378. පුබ්බෙ යඤ්ඤෙන සන්තුට්ඨො කාමධාතුපුරක්ඛතො, පච්ඡා රාගං ච දොසං ච මොහං චාපි සමූහනිං.
379. පුබ්බෙනිවාසං ජානාමි දිබ්බචක්ඛු විසොධිතං, ඉද්ධිමා පරචිත්තඤ්ඤූ දිබ්බසොතඤ්ච පාපුණිං.
380. යස්ස චත්ථාය පබ්බජිතො අගාරස්මානගාරියං,{2} සො මෙ අත්ථො අනුප්පත්තො සබ්බසංයොජනක්ඛයො’ති.
ඉත්ථං සුදං ආයස්මා උරුවෙලකස්සපො ථෙරො ගාථායො අභාසිත්ථා’ති.
උරුවෙලකස්සපත්ථෙරගාථා.
6. 1. 2.
381. අතිහිතා වීහි ඛලගතා සාලී, න ච ලභෙ පිණ්ඩං කථමහං කස්සං.
382. බුද්ධමප්පමෙය්යං අනුස්සර{3} පසන්නො, පීතියා ඵුටසරීරො හොහිසි{4} සතතමුදග්ගො.
383. ධම්මමප්පමෙය්යං අනුස්සර{3} පසන්නො, පීතියා ඵුටසරීරො හොහිසි{4} සතතමුදග්ගො.
384. සඞ්ඝමප්පමෙය්යං අනුස්සර{3} පසන්නො, පීතියා ඵුටසරීරො හොහිසි{4} සතතමුදග්ගො.
385. අබ්භොකාසෙ විහරසි සීතා හෙමන්තිකා ඉමා රත්තියො, මා සීතෙන පරෙතො විහඤ්ඤිත්ථො පවිස ත්වං විහාරං ඵුසිතග්ගළං.
386. ඵුසිස්සං චතස්සො අප්පමඤ්ඤායො තාහි ච සුඛිතො විහරිස්සං, නාහං සීතෙන විහඤ්ඤිස්සං අනිඤ්ජිතො විහරන්තො’ති.
ඉත්ථං සුදං ආයස්මා තෙකිච්ඡකානි ථෙරො ගාථායො අභාසිත්ථා’ති.
තෙකිච්ඡකානිත්ථෙරගාථා.
6. 1. 3.
387. යස්ස සබ්රහ්මචාරීසු ගාරවො නූපලබ්භති, පරිහායති සද්ධම්මා මච්ඡො අප්පොදකෙ යථා.
388. යස්ස සබ්රහ්මචාරීසු ගාරවො නූපලබ්භති, න විරූහති සද්ධම්මෙ ඛෙත්තෙ බීජංව පූතිකං.
389. යස්ස සබ්රහ්මචාරීසු ගාරවො නූපලබ්භති, අරකා හොති නිබ්බානා, ධම්මරාජස්ස සාසනෙ.
390. යස්ස සබ්රහ්මචාරීසු ගාරවො උපලබ්භති, න විහායති සද්ධම්මා මච්ඡො බව්හොදකෙ යථා.
391. යස්ස සබ්රහ්මචාරීසු ගාරවො උපලබ්භති, සො විරූහති සද්ධම්මෙ ඛෙත්තෙ බීජංව භද්දකං.
392. යස්ස සබ්රහ්මචාරීසු ගාරවො උපලබ්භති, සන්තිකෙ හොති නිබ්බානං ධම්මරාජස්ස සාසනෙ’ති.
ඉත්ථං සුදං ආයස්මා මහානාගො ථෙරො ගාථායො අභාසිත්ථා’ති.
මහානාගත්ථෙරගාථා.
6. 1. 4.
393. කුල්ලො සීවථිකං ගන්ත්වා අද්දස ඉත්ථිමුජ්ඣිතං, අපවිද්ධං සුසානස්මිං ඛජ්ජන්තිං කිමිහී ඵුටං.
394. ආතුරං අසුචිං පූතිං පස්ස කුල්ල සමුස්සයං, උග්ඝරන්තං පග්ඝරන්තං බාලානං අභිනන්දිතං.
395. ධම්මාදාසං ගහෙත්වාන ඤාණදස්සනපත්තියා, පච්චවෙක්ඛිං ඉමං කායං තුච්ඡං සන්තරබාහිරං.
396. යථා ඉදං තථා එතං, යථා එතං තථා ඉදං, යථා අධො තථා උද්ධං යථා උද්ධං තථා අධො.
397. යථා දිවා තථා රත්තිං යථා රත්තිං තථා දිවා, යථා පුරෙ තථා පච්ඡා යථා පච්ඡා තථා පුරෙ.
398. පඤ්චඞ්ගිකෙන තුරියෙන න රතී හොති තාදිසී, යථා එකග්ගචිත්තස්ස සම්මා ධම්මං විපස්සතො’ති.
ඉත්ථං සුදං ආයස්මා කුල්ලො ථෙරො ගාථායො අභාසිත්ථා’ති.
කුල්ලත්ථෙරගාථා.
6. 1. 5.
399. මනුජස්ස පමත්තචාරිනො තණ්හා වඩ්ඪති මාලුවා විය, සො පලවති හුරා හුරං ඵලමිච්ඡං ව වනස්මිං වානරො.
400. යං එසා සහතෙ{1} ජම්මි තණ්හා ලොකෙ විසත්තිකා, සොකා තස්ස පවඩ්ඪන්ති අභිවට්ඨං ව බීරණං.
401. යො චෙතං{2} සහතෙ ජම්මිං තණ්හං ලොකෙ දුරච්චයං, සොකා තම්හා පපතන්ති උදබින්දුව පොක්ඛරා.
402. තං වො වදාමි භද්දං වො යාවන්තෙත්ථ සමාගතා, තණ්හාය මූලං ඛණථ උසීරත්ථෙව බීරණං, මා වො නළං ව සොතො ව මාරො භඤ්ජි පුනප්පුනං.
403. කරොථ බුද්ධවචනං ඛණො වො{3} මා උපච්චගා, ඛණාතීතා හි සොචන්ති නිරයම්හි සමප්පිතා.
404. පමාදො රජො සබ්බදා{4} පමාදානුපතිතො රජො, අප්පමාදෙන විජ්ජාය අබ්බහෙ සල්ලමත්තනො’ති.
ඉත්ථං සුදං ආයස්මා මාලුඞ්ක්යපුත්තො ථෙරො ගාථායො අභාසිත්ථා’ති.
මාලුඞ්ක්යපුත්තත්ථෙරගාථා.
6. 1. 6.
405. පණ්ණවීසති වස්සානි යතො පබ්බජිතො අහං, අච්ඡරාසඞ්ඝාතමත්තම්පි චෙතොසන්තිමනජ්ඣගං.
406. අලද්ධා චිත්තස්සෙකග්ගං කාමරාගෙන අද්දිතො,{5} බාහා පග්ගය්හ කන්දන්තො විහාරා උපනික්ඛමිං.
407. සත්ථං වා ආහරිස්සාමි කො අත්ථො ජීවිතෙන මෙ, කථං හි සික්ඛං පච්චක්ඛං කාලං කුබ්බෙථ මාදිසො.
408. තදාහං ඛුරමාදාය මඤ්චකම්හි උපාවිසිං, පරිනීතො ඛුරො ආසි ධමනිං ඡෙත්තුමත්තනො.
409. තතො මෙ මනසිකාරො යොනිසො උදපජ්ජථ, ආදීනවො පාතුරහු නිබ්බිදා සමතිට්ඨථ.
410. තතො චිත්තං විමුච්චි මෙ පස්ස ධම්මසුධම්මතං, තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා සප්පදාසො ථෙරො ගාථායො අභාසිත්ථා’ති.
සප්පදාසත්ථෙරගාථා.
6. 1. 7.
411. උට්ඨෙහි{1} නිසීදි කාතියාන මා නිද්දාබහුලො අහු ජාගරස්සු, මා තං අලසං පමත්තබන්ධු කූටෙනෙව ජිනාතු මච්චුරාජා.
412. සයථාපි{2} මහාසමුද්දවෙගො එවං ජාතිජරාතිවත්තතෙ තං, සො කරොහි සුදීපමත්තනා ත්වං න හි තාණං තව විජ්ජතෙව අඤ්ඤං.
413. සත්ථා හි විජෙසි මග්ගමෙතං සඞ්ගා ජාතිජරාභයා අතීතං,{3} පුබ්බාපරරත්තමප්පමත්තො අනුයුඤ්ජස්සු දළ්හං කරොහි යොගං.
414. පුරිමානි පමුඤ්ච බන්ධනානි සඞ්ඝාටි ඛුරමුණ්ඩභික්ඛභොජී, මා ඛිඩ්ඩාරතිඤ්ච නිද්දං{4} අනුයුඤ්ජිත්ථ ඣාය කාතියාන.{5}
415. ඣායාහි ජිනාහි කාතියාන යොගක්ඛෙමපථෙසු කොවිදොසි, පප්පුය්ය අනුත්තරං විසුද්ධං පරිනිබ්බාහිසි වාරිනාව ජොති.
416. පජ්ජොතිකරො පරිත්තරංසො වාතෙන විනම්යතෙ ලතාව, එවම්පි තුවං අනාදියානො මාරං ඉන්දසගොත්ත නිද්ධුනාහි, සො වෙදයිතාසු වීතරාසො කාලං කඞ්ඛ ඉධෙව සීතිභූතො’ති.
ඉත්ථං සුදං ආයස්මා කාතියානො ථෙරො ගාථායො අභාසිත්ථා’ති.
කාතියානත්ථෙරගාථා.
6. 1. 8.
417. සුදෙසිතො චක්ඛුමතා බුද්ධෙනාදිච්චබන්ධුනා, සබ්බසංයොජනාතීතො සබ්බවට්ටවිනාසනො.
418. නිය්යානිකො උත්තරණො තණ්හාමූලවිසොසනො, විසමූලං ආඝාතනං ඡෙත්වා පාපෙති නිබ්බුතිං.
419. අඤ්ඤණමූලභෙදාය කම්මයන්තවිඝාටනො, විඤ්ඤාණානං පරිග්ගහෙ ඤාණවජීරනිපාතිනො.
420. වෙදනානං විඤ්ඤපනො{1} උපාදානප්පමොචනො, භවං අඞ්ගාරකාසුං ව ඤාණෙන අනුපස්සකො
421. මහාරසො සුගම්භීරො ජරාමච්චුනිවාරණො, අරියො අට්ඨඞ්ගිකො මග්ගො දුක්ඛූපසමනො සිවො.
422. කම්මං කම්මන්ති ඤත්වාන විපාකං ච විපාකතො, පටිච්චුප්පන්නධම්මානං යථා වා ලොකදස්සනො මහාඛෙමඞ්ගමො සන්තො පරියොසානභද්දකො’ති.
ඉත්ථං සුදං ආයස්මා මිගජාලො ථෙරො ගාථායො අභාසිත්ථා’ති.
මිගජාලත්ථෙරගාථා.
6. 1. 9.
423. ජාතිමදෙන මත්තොහං භොගඉස්සරියෙන ච, සණ්ඨානවණ්ණරූපෙන මදමත්තො අචාරිහං.
424. නාත්තනො සමකං කඤ්චි අතිරෙකං ච මඤ්ඤිසං, අතිමානහතො බාලො පත්ථද්ධො උස්සිතද්ධජො.
425. මාතරං පිතරඤ්චාපි අඤ්ඤෙපි ගරුසම්මතෙ, න කඤ්චි අභිවාදෙසිං මානත්ථද්ධො අනාදරො.
426. දිස්වා විනායකං අග්ගං සාරථීනං වරුත්තමං, නපන්තමිව ආදිච්චං භික්ඛුසඞ්ඝපුරක්ඛතං.
427. මානං මදං ච ඡඩ්ඩෙත්වා විප්පසන්නෙන චෙතසා, සිරසා අභිවාදෙසිං සබ්බසත්තානමුත්තමං.
428. අතිමානො ච ඔමානො පහීනා සුසමූහතා, අස්මිමානො සමුච්ඡින්නො සබ්බෙ මානවිධා හතා’ති.
ඉත්ථං සුදං ආයස්මා ජෙන්තො ථෙරො ගාථායො අභාසිත්ථා’ති.
ජෙන්තත්ථෙරගාථා.
6. 1. 10.
429. යදා නවො පබ්බජිතො ජාතියා සත්තවස්සිකො, ඉද්ධියා අභිභොත්වාන පන්නගින්දං මහිද්ධිකං.
430. උපජ්ඣායස්ස උදකං අනොතත්තා මහාසරා, ආහරාමි තතො දිස්වා මං සත්ථා එතදබ්රවී.
431. සාරිපුත්ත ඉමං පස්ස ආගච්ඡන්තං කුමාරකං, උදකුම්භකමාදාය අජ්ඣත්තං සුසමාහිතං.
432. පාසාදිකෙන වත්තෙන කල්යාණඉරියාපථො, සාමණෙරොනුරුද්ධස්ස ඉද්ධියා ච විසාරදො.
433. ආජානීයෙන ආජඤ්ඤො සාධුනා සාධුකාරිතො, විනීතො අනුරුද්ධෙන කතකිච්චෙන සික්ඛිතො.
434. සො පත්වා පරමං සන්තිං සච්ඡිකත්වා අකුප්පතං, සාමණෙරො ස සුමනො මා මං ජඤ්ඤාති ඉච්ඡතී’ති.
ඉත්ථං සුදං ආයස්මා සුමනො ථෙරො ගාථායො අභාසිත්ථා’ති.
සුමනත්ථෙරගාථා.
6. 1. 11.
435. වාතරොගාභිනීතො ත්වං විහරං කානනෙ වනෙ, පවිද්ධගොචරෙ ලූඛෙ කථං භික්ඛු කරිස්සසි.
436. පීතිමුඛෙන විපුලෙන ඵරිත්වාන සමුස්සයං, ලූඛම්පි අභිසම්භොන්තො විහරිස්සාමි කානනෙ.
437. භාවෙන්තො සත්තබොජ්ඣඞ්ගෙ ඉන්ද්රියානි බලානි ච, ඣානසොඛුම්මසම්පන්නො විහරිස්සං අනාසවො.
438. විප්පමුත්තං කිලෙසෙහි සුද්ධචිත්තං අනාවිලං, අභිණ්හං පච්චවෙක්ඛන්තො විහරිස්සං අනාසවො.
439. අජ්ඣත්තං ච බහිද්ධා ච යෙ මෙ විජ්ජිංසු ආසවා, සබ්බෙ අසෙසා උච්ඡින්නා න ච උප්පජ්ජරෙ පුන.
440. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා, දුක්ඛක්ඛයො අනුප්පත්තො නත්ථි දානි පුනබ්භවො’ති.
ඉත්ථං සුදං ආයස්මා න්හාතකමුනිත්ථෙරො ගාථායො අභාසිත්ථා’ති.
න්හාතකමුනිත්ථෙරගාථා.
6. 1. 12.
441. අක්කොධස්ස කුතො කොධො දන්තස්ස සමජීවිනො, සම්මදඤ්ඤා විමුත්තස්ස උපසන්තස්ස තාදිනො,
442. තස්සෙව තෙන පාපියො යො කුද්ධං පටිකුජ්ඣති, කුද්ධං අප්පටිකුජ්ඣන්තො සඞ්ගාමං ජෙති දුජ්ජයං.
443. උභින්නමත්ථං චරති අත්තනො ච පරස්ස ච, පරං සඞ්කුපිතං ඤත්වා යො සතො උපසම්මති.
444. උභික්කං තිකිච්ඡන්තං තං අත්තනො ච පරස්ස ච, ජනා මඤ්ඤන්ති බාලොති යෙ ධම්මස්ස අකොවිදා.