1. 9.
හෙමවතසුත්තං
153. අජ්ජ පණ්ණරසො උපොසථො (ඉති සාතාගිරො යක්ඛො) දිව්යා රත්ති උපට්ඨිතා අනොමනාමං සාත්ථරං හන්දපස්සාම ගොතමං.
154. කච්චි මනො සුපණිහිතො (ඉති හෙමවතො යක්ඛො) සබ්බභූතෙසු තාදිනො, කච්චි ඉට්ඨෙ අනිට්ඨෙ ච සංකප්පස්ස වසීකතා.
155. මනො චස්ස සුපණිහිතො (ඉති සාතාගිරො යක්ඛො) සබ්බභූතෙසු තාදිනො, අථො ඉට්ඨෙ අනිට්ඨෙ ච සඞ්කප්පාස්ස වසීකතා.
156. කච්චි අදින්නං නාදියති (ඉති හෙමවතො යක්ඛො) කච්චි පාණෙසු සඤ්ඤතො, කච්චි ආරා පමාදම්හා කච්චි ඣානං න රිඤ්චති.
157. න සො අදින්නං ආදියති (ඉතී සාතාගිරො යක්ඛො) අථො පාණෙසු සඤ්ඤතො, අථො ආරා පමාදම්හා බුද්ධො ඣානං න රිඤ්චති.
158. කච්චි මුසා න භණති (ඉති හෙමවතො යක්ඛො) කච්චි න ඛිණව්යප්පථො,{1} කච්චි වෙභූතියං නාහ කච්චි සම්ඵං න භාසති.
159. මුසා ච සො න භණති (ඉති සාතාගිරො යක්ඛො) අථො න ඛීණව්යප්පථො{1} අථො වෙභූතියං නාහ මන්තා අත්ථං සො භාසති.
160. කච්චි න රජ්ජති කාමෙසු (ඉති හෙමවතො යක්ඛො) කච්චි චිත්තං අනාවිලං, කච්චි මොහං අතික්කන්තො{2} කච්චි ධම්මෙසු චක්ඛුමා.
161. න සො රජ්ජති කාමෙසු (ඉති සාතාගිරො යක්ඛො) අථො චිත්තං අනාවිලං, සබ්බමොහං අතික්කන්තො බුද්ධො ධම්මෙසු චක්ඛුමා.
162. කච්චි විජ්ජාය සම්පන්නො (ඉති හෙමවතො යක්ඛො) කච්චි සංසුද්ධචාරණො,{1} කච්චිස්ස ආසවා ඛීණා කච්චි නත්ථි පුනබ්භවො.
163. විජ්ජාය චෙව සම්පන්නො (ඉති සාතාගිරො යක්ඛො) අථො සංසුද්ධචාරණො,{1} සබ්බස්ස ආසවා ඛීණා නත්ථි තස්ස පුනබ්භවො.
164. සම්පන්නං මුනිනො චිත්තං කම්මනා ව්යප්පථෙන ච, විජ්ජාචරණසම්පන්නං ධම්මතො නං පසංසසි.{*}
165. සම්පන්නං මුනිනො චිත්තං කම්මනා ව්යප්පථෙන ච, විජ්ජාචරණසම්පන්නං ධම්මතො අනුමොදසි.{*}
166. සම්පන්නං මුනිනො චිත්තං කම්මනා ව්යප්පථෙන ච, විජ්ජාචරණසම්පන්නං හන්ද පස්සාම ගොතමං.{*}
167. එණීජඞ්ඝං කිසං වීරං{2} අප්පාහාරං අලොලුපං, මුනිං වනස්මිං ඣායන්තං එහි පස්සාම ගොතමං.
168. සීහංවෙකචරං නාගං කාමෙසු අනපෙක්ඛිනං, උපසංකම්ම පුච්ඡාම මච්චුපාසා පමොචනං.
169. අක්ඛාතාරං පවත්තාරං සබ්බධම්මාන පාරගුං, බුද්ධං වෙරභයාතීතං මයං පුච්ඡාම ගොතමං.
170. කිස්මිං ලොකො සමුප්පන්නො (ඉති හෙමවතො යක්ඛො) කිස්මිං කුබ්බති සන්ථවං, කිස්ස ලොකො උපාදාය කිස්මිං ලොකො විහඤ්ඤති.
171. ඡස්සු ලොකො සමුප්පන්නො (හෙමවතාති භගවා) ඡස්සු කුබ්බති සන්ථවං, ඡන්නමෙව උපාදාය ඡස්සු ලොකො විහඤ්ඤති.
172. කතමං තං උපාදානං යත්ථ ලොකො විහඤ්ඤති, නීය්යානං පුච්ඡිතො බ්රූහි කථං දුක්ඛා පමුච්චති.
173. පඤ්ච කාමගුණා ලොකෙ මනො ඡට්ඨා පමොදිතා, එත්ථ ඡන්දං විරාජෙත්වා එවං දුක්ඛා පමුච්චති.
174. එතං ලොකස්ස නිය්යානං අක්ඛාතං වො යථා තථං, එතං වො අහමක්ඛාමි එවං දුක්ඛා පමුච්චති.
175. කො සූධ තරතී ඔඝං කො සූධ තරති අණ්ණවං, අප්පතිට්ඨෙ අනාලම්බෙ කො ගම්භීරෙ න සීදති.
176. සබ්බදා සීලසම්පන්නො පඤ්ඤවා සුසමාහිතො, අජ්ඣත්තචින්තී සතිමා ඔඝං තරති දුත්තරං.{1}
177. විරතො කාමසඤ්ඤාය සබ්බසංයොජනාතිගො, නන්දී භව පරික්ඛීණො සො ගම්භීරෙ න සීදති.
178. ගම්භීරපඤ්ඤං නිපුණත්ථදස්සිං අකිඤ්චනං කාමභවෙ අසත්තං, තං පස්සථ සබ්බධි විප්පමුත්තං දිබ්බෙ පථෙ කමමානං මහෙසිං.
179. අනොමනාමං නිපුණත්ථදස්සිං පඤ්ඤාදදං කාමාලයෙ අසත්තං තං පස්සථ සබ්බවිදුං සුමෙධං අරියෙ පථෙ කමමානං මහෙසිං.
180. සුදිට්ඨං වත නො අජ්ජ සුප්පභාතං සුවුට්ඨීතං,{1} යං අද්දසාම සම්බුද්ධං ඔඝතිණ්ණමනාසවං.
181. ඉමෙ දසසතා යක්ඛා ඉද්ධිමන්තො යසස්සිනො, සබ්බෙ තං සරණං යන්ති ත්වං නො සත්ථා අනුත්තරො.
182. තෙ මයං විචරිස්සාම ගාමා ගාමං නගා නගං, නමස්සමානා සම්බුද්ධං ධම්මස්ස ච සුධම්මතන්ති.
හෙමවතසුත්තං නිට්ඨිතං.
1. 10.
ආළවකසුත්තං
එවං මෙ සුතං: එකං සමයං භගවා ආළවියං විහරති ආළවකස්ස යක්ඛස්ස භවනෙ අථ ඛො ආළවකො යක්ඛො යෙන භගවා තෙනුපසඞ්කමි, උපසඞ්කමිත්වා භගවන්තං එතදවොච:
නික්ඛම සමණාති.
සාධාවුසොති භගවා නික්ඛමී,
පවිස සමණාති,
සාධාවුසොති භගවා පාවිසි,
දුතියම්පි ඛො ආළවකො යක්ඛො භගවන්තං එතදවොච. නික්ඛම සමණාති,
සාධාවුසොති භගවා නික්ඛමි,
පවිස සමණාති,
සාධාවුසොති භගවා පාවිසි,
තතියම්පි ඛො ආළවකො යක්ඛො භගවන්තං එතදවොච: නික්ඛම සමණාති,
සාධාවුසොති භගවා නික්ඛමි,
පවිස සමණාති,
සාධාවුසොති භගවා පාවිසි,
චතුත්ථම්පි ඛො ආළවකො යක්ඛො භගවන්තං එතදවොච: නික්ඛම සමණාති,
නඛ්වාහං තං ආවුසො නික්ඛමිස්සාමි යං තෙ කරණීයං තං කරොහීති,
පඤ්හං තං සමණ පුච්ඡිස්සාමි, සචෙ මෙ න ව්යාකරිස්සසි චිත්තං වා තෙ ඛිපිස්සාමි. හදයං වා තෙ ඵාලෙස්සාමි, පාදෙසු වා ගහෙත්වා පාරගඞ්ගාය ඛිපිස්සාමීති,
නඛ්වාහං තං ආවුසො පස්සාමා සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය යො මෙ චිත්තං වා ඛිපෙය්ය හදයං වා ඵාලෙය්ය පාදෙසු වා ගහෙත්වා පාරගඞ්ගාය ඛිපෙය්ය, අපි ච ත්වං ආවුසො පුච්ඡ, යදාකඞ්ඛසීති.
අථ ඛො ආළවකො යක්ඛො භගවන්තං ගාථාය අජ්ඣභාසි:
183. කිංසූධ විත්තං පුරිසස්ස සෙට්ඨං කිංසූ සුචිණ්ණං{1} සුඛමාවහාති, කිංසූ හවෙ සාදුතරං{2} රසානං කථං ජීවිං ජීවිතමාහු සෙට්ඨං.
184. සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති සච්චං භවෙ සාදුතරං රසානං පඤ්ඤාජීවිං ජීවිතමාහු{3} සෙට්ඨං.
185. කථං සු තරති ඔඝං කථං සු තරති අණ්ණවං, කථං සු දුක්ඛං අච්චෙති කථං සු පරිසුජ්ඣති.
186. සද්ධාය තරතී ඔඝං අප්පමාදෙන අණ්ණවං, විරියෙන දුක්ඛමච්චෙති{1} පඤ්ඤාය පරිසුජ්ඣති.
187. කථං සු ලභතෙ පඤ්ඤං කථ සු වින්දතෙ ධනං, කථං සු කිත්තිං පප්පොති කථං මිත්තානි ගන්ථති. අස්මා ලොකා පරං ලොකං කථං පෙච්ච න සොචති.
188. සද්දාහානො අරහතං ධම්මං නිබ්බානපත්තියා, සුස්සූසා ලභතෙ පඤ්ඤං අප්පමත්තො විචක්ඛණො.
189. පතිරූපකාරී ධුරවා උට්ඨාතා වින්දතෙ ධනං, සච්චෙන කිත්තිං පප්පොති දදං මිත්තානි ගන්ථති.
190. යස්සෙතෙ චතුරො ධම්මා සද්ධස්ස ඝරමෙසිනො, සච්චං ධම්මො ධිතී චාගො ස වෙ පෙච්ච න සොචති.
191. ඉඞ්ඝ අඤ්ඤෙපි පුච්ඡස්සු පුථු සමණබ්රාහ්මණෙ, යදි සච්චා දමා චාගා ඛන්ත්යා භීනෙයා විජ්ජති.
192. කථං නු දානි පුච්ඡෙය්යං පුථු සමණබ්රාහ්මණෙ, සො හං අජ්ජ පජානාමි යො චත්ථො සම්පරායිකො.
193. අත්ථාය වත මෙ බුද්ධො වාසායා’ ළවිමාගමී, සො හං අජ්ජ පජානාමි යත්ථ දින්නං මහප්ඵලං.
194. සො අහං විවරිස්සාමි ගාමා ගාමං පුරාපුරං, නමස්සමානො සම්බුද්ධං ධම්මස්ස ච සුධම්මතන්ති.
එවං වුත්තෙ ආළවකො යක්ඛො භගවන්තං එතදවොච. අභික්කන්තං භො ගොතම, අභික්කන්තං භො ගොතම, සෙය්යථාපි භො ගොතම නික්කුජ්ජිතං වා උක්කුජ්ජෙය්ය පචිච්ඡන්නං වා විවරෙය්ය මූළ්හස්ස වා මග්ගා ආචික්ඛෙය්ය අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්තීති, එවමෙවං භොතා ගොතමෙන අනෙකපරියායෙන ධම්මො පකාසිතො, එසාහං භගවන්තං ගොතමං සරණං ගච්ඡාමි, ධම්මඤ්ච භික්ඛුසඞ්ඝඤ්ච. උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
ආළවකසුත්තං නිට්ඨිතං.
1. 11.
විජයසුත්තං
195. චරං වා යදි වා තිට්ඨං නිසින්නො උද වා සයං, සම්මිඤ්ජෙති පසාරෙති එසා කායස්ස ඉඤ්ජනා.
196. අට්ඨි නහාරු සංයුත්තො තචමංසාවලෙපනො, ඡවියා කායො පටිච්ඡන්නො යථාභූතං න දිස්සති.
197. අන්තපූරොදරපූරො යකපෙළස්ස වත්ථිනො, හදයස්ස පප්ඵාසස්ස වක්කස්ස පිහකස්ස ච.
198. සිඞ්ඝාණිකාය ඛෙළස්ස සෙදස්ස මෙදස්ස ච, ලොහිතස්ස ලසිකාය පිත්තස්ස ච වසාය ච.
199. අථස්ස නවහි සොතෙහි අසුචි සවති සබ්බදා, අක්ඛිම්භා අක්ඛිගූථකො කණ්ණම්හා කණ්ණගූථකො.
200. සිඞ්ඝාණිකා ච නාසාතො මුඛෙන චමතෙ’කදා, පිත්තං සෙම්හඤ්ච වමති කායම්හා සෙදජල්ලිකා.
201. අථස්ස සුසිරං සීසං මත්ථජුඞ්ගස්ස පූරිතං, සුභතො නං මඤ්ඤතී බාලො අවිජ්ජාය පුරක්ඛතො.
202. යදාච සො මතො සෙති උද්ධුමාතො විනීලකො, අපවිද්ධො සුසානස්මිං අනපෙක්ඛා හොන්ති ඤාතයො.
203. ඛාදන්ති නං සුවාණා ච සිගාලා ච වකා කිමී, කාකා ගිජ්ඣා ච ඛාදන්ති යෙ චඤ්ඤෙ සන්ති පාණිනො.
204. සුත්වාන බුද්ධවචනං භික්ඛු පඤ්ඤාණවා ඉධ, සො ඛො නං පරිජානාති යථාභූතං හි පස්සති.
205. යථා ඉදං තථා එතං යථා එතං තථා ඉදං, අජ්ඣත්තඤ්ච බහිද්ධා ච කායෙ ඡන්දං විරාජයෙ.
206. ඡන්දාරාගවිරත්තො සො භික්ඛු පඤ්ඤාණවා ඉධ, අජ්ඣගා අමතං සන්තිං නිබ්බාන{1}පද මච්චුතං.
207. දිපාදකො යං අසුචි දුග්ගන්ධො පරිහීරති,{2} නානා කුණප පරිපූරො විස්සවන්නො තතො තතො.
208. එතාදිසෙන කායෙන යො මඤ්ඤෙ උණ්ණමෙතවෙ, පරං වා අවජානෙය්ය කිමඤ්ඤත්ර අදස්සනාති.
විජයසුත්තං නිට්ඨිතං.
1. 12.
මුනි සුත්තං
209. සන්ථවාතො භයං ජාතං නිකෙතා ජායතෙ රජො, අනිකෙතමසන්ථවං එතං වෙ මුනිදස්සනං.
210. යො ජාතමුච්ඡිජ්ජ න රොපයෙය්ය ජායන්තමස්ස නානුප්පවෙච්ඡෙ, තමාහු එකං මුනිනං චරන්තං අද්දක්ඛි සො සන්තිපදං මහෙසී.
211. සඞ්ඛාය වත්ථූනි පහාය බීජං සිනෙහ මස්ස නානුප්පවෙච්ඡෙ, ස චෙ මුනි ජාතිඛයන්තදස්සී තක්කං පහාය න උපෙති සඞ්ඛං.
212. අඤ්ඤාය සබ්බානි නිවෙසනානි අනිකාමයං අඤ්ඤතරම්පිතෙසං, ස වෙ මුනී වීතගෙධො අගිද්ධො නායූහතී පාරගතො හි හොති.
213. සබ්බාභිභූං සබ්බවිදුං සුමෙධං සබ්බෙසු ධම්මෙසු අනූපලිත්තං, සබ්බඤ්ජහං තණ්හක්ඛයෙ විමුත්තං තං වාපි ධීරා මුනිං{1} වෙදයන්ති.
214. පඤ්ඤාබලං සීලවතූපපන්නං සමාහිතං ඣානරතං සතිමං, සඞ්ගාපමුත්තං අඛිලං අනාසවං තං වාපි ධීරා මුනිං{1} වෙදයන්ති.
215. එකං චරන්තං මුනිං අප්පමත්තං නින්දාපසංසාසු අවෙධමානං, සීහංව සද්දෙසු අසන්තසන්තං වාතංව ජාලම්හි අසජ්ජමානං, පදුමං ව තොයෙන අලිප්පමානං නෙතාරමඤ්ඤෙසමනඤ්ඤ නෙය්යං තං වාපි ධීරා මුනිං{1} වෙදයන්ති.
216. යො ගාහණෙ ථම්භොරිවාභිජායතී යස්මිං පරෙ වාචාපරියන්තං වදන්ති, තං වීතරාගං සුසමාහිතින්ද්රියං තං වාපි ධීරා මුනිං{1} වෙදයන්ති. {2}
217. යො වෙ ඨිතත්තො තසරංව උජ්ජුං ජිගුච්ඡති කම්මෙහි පාපකෙහි, වීමංසමානො විසමං සමඤ්ච තං වාපි ධීරා මුනිං වෙදයන්ති.
218. යො සඤ්ඤතත්තො න කරොති පාපං දහරො ච මජ්ඣිමො ච{1} මුනී යතත්තො, අරොසනෙය්යො සො න රොසෙති කඤ්චි තං වාපි ධීරා මුනිං වෙදයන්ති.
219. යදග්ගතො මජ්ඣතො සෙසතො වා පිණ්ඩං ලභෙථ පරදත්තූපජීවි, නාලං ථුතුං නොපි නිපච්චවාදී තං වාපි ධීරා මුනිං වෙදයන්ති:
220. මුනිං චරන්තං විරතං මෙථුනස්මා යො යොබ්බනෙන උපනිබජ්ඣතෙ ක්වචි, මදප්පමාදා විරතං විප්පමුත්තං තං වාපි ධීරා මුනිං වෙදයන්ති.
221. අඤ්ඤාය ලොකං පරමත්ථදස්සිං ඔඝං සමුද්දං අතිතරිය තාදිං, තං ඡින්නගන්ථං අසිතං අනාසවං තං වාපි ධීරා මුනිං වෙදයන්ති.
222. අස්මා චුභො දූරවිහාරවුත්තිනො ගිහී දාරපොසී අමමො ච සුබ්බතො, පරපාණරොධාය ගිහී අසඤ්ඤතො නිච්චං මුනී රක්ඛති පාණිනො යතො.