2. 2. 2.
143. යෙ ඛො තෙ වෙඝමිස්සෙන{1} නානත්ථෙන{2} ච කම්මුනා මනුස්සෙ උපරුන්ධන්ති ඵරුසූපක්කමා ජනා, තෙපි තත්ථෙව{3} කීරන්ති නහි කම්මං පනස්සති.
144. යං කරොති නරො කම්මං කල්යාණං යදි පාපකං, තස්ස තස්සෙව දායාදො යං යං කම්මං පකුබ්බතී’ති.
ඉත්ථං සුදං ආයස්මා ජොතිදාසො ථෙරො ගාථායො අභාසිත්ථා’ති.
ජොතිදාසත්ථෙරගාථා.
2. 2. 3.
145. අච්චයන්ති අහොරත්තා ජීවිතං උපරුජ්ඣති, අයු ඛීයති මච්චානං කුන්නදීනං ව ඔදකං.
146. අථ පාපානි කම්මානි කරං බාලො න බුජ්ඣති, පච්ඡාස්ස කටුකං හොති විපාකො හිස්ස පාපකො’ති.
ඉත්ථං සුදං ආයස්මා හෙරඤ්ඤකානිත්ථෙරො ගාථායො අභාසිත්ථා’ති.
හෙරඤ්ඤකානිත්ථෙරගාථා.
2. 2. 4.
147. පරිත්තං දාරුමාරුය්හ යථා සීදෙ මහණ්ණවෙ, එවං කුසීතමාගම්ම සාධුජීවී පි සීදති,{4} තස්මා තං පරිවජ්ජෙය්ය කුසීතං හීනවීරියං.
148. පවිවිත්තෙහි අරියෙහි පහිතත්තෙහි ඣායිහි, නිච්චං අරද්ධවිරියෙහි පණ්ඩිතෙහි සහාවසෙ’ති.
ඉත්ථං සුදං ආයස්මා සොමචිත්තො ථෙරො ගාථායො අභාසිත්ථා’ති.
සොමචිත්තත්ථෙරගාථා.
2. 2. 5.
149. ජනො ජනම්හි සම්බද්ධො ජනමෙවස්සිතො ජනො, ජනො ජනෙන හෙඨීයති හෙඨෙති ච ජනො ජනං.
150. කොහි තස්ස ජනෙනත්ථො ජනෙන ජනිතෙන වා, ජනං ඔහාය ගච්ඡං තං හෙඨයිත්වා බහුං ජනන්ති.
ඉත්ථං සුදං ආයස්මා සබ්බමිත්තො ථෙරො ගාථායො අභාසිත්ථා’ති.
සබ්බමිත්තත්ථෙරගාථා.
2. 2. 6.
151. කාළී ඉත්ථි බ්රහතී ධඞ්කරූපා සත්ථිං ච භෙත්වා අපරං ච සත්ථිං, බාහං{1} ච භෙත්වා අපරං ච බාහුං සීසං ච භෙත්වා දධිථාලකං’ ව එසා නිසින්නා අභිසද්දහිත්වා.
152. යො වෙ අවිද්වා උපධිං කරොති පුනප්පුනං දුක්ඛමුපෙති මන්දො, තස්මා පජානං{2} උපධිං න කයිරා මාහුං පුන භින්නසිරො සයිස්සන්ති.
ඉත්ථං සුදං ආයස්මා මහාකාළො ථෙරො ගාථායො අභාසිත්ථා’ති.
මහාකාළත්ථෙරගාථා.
2. 2. 7.
153. බහූ සපත්තෙ ලභති මුණ්ඩො සඞ්ඝාටිපාරුතො, ලාභී අන්නස්ස පානස්ස වත්ථස්ස සයනස්ස ච.
154. එතමාදීනවං ඤත්වා සක්කාරෙසු මහබ්භයං, අප්පලාභො ‘නවස්සුතො සතො භික්ඛු පරිබ්බජෙ’ති.
ඉත්ථං සුදං ආයස්මා තිස්සො ථෙරො ගාථායො අභාසිත්ථා’ති.
තිස්සත්ථෙරගාථා.
2. 2. 8.
155. පාචීනවංසදායම්හි සක්යපුත්තා සහායකා, පහායානප්පකෙ භොගෙ උඤ්ඡාපත්තාගතෙ රතා.
156. ආරද්ධවිරියා පහිතත්තා නිච්චං දළ්හපරක්කමා, රමන්ති ධම්මරතියා හිත්වාන ලොකියං රතින්ති.
ඉත්ථං සුදං ආයස්මා කිම්බිලො ථෙරො ගාථායො අභාසිත්ථා’ති.
කිම්බිලත්ථෙරගාථා.
2. 2. 9.
157. අයොනිසො මනසිකාරා මණ්ඩනං අනුයුඤ්ජිසං, උද්ධතො චපලො චාසිං කාමරාගෙන අට්ටිතො.
158. උපායකුසලෙනාහං බුද්ධෙනාදිච්චබන්ධුනා, යොනිසො පටිපජ්ජිත්වා භවෙ චිත්තං උදබ්බහින්ති.
ඉත්ථං සුදං ආයස්මා නන්දො ථෙරො ගාථායො අභාසිත්ථා’ති.
නන්දත්ථෙරගාථා.
2. 2. 10.
159. පරෙ ච නං පසංසන්ති අත්තා චෙ අසමාහිතො, මොඝං පරෙ පසංසන්ති අත්තා හි අසමාහිතො.
160. පරෙ ච නං ගරහන්ති අත්තා චෙ සුසමාහි, මොඝං පරෙ ගරහන්ති අත්තා හි සුසමාහිතො’ති.
ඉත්ථං සුදං ආයස්මා සිරිමා ථෙරො ගාථායො අභාසිත්ථා’ති.
සිරිමාත්ථෙරගාථා.
වග්ගො දුතියො.
තස්සුද්දානං:
චුන්දො ච ජොතිදාසො ච ථෙරො හෙරඤ්ඤකානි ච, සොමමිත්තො සබ්බමිත්තො කාලො තිස්සො ච කිම්බිලො නන්දො ච සිරිමා චෙව දස ථෙරා මහිද්ධිකා’ති.
වග්ගො තතියො.
2. 3. 1.
161. ඛන්ධා මයා පරිඤ්ඤාතා තණ්හා මෙ සුසමූහතා, භාවිතා මම බොජ්ඣඞ්ගා පත්තො මෙ ආසවක්ඛයො.
162. සොහං ඛන්ධෙ පරිඤ්ඤාය අබ්බූහිත්වාන{1} ජාලිනිං, භාවයිත්වාන බොජ්ඣඞ්ගෙ නිබ්බායිස්සං අනාසවො’ති.
ඉත්ථං සුදං ආයස්මා උත්තරො ථෙරො ගාථායො අභාසිත්ථා’ති.
උත්තරත්ථෙරගාථා.
2. 3. 2.
163. පනාදො නාම සො රාජා යස්ස යූපො සුවණ්ණයො, තිරියං සොළසපබ්බෙධො{2} උද්ධමාහු{3} සහස්සධා.
164. සහස්සකණ්ඩො{4} සතභෙණ්ඩු{5} ධජාලූ හරිතාමයො, අනච්චුං තත්ථ ගන්ධබ්බා ඡසභස්සානි සත්තධා’ති.
ඉත්ථං සුදං ආයස්මා භද්දජි ථෙරො ගාථායො අභාසිත්ථා’ති.
භද්දජිත්ථෙරගාථා.
2. 3. 3.
165. සතිමා පඤ්ඤවා භික්ඛු ආරද්ධබලවීරියො, පඤ්චකප්පසතානාහං එකරත්තිං අනුස්සරිං.
166. චත්තාරො සතිපට්ඨානෙ සත්ත අට්ඨ ච භාවයං, පඤ්චකප්පසතානාහං එකරත්තිං අනුස්සරින්ති.
ඉත්ථං සුදං ආයස්මා සොභිතො ථෙරො ගාථායො අභාසිත්ථා’ති.
සොභිතත්ථෙරගාථා.
2. 3. 4.
167. යං කිච්චං දළ්හවිරියෙන යං කිච්චං බොද්ධුමිච්ඡතා, කරිස්සං නාවරුජ්ඣිස්සං පස්ස විරියං පරක්කමං.{6}
168. ත්වං ච මෙ මග්ගමක්ඛාහි අඤ්ජසං අමතොගධං, අහං මොනෙන මොනිස්සං ගඞ්ගාසොතො’ව සාගරන්ති.
ඉත්ථං සුදං ආයස්මා වල්ලියො ථෙරො ගාථායො අභාසිත්ථා’ති.
වල්ලියත්ථෙරගාථා.
2. 3. 5.
169. කෙසෙ මෙ ඔලිඛිස්ස’න්ති කප්පකො උපසඞ්කමි, තතො අදාසමාදාය සරීරං පච්චවෙක්ඛිසං.
170. තුච්ඡො කායො අදිස්සිත්ථ අන්ධකාරො{1} තමො ව්යගා, සබ්බෙ චොළා සමුච්ඡින්නා නත්ථි දානි පුනබ්භවො’ති.
ඉත්ථං සුදං ආයස්මා වීතසොකො ථෙරො ගාථායො අභාසිත්ථා’ති.
වීතසොකත්ථෙරගාථා.
2. 3. 6.
171. පඤ්චනීවරණෙ හිත්වා යොගක්ඛෙමස්ස පත්තියා, ධම්මාදාසං ගහෙත්වාන ඤාණදස්සනමත්තනො.
172. පච්චවෙක්ඛිං ඉමං කායං සබ්බං සන්තරබාහිරං, අජ්ඣත්තඤ්ච බහිද්ධා ච තුච්ඡො කායො අදිස්සථා’ති.
ඉත්ථං සුදං ආයස්මා පුණ්ණමාසො ථෙරො ගාථායො අභාසිත්ථා’ති.
පුණ්ණමාසත්ථෙරගාථා.
2. 3. 7.
173. යථාපි භද්දො ආජඤ්ඤො ඛලිත්වා පතිතිට්ඨති, භිය්යො ලද්ධාන සංවෙගං අදීනො වහතෙ ධුරං.
174. එවං දස්සනසම්පන්නං සම්මාසම්බුද්ධසාවකං, ආජානීයං{2} මං ධාරෙථ පුත්තං බුද්ධස්ස ඔරසන්ති.
ඉත්ථං සුදං ආයස්මා නන්දකො ථෙරො ගාථායො අභාසිත්ථා’ති.
නන්දකත්ථෙරගාථා.
2. 3. 8.
175. එහි නන්දක ගච්ඡාම උපජ්ඣායස්ස සන්තිකං, සීහනාදං නදිස්සාම බුද්ධසෙට්ඨස්ස සම්මුඛා.
176. යාය නො අනුකම්පාය අම්හෙ පබ්බාජයී මුනි, සො නො අත්ථො අනුප්පත්තො සබ්බසංයොජනක්ඛයො’ති.
ඉත්ථං සුදං ආයස්මා භරතො ථෙරො ගාථායො අභාසිත්ථා’ති.
භරතත්ථෙරගාථා.
2. 3. 9.
177. නදන්ති එවං සප්පඤ්ඤා සීහාව ගිරිගබ්භරෙ, වීරා විජිතසඞ්ගාමා ඡෙත්වා මාරං සවාහිනිං{1}.
178. සත්ථා ච පරිචිණ්ණො මෙ ධම්මො සඞ්ඝො ච පූජිතො, අහං ච විත්තො සුමනො පුත්තං දිස්වා අනාසවන්ති.
ඉත්ථං සුදං ආයස්මා භාරද්වාජො ථෙරො ගාථායො අභාසිත්ථා’ති.
භාරද්වාජත්ථෙරගාථා.
2. 3. 10.
179. උපාසිතා සප්පුරිසා සුතා ධම්මා අභිණ්හසො, සුත්වාන පටිපජ්ජිස්සං අඤ්ජසං අමතොගධං.
180. භවරාගහතස්ස මෙ සතො භවරාගො පුන මෙ න විජ්ජති, න චාහු න ච මෙ{2} භවිස්සති න ච මෙ එතරහිපි{3} විජ්ජතී’ති.
ඉත්ථං සුදං ආයස්මා කණ්හදින්නො ථෙරො ගාථායො අභාසිත්ථා’ති.
කණ්හදින්නත්ථෙරගාථා.
වග්ගො තතියො.