900. තස්ස ධම්ම ඉමෙ හොන්ති කුසලා බොධිපක්ඛිකා, අනාසවො ච සො හොති ඉති වුත්තං මහෙසිනා.
901. මම සඞ්කප්පමඤ්ඤාය සත්ථා ලොකෙ අනුත්තරො, මනොමයෙන කායෙන ඉද්ධියා උපසඞ්කමි.
902. යදා මෙ අහු සඞ්කප්පො තතො උත්තරි දෙසයි, නිප්පපඤ්චරතො බුද්ධො නිප්පපඤ්චමදෙසයි.
903. තස්මාහං ධම්මමඤ්ඤාය විහාසිං සාසනෙ රතො, තිස්සො විජ්ජා අනුප්පත්තා කතං බුද්ධස්ස සාසනං.
904. පඤ්චපඤ්ඤාසවස්සානි යතො නෙසජ්ජිකො අහං, පඤ්චවීසතිවස්සානි යතො මිද්ධං සමූහතං.
905. නාහු අස්සාසපස්සාසා ඨිතචිත්තස්ස තාදිනො, අනෙජො සන්තිමාරබ්භ චක්ඛුමා පරිනිබ්බුතො.
906. අසල්ලීනෙන චිත්තෙන වෙදනං අජ්ඣවාසයී, පජ්ජොතස්සෙව නිබ්බානං විමොක්ඛො චෙතසො අහු.
907. එතෙ පච්ඡිමිකා දානි මුනිනො ඵස්සපඤ්චමා, නාඤ්ඤෙ ධම්මා භවිස්සන්ති සමුබද්ධෙ පරිනිබ්බුතෙ.
908. නත්ථි දානි පුනාවාසො දෙවකායම්හි{1} ජාලිනි, වික්ඛීණො ජාතිසංසාරො නත්ථි දානි පුනබ්භවො.
909. යස්ස මුහුත්තෙන{2} සහස්සධා ලොකො සංවිදිතො සබ්රහ්මකප්පො, වසී ඉද්ධිගුණෙ චුතූපපාතෙ කාලෙ පස්සති දෙවතා ස භික්ඛු.{3}
910. අන්නභාරො{4} පුරෙ ආසිං දළිද්දො ඝාසහාරකො, සමණං පටිපාදෙසිං උපරිට්ඨං යසස්සිනං.
911. සොම්හි සක්යකුලෙ ජාතො අනුරුද්ධො’ති මං විදූ, උපෙතො නච්චගීතෙහි සම්මතාළප්පබොධනො.
912. අථද්දසාසිං සම්බුද්ධං සත්ථාරං අකුතොභයං, තස්මිං චිත්තං පසාදෙත්වා පබ්බජිං අනගාරියං.
913. පුබ්බෙනිවාසං ජානාමි යත්ථ මෙ වුසිතං පුරෙ, තාවතිංසෙසු දෙවෙසු අට්ඨාසිං සතජාතියා.
914. සත්තක්ඛත්තුං මනුස්සින්දො අහං රජ්ජමකාරයිං, චාතුරන්තො විජිතාවී ජම්බුසණ්ඩස්ස{1} ඉස්සරො, අදණ්ඩෙන අසත්ථෙන ධම්මෙන අනුසාසයිං.
915. ඉතො සත්ත තතො{2} සත්ත සංසාරානි චතුද්දස, නිවාසමභිජානිස්සං දෙවලොකෙ ඨිතො තදා.
916. පඤ්චඞ්ගිකෙ සමාධිම්හි සන්තෙ{3} එකොදිභාවිතෙ, පටිප්පස්සද්ධිලද්ධම්හි{4} දිබ්බචක්ඛු{5} විසුජ්ඣි මෙ.
917. චුතූපපාතං ජානාමි සත්තානං ආගතිං ගතිං, ඉත්ථභාවඤ්ඤථාභාවං ඣානෙ පඤ්චඞ්ගිකෙ ඨිතො.
918. පරිචිණ්ණො මයා සත්ථා කතං බුද්ධස්ස සාසනං, ඔහිතො ගරුකො භාරො භවනෙත්ති සමූහතා.
919. වජ්ජීනං වෙළුවගාමෙ අහං ජීවිතසඞ්ඛයා, හෙට්ඨතො වෙළුගුම්බස්මිං නිබ්බායිස්සං අනාසවො’ති.
ඉත්ථං සුදං ආයස්මා අනුරුද්ධො ථෙරො ගාථායො අභාසිත්ථා’ති.
අනුරුද්ධත්ථෙරගාථා.
20. 1. 10.
920. සමණස්ස අහු{6} චින්තා පුප්ඵිතම්හි මහාවනෙ, එකග්ගස්ස නිසින්නස්ස පවිවිත්තස්ස ඣායිනො.
921. අඤ්ඤථා ලොකනාථම්හි තිට්ඨන්තෙ පුරිසුත්තමෙ, ඉරියං ආසි භික්ඛූනං අඤ්ඤථා දානි දිස්සති.{7}
922. සීථවාතපරිත්තානං හිරිකොපීනඡාදනං, මත්තත්ථියං අභුඤ්ජිංසු සන්තුට්ඨා ඉතරීතරෙ.
923. පණීතං යදි වා ලූඛං අප්පං වා යදි වා බහුං, යාපනත්ථං අභුඤ්ජිංසු අගිද්ධා නාධිමුච්ඡිතා.
924. ජීවිතානං පරික්ඛාරෙ භෙසජ්ජෙ අථ පච්චයෙ, න බාළ්හං උස්සුකා ආසුං යථා තෙ ආසවක්ඛයෙ.
925. අරඤ්ඤෙ රුක්ඛමූලෙසු කන්දරාසු ගුහාසු ච, විවෙකමනුබ්රූහෙන්තා{1} විහංසු{2} තප්පරායනා.
926. නීචා නිවිට්ඨා සුභරා මුදූ අත්ථද්ධමානසා, අබ්යාසෙකා අමුඛරා අත්ථචින්තාවසානුගා.
927. තතො පාසාදිකං ආසි ගතං භුත්තං නිසෙවිතං, සිනිද්ධා තෙලධාරා’ව අහොසි ඉරියාපථො.
928. සබ්බාසවපරික්ඛීණා මහාඣායී මහාහිතා, නිබ්බුතා දානි තෙ ථෙරා පරිත්තා දානි තාදිසා.
929. කුසලානං ච ධම්මානං පඤ්ඤාය ච පරික්ඛයා, සබ්බාකාරවරූපෙතං ලුජ්ජතෙ ජිනසාසනං.
930. පාපකානං ච ධම්මානං කිලෙසානං ච යො උතු, උපට්ඨිතා විවෙකාය යෙ ච සද්ධම්මසෙසකා.
931. තෙ කිලෙසා පවඩ්ඪන්තා ආවිසන්ති බහුං ජනං, කීළන්ති මඤ්ඤෙ බාලෙහි උම්මත්තෙහි ව රක්ඛසා.
932. කිලෙසෙහාභිභූතා තෙ තෙන තෙන විධාවිතා, නරා කිලෙසවත්ථූසු සසඞ්ගාමෙව{3} ඝොසිතෙ.
933. පරිච්චජිත්වා සද්ධම්මං අඤ්ඤමඤ්ඤෙහි භණ්ඩරෙ, දිට්ඨිගතානි අන්වෙන්තා ඉදං සෙය්යොති මඤ්ඤරෙ.
934. ධනං ච පුත්තං භරියං ච ඡඩ්ඩයිත්වාන නිග්ගතා, කටච්ඡුභික්ඛාහෙතූ{4} අකිච්චානි නිසෙවරෙ.
935. උදරාවදෙහකං භුත්වා සයන්තුත්තානසෙය්යකා, කථා වඩ්ඪෙන්ති{5} පටිබුද්ධා{6} යා කථා සත්ථුගරහිතා.
936. සබ්බකාරුකසිප්පානි චිත්තීකත්වාන{7} සික්ඛරෙ, අවූපසන්තා අජ්ඣත්තං සාමඤ්ඤත්ථො’ති අච්ඡති.
937. මත්තිකං තෙලං චුණ්ණං ච උදකාසනභොජනං, ගිහීනං උපනාමෙන්ති ආකඞ්ඛන්තා බහුත්තරං.
938. දන්තපොනං කපිත්ථං ච පුප්ඵං ඛාදනියානි{8} ච, පිණ්ඩපාතෙ ච සම්පන්නෙ{9} අම්බෙ ආමලකානි ච.
939. භෙසජ්ජෙසු යථා වෙජ්ජා කිච්චාකිච්චෙ යථා ගිහී, ගණිකා’ව විභූසායං ඉස්සරෙ ඛත්තියා යථා.
940. නෙකතිකා වඤ්චනිකා කූටසක්ඛි අපාටුකා,{10} බහූහි පරිකප්පෙහි ආමිසං පරිභුඤ්ජරෙ.
941. ලෙසකප්පෙ පරියායෙ පරිකප්පෙනුධාවිතා, ජීවිකත්ථා උපායෙන සඞ්කඩ්ඪන්ති බහුං ධනං.
942. උපට්ඨාපෙන්ති පරිසං කම්මතො නො ච ධම්මතො, ධම්මං පරෙසං දෙසෙන්ති ලාභතො නො ච අත්ථතො.
943. සඞ්ඝලාභස්ස භණ්ඩන්ති සඞ්ඝතො පරිබාහිරා,{1} පරලාභූපජීවන්තා{2} අහිරීකා{3} න ලජ්ජරෙ.
944. නානුයුත්තා තථා එකෙ මුණ්ඩා සඞ්ඝාටිපාරුතා, සම්භාවනංයෙවිච්ඡන්ති ලාභසක්කාරමුච්ඡිතා.
945. එවං නානප්පයාතම්හි න දානි{4} සුකරං තථා, අඵුසිතං{5} වා ඵුසිතුං ඵුසිතං නානුරක්ඛිතුං.
946. යථා කණ්ටකට්ඨානම්හි චරෙය්ය අනුපාහනො, සතිං උපට්ඨපෙත්වාන එවං ගාමෙ මුනී චරෙ.
947. සරිත්වා පුබ්බකෙ යොගී තෙසං වත්තමනුස්සරං, කිඤ්චා’පි පච්ඡිමො කාලො ඵුසෙය්ය අමතං පදං.
948. ඉදං වත්වා සාලවනෙ සමණො භාවිතින්ද්රියො, බ්රාහ්මණො පරිනිබ්බායී ඉසි ඛීණපුනබ්භවො’ති.
ඉත්ථං සුදං ආයස්මා පාරාසරියො ථෙරො ගාථායො අභාසිත්ථා’ති.
පාරාසරියත්ථෙරගාථා.
තස්සුද්දානං:
අධිමුත්තො පාරාසරියො තෙලකානි රට්ඨපාලො, මාලුඞ්ක්යසෙලො භද්දියො අඞ්ගුලි දිබ්බචක්ඛුකො. පාරාසරියො දසෙතෙ වීසතිනිපාතම්හි පරිකිත්තිතා, ගාථායො ද්වෙසතා හොන්ති පඤ්චතාලීස උත්තරින්ති.
වීසතිනිපාතො නිට්ඨිතො.
30. තිංසතිනිපාතො.
30. 1. 1.
949. පාසාදිකෙ බහූ දිස්වා භවිතත්තෙ සුසංවුතෙ, ඉසි පණ්ඩරස්ස ගොත්තො අපුච්ඡි ඵුස්සසව්හයං.
950. කිංඡන්දා කිමධිප්පායා කිමාකප්පා භවිස්සරෙ, අනාගතම්හි කාලම්හි තං මෙ අක්ඛාහි පුච්ඡිතො.
951. සුණොහි වචනං මය්හං ඉසිපණ්ඩරසව්හය, සක්කච්චං උපධාරෙහි ආක්ඛිචිස්සාම්යනාගතං.
952. කොධනා උපනාහී ච මක්ඛී ථම්භී සඨා බහූ, ඉස්සුකී නානාවාදා ච භවිස්සන්ති අනාගතෙ.
953. අඤ්ඤාතමානිනො ධම්මෙ ගම්භීරෙ තීරගොචරා, ලහුකා අගරු ධම්මෙ අඤ්ඤමඤ්ඤමගාරවා.
954. බහූ ආදීනවා ලොකෙ උප්පජ්ජිස්සන්ත්යනාගතෙ,{1} සුදෙසිතං ඉමං ධම්මං කිලෙසිස්සන්ති දුම්මතී.
955. ගුණහීනා’පි සඞ්ඝම්හි වොහරන්තා{2} විසාරදා, බලවන්තො භවිස්සන්ති මුඛරා අස්සුතාවිනො.
956. ගුණවන්තො’පි සඞ්ඝම්හි වොහරන්තා යථාත්ථතො, දුබ්බලා තෙ භවිස්සන්ති හිරීමනා අනත්ථිකා.
957. රජතං ජාතරූපං ච ඛෙත්තං වත්ථුමජෙළකං, දාසිදාසං ච දුම්මෙධා සාදියිස්සන්ත්යනාගතෙ.{3}
958. උජ්ඣානසඤ්ඤිනො බාලා සීලෙසු අසමාහිතා, උන්නළා විචරිස්සන්ති කලහාභිරතා මගා.
959. උද්ධතා ච භවිස්සන්ති නීලචීවරපාරුතා, කුහා ථද්ධා ලපා සිඞ්ගී චරිස්සන්ත්යරියා විය.
960. තෙලසණ්ඨෙහි{4} කෙසෙහි චපලං අඤ්ජිතක්ඛිකා,{5} රථියාය ගමිස්සන්ති දන්තවණ්ණිකපාරුතා.{6}
961. අජෙගුච්ඡං විමුත්තෙහි සුරත්තං අරහද්ධජං, ජිගුච්ඡිස්සන්ති කාසාවං ඔදාතෙසු සමුච්ඡිතා.
962. ලාභකාමා භවිස්සන්ති කුසීතා හීනවීරියා, කිච්ඡන්තා වනපත්ථානි{7} ගාවන්තෙසු වසිස්සරෙ.
963. යෙ යෙ ලාභං ලභිස්සන්ති මිච්ඡාජීවරතා සදා, තෙ තෙ’ව අනුසික්ඛන්තා භමිස්සන්ති{1} අසංයතා.
964. යෙ යෙ අලාභිනො ලාභං න තෙ පුජ්ජා භවිස්සරෙ, සුපෙසලෙ’පි තෙ ධීරෙ සෙවිස්සන්ති න තෙ තදා.
965. පිලක්ඛුරජනං රත්තං ගරහන්තා සකං ධජං, තිත්ථියානං ධජං කෙචි ධාරෙස්සන්ත්යවදාතකං.{2}
966. අගාරවො ච කාසාවෙ තදා තෙසං භවිස්සති, පටිසඞ්ඛා ච කාසාවෙ භික්ඛූනං න භවිස්සති.
967. අභිභූතස්ස දුක්ඛෙන සල්ලවිද්ධස්ස රුප්පතො, පටිසඞ්ඛා මහාඝොරා නාගස්සාසි අචින්තියා.
968. ඡද්දන්තො හි තදා දිස්වා සුරත්තං අරහද්ධජං, තාවදෙව භණී ගාථා ගජො අත්ථොපසංහිතා.
969. අනික්කසාවො කාසාවං යො වත්ථං පරිදහෙස්සති, අපෙතො දමසච්චෙන න සො කාසාවමරහති.
970. යො ච වන්තකසාවස්ස සීලෙසු සුසමාහිතො, උපෙතො දමසච්චෙන ස වෙ කාසාවමරහති.
971. විපන්නසීලො දුම්මෙධො පාකටො කම්මකාරියො, විබ්භන්තචිත්තො නිස්සුක්කො න සො කාසාවමරහති.
972. යො ච සීලෙන සම්පන්නො වීතරාගො සමාහිතො, ඔදාතමනසඞ්කප්පො සවෙ කාසාවමරහති.
973. උද්ධතො උන්නළො බාලො සීලං යස්ස න විජ්ජති, ඔදාතකං අරහති කාසාවං කිං කරිස්සති.
974. භික්ඛූ ච භික්ඛුනියො ච දුට්ඨචිත්තා අනාදරා, තාදීනං මෙත්තචිත්තානං නිග්ගණ්හිස්සන්ත්යනාගතෙ.{3}
975. සික්ඛාපෙන්තා’පි ථෙරෙහි බාලා චීවරධාරණං, න සුණිස්සන්ති දුම්මෙධා පාකටා කාමකාරියා.
976. තෙ තථා සික්ඛිතා බාලා අඤ්ඤමඤ්ඤං අගාරවා, නාදියිස්සන්තුපජ්ඣායෙ ඛළුඞ්කො විය සාරථිං.
977. එවං අනාගතද්ධානං පටිපත්ති භවිස්සති, භික්ඛූනං භික්ඛුනීනං ච පත්තෙ කාලම්හි පච්ඡිමෙ.
978. පුරා ආගච්ඡතෙ එතං අනාගතං මහබ්භයං, සුබ්බචා හොථ සඛිලා අඤ්ඤමඤ්ඤං සගාරවා.
979. මෙත්තචිත්තා කාරුණිකා හොථ සීලෙසු සංවුතා, ආරද්ධවිරියා පහිතත්තා නිච්චං දළ්හපරක්කමා.
980. පමාදං භයතො දිස්වා අප්පමාදං ච ඛෙමතො, භාවෙථට්ඨඞ්ගිකං මග්ගං ඵුසන්තා{1} අමතං පද’න්ති.
ඉත්ථං සුදං ආයස්මා ඵුස්සො ථෙරො ගාථායො අභාසිත්ථා’ති.
ඵුස්සත්ථෙරගාථා.
30. 1. 2.
981. යථාචාරී යථාසතො සතීමා යතසඞ්කප්පජ්ඣායි අප්පමත්තො, අජ්ඣත්තරතො සමාහිතත්තො{2} එකො සන්තුසිතො තමාහු භික්ඛුං.
982. අල්ලං සුක්ඛං වා{3} භුඤ්ජන්තො න බාළ්හං සුහිතො සියා, ඌනොදරො{4} මිතාහාරො සතො භික්ඛු පරිබ්බජෙ.
983. චත්තාරො පඤ්ච ආලොපෙ අභුත්වා උදකං පිවෙ, අලං ඵාසුවිහාරාය පහිතත්තස්ස භික්ඛුනො.
984. කප්පියං තං චෙ ඡාදෙති{5} තීවරං ඉදමත්ථිතං, අලං ඵාසුවිහාරාය පහිතත්තස්ස භික්ඛුනො.
985. පල්ලඞ්කෙන නිසින්නස්ස ජණ්ණුකෙ නාභිවස්සති, අලං ඵාසුවිහාරාය පහිතත්තස්ස භික්ඛුනො.
986. යො සුඛං දුක්ඛතො අද්ද දුක්ඛමද්දක්ඛි සල්ලතො, උභයන්තරෙන{6} නාහොසි කෙන ලොකස්මිං{7} කිං සියා.