තස්සුද්දානං:
උත්තරො භද්දජිත්ථෙරො සොභිතො වල්ලියො ඉසි, වීතසොකො ච යො ථෙරො පුණ්ණමාසො ච නන්දකො, භරතො භාරද්වාජො ච කණ්හදින්නො මහාමුනී’ති.
වග්ගො චතුත්ථො.
2. 4. 1.
181. යතො අහං පබ්බජිතො සම්මාසම්බුද්ධසාසනෙ, විමුච්චමානො උග්ගච්ඡිං කාමධාතුං උපච්චගං.
182. බ්රහ්මුනො පෙක්ඛමානස්ස තතො චිත්තං විමුච්චි මෙ, අකුප්පා මෙ විමුත්තීති සබ්බසංයොජනක්ඛයා’ති.
ඉත්ථං සුදං ආයස්මා මිගසිරො ථෙරො ගාථායො අභාසිත්ථා’ති.
මිගසිරත්ථෙරගාථා.
2. 4. 2.
183. අනිච්චානි ගහකානි තත්ථ තත්ථ පුනප්පුනං, ගහකාරං ගවෙසන්තො දුක්ඛා ජාති පුනප්පුනං.
184. ගහකාරක දිට්ඨොසි පුන ගෙහං න කාහසි, සබ්බා තෙ ඵාසුකා භග්ගා ථූණිකා{1} ච විදාළිතා,{2} විමරියාදීකතං{3} චිත්තං ඉධෙව විධමිස්සතී’ති.
ඉත්ථං සුදං ආයස්මා සීවකො ථෙරො ගාථායො අභාසිත්ථා’ති.
සීවකත්ථෙරගාථා.
2. 4. 3.
185. අරහං සුගතො ලොකෙ වාතෙහාබාධිතො මුනි, සචෙ උණ්හොදකං අත්ථි මුනිනො දෙහි බ්රාහ්මණ.
186. පූජිතො පූජනීයානං{4} සක්කරෙය්යාන සක්කතො, අපචිතොපචනීයානං{5} තස්ස ඉච්ඡාමි හාතවෙ’ති.
ඉත්ථං සුදං ආයස්මා උපවානො ථෙරො ගාථායො අභාසිත්ථා’ති.
උපවානත්ථෙරගාථා.
2. 4. 4.
187. දිට්ඨා මයා ධම්මධරා උපාසකා කාමා අනිච්චා ඉති භාසමානා, සාරත්තරත්තා මණිකුණ්ඩලෙසු පුත්තෙසු දාරෙසු ච තෙ අපෙක්ඛා.
188. අද්ධා න ජානන්ති යථාව{6} ධම්මං කාමා අනිච්චා ඉති චාපි ආහු,{7} රාගං ච තෙසං න බලත්ථි ඡෙත්තුං තස්මා සිතා පුත්තදාරං ධනඤ්චා’ති.
ඉත්ථං සුදං ආයස්මා ඉසිදින්නො ථෙරො ගාථායො අභාසිත්ථා’ති.
ඉසිදින්නත්ථෙරගාථා.
2. 4. 5.
189. දෙවො ච වස්සති දෙවො ච ගළගළායති එකකො චාහං භෙරවෙ බිලෙ විහරාමි, තස්ස මය්හං එකකස්ස භෙරවෙ බිලෙ විහරතො නත්ථි භයං වා ඡම්භිතත්තං වා ලොමහංසො වා.
190. ධම්මතා මම සා යස්ස මෙ එකකස්ස භෙරවෙ බිලෙ විහරතො නත්ථි භයං වා ඡම්භිතත්තං වා ලොමහංසො වා’ති.
ඉත්ථං සුදං ආයස්මා සම්බුලකච්චානො ථෙරො ගාථායො අභාසිත්ථා’ති.
සම්බුලකච්චානත්ථෙරගාථා.
2. 4. 6.
191. කස්ස සෙලූපමං චිත්තං ඨිතං නානූපකම්පති, විරත්තං රජනීයෙසු කුප්පනීයෙ න කුප්පති, යස්සෙවං භාවිතං චිත්තං කුතො තං දුක්ඛමෙස්සති.
192. මම සෙලූපමං චිත්තං ඨිතං නානූපකම්පති, විරත්තං රජනීයෙසු කුප්පනීයෙ න කුප්පති, මමෙවං භාවිතං චිත්තං කුතො මං දුක්ඛමෙස්සතී’ති.
ඉත්ථං සුදං ආයස්මා ඛිතකො ථෙරො ගාථායො අභාසිත්ථා’ති.
ඛිතකත්ථෙරගාථා.
2. 4. 7.
193. න තාව සුපිතුං හොති රත්ති නක්ඛත්තමාලිනී, පටිජග්ගිතුමෙවෙසා රත්ති හොති විජානතා.
194. හත්ථික්ඛන්ධාවපතිතං කුඤ්ජරො චෙ අනුක්කමෙ, සඞ්ගාමෙ මෙ මතං සෙය්යො යං චෙ ජීවෙ පරාජිතො’ති.
ඉත්ථං සුදං ආයස්මා සොණො සෙලිස්සරිය{1} පුත්තත්ථෙරො ගාථායො අභාසිත්ථා’ති.
සෙලිස්සරියත්ථෙරගාථා.
2. 4. 8.
195. පඤ්චකාමගුණෙ හිත්වා පියරූපෙ මනොරමෙ, සද්ධාය අභිනික්ඛම්ම දුක්ඛස්සන්තකරො{2} භවෙ.
196. නාභිනන්දාමි මරණං නාභිනන්දාමි ජීවිතං, කාලං ච පටිකඞ්ඛාමි සම්පජානො පතිස්සතො’ති.
ඉත්ථං සුදං ආයස්මා නිසභො ථෙරො ගාථායො අභාසිත්ථා’ති.
නිසභත්ථෙරගාථා.
2. 4. 9.
197. අම්බපල්ලව සඞ්කාසං අංසෙ කත්වාන චීවරං, නිසින්නො හත්ථි ගීවාය ගාමං පිණ්ඩාය පාවිසිං.
198. හත්ථික්ඛන්ධතො ඔරුය්හ සංවෙගං අලභිං තදා, සොහං දිත්තො තදා සන්තො පත්තො මෙ ආසවක්ඛයො’ති.
ඉත්ථං සුදං ආයස්මා උසභො ථෙරො ගාථායො අභාසිත්ථා’ති.
උසභත්ථෙරගාථා.
2. 4. 10.
199. අයමිති කප්පටො කප්පටකුරො අච්ඡාය අතිභරිතාය{1} අමතඝටිකායං ධම්මකතමත්තො කතපදං ඣානානි ඔචෙතුං.
200. මා ඛො ත්වං කප්පට පචාලෙසි මා තං උපකණ්ණකම්හි{2} තාළෙස්සං, නහ{3} ත්වං කප්පට මත්තමඤ්ඤාසි සඞ්ඝමජ්ඣම්හි පචලායමානො’ති.
ඉත්ථං සුදං ආයස්මා කප්පටකුරො ථෙරො ගාථායො අභාසිත්ථා’ති.
කප්පටකුරත්ථෙරගාථා.
වග්ගො චතුත්ථො.
තස්සුද්දානං:
මිගසිරො සීවකො ච උපවානො ච පණ්ඩිතො ඉසිදන්නො ච කච්චානො ඛිතකො ච මහාවසි සෙලිස්සරියො නිසභො ච උසභො කප්පටකුරො’ති.
වග්ගො පඤ්චමො.
2. 5. 1.
201. අහො බුද්ධා අහො ධම්මා අහො නො සත්ථු සම්පදා, යත්ථ එතාදිසං ධම්මං සාවකො සච්ඡිකාහිසි.
202. අසඞ්ඛෙය්යෙසු කප්පෙසු සක්කායාධිගතා අහූ{1} තෙසමයං පච්ඡිකො චරිමො’ යං සමුස්සයො, ජාතිමරණසංසාරො නත්ථි දානි පුනබ්භවො’ති.
ඉත්ථං සුදං ආයස්මා කුමාරකස්සපො ථෙරො ගාථායො අභාසිත්ථා’ති.
කුමාරකස්සපත්ථෙරගාථා.
2. 5. 2.
203. යො හවෙ දහරො භික්ඛු යුඤ්ජති බුද්ධසාසනෙ, ජාගරො පතිසුත්තෙසු{2} අමොඝං තස්ස ජීවිතං.
204. තස්මා සද්ධඤ්ච සීලඤ්ච පසාදං ධම්මදස්සනං, අනුයුඤ්ජෙථ මෙධාවී සරං බුද්ධාන සාසන’න්ති.
ඉත්ථං සුදං ආයස්මා ධම්මපාලො ථෙරො ගාථායො අභාසිත්ථා’ති.
ධම්මපාලත්ථෙරගාථා.
2. 5. 3.
205. කස්සින්ද්රියානි සමථඞ්ගතානි අස්සා යථා සාරථිනා සුදන්තා පහීනමානස්ස අනාසවස්ස දෙවාපි තස්ස පිහයන්ති තාදිනො’ති.
206. මහින්ද්රියානි සමථඞ්ගතානි අස්සා යථා සාරථිනා සුදන්තා පහීනමානස්ස අනාසවස්ස දෙවාපි මය්හං පිහයන්ති තාදිනො’ති.
ඉත්ථං සුදං ආයස්මා බ්රහ්මාලි ථෙරො ගාථායො අභාසිත්ථා’ති.
බ්රහ්මාලිත්ථෙරගාථා.
2. 5. 4.
207. ඡවිපාපක චිත්තභද්දක මොඝරාජ සතතං සමාහිතො, හෙමන්තිකසීතකාලරත්තියො භික්ඛු ත්වංසි කථං කරිස්සසි.
208. සම්පන්නසස්සා මගධා කෙවලා ඉති මෙ සුතං, පලාලච්ඡන්නකො සෙය්යං යථඤ්ඤෙ සුඛජීවිනො’ති.
ඉත්ථං සුදං ආයස්මා මොඝරාජත්ථෙරො ගාථායො අභාසිත්ථා’ති.
මොඝරාජත්ථෙරගාථා.
2. 5. 5.
209. න උක්ඛිපෙ නො ච පරික්ඛිපෙ පරෙ න ඔක්ඛිපෙ පාරගතං න එරයෙ, න චත්තවණ්ණං පරිසාසු බ්යාහරෙ අනුද්ධතො සම්මිතභාණි සුබ්බතො.
210. සුසුඛුමනිපුණත්ථදස්සිනා මතිකුසලෙන නිවාතවුත්තිනා, සංසෙවිතවුද්ධසීලිනා නිබ්බානං න හි තෙන දුල්ලභන්ති.
ඉත්ථං සුදං ආයස්මා විසාඛො පඤ්චාලපුත්තො ථෙරො ගාථායො අභාසිත්ථා’ති.
විසාඛපඤ්චාලපුත්තත්ථෙරගාථා.
2. 5. 6.
211. නදන්ති මොරා සුසිඛා සුපෙඛුණා සුනීලගීවා සුමුඛා සුගජ්ජිනො, සුසද්දලා චාපි මහාමහී අයං සුබ්යාපිතම්බු{1} සුවලාහකං නභං.
212. සුකල්ලරූපො සුමනස්ස ඣාය තං{2} සුතික්ඛමො{3} සාධු සුබුද්ධසාසනෙ, සුසුක්කසුක්කං නිපුණං සුදුද්දසං ඵුසාමි තං උත්තමමච්චුතං පදන්ති.
ඉත්ථං සුදං ආයස්මා චූළකො ථෙරො ගාථායො අභාසිත්ථා’ති.
චූළකත්ථෙරගාථා.
2. 5. 7.
213. නන්දමානාගතං චිත්තං සූලමාරොපමානකං, තෙන තෙනෙව වජසි යෙන සූලං කලිඞ්ගරං.
214. තාහං චිත්තකලිං බ්රූමි තං බ්රූමි චිත්තදුබ්භකං, සත්ථා තෙ දුල්ලභො ලද්ධො මානත්ථෙ මං නියොජයීති.
ඉත්ථං සුදං ආයස්මා අනුපමො ථෙරො ගාථායො අභාසිත්ථා’ති.
අනුපමත්ථෙරගාථා.
2. 5. 8.
215. සංසරං දීඝමද්ධානං ගතීසු පරිවත්තිසං, අපස්සං අරියසච්චානි අන්ධභූතො පුථුජ්ජනො.
216. තස්ස මෙ අප්පමත්තස්ස සංසාරා විනලීකතා, ගති{1} සබ්බා සමුච්ඡින්නා නත්ථි දානි පුනබ්භවො’ති.
ඉත්ථං සුදං ආයස්මා වජ්ජිතො ථෙරො ගාථායො අභාසිත්ථා’ති.
වජ්ජිතත්ථෙරගාථා.
2. 5. 9.
217. අස්සත්ථෙ හරිතොකාසෙ සංවිරූළ්හම්පි පාදපෙ, එකං බුද්ධගතං සඤ්ඤං අලභිත්ථං පතිස්සතො.
218. එකතිංසෙ ඉතො කප්පෙ යං සඤ්ඤමලභිං තදා, තස්සා සඤ්ඤාය වාහසා පත්තො මෙ ආසවක්ඛයො’ති.