අථ ඛො සභියස්ස පරිබ්බාජකස්ස එතදහොසි: අයම්පි සමණො ගොතමො සඞ්ඝී චෙව ගණී ච ගණාචරියො ච ඤාතො යසස්සි තිත්ථකරො සාධුසම්මාතො බහුජනස්ස, යන්නූනාහං සමණං ගොතමං උපසඞ්කමිත්වා ඉමෙ පඤ්හෙ පුච්ඡෙය්යන්ති.
අථ ඛො සභියො පරිබ්බජාකස්සා එතදහොසි: යෙපි ඛො තෙ භොන්තො සමණබ්රාහ්මණා ජිණ්ණා වුද්ධා මහල්ලකා අද්ධගතා වයො අනුප්පත්තා ථෙරා රත්තඤ්ඤූ චිරපබ්බජිතා සඞ්ඝිනො ගණිනො ගණාචරියා ඤාතා යසස්සිනො තිත්ථකරා සාධුසම්මතා බහුජනස්ස, යෙය්යථිදං: පූරණො කස්සපො -පෙ- නිගණ්ඨො නාතපුත්තො. තෙපි මයා පඤ්හෙ පුට්ඨො න සම්පායන්ති. අසම්පායන්තා කොපඤ්ච දොසඤ්ච අප්පච්චයඤ්ච පාතුකරොන්ති, අපි ච මඤ්ඤෙවෙත්ථ පටිපුච්ඡන්ති, කං පන මෙ සමණො ගොතමො ඉමෙ පඤ්හෙ පුට්ඨො ව්යාකරිස්සති, සමණො හි ගොතමො දහරො චෙව ව ජාතියා නවො ච පබ්බජායාති: අථ ඛො සභියස්ස පරිබ්බාජකස්ස එතදහොසි: සමණො ඛො දහරොති න පරිභොතබ්බො දහරොපි චෙස සමණො ගොතමො මහිද්ධිකො හොති මහානුභාවො, යන්නූනාහං සමණං ගොතමං උපසඞ්කමිත්වා ඉමෙ පඤ්හෙ පුච්ඡෙය්යන්ති.
අථ ඛො සභියො පරිබ්බාජකො යෙන රාජගහං තෙන චාරිකං පක්කාමි. අනුපුබ්බෙන චාරිකං චරමානො යෙන රාජගහං වෙළුවනං කලන්දකනිවාපො, යෙන භගවා තෙනුපඞ්කමි, උපසඞ්කමිත්වා භගවතා සද්ධිං සම්මොදි, සම්මොදනීයං කථං සාරාණීයං{1} වීතිසාරෙත්වා එකමන්තං නිසීදි, එකමන්තං නිසින්නො ඛො සභියො පරිබ්බාජකො භගවන්තං ගාථාය අජ්ඣභාසි:
513. කඞ්ඛි වෙචිකිච්ඡි ආගමං (ඉති සභියො) පඤ්හෙ පුච්ඡිතුං අභිකඞ්ඛමානො, තෙසන්තකරො භවාහි පඤ්හෙ මෙ පුට්ඨො අනුපුබ්බං අනුධම්මං ව්යාකරොහි මෙ.
514. දූරතො ආගතො සි සභියා (ති භගවා) පඤ්හෙ පුච්ඡිතුං අභිකඞ්ඛමානො, තෙසන්තකරො භවාමි පුට්ඨො අනුපුබ්බං අනුධම්මං ව්යාකරොමි තෙ.
515. පුච්ඡ මං සභිය පඤ්හං යං කිඤ්චි මනසිච්ඡසි, තස්ස තස්සෙව පඤ්හස්ස අහං අන්තං කරොමි තෙ’තී.
අථ ඛො සභියස්ස පරිබ්බාජකස්ස එතදහොසි, අච්ඡරියං වත භො අබ්භුතං වත භො යං වතාහං අඤ්ඤෙසු සමණබ්රාහ්මණෙසු ඔකාසකම්මමත්තම්පි නාලත්ථං, තං මෙ ඉදං සමණෙන ගොතමෙන ඔකාසකම්මං කතන්ති අත්තමනො පමොදිතො උදග්ගො පීතිසොමනස්සජාතො භගවන්තං පඤ්හං පුච්ඡි:
516. කිං පත්තිනමාහු භික්ඛූනං (ඉති සභියො) සොරතං කෙන කථඤ්ච දන්තමාහු, බුද්ධොති කථං පවුච්චති පුට්ඨො මෙ භගවා ව්යාකරොහි{1}
517. පජ්ජෙන කතෙන අත්තනා (සභියාති භගවා) පරිනිබ්බානගතො විතිණ්ණකඞ්ඛො, විභවඤ්ච භවඤ්ච විප්පහාය වුසිතවා ඛීණපුනබ්භවො ස භික්ඛු.
518. සබ්බත්ථ උපෙක්ඛකො{2} සතිමා න සො හිංසති කඤ්චි සබ්බලොකෙ, තිණ්ණො සමණො අනාවිලො උස්සදා යස්ස න සන්ති සොරතො සො.
519. යස්සින්ද්රියානි භාවිතානි අජ්ඣත්තං බහිද්ධා ච සබ්බලොකෙ, නිබ්බිජ්ඣ{3} ඉමං පරඤ්ච ලොකං කාලං කඞ්ඛති භාවිතො ස දන්තො.
520. කප්පානි විචෙය්ය කෙවලානි සංසාරං උභයං චුතූපපාතං, විගතරජමනඞ්ගණං විසුද්ධං පත්තං ජාතික්ඛයං තමාහු බුද්ධන්ති.
අථ ඛො සභියො පරිබ්බාජකො භගවතො භාසිතං අභිනන්දිත්වා අනුමොදිත්වා අත්තමනො පමොදිතො උදග්ගො පීතිසොමනස්සජාතො භගවන්තං උත්තරිං පඤ්හං පුච්ඡි:
521. කිං පත්තිනමාහු බ්රාහ්මණං (ඉති සභියො) සමණං කෙන කථඤ්ච නහාතකොති. නාගොති කථං පවුච්චති පුට්ඨො මෙ භගවා ව්යාකරොහි.
522. බාහිත්වා සබ්බපාපානි (සභියාති භගවා) විමලො සාධු සමාහිතො, ඨිතත්තො, සංසාරමතිච්ච කෙවලී සො අසිතො තාදි පවුච්චතෙ බ්රාහ්මා.
523. සමිතාවි පහාය පුඤ්ඤපාපං විරජො ඤත්වා ඉමං පරඤ්ච ලොකං, ජාතිමරණං උපාතිවත්තො සමණො තාදි පවුච්චතෙ තථත්තා.
524. නින්හාය{1} සබ්බපාපකානි අජ්ඣත්තං බහිද්ධා ච සබ්බලොකෙ, දෙවමනුස්සෙසු කප්පියෙසු කප්පං නෙති තමාහු නහාතකොතී.
525. ආගුං න කරොති කිඤ්චි ලොකෙ සබ්බසංයොගෙ විසජ්ජ බන්ධනානි; සබ්බත්ථ න සජ්ජතී විමුත්තො නාගො තාදි පවුච්චතෙ{2} තථත්තාති.
අථ ඛො සභියො පරිබ්බාජකො -පෙ- භගවන්තං උත්තරිං පඤ්හං අපුච්ඡි:
526. කං ඛෙත්තජිනං වදන්ති බුද්ධා (ඉති සභියො) කුසලං කෙන කථඤ්ච පණ්ඩිතොති, මුනි නාම කථං පවුච්චති පුට්ඨො මෙ භගවා ව්යාකරොහි.
527. ඛෙත්තානි විචෙය්ය කෙවලානි (සභියාති භගවා) දිබ්බං මානුසකඤ්ච බ්රහ්මඛෙත්තං, සබ්බඛෙත්තමූලබන්ධනා පමුත්තො ඛෙත්තජිනො තාදී පවුච්චතෙ තථත්තා.
528. කොසානි විචෙය්ය කෙවලානි දිබ්බං මානුසකඤ්ච බ්රහ්මකොසං, සබ්බකොසමූලබන්ධනා පමුත්තො කුසලො තාදි පවුච්චතෙ තථත්තා.
529. තදුභයානි විචෙය්ය පණ්ඩරානි අජ්ඣත්තං බහිද්ධා ච සුදධිපඤ්ඤො, කණ්හං සුක්කමුපාතිවත්තො පණ්ඩිතො තාදි පවුච්චතෙ තථත්තා.
530. අසතඤ්ච සතඤ්ච ඤත්වා ධම්මං අජ්ඣත්තං බහිද්ධා ච සබ්බලොකෙ, දෙවමනුස්සෙහි පූජනීයො සඞ්ගං ජාලමතිච්ච{1} සො මුනීති.
අථ ඛො සභියො පරිබ්බාජකො -පෙ- භගවන්තං උත්තරිං පඤ්හං අපුච්ඡි:
531. කිං පත්තිනමාහු වෙදගුං (ඉති සභියො) අනුවිදිතං කෙන කථඤ්ච විරියවාති, ආජානියො කින්ති නාම හොති පුට්ඨො මෙ භගවා ව්යාකරොහි.
532. වෙදානි විචෙය්ය කෙවලානි (සභියාති භගවා) සමණානං යානිධත්ථි{2} බ්රාහ්මණානං, සබ්බ වෙදනාසු වීතරාගො සබ්බං වෙද මතිච්ච වෙදගූ සො.
533. අනුවිච්ච පපඤ්චනාමරූපං අජ්ඣත්තං බහිද්ධා ච රොගමූලං, සබ්බරොගමූලබන්ධනා පමුත්තො අනුවිදිතො තාදි පවුච්චතෙ තථත්තා
534. විරතො ඉධ සබ්බපාපකෙහි නිරයදුක්ඛමතිච්ච විරියවා සො, සො විරියවා පධානවා ධීරො තාදී පවුච්චතෙ තථත්තා.
535. යස්සසසු ලුතානි බන්ධනානි අජ්ඣත්තං බහිද්ධා ච සඞ්ගමූලං, සබ්බසඞ්ගමූලබන්ධනා පමුත්තො ආජානීයො තාදි පවුච්චතෙ තථත්තා’ති.
අථ ඛො සභියො පරිබ්බාජකො -පෙ- භගවන්තං උත්තරිං පඤ්හං අපුච්ඡි:
536. කිං පත්තිනමාහු සොත්තියං (ඉති සභියො) අරියං කෙන කථඤ්ච චරණවාති, පරිබ්බාජකො කින්ති නාම හොති පුට්ඨො මෙ භගවා ව්යාකරොහි.
537. සුත්වා සබ්බධම්මං අභිඤ්ඤාය ලොකෙ (සභියාති භගවා) සාවජ්ජානවජ්ජං යදත්ථි කිඤ්චි, අභිභුං අකථංකථිං විමුත්තං අනීඝං සබ්බධිමාහු සොත්තියොති.
538. ඡෙත්වා ආසවානි ආලයානී විද්වා සො න උපෙති ගබ්භසෙය්යං සඤ්ඤං තිවිධං පනුජ්ජ පඞ්කං කප්පං නෙති තමාහු අරියොති.
539. යො ඉධ චරණෙසු පන්තිපත්තො කුසලො සබ්බදා ආජානි ධම්මං, සබ්බත්ථ න සජ්ජති විමුත්තො{1} පටිඝා යස්ස න සන්ති චරණවා සො.
540. දුක්ඛවෙපක්කං යදත්ථි කම්මං උද්ධමධො තිරියඤ්චාපි මජ්ඣෙ, පරිබ්බාජයිත්වා පරිඤ්ඤචාරී මායං මානමථොපි ලොභකොධං පරියන්තමකාසි නාමරූපං තං පරිබ්බාජකමාහු පත්තිපත්තන්ති.
අථ ඛො සභියො පරිබ්බාජකො භගවතො භාසිතං අභිනන්දිත්වා අනුමොදිත්වා අත්තමනො පමුදිතො උදග්ගො පීතිසොමනස්සජාතො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං සම්මුඛා සාරුප්පාහි ගාථාහි අභිත්ථවි:
541. යානි ච තීණි යානි ච සට්ඨි සමණප්පවාද සිතානි භූරිපඤ්ඤ, සඤ්ඤක්ඛරසඤ්ඤනිස්සිතානි ඔසරණානි විනෙය්ය ඔඝන්තමගා.
542. අන්තගූ’සි පාරගු දුක්ඛස්ස අරහාසි සම්මාසම්බුද්ධො ඛීණාසවං තං මඤ්ඤෙ, ජුතිමා මුතිමා පහුතපඤ්ඤො දුක්ඛස්සන්තකර අතාරෙසි මං.
543. යං මෙ කංඛිතමඤ්ඤාසි විචිකිච්ඡා මං තාරයි නමො තෙ මුනි මොනපථෙසු පත්තිපත්ත අඛිලආදිච්චබන්ධූ සොරතොසි.
544. යා මෙ කඞ්ඛා පුරෙ ආසි තං මෙ ව්යාකාසි චක්ඛුමා, අද්ධා මුනීසි සම්බුද්ධො නත්ථි නීවරණා තව.
545. උපායාසා ච තෙ සබ්බෙ විද්ධස්තා විනලීකතා, සීතීභූතො දමප්පත්තො ධිතිමා සච්චනික්කමො.
546. තස්ස තෙ නාග නාගස්ස මහාවීරස්ස භාසතො, සබ්බෙ දෙවානුමොදන්ති උභො නාරදපබ්බතා.
547. නමො තෙ පුරිසාජඤ්ඤ නාමො තෙ පුරිසුත්තම, සදෙවකස්මිං ලොකස්මිං නත්ථි තෙ පටිපුග්ගලො.
548. තුවං බුද්ධො තුවං සත්ථා තුවං මාරාභිභූ මුනි, තුවං අනුසයෙ ඡෙත්වා තිණ්ණො තාරෙසි’මං පජං.
549. උපධී තෙ සමතික්කන්තා ආසවා තෙ පදාලිතා, සීහොසි අනුපාදානො පහීනභයභෙරවො.
550. පුණ්ඩරීකං යථා වග්ගු තොයෙ න උපලිප්පති, එවං පුඤ්ඤෙ ච පාපෙ ච උභයෙ ත්වං න ලිප්පසි, පාදෙ වීර පසාරෙහි සභියො වන්දති සත්ථුනො’ති.
අථ ඛො සභියො පරිබ්බාජකො භගවතො පාදෙසු සිරසා නිපතිත්වා භගවන්තං එතදවොච: අභික්කන්තං භො ගොතම -පෙ- ධම්මඤ්ච භික්ඛු සඞ්ඝඤ්ච, ලභෙය්යාහං භන්තෙ, භගවතො සන්තිකෙ පබ්බජ්ජං ලභෙය්යං උපසම්පදන්ති,
යො ඛො සභිය, අඤ්ඤතිත්ථියපුබ්බො ඉමස්මිං ධම්මවිනයෙ ආකඞ්ඛති පබ්බජ්ජං ආකඞ්ඛති උපසම්පදං සො චත්තාරො මාසෙ පරිවසති, චතුන්නං මාසානං අච්චයෙන ආරද්ධචිත්තා භික්ඛු පබ්බාජෙන්ති උපසම්පාදෙන්ති භික්ඛු භාවාය, අපිච මෙත්ථ පුග්ගලවෙමත්තතා විදිතාති.
සචෙ භන්තෙ, අඤ්ඤතිත්ථියපුබ්බා ඉමස්මිං ධම්මවිනයෙ ආකඞ්ඛන්තා පබ්බජ්ජං ආකඞ්ඛන්තා උපසම්පදං චත්තාරො මාසෙ පරිවසන්ති, චතුන්නං මාසානං අච්චයෙන ආරද්ධචිත්තා භික්ඛුපබ්බාජෙන්ති උපසම්පාදෙන්ති භික්ඛුභාවාය, අහං චත්තාරි වස්සානි පරිවසිස්සාමි, චතුන්නං වස්සානං අච්චයෙන ආරද්ධචිත්තා භික්ඛු පබ්බාජෙන්තු උපසම්පාදෙන්තු භික්ඛුභාවායාති.
අලත්ථ ඛො සභියො පරිබ්බාජකො භගවතො සන්තිකෙ පබ්බජ්ජං අලත්ථ උපසම්පදං -පෙ- අඤ්ඤතරො ච ඛො පනායස්මා සභියො අරහතං අහොසීති.
සභියසුත්තං නිට්ඨිතං.
3. 7.
සෙල සුත්තං
එවං මෙ සුතං එකං සමයං භගවා අඞ්ගුත්තරාපෙසු චාරිකං චරමානො මහතා භික්ඛුසඞ්ඝෙන සද්ධිං අඩ්ඪතෙළසෙහි භික්ඛුසතෙහි යෙන ආපණං නාම අඞ්ගුත්තරාපානං නිගමො තදවසරි, අස්සොසි ඛො කෙණියො ජටිලො සමණො ඛලු භො ගොතමො සක්යපුත්තො සක්යකුලා පබ්බජිතො අඞ්ගුත්තරාපෙසු චාරිකං චරමානො මහතා භික්ඛුසඞ්ඝෙන සද්ධිං අඩ්ඪතෙළසෙහි භික්ඛුසතෙහි ආපණං අනුප්පත්තො, තං ඛො පන භවන්තං ගොතමං එවං කල්යාණො කිත්තිසද්දො අබ්භුග්ගතො “ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථි සත්ථා දෙවමනුස්සානං බුද්ධො භගවා”ති සො ඉමං ලොකං සදෙවකං සමාරකං සබ්රහ්මකං සස්සමණබ්රාහ්මණිං පජං සදෙවමුනස්සං සයං අභිඤ්ඤා සච්ඡිකත්වා පවෙදෙති, සො ධම්මං දෙසෙති ආදිකල්යාණං මජ්ඣෙ කල්යාණං පරියොසානකල්යාණං සාත්ථං සබ්යඤ්ජනං කෙවලපරිපුණ්ණං පරිසුද්ධං බ්රහ්මචරියං පකාසෙති, සාධු ඛො පන තථාරූපානං අරහතං දස්සනං හොතී’ති.
අථ ඛො කෙණියො ජටිලො යෙන භගවා තෙනුපසඞ්කමි, උපසඞ්කමිත්වා භගවතා සද්ධිං සම්මොදි, සම්මොදනීයං කථං සාරාණීයං වීතිසාරෙත්වා එකමන්තං නිසීදි, එකමන්තං නිසින්නං ඛො කෙණියං ජටිලං භගවා ධම්මියා කථාය සන්දස්සෙසි සමාදපෙසි සමුත්තෙපෙසි සම්පහසෙසි.
අථ ඛො කෙණියො ජටිලො භගවතා ධම්මියා කථාය සන්දස්සිතො සමාදපිතො සමුත්තෙජිතො සම්පහංසිතො භගවන්තං එතදවොච: අධිවාසෙතු මෙ භවං ගොතමො ස්වාතනාය භත්තං සද්ධිං භික්ඛුසඞ්ඝෙනාති, එවං වුත්තො භගවා කෙණියං ජටිලං එතදවොච: මහා ඛො කෙණිය, භික්ඛුසඞ්ඝො අඩ්ඪතෙළසානි භික්ඛුසතානි, ත්වඤ්ච ඛො බ්රාහ්මණෙසු අභිප්පසන්නොති. දුතියම්පි ඛො කෙණියො ජටිලො භගවන්තං එතදවොච: කිඤ්චාපි භො ගොතම, මහා භික්ඛුසඞ්ඝො අඩ්ඪතෙළසානි භික්ඛුසතානි, අහඤ්ච බ්රාහ්මණෙසු අභිප්පසන්නො, අධිවාසෙතු මෙ භවං ගොතමො ස්වාතනාය භත්තං සද්ධිං භික්ඛුසඞ්ඝෙනාති, තතියම්පි ඛො භගවා කෙණියං ජටිලං එතදවොච: මහා ඛො කෙණිය, භික්ඛුසඞ්ඝො අඩ්ඪතෙළසානි භික්ඛුසතානි, ත්වඤ්ච ඛො බ්රාහ්මණෙසු අභිප්පසන්නොති, තතියම්පි ඛො කෙණියො ජටිලො භගවන්තං එතදවොච: කිඤ්චාපි භො ගොතම, මහා භික්ඛුසඞ්ඝො අඩ්ඪතෙළසානි භික්ඛුසතානි, අහඤ්ච ඛො බ්රාහ්මණෙසු අභිප්පසන්නො, අධිවාසෙත්වෙව මෙ භවං ගොතමො ස්වාතනාය භත්තං සද්ධිං භික්ඛුසඞ්ඝෙනාති.
අධිවාසෙසි භගවා තුණ්හීභාවෙන.
අථ ඛො කෙණියො ජටිලො භගවතො අධිවාසනං විදිත්වා උට්ඨායාසනා යෙන සකො අස්සමො තෙනුපසඞ්කමි, උපසඞ්කමිත්වා මිත්තා මච්චෙ ඤාතිසාලොහිතෙ ආමන්තෙසි: සුණන්තු මෙ භවනෙතා මිත්තා මච්චා ඤාතිසාලොහිතා සමණො මෙ ගොතමො නිමන්තිතො ස්වාතනාය භත්තං සද්ධිං භික්ඛුසඞ්ඝෙන. යෙන මෙ කායවෙය්යාවටිකං කරෙය්යාථාති.
එවං හොති ඛො කෙණියස්ස ජටිලස්ස මිත්තාමච්චා ඤාතිසාලොහිතා කෙණියස්ස ජටිලස්ස පටිස්සුත්වා අප්පෙකච්චෙ උද්ධනානි ඛණන්ති, අප්පෙකච්චෙ කට්ඨානි ඵාලෙන්ති, අප්පෙකච්චෙ භාජන්ති ධොවන්ති, අප්පෙකච්චෙ උදකමණිකං පතිට්ඨාපෙන්ති, අප්පෙකච්චෙ ආසනානි පඤ්ඤාපෙන්ති. කෙණියො පන ජටිලො සාමංයෙව මණ්ඩලමාලං පටියාදෙති.
තෙන ඛො පන සමයෙන සෙලො බ්රාහ්මණො ආපණෙ පටිවසති තිණ්ණං වෙදානං පාරගු සනිඝණටුකෙටුභානං සාක්ඛරප්පභෙදානං ඉතිහාසපඤ්චමානං පදකො වෙය්යාකරණො ලොකායතමහාපුරිසලක්ඛණෙසු අනවයො තීණි මාණවකසතානි මන්තෙ වාචෙති, තෙන ඛො සමයෙන කෙණියෙ ජටිලෙ සෙලො බ්රාහ්මණො අභිප්පසන්නො හොති.
අථ ඛො සෙලො බ්රාහ්මණො තීහි මාණවකසතෙහි පරිවුතො ජඞ්ඝාවිහාරං අනුචඞ්කමමානො අනුවිචරමානො යෙන කෙණියස්ස ජටිලස්ස අස්සමො තෙනුපසඞ්කමි. අද්දසා ඛො සෙලො බ්රාහ්මණො කෙණියස්මිං ජටිලෙ අප්පෙකච්චෙ උද්ධනානි ඛණන්නෙ -පෙ- අප්පෙකච්චෙ ආසනානි පඤ්ඤාපෙන්තෙ කෙණියං පන ජටිලං සාමංයෙව මණ්ඩලමාලං පටියාදෙන්තං දිස්වාන කෙණියං ජටිලං එතදවොච:
කින්නු භොතො කෙණියස්ස ආවාහො වා භවිස්සති, විහාහො වා භවිස්සති, මහායඤ්ඤො වා පච්චුපට්ඨිතො, රාජා වා මාගධො සෙනියො බිම්බිසාරො නිමන්තිතො ස්වාතනාය සද්ධිං බලකායෙනාති.
න මෙ සෙල, ආවාහො භවිස්සති, නපි විවාහො භවිස්සති නපි රාජා මාගධො සෙනියො බිම්බිසාරො නිමත්ති තො ස්වාතනාය සද්ධිං බලකායෙන, අපි ච ඛො මෙ මහායඤ්ඤො පච්චුපට්ඨිතො අත්ථි. සමණො ගොතමො සක්යපුත්තො සක්යකුලා පබ්බජිතො අඞ්ගුත්තරාපෙසු චාරිකං චරමානො මහතා භික්ඛුසඞ්ඝෙන සද්ධිං අඩ්ඪතෙළසෙහි භික්ඛුසතෙහි ආපණං අනුප්පත්තො, තං ඛො පන භවන්තං ගොතමං එවං කල්යාණො කිත්තිසද්දො අබ්භුග්ගතො -පෙ- බුද්ධො භගවාති. සො මෙ නිමන්තිතො ස්වාතනාය සද්ධිං භික්ඛුසඞ්ඝෙනාති.
බුද්ධොති ඛො භො කෙණිය, වදෙසි? බුද්ධොති භො සෙල, වදාමි, බුද්ධොති භො කෙණිය, වදෙසි? බුද්ධොති භො සෙල වදාමිති.
අථ ඛො සෙලස්ස බ්රාහ්මණස්ස එතදහොසි: ඝොසොපි ඛො එසො දුල්ලභො ලොකස්මිං යදිදං බුද්ධො’ති. ආගතානි ඛො පන අස්මාකං මන්තෙසු ද්වත්තිංස මහාපුරිසලක්ඛණානි යෙහි සමන්නාගතස්ස මහාපුරිසස්ස ද්වෙව ගතියො භවන්ති අනඤ්ඤා. සචෙ අගාරං අජ්ඣාවසති, රාජා හොති චක්කවත්ති ධම්මිකො ධම්මරාජා චාතුරන්තො විජිතාවි ජනපදත්ථාවරියප්පත්තො සත්තරතනසමන්නාගතො. තස්සිමානි සත්තරතනානි භවන්ති, සෙය්යථීදං: චක්කරතනං හත්ථිරතනං අස්සරතනං මණිරතනං ඉත්ථිරතනං ගහපතිරතනං පරිණායකරතනමෙව සත්තමං, පරොසහස්සං ඛො පනස්ස පුත්තා භවන්ති සූරා වීරඞ්ගරූපා පරසෙනප්පමද්දනා, සො ඉමං පඨවිං සාගරපරියන්තං අදණ්ඩෙන අසත්ථෙන ධම්මෙන අභිවිජිය අජ්ඣාවසති. සචෙ ඛො පනාගාරස්මා අනගාරියං පබ්බජති අරහං හොති සම්මාසම්බුද්ධො ලොකෙ විවත්තච්ඡද්දො.
කහං පන භො කෙණිය, එතරහි සො භවං ගොතමො විහරති අරහං සම්මා සම්බුද්ධො’ති.
එවං වුත්තෙ කෙණියො ජටිලො දක්ඛිණං බාහං පග්ගහෙත්වා සෙලං බ්රාහ්මණං එතදවොච: යෙනෙසා භො සෙල නිලවනරාජීති,
අථ ඛො සෙලො බ්රාහ්මණො තීහි මාණවකසතෙහි සද්ධිං යෙන භගවා තෙනුපසඞ්කමි, අථඛො සෙලො බ්රාහ්මණො තෙ මාණවකෙ ආමන්තෙසි: අප්පසද්දා භොන්තො ආගච්ඡන්තු පාදෙ පදං නික්ඛිපන්තා, දුරාසදා හි තෙ භගවන්තො සීහාව එකවරා, යදා වාහං භොන්තො, සමණෙන ගොතමෙන සද්ධිං මන්තෙය්යං මා මෙ භොන්තො, අන්තරන්තරා කථං ඔපාතෙථ, කථාපරියොසානං මෙ භවන්තො ආගමෙන්තූති.
අථ ඛො සෙලො බ්රාහ්මණො යෙන භගවා තෙනුපසඞ්කමි, උපසඞ්කමිත්වා භගවතා සද්ධිං සම්මොදි, සම්මොදනීයං කථං සාරාණීයං{1}වීතිසාරෙත්වා එකමන්තං නිසීදි, එකමන්තං නිසින්නො ඛො සෙලො බ්රාහ්මණො භගවතො කායෙ ද්වත්තිංසමහාපුරිසලක්ඛණානි සමන්නෙසි{2}, අද්දසා ඛො සෙලො බ්රාහ්මණො භගවතො කායෙ ද්වත්තිංස මහාපුරිසලක්ඛණානි යෙභුය්යෙන ඨපෙත්වා ද්වෙ, ද්වීසු මහාපුරිසලක්ඛණෙසු කඞ්ඛති විචිකිච්ඡති නාධිමුච්චති න සම්පසීදති, කොසොහිතෙ ච වත්ථගුය්හෙ පහූතජිව්හතාය ච,
අථ ඛො භගවතො එතදහොසි: පස්සති ඛො මෙ අයං සෙලො බ්රාහ්මණො ද්වත්තිංසමහාපුරිසලක්ඛණානි යෙභුය්යෙන ඨපෙත්වා ද්වෙ, ද්වීසු මහාපුරිසලක්ඛණෙසු කඞ්ඛති විචිකිච්ඡති නාධිමුච්චති න සම්පසීදති, කොසොහිතෙ ච වත්ථගුය්හෙ පහූතජිව්හතාය චාති. අථ ඛො භගවා තථාරූපං ඉද්ධාභිසඞ්ඛාරං අභිසඞ්ඛාසි යථා අද්දස සෙලො බ්රාහ්මණො භගවතො කොසොහිතං වත්ථගුය්හං, අථ ඛො භගවා ජිව්හං නින්නාමෙත්වා උභොපි කණ්ණසොතානි අනුමසි පරිමසි, උභොපි නාසිකසොතානි අනුමසි පිරිමසි, කෙවලම්පි ලළාටමණ්ඩලං ජිව්හාය ඡාදෙසි.
අථ ඛො සෙලස්ස බ්රාහ්මණස්ස එතහොසි සමන්නාගතො ඛො සමණො ගොතමො ද්වත්තිංසමහාපුරිසලක්ඛණෙහි පරිපුණ්ණෙහි නො අපරිපුණ්ණෙහි නො ච ඛො නං ජානාමි බුද්ධො වා නො වා, සුතං ඛො පන මෙතං බ්රාහ්මණානං වුද්ධානං මහල්ලකානං ආචරියපාචරියානං භාසමානානං, යෙ තෙ භවන්ති අරහන්තො සම්මාසම්බුද්ධො තෙ සකෙ වණ්ණෙ භඤ්ඤමානෙ අත්තානං පාතුකරොන්තීති, යන්නූනාහං සමණං ගොතමං සම්මුඛා සාරුප්පාහි ගාථාහි අභිත්ථවෙය්යන්ති, අථ ඛො සෙලො බ්රාහ්මණො භගවන්තං සම්මුඛා සාරුප්පාහි ගාථාහි අභිත්ථවි.
551. පරිපුණ්ණකායො සුරුචි සුජාතො චාරුදස්සනො, සුවණ්ණවණ්ණොසි{1} භගවා සුසුක්කදාඨොසි විරියවා.
552. නරස්ස හි සුජාතස්ස යෙ භවන්ති වියඤ්ජනා සබ්බෙ තෙ තව කායස්මිං මහාපුරිසලක්ඛණා.
553. පසන්නනෙත්තො සුමුඛො බ්රහා උජු පතාපවා, මජ්ඣෙ සමණසඞ්ඝස්ස ආදිච්චො’ව විරොචසි.
554. කල්යාණදස්සනො භික්ඛු කඤ්චනසන්නිභත්තවො, කිං තෙ සමණභාවෙන එවං උත්තමවණ්ණිනො.
555. රාජා අරහසි භවිතුං චක්කවත්ති රථෙසභො, චාතුරන්තො විජිතාවි ජම්බුසණ්ඩස්ස ඉස්සරො.
556. ඛත්තියා භොජරාජානො අනුයුත්තා භවන්ති තෙ, රාජාභිරාජා මනුජින්දො රජ්ජං කාරෙහි ගොතම.
557. රාජාහමස්මි{1} සෙල (ඉති භගවා) ධම්මරාජා අනුත්තරො, ධම්මෙන චක්කං වත්තෙමි චක්කං අප්පතිවත්තියං
558. සම්බුද්ධො පටිජානාසි (ඉතිසෙලො බ්රාහ්මණො) ධම්මරාජා අනුත්තරො, ධම්මෙන චක්කං වත්තෙමි ඉති භාසසි ගොතම.
559. කොනු සෙනාපතී භොතො සාවකො සත්ථුදන්වයො, කො තෙ ඉමං අනුවත්තෙති ධම්මචක්කං පවත්තිතං.
560. මයා පවත්තිතං චක්කං (සෙලාති භගවා) ධම්මචක්කං අනුත්තරං, සාරිපුත්තො අනුවත්තෙති අනුජාතො තථාගතං
561. අභිඤ්ඤෙය්යං අභිඤ්ඤාතං භාවෙතබ්බඤ්ච භාවිතං, පහාතබ්බං පහීනං මෙ තස්මා බුද්ධොස්මි බ්රාහ්මණ.
562. විනයස්සු මයි කඞ්ඛං අධිමුච්චස්සු බ්රාහ්මණ, දුල්ලභං දස්සනං හොති සම්බුද්ධානං අභිණ්හසො.
563. යෙසං වො දුල්ලභො ලොකෙ පාතුභාවො අභිණ්හසො, සො’හං බ්රාහ්මණ සම්බුද්ධො සල්ලකත්තො අනුත්තරො.
564. බ්රහ්මභූතො අතිතුලො මාරසෙනප්පමද්දනො, සබ්බාමිත්තෙ වසීකත්වා මොදාමි අකුතොභයො.
565. ඉමං භොන්තො නිසාමෙථ යථා භාසති චක්ඛුමා, සල්ලකත්තො මහාවීරො සීහො ව නදතී වනෙ.
566. බ්රහ්මභූතං අතිතුලං මාරයෙනප්පමද්දනං, කො දිස්වා නප්පසීදෙය්ය අපි කණ්හාභිජාතිකො.
567. යො මං ඉච්ඡති අන්වෙතු යො වා නිච්ඡති ගච්ඡතු, ඉධාහං පබ්බජිස්සාමි වරපඤ්ඤස්ස සන්තිකෙ
568. එතඤ්චෙ රුච්චති භොතො සම්මාසම්බුද්ධසාසනං, මයම්පි පබ්බජිස්සාම වරපඤ්ඤස්ස සන්තිකෙ.
569. බ්රාහ්මණා තිසතා ඉමෙ යාචන්ති පඤ්ජලීකතා, බ්රහ්මචරියං චරිස්සාම භගවා තව සන්තිකෙ.
570. ස්වාක්ඛාතං බ්රහ්මචරියං (සෙලාති භගවා) සන්දිට්ඨිකමකාලිකං, යත්ථු අමොඝා පබ්බජ්ජා අප්පමත්තස්ස සික්ඛතොති.
අලත්ථ ඛො සෙලො බ්රාහ්මණො සපරිසො භගවතො සන්තිකෙ පබ්බජ්ජං අලත්ථ උපසම්පදං. අථ ඛො කෙණියො ජටිලො තස්සා අත්තියා අච්චයෙන සකෙ අස්සමෙ පණීතං ඛාදනීයං භොජනීයං පටියාදාපෙත්වා භගවතො කාලං ආරොචාපෙසි, කාලො භො ගොතම නිට්ඨිතං භත්තන්ති.
අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන කෙණියස්ස ජටිලස්ස අස්සමො තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි, සද්ධිං භික්ඛුසඞ්ඝෙන. අථ ඛො කෙණියො ජටිලො බුද්ධපමුඛං භික්ඛුසඞ්ඝං පණීතෙන ඛාදනීයෙන භොජනීයෙන සහත්ථා සන්තප්පෙසි සම්පවාරෙසි. අථ ඛො කෙණියො ජටිලො භගවන්තං භුත්තාවිං ඔනීතපත්තපාණිං අඤ්ඤතරං නීචං ආසනං ගහෙත්වා එකමන්තං නිසීදි. එකමන්තං නිසින්නං ඛො කෙණියං ජටිලං භගවා ඉමාහි ගාථාහි අනුමොදි.
571. අග්ගිහුත්තමුඛා යඤ්ඤා සාවිත්තී ඡන්දසො මුඛං, රාජා මුඛං මනුස්සානං නදීනං සාගරො මුඛං.
572. නක්ඛත්තානං මුඛං චන්දො ආදිච්චො තපතං මුඛං, පුඤ්ඤං ආකඞ්ඛමානානං සඞ්ඝො චෙ යජතං මුඛන්ති.
අථ ඛො භගවා කෙණියං ජටිලං ඉමාහි ගාථාහි අනුමොදිත්වා උට්ඨායාසනා පක්කාමි. අථ ඛො ආයස්මා සෙලො පසරිසො එකො වූපකට්ඨො අප්පමත්තො ආතාපි පහිතත්තො විහරන්තො න චිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි.
ඛීණා ජාති වුසිතං බ්රහ්මචරියං කතං කරණීයං නාපරං ඉත්ථත්තායාති. අබ්භඤ්ඤාසි අඤ්ඤතරො ච ඛො පනායස්මා සෙලො සපරියො අරහතං අහොසි.
අථ ඛො ආයස්මා සෙලො සපරියො යෙන භගවා තෙනුපසඞ්කමි. උපසඞ්කමිත්වා එකංසං චීවරං කත්වා යෙන භගවා තෙනඤ්ජලිං පණාමෙත්වා භගවන්තං ගාථාහි අජ්ඣභාසි.
573. යං තං සරණමාගම්ම ඉතො අට්ඨමී චක්ඛුම, සත්තරත්තෙන භගවා දන්තම්හ තව සාසනෙ.