සාමිදත්තත්ථෙරගාථා.
නවමො වග්ගො.
තස්සුද්දානං:
ථෙරො සමිතිගුත්තො ච කස්සපො සීහසව්හයො නීතො සුනාගො නාගිතො පවිට්ඨො අජ්ජුනො ඉසි, දෙවසභො ච යො ථෙරො සාමිදත්තො මහබ්බලො’ති.
දසමො වග්ගො.
1. 10. 1.
91. න තථා’ මතං සතරසං සුධන්නං යං මයජ්ජ පරිභුත්තං, අපරිමිත දස්සිනා ගොතමෙන බුද්ධෙන දෙසිතො ධම්මො’ති.
ඉත්ථං සුදං ආයස්මා පරිපුණ්ණකො ථෙරො ගාථං අභාසිත්ථා’ති.
පරිපුණ්ණකත්ථෙරගාථා.
1. 10. 2.
92. යස්සාසවා පරික්ඛීණා ආහාරෙ ච අනිස්සිතො, සුඤ්ඤතා අනිමිත්තො ච විමොක්ඛො යස්ස ගොචරො, ආකාසෙව සකුන්තානං පදං තස්ස දුරන්නයන්ති.
ඉත්ථං සුදං ආයස්මා විජයො ථෙරො ගාථං අභාසිත්ථා’ති.
විජයත්ථෙරගාථා.
1. 10. 3.
93. දුක්ඛා කාමා එරක න සුඛා කාමා එරක, යො කාමෙ කාමයති දුක්ඛං සො කාමයති එරක, යො කාමෙ න කාමයති එරක දුක්ඛං සො න කාමයති එරකා’ති.
ඉත්ථං සුදං ආයස්මා එරකො ථෙරො ගාථං අභාසිත්ථා’ති.
එරකත්ථෙරගාථා.
1. 10. 4.
94. නමො හි තස්ස භගවතො සක්යපුත්තස්ස සිරීමතො, තෙනායං අග්ගප්පත්තෙන අග්ගො ධම්මො සුදෙසිතො’ති.
ඉත්ථං සුදං ආයස්මා මෙත්තජි ථෙරො ගාථං අභාසිත්ථා’ති.
මෙත්තජිත්ථෙරගාථා.
1. 10. 5.
95. අන්ධොහං හතනෙත්තොස්මි කන්තාරද්ධානපක්කන්තො,{1} සයමානො’පි ගච්ඡිස්සං න සහායෙන පාපෙනා’ති.
ඉත්ථං සුදං ආයස්මා චක්ඛුපාලො ථෙරො ගාථං අභාසිත්ථා’ති.
චක්ඛුපාලත්ථෙරගාථා.
1. 10. 6.
96. එකපුප්ඵං චජිත්වාන අසීතිං වස්සකොටියො, සග්ගෙසු පරචාරෙත්වා සෙසකෙනම්හි නිබ්බුතො’ති.
ඉත්ථං සුදං ආයස්මා ඛණ්ඩසුමනො ථෙරො ගාථං අභාසිත්ථා’ති.
ඛණ්ඩසුමණත්ථෙරගාථා.
1. 10. 7.
97. හිත්වා සතඵලං කංසං සොවණ්ණං සතරාජිකං, අග්ගහිං මත්තිකාපත්තං ඉදං දුතියාභසෙවන’න්ති.
ඉත්ථං සුදං ආයස්මා තිස්සො ථෙරො ගාථං අභාසිත්ථා’ති.
තිස්සත්ථෙරගාථා.
1. 10. 8.
98. රූපං දිස්වා සති මුට්ඨා පියනිමිත්තං මනසිකරොතො, සාරත්තචිත්තො වෙදෙති තං ච අජ්ඣොස තිට්ඨති, තස්ස වඩ්ඪන්ති ආසවා භවමූලා භවගාමිනො’ති.{1}
ඉත්ථං සුදං ආයස්මා අභයො ථෙරො ගාථං අභාසිත්ථා’ති.
අභයත්ථෙරගාථා.
1. 10. 9.
99. සද්දං සුත්වා සති මුට්ඨා පියනිමිත්තං මනසිකරොතො, සාරත්තචිත්තො වෙදෙති තං ච අජ්ඣොස තිට්ඨති, තස්ස වඩ්ඪන්ති ආසවා සංසාරමුපගාමිනො’ති.{2}
ඉත්ථං සුදං ආයස්මා උත්තියො ථෙරො ගාථං අභාසිත්ථා’ති.
උත්තියත්ථෙරගාථා.
1. 10. 10.
100. සම්මප්පධානසම්පන්නො සතිපට්ඨානගොචරො, විමුත්තිකුසුමසඤ්ඡන්නො පරිනිබ්බිස්සත්යනාසවො’ති.
ඉත්ථං සුදං ආයස්මා දෙවසභො ථෙරො ගාථං අභාසිත්ථා’ති.
දෙවසභත්ථෙරගාථා.
දසමො වග්ගො.
තස්සුද්දානං:
පරිපුණ්ණකො ච විජයො එරකො මෙත්තජී මුනි, චක්ඛුපාලො ඛණ්ඩසුමනො තිස්සො ච අභයො{3} තථා, උත්තියො ච මහාපඤ්ඤො ථෙරො දෙවසභො පි චා’ති.
එකාදසමො වග්ගො.
1. 11. 1.
101. හිත්වා ගිහිත්තං අනවොසිතත්තො මුඛනඞ්ගලී ඔදරිකො කුසීතො, මහාවරාහො’ව නිවාපපුට්ඨො පුනප්පුනං ගබ්භමුපෙති මන්දො.
ඉත්ථං සුදං ආයස්මා බෙලට්ඨානිකො ථෙරො ගාථං අභාසිත්ථා’ති.
බෙලට්ඨානිකත්ථෙරගාථා.
1. 11. 2.
102. මානෙන වඤ්චිතාසෙ සඞ්ඛාරෙසු සඞ්කිලිස්සමානාසෙ,{1} ලාභාලාභෙන මථිතා සමාධිං නාධිගච්ඡන්තී’ති.
ඉත්ථං සුදං ආයස්මා සෙතුච්ඡො ථෙරො ගාථං අභාසිත්ථා’ති.
සෙතුච්ඡත්ථෙරගාථා.
1. 11. 3.
103. නාහං එතෙන අත්ථිකො සුඛිතො ධම්මරසෙන තප්පිතො, පීත්වාන{2} රසග්ගමුත්තමං න ච කාහාමි විසෙන සන්ථව’න්ති.
ඉත්ථං සුදං ආයස්මා බන්ධුරො{3} ථෙරො ගාථං අභාසිත්ථා’ති.
බන්ධුරත්ථෙරගාථා.
1. 11. 4.
104. ලහුකො වත මෙ කායො ඵුට්ඨො ච පීතිසුඛෙන විපුලෙන තූලමිව එරිතං මාලුතෙන පිලවතීව මෙ කායො’ති.
ඉත්ථං සුදං ආයස්මා ඛිතකො ථෙරො ගාථං අභාසිත්ථා’ති.
ඛිතකත්ථෙරගාථා.
1. 11. 5.
105. උක්කණඨිතොපි න වසෙ රමමානොපි පක්කමෙ, නත්වෙවානත්ථසංහිතං වසෙ වාසං විචක්ඛණො’ති.
ඉත්ථං සුදං ආයස්මා මලිතවම්භො ථෙරො ගාථං අභාසිත්ථා’ති.
මලිතවම්භත්ථෙරගාථා.
1. 11. 6.
106. සතලිඞ්ගස්ස අත්ථස්ස සතලක්ඛණධාරිනො, එකඞ්ගදස්සී දුම්මෙධො සතදස්සී ච පණ්ඩිතො’ති.
ඉත්ථං සුදං ආයස්මා සුහෙමන්තො ථෙරො ගාථං අභාසිත්ථා’ති.
සුහෙමන්තත්ථෙරගාථා.
1. 11. 7.
107. පබ්බජිං තුලයිත්වාන අගාරස්මානගාරියං, තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා ධම්මසවො ථෙරො ගාථං අභාසිත්ථා’ති.
ධම්මසවත්ථෙරගාථා.
1. 11. 8.
108. ස වීසංවස්සසතිකො පබ්බජිං අනගාරියං, තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා ධම්මසවපිතුත්ථෙරො ගාථං අභාසිත්ථා’ති.
ධම්මසවපිතුත්ථෙරගාථා.
1. 11. 9.
109. න නූනායං පරමහිතානුකම්පිනො රහොගතො අනුවිගණෙති සාසනං, තථාහයං විහරති පාකතින්ද්රියො මිගී යථා තරුණජාතිකා වනෙ’ති.
ඉත්ථං සුදං ආයස්මා සඞ්ඝරක්ඛිතො ථෙරො ගාථං අභාසිත්ථා’ති.
සඞ්ඝරක්ඛිතත්ථෙරගාථා.
1. 11. 10.
110. නගා නගග්ගෙසු සුසංවිරූළ්හා උදග්ගමෙඝෙන නවෙන සිත්තා විවෙකකාමස්ස අරඤ්ඤසඤ්ඤිනො ජනෙති භිය්යො උසභස්ස කල්යත’න්ති.
ඉත්ථං සුදං ආයස්මා උසභො ථෙරො ගාථං අභාසිත්ථා’ති.
උසභත්ථෙරගාථා.
එකාදසමො වග්ගො.
තස්සුද්දානං:
බෙලට්ඨානිකසෙතුච්ඡා බන්ධුරො ඛිතකො ඉසී, මලිතවම්භො සුහෙමන්තො ධම්මසවො ධම්මසවපිතා, සඞ්ඝරක්ඛිතත්ථෙරො ච උසභො ච මහාමුනී’ති.
වග්ගො ද්වාදසමො.
1. 12. 1.
111. දුප්පබ්බජ්ජං වෙ දුරධිවාසා ගෙහා ධම්මො ගම්භීරො දුරධිගමා භොගා, කිච්ඡා වුත්ති නො ඉතරීතරෙනෙව යුත්තං චින්තෙතුං සතතමනිච්චත’න්ති.
ඉත්ථං සුදං ආයස්මා ජෙන්තො ථෙරො ගාථං අභාසිත්ථා’ති.
ජෙන්තත්ථෙරගාථා.
1. 12. 2.
112. තෙවිජ්ජොහං මහාඣායී චෙතොසමථකොවිදො සදත්ථො මෙ අනුප්පත්තො කතං බුද්ධස්ස සාසන’න්ති.
ඉත්ථං සුදං ආයස්මා ජෙන්තො ථෙරො ගාථං අභාසිත්ථා’ති.