812. න සො රජ්ජති රසෙසු රසං භොත්වා{3} පතිස්සතො, විරත්තචිත්තො වෙදෙති තං ච නාජ්ඣොස්ස{1} තිට්ඨති.
813. යථාස්ස සායතො රසං සෙවතො චා’පි වෙදනං, ඛීයති නොපචීයති එවං සො චරතී සතො, එවං අපචිනතො දුක්ඛං සන්තිකෙ නිබ්බානං{2} වුච්චති.
814. න සො රජ්ජති ඵස්සෙසු ඵස්සං ඵුස්ස පතිස්සතො, විරත්තචිත්තො වෙදෙති තං ච නාජ්ඣොස්ස{1} තිට්ඨති.
815. යථාස්ස ඵුසතො ඵස්සං සෙවතො චා’පි වෙදනං, ඛීයති නොපචීයති එවං සො චරතී සති, එවං අපචිනතො දුක්ඛං සන්තිකෙ නිබ්බානං{2} වුච්චති.
816. න සො රජ්ජති ධම්මෙසු ධම්මං ඤත්වා පතිස්සතො, විරත්තචිත්තො වෙදෙති තං ච නාජ්ඣොස්ස තිට්ඨති.
817. යථාස්ස විජානතො ධම්මං සෙවතො චා’පි වෙදනං, ඛීයති නොපචීයති එවං සො චරතී සතො, එවං අපචිනතො දුක්ඛං සන්තිකෙ නිබ්බානං{2} වුච්චතී’ති.
ඉත්ථං සුදං ආයස්මා මාලුඞ්ක්යපුත්තො ථෙරො ගාථායො අභාසිත්ථා’ති.
මාලුඞ්ක්යපුත්තත්ථෙරගාථා.
20. 1. 6.
818. පරිපුණ්ණකායො සුරුචි සුජාතො චාරුදස්සනො, සුවණ්ණවණ්ණොසි භගවා සුසුක්කදාඨො{1} විරියවා.
819. නරස්ස හි සුජාතස්ස යෙ භවන්ති වියඤ්ජනා, සබ්බෙ තෙ තව කායස්මිං මහාපුරිසලක්ඛණා.
820. පසන්නනෙත්තො සුමුඛො බ්රහ්මා උජු පතාපවා, මජ්ඣෙ සමණසඞ්ඝස්ස ආදිච්චො’ව විරොචසි.
821. කල්යාණදස්සනො භික්ඛු කඤ්චනසන්නිභත්තචො, කිං තෙ සමණභාවෙන එවං උත්තමවණ්ණිනො.
822. රාජා අරහසි භවිතුං චක්කවත්තී රථෙසභො, චාතුරන්තො විජිතාවී ජම්බුසණ්ඩස්ස{2} ඉස්සරො.
823. ඛත්තියා භොගා රාජානො{3} අනුයන්තා භවන්ති තෙ, රාජාධිරාජා{4} මනුජින්දො රජ්ජං කාරෙහි ගොතම.
824. රාජාහමස්මි සෙල (සෙලාති භගවා) ධම්මරාජා අනුත්තරො, ධම්මෙන වක්කං වත්තෙමි චක්කං අප්පතිවත්තියං.
825. සම්බුද්ධො පටිජානාසි (ඉති සෙලො බ්රාහ්මණො) ධම්මරාජා අනුත්තරො, ධම්මෙන චක්කං වත්තෙමි ඉති භාසසි{5} ගොතම.
826. කො නු සෙනාපති භොතො සාවකො සත්ථු අන්වයො,{6} කො තෙ මං අනුවත්තෙති ධම්මචක්කං පවත්තිතං.
827. මයා පවත්තිතං චක්කං (සෙලාති භගවා) ධම්මචක්කං අනුත්තරං, සාරිපුත්තො අනුවත්තෙති අනුජාතො තථාගතං.
828. අභිඤ්ඤෙය්යං අභිඤ්ඤාතං භාවෙතබ්බං ච භාවිතං, පහාතබ්බං පහීනං මෙ තස්මා බුද්ධොස්මි බ්රාහ්මණ.
829. විනයස්සු මයි කඞ්ඛං අධිමුච්චස්සු බ්රාහ්මණ, දුල්ලභං දස්සනං හොති සම්බුද්ධානං අභිණ්හසො.
830. යෙසං වෙ දුල්ලභො ලොකෙ පාතුභාවො අභිණ්හසො, සො’හං බ්රාහ්මණ සම්බුද්ධො{7} සල්ලකත්තො අනුත්තරො.
831. බ්රහ්මභූතො අතිතුලො මාරසෙනප්පමද්දනො, සබ්බාමිත්තෙ වසෙ කත්වා{8} මොදාමි අකුතොභයො.
832. ඉදං භොන්තො නිසාමෙථ යථා භාසති චක්ඛුමා, සල්ලකත්තො{1} මහාවීරො සීහො’ව නදතී වනෙ.
833. බ්රහ්මභූතං අතිතුලං මාරසෙනප්පමද්දනං, කො දිස්වා නප්පසීදෙය්ය අපි කණ්හාභිජාතිකො.
834. යො මං ඉච්ඡති අන්වෙතු යො වා නිච්ඡති ගච්ඡතු, ඉධාහං පබ්බජිස්සාමි වරපඤ්ඤස්ස සන්තිකෙ.
835. එතං චෙ රුච්චති භොතො සම්මාසම්බුද්ධසාසනං, මයම්පි පබ්බජිස්සාම වරපඤ්ඤස්ස සන්තිකෙ.
836. බ්රාහ්මණා තිසතා ඉමෙ යාචන්ති පඤ්ජලීකතා, බ්රහ්මචරියං චරිස්සාම භගවා තව සන්තිකෙ.
837. ස්වාක්ඛාතං බ්රහ්මචරියං (සෙලාති භගවා) සන්දිට්ඨිකමකාලිකං, යත්ථ අමොඝා පබ්බජ්ජා අප්පමත්තස්ස සික්ඛතො.
838. යං තං සරණමාගම්ම ඉතො අට්ඨමෙ{2} චක්ඛුම, සත්තරත්තෙන භගවා දන්තාම්හ තව සාසනෙ.
839. තුවං බුද්ධො තුවං සත්ථා තුවං මාරාභිභූ මුනි, තුවං අනුසයෙ ඡෙත්වා තිණ්ණො තාරෙසිමං පජං.
840. උපධී තෙ සමතික්කන්තා ආසවා තෙ පදාලිතා, සීහො’ව අනුපාදානො පහීනභයභෙරවො.
841. භික්ඛවො තිසතා ඉමෙ තිට්ඨන්ති පඤ්ජලීකතා, පාදෙ වීර පසාරෙහි නාගා වන්දන්තු සත්ථුනො’ති.
ඉත්ථං සුදං ආයස්මා සෙලො ථෙරො ගාථායො අභාසිත්ථා’ති.
සෙලත්ථෙරගාථා.
20. 1. 7.
842. යාතං මෙ හත්ථිගීවාය සුඛුමා වත්ථා පධාරිතා, සාලීනං ඔදනො භුත්තො සුචීමංසූපසෙචනො.
843. සොජ්ජ භද්දො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
844. පංසුකූලී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
845. පිණ්ඩපාතී සාතතිකො උඤ්ඡාපත්තාගතෙ1 රතො, ඣායති අනුපාදානො පුත්තො ගොධාය භද්දියො.
846. තෙචිවරී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
847. සපදානචාරී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
848. එකාසනී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
849. පත්තපිණ්ඩී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
850. ඛලුපච්ඡාභත්තී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
851. ආරඤ්ඤිකො සාතතිකො උඤ්ඡාපත්තාගතෙ1 රතො, ඣායති අනුපාදානො පුත්තො ගොධාය භද්දියො.
852. රුක්ඛමූලිකො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
853. අබ්භොකාසී සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
854. සොසානිකො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
855. යථාසන්ථතිකො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
856. නෙසජ්ජිකො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
857. අප්පිච්ඡො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
858. සන්තුට්ඨො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
859. පවිවිත්තො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
860. අසංසට්ඨො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
861. ආරද්ධවිරියො සාතතිකො උඤ්ඡාපත්තාගතෙ{1} රතො, ඣායති අනුපාදානො පුත්තො ගොධාය භද්දියො.
862. හිත්වා සතපලං කංසං සොවණ්ණං සතරාජිකං, අග්ගහිං මත්තිකාපත්තං ඉදං දුතියාභිසෙචනං.
863. උච්චෙ මණ්ඩලිපාකාරෙ දළ්හමට්ටාලකොට්ඨකෙ, රක්ඛිතො ඛග්ගහත්ථෙහි උත්තසං විහරිං පුරෙ.
864. සොජ්ජ භද්දො අනුත්රාසී පහීනභයභෙරවො, ඣායති වනමොගය්හ පුත්තො ගොධාය භද්දියො.
865. සීලක්ඛන්ධෙ පතිට්ඨාය සතිං පඤ්ඤං ච භාවයං, පාපුණිං අනුපුබ්බෙන සබ්බසංයොජනක්ඛය’න්ති.
ඉත්ථං සුදං ආයස්මා භද්දියො කාළිගොධාය පුත්තො ථෙරො ගාථායො අභාසිත්ථා’ති.
භද්දියත්ථෙරගාථා.
20. 1. 8.
866. ගච්ඡං වදෙසි සමණට්ඨිතොම්හි මමං ච බ්රූසි ඨිතමට්ඨිතො’ති, පුච්ඡාමි තං සමණ එතමත්ථං කථං{2} ඨිතො ත්වං අහමට්ඨිතොම්හි.
867. ඨිතො අහං අඞ්ගුලිමාල සබ්බදා සබ්බෙසු භූතෙසු නිධාය දණ්ඩං, තුවඤ්ච පාණෙසු අසඤ්ඤතොසි තස්මා ඨිතොහං තුවමට්ඨිතොසි.
868. චිරස්සං වත මෙ මහිතො මහෙසි මහාවනං සමණො පච්චුපාදි, සො’හං චජිස්සාමි සහස්සපාපං සුත්වාන ගාථං තව ධම්මයුත්තං.
869. ඉච්චෙව චොරො අසිමාවුධං ච සොබ්භෙ පපාතෙ නරකෙ අන්වකාසි, අවන්දි චොරො සුගතස්ස පාදෙ තත්ථෙව පබ්බජ්ජමයාචි බුද්ධං.
870. බුද්ධො ච ඛො කාරුණිකො මහෙසි යො සත්ථා ලොකස්ස සදෙවකස්ස, තමෙහි භික්ඛූ’ති තදා අවොච එසො’ව තස්ස අහු භික්ඛුභාවො.
871. යො ච පුබ්බෙ පමජ්ජිත්වා පච්ඡා සො නප්පමජ්ජති, සො’මං ලොකං පභාසෙති අබ්භා මුත්තො’ව චන්දිමා.
872. යස්ස පාපං කතං කම්මං කුසලෙන පිථීයති,{1} සො’මං ලොකං පභාසෙති අබ්භා මුත්තො’ව චන්දිමා.
873. යො හවෙ දහරො භික්ඛු යුඤ්ජති බුද්ධසාසනෙ, සො’මං ලොකං පභාසෙති අබ්භා මුත්තො’ව චන්දිමා.
874. දිසා’පි{2} මෙ ධම්මකථං සුණන්තු දිසා’පි මෙ යුඤ්ජන්තු බුද්ධසාසනෙ, දිසා’පි{2} මෙ තෙ මනුජෙ{3} භජන්තු යෙ ධම්මමෙවාදාපෙන්ති{4} සන්තො.
875. දිසා හි මෙ ඛන්තිවාදානං අවිරොධප්පසංසිනං, සුණන්තු ධම්මං කාලෙන තඤ්ච අනුවිධීයන්තු.
876. නහි ජාතු සො මමං හිංසෙ අඤ්ඤං වා පන කිඤ්චනං, පප්පුය්ය පරමං සන්තිං රක්ඛෙය්ය තසථාවරෙ.
877. උදකං හි නයන්ති නෙත්තිකා උසුකාරා නමයන්ති තෙජනං, දාරුං නමයන්ති තච්ඡකා අත්තානං දමයන්ති පණ්ඩිතා.
878. දණ්ඩෙනෙකෙ දමයන්ති අඞ්කුසෙහි කසාහි ච, අදණ්ඩෙන අසත්ථෙන අහං අන්තොම්හි තාදිනා.
879. අභිංසකො’ති මෙ නාමං හිංසකස්ස පුරෙ සතො, අජ්ජාහං සච්චනාමොම්හි න නං හිංසාමි කිඤ්චනං.
880. චොරො අහං පුරෙ ආසිං අඞ්ගුලිමාලො’ති විස්සුතො, වුය්හමානො මහොඝෙන බුද්ධං සරණමාගමං.
881. ලොහිතපාණී{5} පුරෙ ආසිං අඞ්ගුලිමාලො’ති විස්සුතො, සරණාගමනං පස්ස භවනෙත්ති සමූහතා.
882. තාදිසං කම්මං කත්වාන බහුං දුග්ගතිගාමිනං ඵුට්ඨො කම්මවිපාකෙන අනණො භුඤ්ජාමි භොජනං.
883. පමාදමනුයුඤ්ජන්ති බාලා දුම්මෙධිනො ජනා. අප්පමාදං ච මෙධාවී ධනං සෙට්ඨං’ව රක්ඛති.
884. මා පමාදමනුයුඤ්ජෙථ මා කාමරතිසන්ථවං, අප්පමත්තො හි ඣායන්තො පප්පොති පරමං සුඛං.
885. ස්වාගතං නාපගතං නෙතං දුම්මන්තිතං මම, සංවිභත්තෙසු{6} ධම්මෙසු යං සෙට්ඨං තදුපාගමං.
886. ස්වාගතං නාපගතං නෙතං දුම්මන්තිතං මම, තිස්සො විජ්ජා අනුප්පත්තා කතං බුද්ධස්ස සාසනං.
887. අරඤ්ඤෙ රුක්ඛමූලෙ වා පබ්බතෙසු ගුහාසු වා, තත්ථ තත්ථෙව අට්ඨාසිං උබ්බිග්ගමනසො තදා.
888. සුඛං සයාමි ඨායාමි සුඛං කප්පෙමි ජීවිතං, අහත්ථපාසො මාරස්ස අහො සත්ථානුකම්පිතො.
889. බ්රහ්මජච්චො පුරෙ ආසිං උදිච්චො උභතො අහු,{1} සොජ්ජ පුත්තො සුගතස්ස ධම්මරාජස්ස සත්ථුනො.
890. වීතතණ්හො අනාදානො ගුත්තද්වාරො සුසංවුතො, අඝමූලං වධිත්වාන{2} පත්තො මෙ ආසවක්ඛයො.
891. පරිචිණ්ණො මයා සත්ථා කතං බුද්ධස්ස සාසනං, ඔහිතො ගරුකො භාරො භවනෙත්ති සමූහතා’ති.
ඉත්ථං සුදං ආයස්මා අඞ්ගුලිමාලො ථෙරො ගාථායො අභාසිත්ථා’ති.
අඞ්ගුලිමාලත්ථෙරගාථා.
20. 1. 9.
892. පහාය මාතාපිතරො භගිනී ඤාතිභාතරො, පඤ්චකාමගුණෙ හිත්වා අනුරුද්ධො’ව ඣායතු.
893. සමෙතො නච්චගීතෙහි සම්මතාළප්පබොධනො, න තෙන සුද්ධිමජ්ඣගං{3} මාරස්ස විසයෙ රතො.
894. එතං ච සමතික්කම්ම රතො බුද්ධස්ස සාසනෙ, සබ්බොඝං සමතික්කම්ම අනුරුද්ධො’ව ඣායති.
895. රූපා සද්දා රසා ගන්ධා ඵොට්ඨබ්බා ච මනොරමා’ එතෙ ච සමතික්කම්ම අනුරුද්ධො’ව ඣායති.
896. පිණ්ඩපාතා පටික්කන්තො{4} එකො අදුතියො මුනි, එසති පංසුකූලානි අනුරුද්ධො අනාසවො.
897. විචිනී අග්ගහී ධොවී රජයී ධාරයී මුනි, පංසුකූලානි මතිමා අනුරුද්ධො අනාසවො.
898. මහිච්ඡො ච අසන්තුට්ඨො සංසට්ඨො යො ච උද්ධතො, තස්ස ධම්මා ඉමෙ හොන්ති පාපකා සඞ්කිලෙසිකා.
899. සතො ච හොති අප්පිච්ඡො සන්තුට්ඨො අවිඝාතවා, පවිවෙකරතො විත්තො නිච්චමාරද්ධවීරියො.