වච්ඡගොත්තත්ථෙරගාථා.
1. 12. 3.
113. අච්ඡොදිකා පුථුසිලා ගොනඞ්ගුලමිගායුතා, අම්බුසෙවාලසඤ්ඡන්නා තෙ සෙලා රමයන්ති ම’න්ති.
ඉත්ථං සුදං ආයස්මා වනවච්ඡො ථෙරො ගාථං අභාසිත්ථා’ති.
වනවච්ඡත්ථෙරගාථා.
1. 12. 4.
114. කායදුට්ඨුල්ලගරුනො හීයමානම්හි{1} ජීවිතෙ, සරීරසුඛගිද්ධස්ස කුතො සමණ සාධුතා’ති.
ඉත්ථං සුදං ආයස්මා අධිමුත්තො ථෙරො ගාථං අභාසිත්ථා’ති.
අධිමුත්තත්ථෙරගාථා.
1. 12. 5.
115. එසාවහිය්යසෙ පබ්බතෙන බහුකුටජසල්ලකිකෙන,{2} නෙසාදකෙන ගිරිනා යසස්සිනා පරිච්ඡදෙනා’ති.
ඉත්ථං සුදං ආයස්මා මහානාමො ථෙරො ගාථං අභාසිත්ථා’ති.
මහානාමත්ථෙරගාථා.
1. 12. 6.
116. ඡ ඵස්සායතනෙ හිත්වා ගුත්තද්වාරො සුසංවුතො, අඝමූලං වමිත්වාන පත්තො මෙ ආසවක්ඛයො’ති.
ඉත්ථං සුදං ආයස්මා පාරාසරියත්ථෙරො{3} ගාථං අභාසිත්ථා’ති.
පාරාසරියත්ථෙරගාථා.
1. 12. 7.
117. සුවිලිත්තො සුවසනො සබ්බාභරණභූසිතො, තිස්සො විජ්ජා අජ්ඣගමිං කතං බුද්ධස්ස සාසන’න්ති.
ඉත්ථං සුදං ආයස්මා යසො ථෙරො ගාථං අභාසිත්ථා’ති.
යසත්ථෙරගාථා.
1. 12. 8.
118. අභිසත්ථොව නිපතති වයො රූපං අඤ්ඤමිව තථෙව සන්තං, තස්සෙව සතො අවිප්පවසතො අඤ්ඤස්සෙව සරාමි අත්තාන’න්ති.
ඉත්ථං සුදං ආයස්මා කිම්බිලො ථෙරො ගාථං අභාසිත්ථා’ති.
කිම්බිලත්ථෙරගාථා.
1. 12. 9.
119. රුක්ඛමූලගහනං පසක්කිය නිබ්බානං හදයස්මිං ඔපිය{1} ඣාය ගොතම මා ච පාමදො{2} කිං තෙ බිලිබිලිකා කරිස්සතී’ති.
ඉත්ථං සුදං ආයස්මා වජ්ජිපුත්තො ථෙරො ගාථං අභාසිත්ථා’ති.
වජ්ජිපුත්තත්ථෙරගාථා.
1. 12. 10.
120. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා, දුක්ඛක්ඛයො අනුප්පත්තො පත්තො මෙ ආසවක්ඛයො’ති.
ඉත්ථං සුදං ආයස්මා ඉසිදත්තො ථෙරො ගාථං අභාසිත්ථා’ති.
ඉසිදත්තත්ථෙරගාථා.
වග්ගො ද්වාදසමො.
තස්සුද්දානං:
ජෙන්තො ච වච්ඡගොත්තො ච වච්ඡො ච වනසව්හයො,{3} අධිමුත්තො මහානාමො පාරාසරියො{4} යසො පි ච, කිම්බිලො වජ්ජිපුත්තො ච ඉසිදත්තො මහායසො’ති.
තත්රුද්දානං:
වීසුත්තරසතං ථෙරා කතකිච්චා අනාසවා, එකකෙව නිපාතම්හි සුසඞ්ගීතා මහෙසිභී’ති.
එකකනිපාතො නිට්ඨිතො.
2. දුකනිපාතො
වග්ගො පඨමො.
2. 1. 1.
121. නත්ථි කොචි භවො නිච්චො සඞ්ඛාරා වා පි සස්සතා, උප්පජ්ජන්ති ච තෙ ඛන්ධා වචන්ති අපරාපරං.
122. එතමාදීනවං ඤත්වා භවෙනම්හි අනත්ථිකො, නිස්සටො සබ්බකාමෙහි පත්තො මෙ ආසවක්ඛයො’ති.
ඉත්ථං සුදං ආයස්මා අත්තරො ථෙරො ගාථායො අභාසිත්ථා’ති.
උත්තරත්ථෙරගාථා.
2. 1. 2.
123. නයිදං අනයෙන ජීවිතං නාහාරො හදයස්ස සන්තිකො, ආහාරට්ඨිතිකො සමුස්සයො ඉති දිස්වාන චරාමි එසනං.
124. පඞ්කොති හි නං පවෙදයුං යායං වන්දනපූජනා කුලෙසු, සුඛුමං සබ්බං දුරුල්ලහං සක්කාරො කාපුරිසෙන දුජ්ජහො’ති.
ඉත්ථං සුදං ආයස්මා පිණ්ඩොලභාරද්වාජො ථෙරො ගාථායො අභාසිත්ථා’ති.
පිණ්ඩොලභාද්වාජත්ථෙරගාථා.
2. 1. 3.
125. මක්කටො පඤ්චද්වාරායං කුටිකායං පසක්කිය, ද්වාරෙන අනුපරියෙති ඝට්ටයෙන්තො මුහුං මුහුං.
126. තිට්ඨ මක්කට මා ධාවි නහි තෙ තං යථා පුරෙ, නිග්ගහීතොසි පඤ්ඤාය නෙව{1} දූරං ගමිස්සසී’ති.
ඉත්ථං සුදං ආයස්මා වල්ලියො ථෙරො ගාථායො අභාසිත්ථා’ති.
වල්ලියත්ථෙරගාථා.
2. 2. 4.
127. තිණ්ණං මෙ තාලපත්තානං ගඞ්ගාතීරෙ කුටී කතා, ජවසිත්තොව මෙ පත්තො පංසුකූලං ච චීවරං.
128. ද්වින්නං අන්තරවස්සානං එකා වාචා මෙ භාසිතා, තතියෙ අන්තරවස්සම්හි තමොක්ඛන්ධො පදාලිතො.
ඉත්ථං සුදං ආයස්මා ගඞ්ගාතීරියො ථෙරො ගාථායො අභාසිත්ථා’ති.
ගඞ්ගාතීරියත්ථෙරගාථා.
2. 1. 5.
129. අපි චෙ හොති තෙවිජ්ජො මච්චුහායී අනාසවො, අප්පඤ්ඤාතොති නං බාලා අවජානන්ති අජානතා.
130. යො ච ඛො අන්නපානස්ස ලාභී හොතීධ පුග්ගලො, පාපධම්මොපි චෙ හොති සො නෙසං හොති සක්කතො’ති.
ඉත්ථං සුදං ආයස්මා අජිනො ථෙරො ගාථායො අභාසිත්ථා’ති.
අජිනත්ථෙරගාථා.
2. 1. 6.
131. යදාහං ධම්මමස්සොසිං භාසමානස්ස සත්ථුනො, න කඞ්ඛමභිජානාමි සබ්බඤ්ඤූ අපරාජිතෙ.
132. සත්ථවාහෙ මහාවීරෙ සාරථීනං වරුත්තමෙ, මග්ගෙ පටිපදායං වා කඞ්ඛා මය්හං න විජ්ජතී’ති.
ඉත්ථං සුදං ආයස්මා මෙලජිනො ථෙරො ගාථායො අභාසිත්ථා’ති.
මෙලජිනත්ථෙරගාථා.
2. 1. 7.
133. යථා අගාරං දුච්ඡන්නං වුට්ඨි සමතිවිජ්ඣති, එවං අභාවිතං චිත්තං රාගො සමතිවිජ්ඣති.
134. යථා අගාරං සුච්ඡන්නං වුට්ඨි න සමතිවිජ්ඣති, එවං සුභාවිතං චිත්තං රාගො න සමතිවිජ්ඣති.
ඉත්ථං සුදං ආයස්මා රාධො ථෙරො ගාථායො අභාසිත්ථා’ති.
රාධත්ථෙරගාථා.
2. 1. 8.
135. ඛීණා හි මය්හං ජාති වුසිතං ජිනසාසනං, පහීනො ජාලසඞ්ඛාතො භවනෙත්ති සමූහතා.
136. යස්සත්ථාය පබ්බජිතො අගාරස්මානගාරියං, සො මෙ අත්ථො අනුප්පත්තො සබ්බසංයොජනක්ඛයො’ති.
ඉත්ථං සුදං ආයස්මා සුරාධො ථෙරො ගාථායො අභාසිත්ථා’ති.
සුරාධත්ථෙරගාථා.
2. 1. 9.
137. සුඛං සුපන්ති මුනයො යෙ ඉත්ථිසු න බජ්ඣරෙ, සදා වෙ රක්ඛිතබ්බාසු යාසු සච්චං සුදුල්ලභං.
138. වධං චරිම්හ තෙ කාම අනණා දානි තෙ මයං, ගච්ඡාම දානි නිබ්බානං යත්ථ ගන්ත්වා න සොචතී’ති.
ඉත්ථං සුදං ආයස්මා ගොතමො ථෙරො ගාථායො අභාසිත්ථා’ති.
ගොතමත්ථෙරගාථා.
2. 1. 10.
139. පුබ්බෙ හන්ති අත්තානං පච්ඡා හන්ති සො පරෙ, සුහතං හන්ති අත්තානං වීතසෙනෙව පක්ඛිමා.
140. න බ්රාහ්මණො බහිවණ්ණො අන්තො වණ්ණො හි බ්රාහ්මණො, යසුමිං පාපානි කම්මානි ස වෙ කණ්හො සුජම්පතී’ති.
ඉත්ථං සුදං ආයස්මා වසභො ථෙරො ගාථායො අභාසිත්ථා’ති.
වසභත්ථෙරගාථා.
වග්ගො පඨමො.
තස්සුද්දානං:
උත්තරො චෙව පිණ්ඩොලො වල්ලිතො තීරියො ඉසි, අජිනො ච මෙලජිනො රාධො සුරාධො ගොතමො, වසභෙන ඉමෙ හොන්ති දස ථෙරා මහිද්ධිකා’ති.
වග්ගො දුතියො.
2. 2. 1.
141. සුස්සූසා සුතවද්ධනී සුතං පඤ්ඤාය වද්ධනං, පඤ්ඤාය අත්ථං ජානාති ඤාතො අත්ථො සුඛාවහො.
142. සෙවෙථ පන්තානි සෙනාසනානි චරෙය්ය සංයොජන විප්පමොක්ඛං, සචෙ රතිං නාධිගච්ඡෙය්ය තත්ථ සඞ්ඝෙ වසෙ රක්ඛිතත්තො සතීමා’ති.
ඉත්ථං සුදං ආයස්මා මහාචුන්දො ථෙරො ගාථායො අභාසිත්ථා’ති.
මහාචුන්දත්ථෙරගාථා.