සන්දිස්සන්ති නු ඛො භො ගොතම එතරහි බ්රාහ්මණා පොරාණානං බ්රාහ්මණානං බ්රාහ්මණධම්මෙති.
න ඛො බ්රාහ්මණා සන්දිස්සන්ති එතරහි බ්රාහ්මණා පොරාණානං බ්රාහ්මණානං බ්රාහ්මණධම්මෙති.
සාධු නො භවං ගොතමො පොරාණානං බ්රාහ්මණානං බ්රාහ්මණධම්මං භාසතු සවෙ හොතො ගොතමස්ස අගරූති.
තෙන හි බ්රාහ්මණා සුණාථ සාධුකං මනසි කරොථ භාසිස්සාමීති.
එවං භො’ති ඛො තෙ බ්රාහ්මණමහාසාළා භගවතො පච්චස්සොසුං
භගවා එතදවොච:
286. ඉසයො පුබ්බකා ආසුං සංයතත්තා තපස්සිනො පඤ්චකාමගුණෙ හිත්වා අත්තදත්ථමචාරිසුං.
287. න පසූ බ්රාහ්මණානාසුං න හිරඤ්ඤං න ධානීයං සජ්ඣායධනධඤ්ඤාසුං බ්රහ්මං නිධිමපාලයුං.
288. යං තෙසං පකතං ආසි ද්වාරභත්තං උපට්ඨිතං සද්ධපකතමෙසානං දාතවෙ තදමඤ්ඤිසුං.
289. නානාරත්තෙහි වත්ථෙහි සයනෙභාවසථෙහි ච ඵිතා ජනපදා රට්ඨා තෙ නමස්සිංසු බ්රාහ්මණෙ.
290. අවජ්ඣා බ්රාහ්මණා ආසුං අජෙය්යා ධම්මරක්ඛිතා න තෙ කොචි නිවාරෙසි කුලද්වාරෙසු සබ්බසො.
291. අට්ඨචත්තාරිසං වස්සානි කොමාරං බ්රහ්මචරියං චරිංසු තෙ විජ්ජාචරණපරියෙට්ඨිං අචරුං බ්රාහ්මණා පුරෙ.
292. න බ්රාහ්මණ අඤ්ඤමගමුං නපි භරියං කිණිංසු තෙ සම්පියෙනෙව සංවාසං සංගන්ත්වා සමරොචයුං.
293. අඤ්ඤත්ර තම්හා සමයා උතුවෙරමණිම්පති අන්තරා මෙථුනං ධම්මං නාස්සු ගච්ඡන්ති බ්රාහ්මණා.
294. බ්රහ්මචරියඤ්ච සීලඤ්ච අජ්ජවං මද්දවං තපං සොරච්චං අවිහිංසඤ්ච ඛන්තිඤ්චාපි අවණ්ණයුං.
295. යො නෙසං පරමො ආසි බ්රහ්මා දළ්හපරක්කමො ස චාපි මෙථුනං ධම්මං සුපිනන්තෙපි නාගමා.
296. තස්ස වත්තමනුසික්ඛන්තා ඉධෙකෙ විඤ්ඤුජාතිකා බ්රහ්මචරියඤ්ච සීලඤ්ච ඛන්තිඤ්චාපි අවණ්ණයුං.
297. තණ්ඩුලං සයනං වත්ථං සප්පිතෙලඤ්ච යාචිය ධම්මෙන සමොධානෙත්වා{1}තතො යඤ්ඤමකප්පයුං උපට්ඨිතස්මිං යඤ්ඤස්මිං නාස්සු ගාවො හනිංසු තෙ.
298. යථා මාතා පිතා භාතා අඤ්ඤෙ විපි ච ඤාතකා ගාවො නො පරමා මිත්තා යාසු ජායන්ති ඔසධා.
299. අන්නදා බලදා චෙතා වණ්ණදා සුඛදා තථා එතමත්ථමසං ඤත්වා සාස්සු ගාවො හනිංසු තෙ.
300. සුඛුමාලා මහාකායා වණ්ණවන්තො යසස්සිනො බ්රාහ්මණා සෙහි ධම්මෙහි කිච්චාකිච්චෙසු උස්සුකා යාව ලොකෙ අවත්තිංසු සුඛමෙධිත්ථයම්පජා.
301. තෙසං ආසි විපල්ලාසො දිස්වාන අණුතො අණුං රාජිනො ව වියාකාරං නාරියො සමලඞ්කතා.
302. රථෙ චාජඤ්ඤසංයුත්තෙ සුකතෙ චිත්තසිබ්බනෙ නිවෙසනෙ නිවෙසෙ ච විභත්තෙ භාගසො මිතෙ.
303. ගොමණ්ඩලපරිබ්බූළ්හං නාරීවරගණායුතං උළාරං මානුසං භොගං අභිජ්ඣායිංසු බ්රාහ්මණා.
304. තෙ තත්ථ මන්තෙ ගන්ථෙත්වා ඔක්කාකං තදුපාගමුං, පහූතධනධඤ්ඤෙසි යජස්සු බහු තෙ චිත්තං යජස්සු බහු තෙ ධනං.
305. තතො ච රාජා සඤ්ඤත්තො බ්රාහ්මණෙහි රථෙසභො අස්සමෙධං පුරිසමෙධං සම්මාපාසං වාජපෙය්යං නිරග්ගලං එතෙ යාගෙ යජිත්වාන බ්රාහ්මණානං අදා ධනං.
306. ගාවො සයනඤ්ච වත්ථඤ්ච නාරියො සමලඞ්කතා රථෙ චාජඤ්ඤසංයුත්තෙ සුකතෙ චිත්තසිබ්බනෙ.
307. නිවෙසනානි රම්මානි සුවිභත්තානි භාගසො නානාධඤ්ඤස්ස පූරෙත්වා බ්රාහ්මණානං අදා ධනං.
308. තෙ ච තත්ථ ධනං ලද්ධා සන්නිධිං සමරොචයුං තෙසං ඉච්ඡාවතිණ්ණානං හිය්යො තණ්හා පවඩ්ඪථ. තෙ තත්ථ මන්තෙ ගන්ථෙත්වා ඔක්කාකං පුනුපාගමුං.
309. යථා ආපො ච පඨවී හිරඤ්ඤං ධනධානියං එවං ගාවො මනුස්සානං පරික්ඛාරො සො හි පාණිනං යජස්සු බහු තෙ චිත්තං යජස්සු බහු තෙ ධනං.
310. තතො ච රාජා සඤ්ඤත්තො බ්රාහ්මණෙහි රථෙසභො නෙකසතසහස්සියො ගාවො යඤ්ඤෙ{1} අඝාතයී.
311. න පාදා න විසාණෙන නාස්සු හිංසන්ති කෙනචි ගාවො එළකසමානා සොරතා කුම්භදූහනා තා විසාණෙ ගහෙත්වාන රාජා සත්ථෙන ඝාතයී.
312. තතො ච දෙවා පිතරො ඉන්දො අසුරරක්ඛසා අධම්මො ඉති පක්කන්දුං යං සත්ථං නිපතී ගවෙ.
313. තයො රොගා පුරෙ ආසුං ඉච්ඡා අනසනං ජරා පසූනඤ්ච සමාරම්භා{2} අට්ඨානවුතිමාගමුං.
314. එසො අධම්මො දණ්ඩානං ඔක්කන්තො පුරාණො අහු අදූසිකායො හඤ්ඤන්ති ධම්මා ධංසන්ති යාජකා.
315. එවමෙසො අණුධම්මො පොරාණො විඤ්ඤූගරහීතො යත්ථ එදිසකං පස්සති යාජකං ගරහතී ජනො.
316. එවං ධම්මෙ වියාපන්නෙ විභින්නා සුද්දවෙස්සිකා පුථු විභින්නා ඛත්තියා පතිං භරියා‘වමඤ්ඤථ.
317. ඛත්තියා බ්රහ්මබන්ධු ව යෙ චඤ්ඤෙ ගොත්තරක්ඛිතා ජාතිවාදං නිරංකත්වා කාමානං වසමන්වගුන්ති.
එවං වුත්තෙ තෙ බ්රාහ්මණමහාසාළා භගවන්තං එතදවොච: අභික්කන්තං භො ගොතම අභික්කන්තං භො ගොතම. සෙය්යථාපි භො ගොතම, නික්කුජ්ජිතං වා උක්කුජ්ජෙය්ය, පටිච්ඡන්නං වා විවරෙය්ය, මූළ්හස්ස වා මග්ගං ආචික්ඛෙය්ය, අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්තීති, එවමෙවං භොතා ගොතමෙන අනෙකපරියායෙන ධම්මො පකාසිතො, එතෙ මයං භවන්තං ගොතමං සරණං ගච්ඡාම ධම්මඤ්ච භික්ඛුසඞ්ඝඤ්ච, උපාසකෙ නො භවං ගොතමො ධාරෙතු අජ්ජතග්ගෙ පාණුපෙතෙ සරණං ගතෙ’ති.
බ්රාහ්මණධම්මිකසුත්තං නිට්ඨිතං.
2. 8.
ධම්ම (නාවා) සුත්තං{1}
318. යස්මා භි ධම්මං පුරිසො විජඤ්ඤා ඉන්දං’ච නං දෙවතා පූජයෙය්ය, සො පූජිතො තස්මිං පසන්නචිත්තො බහුස්සුතො පාතුකරොති ධම්මං.
319. තදට්ඨිකත්වාන නිසම්ම ධීරො ධම්මානුධම්මං පටිපජ්ජමානො, විඤ්ඤූ විභාවී නිපුණො ච හොති යො තාදිසං භජතෙ අප්පමත්තො.
320. ඛුද්දඤ්ච බාලං උපසෙවමානො අනාගතත්ථඤ්ච උසූයකඤ්ච, ඉධෙව ධම්මං අචිභාවයිත්වා අවිතිණ්ණකඞ්ඛො මරණං උපෙති.
321. යථා නරො ආපගං ඔතරිත්වා මහොදකං{1} සලිලං සීඝසොතං, සො වුය්හමානො අනුසොතගාමී කිං සො පරෙ සක්කති තාරයෙතං.
322. තථෙව ධම්මං අවිභාවයිත්වා බහුස්සුතානං අනිසාමයත්ථ, සයං අජානං අවීතිණ්ණකඞ්ඛො කිං සො පරෙ සක්කති නිජ්ඣාපෙතුං.
323. යථාපි නාවං දළ්හමාරුහිත්වා පියෙන’රිත්තෙන සමඞ්ගිභූතො, සො තාරයෙ තත්ථ බහූපි අඤ්ඤෙ තත්රූපායඤ්ඤූ කුසලො මුතීමා.
324. එවම්පි යො වෙදගූ භාවිතත්තො බහුස්සුතො හොති අවෙධධම්මො, සො ඛො පරෙ නිජ්ඣපයෙ පජානං සොතාවධානූපනීසූපපන්නෙ.
325. තස්මා භවෙ සප්පුරිසං භජෙථ මෙධාවිනඤ්චෙව බහුස්සුතඤ්ච, අඤ්ඤාය අත්ථං පටිපජ්ජමානො විඤ්ඤාතධම්මො සො සුඛං ලභෙථාති.
ධම්ම{2}සුත්තං නිට්ඨිතං.
2. 9.
කිංසීලසුත්තං
326. කිංසීලො කිංසමාචාරො කානි කම්මානි බ්රූභයං නරො සම්මා නිවිට්ඨස්ස උත්තමත්ථඤ්ච පාපුණෙ.
327. වුද්ධාපචායී අනුසුය්යකො සියා කාලඤ්ඤූ චස්ස ගරූනං දස්සනාය ධම්මිං කථං එරයිතං ඛණඤ්ඤූ සුණෙය්ය සක්කච්ච සුභාසිතානි.
328. කාලෙන ගච්ඡෙ ගරූනං සකාසං ථම්භං නිරංකත්වා නිවාතවුත්ති අත්ථං ධම්මං සංයමං බ්රහ්මචරියං අනුස්සරෙ චෙව සමාචරෙ ව.
329. ධම්මාරාමො ධම්මරතො ධම්මෙ ඨිතො ධම්මවිනිච්ඡයඤ්ඤූ, නො වාචරෙ ධම්මසන්දොසවාදං නියෙථ තච්ඡෙහි{1} සුභාසිතෙහී.
330. හස්සං ජප්පං පරිදෙවං පදොසං මායාකතං කුහකං ගිද්ධිමානං, සාරම්භකක්කසකසාව මුච්ඡං{2} හිත්වා චරෙ වීතමදො ඨිතත්තො.
331. විඤ්ඤාතසාරානි සුභාසිතානි සුතඤ්ච වඤ්ඤාතසමාධිසාරං, න තස්ස පඤ්ඤා ච සුතඤ්ච වඩ්ඪති යො සාහසො හොති නරො පමත්තො.
332. ධම්මෙ ච යෙ අරියපවෙදිතෙ රතා අනුත්තරා තෙ වචසා මනසා කම්මනා ච තෙ සන්නිසොරච්චසාධිසණ්ඨිතා සුතස්ස පඤ්ඤාය ච සාරමජ්ඣගූති.
කිංසීලසුත්තං නිට්ඨිතං.
2. 10.
උට්ඨාන සුත්තං
333. උට්ඨහථ නිසීදථ කො අත්ථො සුපිතෙන වො, ආතුරානං භි කා නිද්දා සල්ලවිද්ධාන රුප්පතං.
334. උට්ඨහථ නිසීදථ දළ්හං සික්ඛථ සන්තියා, මා වො පමත්තෙ විඤ්ඤාය මච්චුරාජා අමොසයිත්ථවසානුහෙ.
335. යාය දෙවා මනුස්ස ච සිතා තිට්ඨන්ති අත්ථිකා, තරථෙතං’විසත්තිකං ඛණො වො{1} මා උපච්චගා; ඛණාතීතා හි සොචන්ති නිරයම්හි සමප්පිතා.
336. පමාදො රජො පමාදො{2} පමාදානුපතිතො රජො, අප්පමත්තෙන විජ්ජාය අබ්බහෙ සල්ලමත්තනොති.
උට්ඨානසුත්තං නිට්ඨිතං.
2. 11.
රාහුල සුත්තං
337. කච්චි අභිණ්හසංවාසා නාවජානාසි පණ්ඩිතං උක්කාධාරො මනුස්සානං කච්චි අපචිතො තයා{3}
338. නාහං අභිණ්හසංවාසා අවජානාමි පණ්ඩිතං, උක්කාධාරො මනුස්සානං නිච්චං අපචිතො මයා.
339. පඤ්චකාමගුණෙ හිත්වා පියරූපෙ මනොරමෙ, සද්ධාය ඝරා නික්ඛම්ම දුක්ඛස්සන්තකරො භව.
340. මිත්තෙ භජස්සු කල්යාණෙ පන්තඤ්ච{4} සයනාසනං, විචිත්තං අප්පනිග්ඝොසං මත්තඤ්ඤූ හොහි භොජනෙ.
341. චීවරෙ පිණ්ඩපාතෙ ච පච්චයෙ සයනාසනෙ, එතෙසු තණ්හං මා කාසි මා ලොකං පුනරාගමි.
342. සංවුතො පාතිමොක්ඛස්මිං ඉන්ද්රියෙසු ච පඤ්චසු, සති කායගතාත්යත්ථු නිබ්බිදා බහුලො භව.
343. නිමිත්තං පරිවජ්ජෙහි සුභං රාගූපසංහිතං, අසුභාය චිත්තං භාවෙහි එකග්ගං සුසමාහිතං.
344. අනිමිත්තඤ්ච භාවෙහි මානානුසයමුජ්ජහ, තතො මානාභිසමයා උපසන්තො චරිස්සසීති.
ඉත්ථං සුදං භගවා ආයස්මන්තං රාහුලං ඉමාහි ගාථාහි අභිණ්හං ඔවදතීති.
රාහුලසුත්තං නිට්ඨිතං.
2. 12.
නිග්රොධකප්ප සුත්තං
එවං මෙ සුතං: එකං සමයං භගවා ආළවියං විහරති අග්ගාළවෙ චෙතියෙ. තෙන ඛො පන සමයෙන ආයස්මතො වඞ්ගීසස්ස උපජ්ඣායො නිග්රොධකප්පො නාම ථෙරො අග්ගාළවෙ චෙතියෙ අචිරපරිනිබ්බුතො හොති.
අථ ඛො ආයස්මතො වංගීසස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි: පරිනිබ්බුතො නු ඛො මෙ උපජ්ඣායො උදාහු නො පරිනිබ්බුතොති.
අථ ඛො ආයස්මා වංගීසො සායන්හසමයං{1} පටිසල්ලානි වුට්ඨිතො යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා වංගීසො භගවන්තං එතදවොච: ඉධ මය්හං භන්තෙ රහොගතස්ස පටිසල්ලීනස්ස එවං චෙතසො පරිවිතක්කො උදපාදී: පරිනිබ්බුතො නු ඛො මෙ උපජ්ඣායො උදාහු නො පරිනිබ්බුතොති.
අථ ඛො ආයස්මා වඞ්ගීසො උට්ඨායාසනා එකංසං චීවරං කත්වා යෙන භගවා තෙනඤ්ජලිං පණාමෙත්වා භගවන්තං ගාථාය අජ්ඣභාසි:
345. පුච්ඡාම සත්ථාරං අනොමපඤ්ඤං දිට්ඨෙව ධම්මෙ යො විචිකිච්ඡානං ඡෙත්තා, අග්ගාළවෙ කාලමකාසි භික්ඛු ඤාතො යසස්සි අභිනිබ්බුතත්තො.
346. නිග්රොධකප්පො ඉති තස්ස නාම, තයා කතං භගවා බ්රාහ්මණස්ස, සො තං නමස්සං අචරි මුත්යපෙක්ඛො ආරද්ධවිරියො දළ්හධම්මදස්සී.
347. තං සාවකං සක්ක{1} මයම්පි සබ්බෙ අඤ්ඤාතුමිච්ඡාම සමන්තචක්ඛු, සමවට්ඨිතා නො සවණාය සොතා ත්වං නො සත්ථා ත්වං අනුත්තරොසි.
348. ඡින්දෙව නො විචිකිච්ඡං බ්රූහි මෙතං පරිනිබ්බුතං වෙදය භූරිපඤ්ඤ, මජ්ඣෙව නො භාස සමන්තචක්ඛු සක්කොව දෙවානං{2} සහස්සනෙත්තො.
349. යෙ කෙචි ගන්ථා ඉධ මොහමග්ගා, අඤ්ඤාණපක්ඛා විචිකිච්ඡට්ඨානා, තථාගතං පත්වා න තෙ භවන්ති චක්ඛුං හි එතං පරමං නරානං.
350. නො චෙ හි ජාතු පුරිසො කිලෙසෙ වාතො යථා අබ්භඝනං විහානෙ, තමො වස්ස නිවුතො සබ්බලොකො න ජොතිමන්තොපි නරා තපෙය්යුං.
351. ධීරා ච පජ්ජොතකරා භවන්ති තං තං අහං ධීර තථෙව මඤ්ඤෙ, විපස්සිනං ඣානමුපාගමම්හ පරිසාසු නො ආවිකරොහි කප්පං.
352. ඛිප්පං ගිරං එරය වග්ගුවග්ගුං හංසොව පග්ගය්හ සනිකං නිකූජං,{3} බින්දුස්සරෙන සුවිකප්පිතෙන සබ්බෙව තෙ උජ්ජුගතා සුණොම.
353. පහීනජාතිමරණං අසෙසං නිග්ගය්හ ධොනං වදෙස්සාමි ධම්මං, න කාමකාරො හි පුථුජ්ජනානං සඞ්ඛෙය්යකාරොව තථාගතානං.
354. සම්පන්නවෙය්යාකරණං තවෙදං සමුජ්ජුපඤ්ඤස්ස සමුග්ගහීතං, අයමඤ්ජලී පච්ඡිමො සුප්පණාමිතො මා මොහයී ජාන’මනොමපඤ්ඤ.
355. පරොවරං අරියධම්මං විදිත්වා මා මොහයී ජාන’මනොමවීර, වාරිං යථා ඝම්මනි ඝම්මතත්තො වාචාභිකඞ්ඛාමි සුතං පවස්ස.{1}
356. යදත්ථිකං බ්රහ්මචරියං අචාරි{2} කප්පායනො කච්චිස්ස තං අමොඝං, නිබ්බායි සො ආදු උපාදිසෙසො යථා විමුත්තො අහු නං සුණොම.
357. අච්ඡෙච්ඡි තණ්හං ඉධ නාමරූපෙ (ඉති භගවා) කණ්හස්ස සොතං දීඝරත්තානුසයිතං, අතාරි ජාතිමරණං අසෙසං ඉච්චබ්රවී භගවා පඤ්චසෙට්ඨො.
358. එස සුත්වා පසීදාමි වචො තෙ ඉසිසත්තම, අමොඝං කිර මෙ පුට්ඨං න මං වඤ්චෙසි බ්රාහ්මණො.