318. තතො මෙ මනසිකාරො යොනිසො උදපජ්ජථ, ආදීනවො පාතුරහු නිබ්බිදා සමතිට්ඨථ.
319. තතො චිත්තං විමුච්චි මෙ පස්ස ධම්මසුධම්මතං, තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා රාජදත්තො ථෙරො ගාථායො අභාසිත්ථා’ති.
රාජදත්තත්ථෙරගාථා.
5. 1. 2.
320. අයොගෙ යුඤ්ජමත්තානං පුරිසො කිච්චමිච්ඡතො, චරං චෙ නාධිගච්ඡෙය්ය තං මෙ දුබ්භගලක්ඛණං.
321. අබ්බූළ්හං{1} අඝගතං විජිතං එකං චෙ ඔස්සජෙය්ය{2} කලීව සියා, සබ්බානිපි චෙ ඔස්සජෙය්ය අන්ධොව සියා සමවිසමස්ස අදස්සනතො.
322. යං හි කයිරා තං හි වදෙ යං න කයිරා න තං වදෙ, අකරොන්තං භාසමානං පරිජානන්ති පණ්ඩිතා.
323. යථා’පි රුචිරං පුප්ඵං වණ්ණවන්තං අගන්ධකං, එවං සුභාසිතා වාචා අඵලා හොති අකුබ්බතො.
324. යථා’පි රුචිරං පුප්ඵං වණ්ණවන්තං සගන්ධකං, එවං සුභාසිතා වාචා සඵලා හොති පකුබ්බතො’ති.{3}
ඉත්ථං සුදං ආයස්මා සුභූතො ථෙරො ගාථායො අභාසිත්ථා’ති.
සුභූතත්ථෙරගාථා.
5. 1. 3.
325. වස්සති දෙවො යථා සුගීතං ඡන්නා මෙ කුටිකා සුඛා නිවාතා, තස්සං විහරාමි වූපසන්තො අථ වෙ පත්ථයසී පවස්ස දෙව.
326. වස්සති දෙවො යථා සුගීතං ඡන්නා මෙ කුටිකා සුඛා නිවාතා, තස්සං විහරාමි සන්තචිත්තො අථ වෙ පත්ථයසී පවස්ස දෙව.
327. වස්සති දෙවො යථා සුගීතං ඡන්නා මෙ කුටිකා සුඛා නිවාතා, තස්සං විහරාමි වීතරාගො අථ වෙ පත්ථයසී පවස්ස දෙව.
328. වස්සති දෙවො යථා සුගීතං ඡන්නා මෙ කුටිකා සුඛා නිවාතා, තස්සං විහරාමි වීතදොසො අථ වෙ පත්ථයසී පවස්ස දෙව.
329. වස්සති දෙවො යථා සුගීතං ඡන්නා මෙ කුටිකා සුඛා නිවාතා, තස්සං විහරාමි වීතමොහො අථ වෙ පත්ථයසී පවස්ස දෙව.
ඉත්ථං සුදං ආයස්මා ගිරිමානන්දො ථෙරො ගාථායො අභාසිත්ථා’ති.
ගිරිමානන්දත්ථෙරගාථා.
5. 1. 4.
330. යං පත්ථයානො ධම්මෙසු උපජ්ඣායො අනුග්ගහී, අමතං අභිකඞ්ඛන්තං කතං කත්තබ්බකං මයා.
331. අනුප්පත්තො සච්ඡිකතො සයං ධම්මො අනීතිහො, විසුද්ධඤාණො නික්කඞ්ඛො ව්යාකරොමි තවන්තිකෙ.
332. පුබ්බෙනිවාසං ජානාමි දිබ්බචක්ඛු විසොධිතං, සදත්ථො මෙ අනුප්පත්තො කතං බුද්ධස්ස සාසනං.
333. අප්පමත්තස්ස මෙ සික්ඛා සුස්සුතා තව සාසනෙ, සබ්බෙ මෙ අසවා ඛීණා නත්ථි දානි පුනබ්භවො.
334. අනුසාසි මං අරියවතා අනුකම්පි අනුග්ගහි, අමොඝො තුය්හමොවාදො අන්තෙවාසිම්හි සික්ඛිතො’ති.
ඉත්ථං සුදං ආයස්මා සුමනො ථෙරො ගාථායො අභාසිත්ථා’ති.
සුමනත්ථෙරගාථා.
5. 1. 5.
335. සාධූ හි කිර මෙ මාතා පතොදං උපදංසයි, යස්සාහං වචනං සුත්වා අනුසිට්ඨො ජනෙත්තියා, ආරද්ධවිරියො පහිතත්තො පත්තො සම්බොධිමුත්තමං.
336. අරහා දක්ඛිණෙය්යොම්හි තෙවිජ්ජො අමතද්දසො, ජෙත්වා{1} නමුචිනො සෙනං විහරාමි අනාසවො.
337. අජ්ඣත්තං ච බහිද්ධා ච යෙ මෙ විජ්ජිංසු ආසවා, සබ්බෙ අස්සො උච්ඡින්නා න ච උප්පජ්ජරෙ පුන.
338. විසාරදා ඛො භගිනි එතමත්ථං අභාසයි, අපිහා නූන මයි’පි වනථො තෙ න විජ්ජති.
339. පරියන්තකතං දුක්ඛං අන්තිමො’යං සමුස්සයො, ජාතිමරණසංසාරො නත්ථි දානි පුනබ්භවො’ති.
ඉත්ථං සුදං ආයස්මා වඩ්ඪො ථෙරො ගාථායො අභාසිත්ථා’ති.
වඩ්ඪත්ථෙරගාථා.
5. 1. 6.
340. අත්ථාය වත මෙ බුද්ධො නදිං නෙරඤ්ජරං අගා, යස්සාහං ධම්මං සුත්වාන මිච්ඡාදිට්ඨිං විවජ්ජයිං.
341. යජිං උච්චාවචෙ යඤ්ඤෙ අග්ගිහුත්තං ජුහිං අහං, එසා සුද්ධීති මඤ්ඤන්තො අන්ධභූතො පුථුජ්ජනො.
342. දිට්ඨිගහනපක්ඛන්නො{2} පරාමාසෙන මොහිතො, අසුද්ධිං මඤ්ඤිසං සුද්ධිං අන්ධභූතො අවිද්දසු.
343. මිච්ඡාදිට්ඨි පහීනා මෙ භවා සබ්බෙ විදාලිතා, ජුහාමි දක්ඛිණෙය්යග්ගිං නමස්සාමි තථාගතං.
344. මොහා සබ්බෙ පහීනා මෙ භවතණ්හා පදාලිතා, වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා නදීකස්සපො ථෙරො ගාථායො අභාසිත්ථා’ති.
නදීකස්සපත්ථෙරගාථා.
5. 1. 7.
345. පාතො මජ්ඣන්තිකං සායං තික්ඛත්තුං දිවසස්සහං, ඔතරිං උදකං සො’හං{1} ගයාය ගයඵග්ගුයා.
346. යං මයා පකතං පාපං පුබ්බෙ අඤ්ඤාසු ජාතිසු, තං දානීධ පවාහෙමි{2} එවංදිට්ඨි පුරෙ අහුං.
347. සුත්වා සුභාසිතං වාචං ධම්මත්ථසහිතං පදං, තථං යාථාවතං{3} අත්ථං යොනිසො පච්චවෙක්ඛිසං.
348. නින්හාතසබ්බපාපොම්හි නිම්මලො පයතො සුචි, සුද්ධො සුද්ධස්ස දායාදො පුත්තො බුද්ධස්ස ඔරසො.
349. ඔගය්හට්ඨඞ්ගිකං සොතං සබ්බපාපං පවාහයිං, තිස්සො විජ්ජා අජ්ඣගමිං කතං බුද්ධස්ස සාසන’න්ති.
ඉත්ථං සුදං ආයස්මා ගයාකස්සපො ථෙරො ගාථායො අභාසිත්ථා’ති.
ගයාකස්සපත්ථෙරගාථා.
5. 1. 8.
350. වාතරොගාභිනීතො ත්වං විහරං කානනෙ වනෙ, පවිද්ධගොචරෙ{4} ලූඛෙ කථං භික්ඛු කරිස්සසි.
351. පීතිසුඛෙන විපුලෙන ඵරමානො සමුස්සයං, ලූඛම්පි අභිසම්භොන්තො විහරිස්සාමි කානනෙ.
352. භාවෙන්තො සතිපට්ඨානෙ ඉන්ද්රියානි බලානි ච, බොජ්ඣඞ්ගානි ච භාවෙන්තො විහරිස්සාමි කානනෙ.
353. ආරද්ධවිරියො පහිතත්තො නිච්චං දළ්හපරක්කමො,{5} සමග්ගෙ සහිතෙ දිස්වා විහරිස්සාමි කානනෙ.
354. අනුස්සරන්තො සම්බුද්ධං අග්ගං දන්තං{6} සමාහිතං, අතන්දිතො රත්තින්දිවං විහරිස්සාමි කානනෙ’ති.
ඉත්ථං සුදං ආයස්මා වක්කලිත්ථෙරො ගාථායො අභාසිත්ථා’ති.
වක්කලිත්ථෙරගාථා.
5. 1. 9.
355. ඔලග්ගෙස්සාමි තෙ චිත්ත ආණිද්වාරෙව හත්ථිනං, න තං පාපෙ නියොජෙස්සං කාමජාල සරිරජ.
356. ත්වං ඔලග්ගො න ගච්ඡසි ද්වාරවිවරං ගජො’ව අලභන්තො, න ච චිත්තකලි පුනප්පුනං පසහං පාපරතො චරිස්සසි.
357. යථා කුඤ්ජරං අදන්තං නවග්ගහමඞ්කුසග්ගහො, බලවා ආවත්තෙති අකාමං එවං ආවත්තයිස්සං තං.
358. යථා වරහයදමකුසලො සාරථි පවරො දමෙති ආජඤ්ඤං, එවං දමයිස්සං තං පතිට්ඨිතො පඤ්චසු බලෙසු.
359. සතියා තං නිබන්ධිස්සං පයතත්තො වොදපෙස්සාමි, විරියධුරනිග්ගහිතො න නියතො දූරං ගමිස්සසෙ චිත්තා’ති.
ඉත්ථං සුදං ආයස්මා විජිතසෙනො ථෙරො ගාථායො අභාසිත්ථා’ති.
විජිතසෙනත්ථෙරගාථා.
5. 1. 10.
360. උපාරම්භචිත්තො දුම්මෙධො සුණාති ජිනසාසනං, ආරකා හොති සද්ධම්මා නභසො පඨවී යථා.
361. උපාරම්භචිත්තො දුම්මෙධො සුණාති ජිනසාසනං, පරිහායති සද්ධම්මා කාළපක්ඛෙව චන්දිමා.
362. උපාරම්භචිත්තො දුම්මෙධො සුණාති ජිනසාසනං, පරිසුස්සති සද්ධම්මෙ මච්ඡා අප්පොදකෙ යථා.
363. උපාරම්භචිත්තො දුම්මෙධො සුණාති ජිනසාසනං, න විරූහති සද්ධම්මෙ ඛෙත්තෙ බීජංව පූතිකං.
364. යො ච තුට්ඨෙන චිත්තෙන සුණාති ජිනසාසනං, ඛෙපෙත්වා ආසවෙ සබ්බෙ සච්ඡිකත්වා අකුප්පතං, පප්පුය්ය පරමං සන්තිං පරිනිබ්බාති අනාසවො’ති.{1}
ඉත්ථං සුදං ආයස්මා යසදත්තො ථෙරො ගාථායො අභාසිත්ථා’ති.
යසදත්තත්ථෙරගාථා.
5. 1. 11.
365. උපසම්පදා ච මෙ ලද්ධා විමුත්තො චම්හි අනාසවො, සො ච මෙ භගවා දිට්ඨො විහාරෙ ච සහාවසිං.
366. බහුදෙව රත්තිං භගවා අබ්භොකාසෙතිනාමයි, විහාරකුසලො සත්ථා විහාරං පාවිසී තදා.
367. සන්ථරිත්වාන සඞ්ඝාටිං සෙය්යං කප්පෙසි ගොතමො, සීහො සෙලගුහායං’ව පහීනභයභෙරවො.
368. තතො කල්යාණවාක්කරණො සම්මාසම්බුද්ධසාවකො, සොණො අභාසි සද්ධම්මං බුද්ධසෙට්ඨස්ස සම්මුඛා.
369. පඤ්චක්ඛන්ධෙ පරිඤ්ඤාය භාවයිත්වාන අඤ්ජසං, පප්පුය්ය පරමං සන්තිං පරිනිබ්බිස්සත්යනාසවො’ති.
ඉත්ථං සුදං ආයස්මා සොණො ථෙරො ගාථායො අභාසිත්ථා’ති.
සොණකුටිකණ්ණත්ථෙරගාථා.
5. 1. 12.
370. යො වෙ ගරූනං වචනඤ්ඤු ධීරො වසෙ ච තම්හි ජනයෙ ච පෙමං, සො භත්තිමා නාම ච හොති පණ්ඩිතො ඤත්වා ච ධම්මෙසු විසෙසි අස්ස.
371. යං ආපදා උප්පතිතා උළාරා නක්ඛම්භයන්තෙ පටිසඞ්ඛයන්තං, සො ථාමවා නාම ච හොති පණ්ඩිතො ඤත්වා ච ධම්මෙසු විසෙසි අස්ස.
372. යො වෙ සමුද්දො’ව ඨිතො අනෙජො ගම්භීරපඤ්ඤො නිපුණත්ථදස්සී, අසංහාරියො නාම ච හොති පණ්ඩිතො ඤත්වා ච ධම්මෙසු විසෙසි අස්ස.
373. බහුස්සුතො ධම්මධරො ච හොති ධම්මස්ස හොති අනුධස්සචාරී, සො තාදිසො නාම ච හොති පණ්ඩිතො ඤත්වා ච ධම්මෙසු විසෙසි අස්ස.
374. අත්ථං ච යො ජානාති භාසිතස්ස අත්ථං ච ඤත්වාන තථා කරොති අත්ථන්තරො නාම ස හොති පණ්ඩිතො ඤත්වා ච ධම්මෙසු විසෙසි අස්සා’ති.
ඉත්ථං සුදං ආයස්මා කොසියො ථෙරො ගාථායො අභාසිත්ථා’ති.
කොසියත්ථෙරගාථා.
තස්සුද්දානං:
රාජදත්තො සුභූතො ච ගිරිමානන්දසූනුනා වඩ්ඪො ච කස්සපො ථෙරො ගයාකස්සපවක්කලී විජිතො යසදත්තො ච සොණො කොසියසව්හයො සට්ඨී ච පඤ්ච ගාථායො ථෙරා ච එත්ථ ද්වාදසා’ති.
පඤ්චකනිපාතො නිට්ඨිතො.
6. ඡක්කනිපාතො.
6. 1. 1.
375. දිස්වාන පාටිහීරානි ගොතමස්ස යසස්සිනො, න තාවාහං පණිපතිං ඉස්සාමානෙන වඤ්චිතො.
376. මම සඞ්කප්පමඤ්ඤාය චොදෙසි නරසාරථි, තතො මෙ ආසි සංවෙගො අබ්භුතො ලොමහංසනො.
377. පුබ්බෙ ජටිලභූතස්ස යා මෙ සිද්ධි{1} පරිත්තිකා, තාහං තදා නිරංකත්වා පබ්බජිං ජිනසාසනෙ.