සුත්තන්තපිටකෙ
ථෙරගාථාපාළි
නිදානගාථා
නමො තස්ස භගවතො අරහතො සම්මාසම්බුද්ධස්ස
සීහානං’ව නදන්තානං දාඨීනං ගිරිගබ්භරෙ සුණාථ භාවිතත්තානං ගාථා අත්තූපනායිකා.
යථානාමා යථාගොත්තා යථාධම්මවිහාරිනො යථාධිමුත්තා සප්පඤ්ඤා විහරිංසු අතන්දිතා.
තත්ථ තත්ථ විපස්සිත්වා ඵුසිත්වා අච්චුතං පදං කතන්තං පච්චවෙක්ඛන්තා ඉමමත්ථමභාසිසුං.
1. එකකනිපාතො
පඨමො වග්ගො
1. 1. 1.
1. ඡන්නා මෙ කුටිකා සුඛා නිවාතා වස්ස දෙව යථාසුඛං චිත්තං මෙ සුසමාහිතං විමුත්තං ආතාපී විහරාමි වස්ස දෙවා’ති.
ඉත්ථං සුදං ආයස්මා සුභූතිත්ථෙරො ගාථං අභාසිත්ථා’ති.
සුභූතිත්ථෙරගාථා.
1. 1. 2.
2. උපසන්තො උපරතො මන්තභාණී{1} අනුද්ධතො ධුනාති පාපකෙ ධම්මෙ දුමපත්තං ව මාලුතො’ති.
ඉත්ථං සුදං ආයස්මා මහාකොට්ඨිතො ථෙරො ගාථං අභාසිත්ථා’ති.
මහාකොට්ඨිතත්ථෙරගාථා.
1. 1. 3.
3. පඤ්ඤං ඉමං පස්ස තථාගතානං අග්ගි යථා පජ්ජලිතො{1} නිසීථෙ ආලොකදා චක්ඛුදදා භවන්ති යෙ ආගතානං විනයන්ති කඞ්ඛං’ති.
ඉත්ථං සුදං ආයස්මා කඞ්ඛාරෙවතො ථෙරො ගාථං අභාසිත්ථා’ති.
කඞ්ඛාරෙවතත්ථෙරගාථා.
1. 1. 4.
4. සබ්භිරෙව සමාසෙථ පණ්ඩිතෙහත්ථදස්සිභි{2} අත්ථං මහන්තං ගම්භීරං දුද්දසං නිපුණං අණුං ධීරා සමධිගච්ඡන්ති අප්පමත්තා විචක්ඛණා’ති.
ඉත්ථං සුදං ආයස්මා පුණ්ණො මන්තාණිපුත්තො ථෙරො ගාථං අභාසිත්ථා’ති.
පුණ්ණත්ථෙරගාථා.
1. 1. 5.
5. යො දුද්දමියො{3} දමෙන දන්තො දබ්බො සන්තුසිතො විතිණ්ණකඞ්ඛො විජිතාවී අපෙතභෙරවො හි දබ්බො සො පරිනිබ්බුතො ඨිතත්තො’ති.
ඉත්ථං සුදං ආයස්මා දබ්බො ථෙරො ගාථං අභාසිත්ථා’ති.
දබ්බත්ථෙරගාථා.
1. 1. 6.
6. යො සීතවනං උපාග{4} භික්ඛු එකො සන්තුසිතො සමාහිතත්තො විජිතාවී අපෙතලොමහංසො රක්ඛං කායගතාසතිං ධිතීමා’ති.{5}
ඉත්ථං සුදං ආයස්මා සීතවනියො ථෙරො ගාථං අභාසිත්ථා’ති.
සීතවනියත්ථෙරගාථා.
1. 1. 7.
7. යොපානුදී මච්චුරාජස්ස සෙනං නළසෙතුං ව සුදුබ්බලං මහොඝො විජිතාවී අපෙතභෙරවො හි දන්තො සො පරිනිබ්බුතො ඨිතත්තො’ති.
ඉත්ථං සුදං ආයස්මා භල්ලියො ථෙරො ගාථං අභාසිත්ථා’ති.
භල්ලියත්ථෙරගාථා.
1. 1. 8.
8. යො දුද්දමියො{1} දමෙන දන්තො වීරො සන්තුසිතො විතිණ්ණකංඛො විජිතාවී අපෙතලොමහංසො වීරො සො පරිනිබ්බුතො ඨිතත්තො’ති.
ඉත්ථං සුදං ආයස්මා වීරො ථෙරො ගාථං අභාසිත්ථා’ති.
වීරත්ථෙරගාථා.
1. 1. 9.
9. ස්වාගතං න දුරාගතං නයිදං දුමන්තිතං මම සංවිභත්තෙසු ධම්මෙසු යං සෙට්ඨං තදුපාගමින්ති.
ඉත්ථං සුදං ආයස්මා පිළින්දවච්ඡො ථෙරො ගාථං අභාසිත්ථා’ති.
පිළින්දවච්ඡත්ථෙරගාථා.
1. 1. 10.
10. විහරි අපෙක්ඛං ඉධ වා හුරං වා යො වෙදගූ සමිතො යතත්තො සබ්බෙසු ධම්මෙසු අනූපලිත්තො ලොකස්ස ධඤ්ඤා උදයබ්බයඤ්ඤා’ති.
ඉත්ථං සුදං ආයස්මා පුණ්ණමාසො ථෙරො ගාථං අභාසිත්ථා’ති.
පුණ්ණමාසත්ථෙරගාථා.
පඨමො වග්ගො.
තස්සුද්දානං:
සුභූති කොට්ඨිතො ථෙරො කඞ්ඛාරෙවතසම්මතො{2} මන්තාණිපුත්තො දබ්බො ච සීතවනියො ච භල්ලියො වීරො පිළින්දවච්ඡො ච පුණ්ණමාසො තමොනුදො’ති.
දුතියො වග්ගො
1. 2. 1.
11. පාමොජ්ජබහුලො{1} භික්ඛු ධම්මෙ බුද්ධප්පවෙදිතෙ අධිගච්ඡෙ පදං සන්තං සඞ්ඛාරූපසමං සුඛන්ති.
ඉත්ථං සුදං ආයස්මා චූළවච්ඡො{2} ථෙරො ගාථං අභාසිත්ථා’ති.
චූළවච්ඡත්ථෙරගාථා.
1. 2. 2.
12. පඤ්ඤාබලී සීලවතූපපන්නො සමාහිතො ඣානරතො සතීමා යදත්ථියං භොජනං භුඤ්ජමානො කඞ්ඛෙථ කාලං ඉධ වීතරාගො’ති.
ඉත්ථං සුදං ආයස්මා මහාවච්ඡො{3} ථෙරො ගාථං අභාසිත්ථා’ති.
මහාවච්ඡත්ථෙරගාථා.
1. 2. 3.
13. නීලබ්භවණ්ණා රුචිරා සීතවාරී සුචින්ධරා ඉන්දගොපකසඤ්ඡන්නා තෙ සෙලා රමයන්ති ම’න්ති.
ඉත්ථං සුදං ආයස්මා වනවච්ඡො ථෙරො ගාථං අභාසිත්ථා’ති.
වනවච්ඡත්ථෙරගාථා.
1. 2. 4.
14. උපජ්ඣායො මං අවච{4} ඉතො ගච්ඡාම{5} සීවක ගාමෙ මෙ වසති කායො අරඤ්ඤං මෙ ගතො මනො සෙමානකො පි ගච්ඡාමි නත්ථි සඞ්ගො විජානත’න්ති.
ඉත්ථං සුදං ආයස්මතො වනවච්ඡස්ස ථෙරස්ස සාමණෙරො ගාථං අභාසිත්ථා’ති.
වනවච්ඡත්ථෙරසාමණෙරගාථා.
1. 2. 5.
15. පඤ්ච ඡින්දෙ පඤ්ච ජහෙ පඤ්ච චුත්තරි භාවයෙ පඤ්චසඞ්ගාතිගො භික්ඛු ඔඝතිණ්ණො’ති වුච්චතී’ති.
ඉත්ථං සුදං ආයස්මා කුණ්ඩධානො ථෙරො ගාථං අභාසිත්ථා’ති.
කුණ්ඩධානත්ථෙරගාථා.
1. 2. 6.
16. යථා පි භද්දො ආජඤ්ඤො නඞ්ගලාවත්තනී සිඛී ගච්ඡති අප්පකසිරෙන එවං රත්තින්දිවා මම ගච්ඡති අප්පකසිරෙන සුඛෙ ලද්ධෙ නිරාමිසෙ’ති.
ඉත්ථං සුදං ආයස්මා බෙල්ලට්ඨිසීසො ථෙරො ගාථං අභාසිත්ථා’ති.
බෙල්ලට්ඨිසීසත්ථෙරගාථා.
1. 2. 7.
17. මිද්ධි යදා හොති මහග්ඝසො ච නිද්දායිතා සම්පරිවත්තසායී මහාවරාහො’ව නිවාපපුට්ඨො පුනප්පුනං ගබ්භමුපෙති මන්දො’ති.
ඉත්ථං සුදං ආයස්මා දාසකො ථෙරො ගාථං අභාසිත්ථා’ති.
දාසකත්ථෙරගාථා.
1. 2. 8.
18. අහු බුද්ධස්ස දායාදො භික්ඛු භෙසකලාවනෙ කෙවලං අට්ඨිකසඤ්ඤාය{1} අඵරී පඨවිං ඉමං මඤ්ඤෙ’හං කාමරාගං සො ඛිප්පමෙව පහිස්සතීති.
ඉත්ථං සුදං ආයස්මා සිගාලපිතා{2} ථෙරො ගාථං අභාසිත්ථා’ති.
සිගාලපිතුත්ථෙරගාථා.
1. 2. 9.
19. උදකං හි නයන්ති නෙත්තිකා උසුකාරො නමයන්ති තෙජනං දාරුං නමයන්ති තච්ඡකා අත්තානං දමයන්ති සුබ්බතා’ති.
ඉත්ථං සුදං ආයස්මා කුණ්ඩලො ථෙරො ගාථං අභාසිත්ථා’ති.
කුණ්ඩලත්ථෙරගාථා.
1. 2. 10.
20. මරණෙ මෙ භයං නත්ථි නිකන්ති නත්ථි ජීවිතෙ සන්දෙහං නික්ඛිපිස්සාමි සම්පජානො පතිස්සතො’ති.
ඉත්ථං සුදං ආයස්මා අජිතො ථෙරො ගාථං අභාසිත්ථා’ති.
අජිතත්ථෙරගාථා.
දුතියො වග්ගො.
තස්සුද්දානං:
චූළවච්ඡො මහාවච්ඡො වනවච්ඡො ච සීවකො කුණ්ඩධානො ච බෙලට්ඨි දාසකො ච තතොපරි සිගාලපිතිකො ථෙරො කුණ්ඩලො ච අජිතො දසා’ති.
තතියො වග්ගො
1. 3. 1.
21. නාහං භයස්ස භායාමි සත්ථා නො අමතස්ස කොවිදො යත්ථ භයං නාවතිට්ඨති තෙන මග්ගෙන වජන්ති භික්ඛවො’ති.
ඉත්ථං සුදං ආයස්මා නිග්රොධො ථෙරො ගාථං අභාසිත්ථා’ති.