා.
1. 9. 9.
89. උත්තිණ්ණා පඞ්කපලිපා පාතාලා පරිවජ්ජිතා, මුත්තා ඔඝා ච ගන්ථා ච සබ්බෙ මානා විසංහතා’ති.
ඉත්ථං සුදං ආයස්මා දෙවසභො ථෙරො ගාථං අභාසිත්ථා’ති.
පඨමදෙවසභත්ථෙරගාථා.
1. 9. 10.
90. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා, වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා සාමිදත්තො ථෙරො ගාථං අභාසිත්ථා’ති.