987. මා මෙ කදාචි පාපිච්ඡො කුසීතො හීනවිරියො, අප්පස්සුතො අනාදරො කෙන ලොකස්මිං{7} කිං සියා.
988. බහුස්සුතො ච මෙධාවී සීලෙසු සුසමාහිතො, චෙතොසමථමනුයුත්තො අපි මුද්ධනි තිට්ඨතු.
989. යො පපඤ්චමනුයුත්තො පපඤ්චාභිරතො මගො, විරාධයී සො නිබ්බානං යෙගක්ඛෙමං අනුත්තරං.
990. යො ච පපඤ්චං හිත්වාන නිප්පපඤ්චපථෙ රතො, ආරාධයී සො නිබ්බානං යොගක්ඛෙමං අනුත්තරං.
991. ගාමෙ වා යදි වා රඤ්ඤෙ නින්නෙ වා යදි වා ථලෙ, යත්ථ අරහන්තො විහරන්ති තං භූමිං රාමණෙය්යකං.
992. රමණීයා{1} අරඤ්ඤානි යත්ථ න රමතී මනො, වීතරාගා රමිස්සන්ති{2} න තෙ කාමගවෙසිනො.
993. නිධීනං’ව පවත්තාරං යං පස්සෙ වජ්ජදස්සිනං, නිග්ගය්හවාදිං මෙධාවිං තාදිසං පණ්ඩිතං භජෙ, තාදිසං භජමානස්ස සෙය්යො හොති න පාපියො.
994. ඔවදෙය්යානුසාසෙය්ය අසබ්භා ච නිවාරයෙ, සතං හි සො පියො හොති අසතං හොති අප්පියො.
995. අඤ්ඤස්ස භගවා බුද්ධො ධම්මං දෙසෙසි චක්ඛුමා, ධම්මෙ දෙසීයමානම්හි සොතමොධෙසිමත්ථිකො, තං මෙ අමොඝං සවනං විමුත්තොම්හි අනාසවො.
996. නෙව පුබ්බෙනිවාසාය න’පි දිබ්බස්ස චක්ඛුනො, චෙතොපරියාය ඉදිධියා චුතියා උපපත්තියා, සොතධාතුවිසුද්ධියා පණිය මෙ න විජ්ජති.
997. රුක්ඛමූලං’ව නිස්සාය මුණ්ඩො සඞ්ඝාටිපාරුතො, පඤ්ඤාය උත්තමො ථෙරො උපතිස්සො ච{3} ඣායති.
998. අවිතක්කං සමාපන්නො සම්මාසම්බුද්ධසාවකො, අරියෙන තුණ්හීභාවෙන{4} උපෙතො හොති තාවදෙ.
999. යථා’පි පබ්බතො සෙලො අචලො සුප්පතිට්ඨිතො,{5} එවං මොහක්ඛයා භික්ඛු පබ්බතො’ව න වෙධති.
1000. අනඞ්ගණස්ස පොසස්ස නිච්චං සුචිගවෙසිනො, වාලග්ගමත්තං පාපස්ස අබ්භමත්තං’ව ඛායති.
1001. නාභිනන්දාමි මරණං නාභිනන්දාමි ජීවිතං, නික්ඛිපිස්සං ඉමං කායං සම්පජානො පතිස්සතො.
1002. නාභිනන්දාමි මරණං නාභිනන්දාමි ජීවිතං, කාලං ච පටිකඞ්ඛාමි නිබ්බිසං භතකො යථා.
1003. උභයෙනමිදං මරණමෙව නාමරණං පච්ඡා වා පුරෙ වා, පටිපජ්ජථ මා විනස්සථ ඛණො වො{1} මා උපච්චගා.
1004. නගරං යථා පච්චන්තං ගුත්තං සන්තරබාහිරං, එවං ගොපෙථ අත්තානං ඛණො වො මා උපච්චගා, ඛණාතීතා හි සොචන්ති නිරයම්හි සමප්පිතා.
1005. උපසන්තො උපරතො මන්තභාණී{2} අනුද්ධතො, ධුනාති පාපකෙ ධම්මෙ දුමපත්තං ව මාලුතො.
1006. උපසන්තො උපරතො මන්තභාණී{2} අනුද්ධතො, අප්පාසි{3} පාපකෙ ධම්මෙ දුමපත්තං ව මාලුතො.
1007. උපසන්තො අනායාසො විප්පසන්නො අනාවිලො,{4} කල්යාණසීලො මෙධාවී දුක්ඛස්සන්තකරො සියා.
1008. න විස්සසෙ එකතියෙසු එවං අගාරිසු පබ්බජිතෙසු චා’පි, සාධූ’පි{5} හුත්වාන අසාධු හොන්ති අසාධු හුත්වා පුන සාධු හොන්ති.
1009. කාමච්ඡන්දො ච ව්යාපාදො ථීනමිද්ධං ච භික්ඛුනො, උද්ධච්චං විචිකිච්ඡා ච පඤ්චෙතෙ චිත්තකෙලිසා.
1010. යස්ස සක්කරියමානස්ස අසක්කාරෙන චූභයං, සමාධි න විකම්පති අප්පමාදවිහාරිනො.
1011. තං ඣායිනං සාතතිකං සුඛුමදිට්ඨිවිපස්සකං, උපාදානක්ඛයාරාමං ආහු සප්පුරිසො ඉති.
1012. මහාසමුද්දො පඨවී{6} පබ්බතො අනිලො’පි ච, උපරාය න යුජ්ජන්ති සත්ථු වරවිමුත්තියා.
1013. චක්කානුවත්තකො ථෙරො මහාඤාණී සමාහිතො, පඨවාපග්ගිසමානො{7} න රජ්ජති න දුස්සති.
1014. පඤ්ඤාපාරමිතං පත්තො මහාබුද්ධි මහාමති,{8} අජළො ජළසමානො සදා චරති නිබ්බුතො.
1015. පරිචිණ්ණො මයා සත්ථා කතං බුද්ධස්ස සාසනං, ඔහිතො ගරුකො භාරො භවනෙත්ති සමූහතා’ති.
1016. සම්පාදෙථප්පමාදෙන එසා මෙ අනුසාසනී, හන්දාහං පරිනිබ්බිස්සං විප්පමුත්තොම්හි සබ්බධී’ති.
ඉත්ථං සුදං ආයස්මා සාරිපුත්තො ථෙරො ගාථායො අභාසිත්ථා’ති.
සාරිපුත්තත්ථෙරගාථා.
30. 1. 3.
1017. පිසුනෙන ච කොධනෙන ච මච්ඡරිනා ච විභූතනන්දිනා, සඛිතං න කරෙය්ය පණ්ඩිතො පාපො කාපුරිසෙන සඞ්ගමො.
1018. සද්ධෙන ච පෙසලෙන ච පඤ්ඤවතා බහුස්සුතෙන ච, සඛිතං හි{1} කරෙය්ය පණ්ඩිතො භද්දො සප්පුරිසෙන සඞ්ගමො.
1019. පස්ස චිත්තකතං{2} බිම්බං අරුකායං සමුස්සිතං, ආතුරං බහුසඞ්කප්පං යස්ස නත්ථි ධුවං ඨිති.
1020. පස්ස චිත්තකතං{2} රූපං මණිනා කුණ්ඩලෙන ච, අට්ඨිං තචෙන ඔනද්ධං සහ වත්ථෙන සොභති.
1021. අලත්තකකතා පාදා මුඛං චුණ්ණකමක්ඛිතං, අලං බාලස්ස මොහාය නො ච පාරගවෙසිනො.
1022. අට්ඨපාදකතා කෙසා නෙත්තා අඤ්ජනමක්ඛිතා, අලං බාලස්ස මොහාය නො ච පාරගවෙසිනො.
1023. අඤ්ජනීව නවා චිත්තා පූතිකායො අලඞ්කතො, අලං බාලස්ස මොහාය නො ච පාරගවෙසිනො.
1024. ඔදහි මිගවො පාසං නාසදා වාගුරං මිගො, භුත්වා නිවාපං ගච්ඡාම කන්දන්තෙ මිගබන්ධකෙ.
1025. ඡින්නා පාසා මිගවස්ස නාසදා වාගුරං මිගො, භුත්වා නිවාපං ගච්ඡාම සොචන්තෙ මිගලුද්දකෙ.
1026. බහුස්සුතො චිත්තකථී බුද්ධස්ස පරිචාරකො, පන්නභාරො විසඤ්ඤුත්තො සෙය්යං කප්පෙති ගොතමො.
1027. ඛීණාසවො විසඤ්ඤුත්තො සඞ්ගාතීතො සුනිබ්බුතො, ධාරෙති අන්තිමං දෙහං ජාතිමරණපාරගූ.{1}
1028. යස්මිං පතිට්ඨිතා ධම්මා බුද්ධස්සාදිච්චබන්ධුනො, නිබ්බානගමනෙ මග්ගෙ සො’යං තිට්ඨති ගොතමො.
1029. ද්වාසීතිං බුද්ධතො ගණ්හිං{2} ද්වෙ සහස්සානි භික්ඛුතො, චතුරාසීතිසහස්සානි යෙ මෙ ධම්මා පවත්තිනො.
1030. අප්පස්සුතා’යං{3} පුරිසො බලිවද්දො’ව ජීරති, මංසානි තස්ස වඩ්ඪති පඤ්ඤා තස්ස න වඩ්ඪති.
1031. බහුස්සුතො අප්පස්සුතං යො සුතෙනාතිමඤ්ඤති, අන්ධො පදීපධාරො’ව තථෙව පටිභාති මං.
1032. බහුස්සුතං උපාසෙය්ය සුතං ච න විනාසයෙ, තං මූලං බ්රහ්මචරියස්ස තස්මා ධම්මධරො සියා.
1033. පුබ්බාපරඤ්ඤූ අත්ථඤ්ඤූ නිරුත්තිපදකොවිදො, සුග්ගහීතං ච ගණ්හාති අත්ථං චොපපරික්ඛති.
1034. ඛන්ත්යා ඡන්දීකතො{4} හොති උස්සහිත්වා තුලෙති තං, සමයෙ සො පදහති අජ්ඣත්තං සුසමාහිතො.
1035. බහුස්සුතං ධම්මධරං සප්පඤ්ඤං බුද්ධසාවකං, ධම්මවිඤ්ඤාණමාකඞ්ඛං තං භජෙථ තථාවිධං.
1036. බහුස්සුතො ධම්මධරො කොසාරක්ඛො මහෙසිනො, චක්ඛු සබ්බස්ස ලොකස්ස පූජනීයො බහුස්සුතො.
1037. ධම්මාරාමො ධම්මරතො ධම්මං අනුවිචින්තයං, ධම්මං අනුස්සරං භික්ඛු සද්ධම්මා න පරිහායති.
1038. කායමච්ඡෙරගරුනො{5} හිය්යමානෙ{6} අනුට්ඨහෙ, සරීරසුඛගිද්ධස්ස කුතො සමණඵාසුතා.
1039. න පක්ඛන්ති දිසා සබ්බා ධම්මා නප්පටිභන්ති මං, ගතෙ කල්යාණමිත්තම්හි අන්ධකාරංව ඛායති.
1040. අබ්භතීතසහායස්ස අතීතගතසත්ථුනො, නත්ථි එතාදිසං මිත්තං යථා කායගතා සති.
1041. යෙ පුරාණා අතීතා තෙ නවෙහි න සමෙති මෙ, ස්වජ්ජ එකො’ව ඣායාමි වස්සුපෙතො’ව{1} පක්ඛිමා.
1042. දස්සනාය අභික්කන්තෙ{2} නානා වෙරජ්ජකෙ බහූ, මා වාරයිත්ථ සොතාරො පස්සන්තු සමයො මමං.
1043. දස්සනාය අභික්කන්තෙ{2} නානා වෙරජ්ජකෙ පුථු, කරොති සත්ථා ඔකාසං න නිවාරෙති චක්ඛුමා.
1044. පණ්ණවීසති වස්සානි සෙඛභූතස්ස මෙ සතො, න කාමසඤ්ඤා උප්පජ්ජි පස්ස ධම්මසුධම්මතං.
1045. පණ්ණවීසති වස්සානි සෙඛභූතස්ස මෙ සතො, න දෙසසඤ්ඤා උප්පජ්ජි පස්ස ධම්මසුධම්මතං.
1046. පණ්ණවීසති වස්සානි භගවන්තං උපට්ඨහිං, මෙත්තෙන කායකම්මෙන ඡායා’ව අනපායිනී.
1047. පණ්ණවීසති වස්සානි භගවන්තං උපට්ඨහිං, මෙත්තෙන වචීකම්මෙන ඡායා’ව අනපායිනී.
1048. පණ්ණවීසති වස්සානි භගවන්තං උපට්ඨහිං, මෙත්තෙන මනොකම්මෙන ඡායා’ව අනපායිනී.
1049. බුද්ධස්ස චඞ්කමන්තස්ස පිට්ඨිතො අනුචඞ්කමිං, ධම්මෙ දෙසීයමානම්හි ඤාණං මෙ උදපජ්ජථ.
1050. අහං සකරණීයොම්හි සෙඛො{3} අප්පත්තමානසො, සත්ථු ච පරිනිබ්බානං යො අම්හං අනුකම්පකො.
1051. තදාසි යං භිංසනකං තදාසි ලොමහංසනං, සබ්බාකාරවරූපෙතෙ සම්බුද්ධෙ පරිනිබ්බුතෙ.
1052. බහුස්සුතො ධම්මධරො කොසාරක්ඛො මහෙසිනො, චක්ඛු සබ්බස්ස ලොකස්ස ආනන්දො පරිනිබ්බුතො.
1053. බහුස්සුතො ධම්මධරො කොසාරක්ඛො මහෙසිනො, චක්ඛු සබ්බස්ස ලොකස්ස අන්ධකාරෙ තමොනුදො.
1054. ගතිමන්තො සතිමන්තො ධිතිමන්තො ච යො ඉසි, සද්ධම්මධාරකො ථෙරො ආනන්දො රතනාකරො.
1055. පරිචිණ්ණො මයා සත්ථා කතං බුද්ධස්ස සාසනං, ඔහිතො ගරුකො භාරො නත්ථි දානි පුනබ්භවො’ති.
ඉත්ථං සුදං ආයස්මා ආනන්දො ථෙරො ගාථායො අභාසිත්ථා’ති.
ආනන්දත්ථෙරගාථා.
තස්සුද්දානං:
ඵුස්සොපතිස්සො ආනන්දො තයො’තිංසෙපකිත්තිතා{1} ගාථායො තත්ථ සඞ්ඛාතා සතං පඤ්ච ච උත්තරී’ති.
තිංසතිනිපාතො නිට්ඨිතො.
40. චත්තාලීසනිපාතො.
40. 1. 1.
1056. න ගණෙන පුරක්ඛතො චරෙ විමනො හොති සමාධි දුල්ලභො, නානා ජනසඞ්ගහො දුඛො{1} ඉති දිස්වාන ගණං න රොචයෙ.
1057. න කුලානි උපබ්බජෙ මුනි විමනො හොති සමාධි දුල්ලභො, සො උස්සුක්කො රසානුගිද්ධො අත්ථං රිඤ්චති යො සුඛාවහො.{2}
1058. පඞ්කොති හි නං පවෙදයුං{3} යායං වන්දනපූජනා කුලෙසු, සුඛුමං සල්ලං දුරුබ්බහං{4} සක්කාරො කාපුරිසෙන දුජ්ජහො.
1059. සෙනාසනම්හා ඔරුය්හ නගරං පිණ්ඩාය පාවිසිං, භුඤ්ජන්තං පුරිසං කුට්ඨිං සක්කච්චං තං උපට්ඨහිං.
1060. සො මෙ පක්කෙන හත්ථෙන ආලොපං උපනාමයි, ආලොපං පක්ඛිපන්තස්ස අඞ්ගුලීපෙත්ථ ඡිජ්ජථ.
1061. කුඩ්ඩමූලං ච නිස්සාය ආලොපං තං අභුඤ්ජිසං, භුඤ්ජමානෙ ව{5} භුත්තෙ වා ජෙගුච්ඡං මෙ න විජ්ජති.
1062. උත්තිට්ඨපිණ්ඩො ආහාරො පූතිමුත්තං ච ඔසධං, සෙනාසනං රුක්ඛමූලං පංසුකූලං ච චීවරං, යස්සෙතෙ අභිසම්භූත්වා ස වෙ චාතුද්දිසො නරො.
1063. යත්ථ එකෙ විහඤ්ඤන්ති ආරුහන්තා සිලුච්චයං, තත්ථ{6} බුද්ධස්ස දායාදො සම්පජානො පතිස්සතො, ඉද්ධිබලෙනුපත්ථද්ධො කස්සපො අභිරූහති.
1064. පිණ්ඩපාතපටික්කන්තො සෙලමාරුය්හ කස්සපො, ඣායති අනුපාදානො පහීනභයභෙරවො.
1065. පිණ්ඩපාතපටික්කන්තො සෙලමාරුය්හ කස්සපො, ඣායති අනුපාදානො ඩය්හමානෙසු නිබ්බුතො.
1066. පිණ්ඩපාතපටික්කන්තො සෙලමාරුය්හ කස්සපො, ඣායති අනුපාදානො කතකිච්චො අනාසවො.
1067. කරෙරිමාලාවිතතා භූමිභාගා මනොරමා, කුඤ්ජරාභිරුදා රම්මා තෙ සෙලා රමයන්ති මං.
1068. නීලබ්භවණ්ණා රුචිරා වාරිසීතා සුවින්ධරා, ඉන්දගොපකසඤ්ඡන්නා තෙ සෙලා රමයන්ති මං.
1069. නීලබ්භකූටසදිසා කූටාගාරවරූපමා, වාරණාභිරුදා රම්මා තෙ සෙලා රමයන්ති මං.
1070. අභිවුට්ඨා රම්මතලා නගා ඉසීහි සෙවිතා, අබ්භුන්නදිතා සිඛීහි තෙ සෙලා රමයන්ති මං.
1071. අලං ඣායිතුකාමස්ස පහිතත්තස්ස මෙ සතො, අලං මෙ අත්ථකාමස්ස පහිතත්තස්ස භික්ඛුනො.
1072. අලං මෙ ඵාසුකාමස්ස පහිතත්තස්ස භික්ඛුනො, අලං මෙ යොගකාමස්ස පහිතත්තස්ස තාදිනො.
1073. උම්මාපුප්ඵෙන{1} සමානා ගගනාවබ්භඡාදිතා, නානාදිජගණාකිණ්ණා තෙ සෙලා රමයන්ති මං.
1074. අනාකිණ්ණා ගහට්ඨෙහි මිගසඞ්ඝනිසෙවිතා, නානාදිජගණාකිණ්ණා තෙ සෙලා රමයන්ති මං.
1075. අච්ඡොදිකා පුථුසිලා ගෙනඞ්ගුලමිගායුතා, අම්බුසෙවාලසඤ්ඡන්නා තෙ සෙලා රමයන්ති මං.
1076. න පඤ්චඞ්ගිකෙන තුරියෙන රති මෙ හොති තාදිසි, යථා එකග්ගචිත්තස්ස සම්මා ධම්මං විපස්සතො.