1256. පජ්ජොතකරො අතිවිජ්ඣ ධම්මං{8} සබ්බට්ඨිතීනං අතික්කමමද්දා{9} ඤත්වා ච සච්ඡිකත්වා ච අග්ගං සො දෙසයි දසද්ධානං.
1257. එවං සුදෙසිතෙ ධම්මෙ කො පමාදො විජානතං ධම්මං තස්මා හි තස්ස භගවතො සාසනෙ අප්පමත්තො සදා නමස්සමනුසික්ඛෙ.
1258. බුද්ධානුබුද්ධො යො ථෙරො කොණ්ඩඤ්ඤො තිබ්බනික්ඛමො{1} ලාභී සුඛවිහාරානං විවෙකානං අභිණ්හසො.
1259. යං සාවකෙන පත්තබ්බං සත්ථුසාසනකාරිනා සබ්බස්ස තං අනුප්පත්තං අප්පමත්තස්ස සික්ඛතො.{2}
1260. මහානුභාවො තෙවිජ්ජො චෙතොපරියකොවිදො කොණ්ඩඤ්ඤො බුද්ධදායාදො පාදෙ වන්දති සත්ථුනො.
1261. නගස්ස{3} පස්සෙ ආසීනං මුනිං දුක්ඛස්ස පාරගුං සාවකා පයිරුපාසන්ති තෙවිජ්ජා මච්චුහායිනො.
1262. චෙතසා අනුපරියෙති මොග්ගල්ලානො මහිද්ධිකො චිත්තං නෙසං සමන්වෙසං විප්පමුත්තං නිරූපධිං.
1263. එවං සබ්බඞ්ගසම්පන්නං මුනිං දුක්ඛස්ස පාරගුං අනෙකාකාරසම්පන්නං පයිරුපාසන්ති ගොතමං.
1264. චන්දො යථා විගතවලාහකෙ නභෙ විරොචති වීතමලො’ව භානුමා එවං’පි අඞ්ගීරස ත්වං මහාමුනි අතිරොචසි යසසා සබ්බලොකං.
1265. කාව්යෙමත්තා විචරිම්හ පුබ්බෙ ගාමා ගාමං පුරා පුරං අථද්දසාම{4} සම්බුද්ධං සබ්බධම්මාන පාරගුං.
1266. සො මෙ ධම්මමදෙසෙසි මුනි දුක්ඛස්ස පාරගූ ධම්මං සුත්වා පසීදිම්හ අද්ධා{5} නො උදපජ්ජථ.
1267. තස්සාහං වචනං සුත්වා ඛන්ධෙ ආයතනානි ච ධාතුයො ච විදිත්වාන පබ්බජිං අනගාරියං.
1268. බහුන්නං{6} වත අත්ථාය උප්පජ්ජන්ති තථාගතා ඉත්ථීනං පුරිසානං ච යෙ තෙ සාසනකාරකා.
1269. තෙසං ඛො වත අත්ථාය බොධිමජ්ඣගමා මුනි භික්ඛූනං භික්ඛුනීනං ච යෙ නියාමගතද්දසා.{7}
1270. සුදෙසිතා චක්ඛුමතා බුද්ධෙනාදිච්චබන්ධුනා චත්තාරි අරියසච්චානි අනුකම්පාය පාණිනං.
1271. දුක්ඛං දුක්ඛසමුප්පාදං දුක්ඛස්ස ච අතික්කමං අරියං චට්ඨඞ්ගිකං{1} මග්ගං දුක්ඛූපසමගාමිනං.
1272. එවමෙතෙ තථා වුත්තා දිට්ඨා මෙ තෙ යථා තථා සදත්ථො මෙ අනුප්පත්තො කතං බුද්ධස්ස සාසනං.
1273. ස්වාගතං වත මෙ ආසි මම බුද්ධස්ස සන්තිකෙ සංවිභත්තෙසු{2} ධම්මෙසු යං සෙට්ඨං තදුපාගමිං.
1274. අභිඤ්ඤාපාරමිප්පත්තො සොතධාතු විසොධිතා{3} තෙවිජ්ජො ඉද්ධිපත්තොම්හි චෙතොපරියකොවිදො.
1275. පුච්ඡාමි සත්ථාරමනොමපඤ්ඤං දිට්ඨො’ව ධම්මෙ යො විචිකිච්ඡානං ඡෙත්වා අග්ගාළවෙ කාලමකාසි භික්ඛු ඤාතො යසස්සී අභිනිබ්බුතත්තො.
1276. නිග්රොධකප්පො ඉති තස්ස නාමං, තයා කතං භගවා බ්රාහ්මණස්ස සො’හං{4} නමස්සං අචරිං මුත්ත්යපෙඛො{5} ආරද්ධවිරියො දළ්හධම්මදස්සී.
1277. තං සාවකං සක්ක මයං’පි සබ්බෙ අඤ්ඤාතුමිච්ඡාම සමන්තචක්ඛු සමවට්ඨිතා{6} නො සවනාය සොතා{8} තුවං නො{9} සත්ථා ත්වමනුත්තරොසි.
1278. ඡින්ද නො{10} විචිකිච්ඡං බ්රූහි මෙතං පරිනිබ්බුතං වෙදය භූරිපඤ්ඤ මජ්ඣෙ’ව නො භාස සමන්තචක්ඛු සක්කො’ව දෙවාන සහස්සනෙත්තො.
1279. යෙ කෙචි ගන්ථා{11} ඉධ මොහමග්ගා අඤ්ඤාණපක්ඛා විචිකිච්ඡඨානා{12} තථාගතං පත්වා න තෙ භවන්ති චක්ඛුං හි එතං පරමං නරානං.
1280. නො චෙ හි ජාතු පුරිසො කිලෙසෙ වාතො යථා අබ්භඝනං විහානෙ{13} තමොවස්ස නිවුතො{14} සබ්බලොකො ජොතිමන්තො’පි න පභාසෙය්යුං.{15}
1281. ධීරා ච පජ්ජොතකරා භවන්ති තං තං අහං වීර{1} තථෙව මඤ්ඤෙ විපස්සිනං ජානමුපාගමිම්හා පරිසාසු{2} නො ආවිකරොහි කප්පං.
1282. ඛිප්පං ගිරං එරය වග්ගු වග්ගුං හංසො’ව පග්ගය්හ සනිකං නිකූජ බින්දුස්සරෙන සුවිකප්පිතෙන සබ්බෙ’ව තෙ උජ්ජුගතා සුණොම.
1283. පහීනජාතිමරණං අසෙසං නිග්ගය්හ ධොනං{3} පටිවෙදියාමි{4} න කාමකාරො හි{5} පුථුජ්ජනානං සඞ්ඛෙය්යකාරො’ව තථාගතානං.
1284. සම්පන්නවෙය්යාකරණං තවෙදං සමුජ්ජුපඤ්ඤස්ස{6} සමුග්ගහීතං අයමඤ්ජලි පච්ඡිමො සුප්පණාමිතො මා මොහයී ජානමනොමපඤ්ඤ.
1285. පරොවරං{7} අරියධම්මං විදිත්වා මා මොහයී ජානමනොමවීර{8} වාරිං යථා ඝම්මනි ඝම්මතත්තො වාචාභිකඞ්ඛාමි සුතං පවස්ස.{9}
1286. යදත්ථිකං{10} බ්රහ්මචරියං අචාරි කප්පායනො කච්චි සතං අමොඝං නිබ්බායි සො ආදු සඋපාදිසෙසො{11} යථා විමුත්තො අහු තං සුණොම.
1287. අච්ඡෙච්ඡි තණ්හං ඉධ නාමරූපෙ (ඉති භගවා) තණ්හාය සොතං දීඝරත්තානුසයිතං අතාරි ජාතිං මරණං{12} අසෙසං ඉච්චබ්රවී භගවා පඤ්චසෙට්ඨො.
1288. එස සුත්වා පසීදාමි වචො තෙ ඉසිසත්තම අමොඝං කිර මෙ පුට්ඨං න මං වඤ්චෙසි බ්රාහ්මණො.
1289. යථාවාදී තථාකාරී අහු බුද්ධස්ස සාවකො අච්ඡෙච්ඡි වච්චුනො ජාලං තතං මායාවිනො දළ්හං.
1290. අද්දස භගවා ආදිං උපාදානස්ස කප්පියො අච්චගා වත කප්පානො{1} මච්චුධෙය්යං සුදුත්තරං.
1291. තං දෙවදෙවං වන්දාමි පුත්තං තෙ ද්විපදුත්තම අනුජාතං මහාවීරං නාගං නාගස්ස ඔරස’න්ති.
ඉත්ථං සුදං ආයස්මා වඞ්ගීසො ථෙරො ගාථායො අභාසිත්ථා’ති.
වඞ්ගීසත්ථෙරගාථා.
තස්සුද්දානං:
සත්තතිම්හි නිපාතම්හි වඞ්ගීසො පටිභානවා එකො’ව ථෙරො නත්ථඤ්ඤො ගාථායො එකසත්තතී’ති.
මහානිපාතො නිට්ඨිතො.
තස්සුද්දානං:
සහස්සං හොන්ති තා ගාථා තීණි සට්ඨි සතානි ච ථෙරා ච ද්වෙ සතා සට්ඨි චත්තාරො ච පකාසිතා.
සීහනාදං නදිත්වාන බුද්ධපුත්තා අනාසවා ඛෙමන්තං පාපුණිත්වාන අග්ගික්ඛන්ධා’ව නිබ්බුතා’ති.
ථෙරගාථාපාළි නිට්ඨිතා.