අථ ඛො කසීභාරද්වාජො බ්රාහ්මණො මහතියා කංසපාතියා පායාසං වඩ්ඪෙත්වා භගවතො උපනාමෙසි, භුඤ්ජතු භවං ගොතමො පායාසං කස්සකො භවං යං හි භවං ගොතමො අමතඵලං කසිං කසතීති.
81. ගාථාභිගීතං මෙ අභොජනෙය්යං සම්පස්සතං බ්රාහ්මණ නෙසධම්මො ගාථාභිගීතං පනුදන්ති බුද්ධා ධම්මෙ සතී බ්රාහ්මණ වුත්තිරෙසා.
82. අඤ්ඤෙන ච කෙවලිනං මහෙසිං ඛීණාසවං කුක්කුච්ච වූපසන්තං, අන්නෙන පානෙන උපට්ඨහස්සු ඛෙත්තං හි තං පුඤ්ඤපෙඛස්ස හොතීති.
අථ කස්ස චාහං භො ගොතම ඉමං පායාසං දම්මීති,
න ඛ්වාහං තං බ්රාහ්මණ පස්සාමි සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය යස්ස සො පායාසො භුත්තො සම්මා පරිණාමං ගච්ඡෙය්ය අඤ්ඤත්ර තථාගතස්ස වා තථාගතසාවකස්ස වා, තෙන හි ත්වං බ්රාහ්මමණ තං පායාසං අප්පහරිතෙ වා ඡඩ්ඩෙහි, අප්පාණකෙ වා උදකෙ ඔපිලාපෙහීති,
අථ ඛො කසීභාරද්වාජො බ්රාහ්මණො තං පායාසං අප්පාණකෙ උදකෙ ඔපිලාපෙසි. අථ ඛො සො පායාසො උදකෙ පක්ඛිත්තො චිච්චිටායති චිටිචිටායති සන්ධූපායති සම්පධූපායති, සෙය්යථාපි නාම ඵාලො දිවසසන්තත්තො උදකෙ පක්ඛිත්තො චිච්චිටායති චිටිචිටායති සන්ධූපායතී සම්පධූපායති, එවමෙව සො පායාසො උදකෙ පක්ඛිත්තො චිච්චිටායති චිටිචිටායති සන්ධූපායති සම්පධූපායති,
අථ ඛො කසීභාරද්වාජො බ්රාහ්මණො සංවිග්ගො ලොමහට්ඨජාතො යෙන භගවා තෙනුපසඞ්කමි උපසඞ්කමිත්වා භගවතො පාදෙසු සිරසා නිපතිත්වා භගවන්තං එතදවොච:
අභික්කන්තං භො ගොතම අභික්කන්තං භො ගොතම සෙය්යථාපි භො ගොතම නික්කුජ්ජිතං වා උක්කුජ්ජෙය්ය පටිච්ඡන්නං වා විවරෙය්ය මූළ්හස්ස වා මග්ගං ආචික්ඛෙය්ය අන්ධකාරෙ වා තෙලපජ්ජාතං ධාරෙය්ය චක්ඛුමන්තො රූපානි දක්ඛින්තීති, එවමෙවං භොතා ගොතමෙන අනෙකපරියායෙන ධම්මො පකාසිතො එසාහං භවන්තං ගොතමං සරණං ගච්ඡාමි ධම්මඤ්ච භික්ඛුසඞ්ඝඤ්ච, ලභෙය්යාහං භොතො ගොතමස්ස සන්තිකෙ පබ්බජ්ජං, ලභෙය්යං උපසම්පදන්ති.
අලත්ථ ඛො කසීභාරද්වාජො බ්රාහ්මණො භගවතො සන්තිකෙ පබ්බජ්ජං අලත්ථ උපසම්පදං, අචිරූපසම්පන්නො ඛො පනායස්මා භාරද්වාජො එකො වූපකට්ඨෙ අප්පමත්තො ආතාපී පහිතත්තො විහරන්තො න චිරස්සෙ ව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති.
තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ඛීණා ජාති වුසිතං බ්රහ්මචරියං කතං කරණීයං නාපරං ඉත්ථත්තායාති අබ්භඤ්ඤාසි අඤ්ඤතරොච ඛො පනායස්මා භාරද්වාජො අරහතං අහොසීති.
කසීභාරද්වාජසුත්තං නිට්ඨිතං.
1. 5.
චුන්දසුත්තං
83. පුච්ඡාමි මුනිං පහූතපඤ්ඤං (ඉති චුන්දො කම්මාරපුත්තො) බුද්ධං ධම්මස්සාමිං වීතතණ්හං දීපදුත්තමං සාරථිනං පවරං කති ලොකෙ සමණා තදිඞ්ඝ බ්රූහි.
84. චතුරො සමණා න පඤ්චමත්ථි (චුන්දාති භගවා) තෙ තෙ ආවිකරොමි සක්ඛිපුට්ඨො මග්ගජිනො මග්ගදෙසකො ච මග්ගෙ ජීවති යො ච{1} මග්ගදූසි.
85. කං මග්ගජිනං වදන්ති බුද්ධා (ඉති චුන්දො කම්මාරපුත්තො) මග්ගක්ඛායී කථං අතුල්යො හොති, මග්ගෙ ජීවති මෙ බ්රූහි පුට්ඨො අථ මෙ ආවිකරොහි මග්ගදූසිං.
86. යො තිණ්ණකථං කථො විසල්ලො නිබ්බානාභිරතො අනානුගිද්ධො, ලොකස්ස සදෙවකස්ස නෙතා තාදිං මග්ගජිනං වදන්ති බුද්ධා.
87. පරමං පරමන්ති යොධ ඤත්වා අක්ඛාති විභජති ඉධෙව ධම්මං, තං කඞ්ඛච්ඡිදං මුනිං අනෙජං දුතියං භික්ඛූනමාහු මග්ගදෙසිං.
88. යො ධම්මපදෙ සුදෙසිතෙ මග්ගෙ ජීවති සඤ්ඤතො සතීමා, අනවජ්ජපදානි සෙවමානො තතියං භික්ඛුනමාහු මග්ගජීවිං.
89. ඡදනං කත්වාන සුබ්බතානං පක්ඛන්දි කුලදූසකො පගබ්භො, මායාවී අසඤ්ඤතො පලාපො පතිරූපෙන චරං ස මග්ගදූසී.
90. එතෙ ච පටිවිජ්ඣ යො ගහට්ඨො සුතවා අරියසාවකො සපඤ්ඤො සබ්බෙ තෙ තාදිසාති ඤත්වා ඉති දිස්වා න හාපෙති තස්ස සද්ධා කථං හි දුට්ඨෙන අසම්පදුට්ඨං සුද්ධං අසුද්ධෙන සමං කරෙය්යාති.
චුන්දසුත්තං නිට්ඨිතං.
1. 6.
පරාභවසුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
91. පරාභවන්තං පුරිසං මයං පුච්ඡාම ගොතමං, භගවන්තං පුට්ඨුමාගම්ම කිං පරාභවතො මුඛං.
92. සුවිජානො භවං හොති සුවිජානො පරාභවො, ධම්මකාමො භවං හොති ධම්මදෙස්සී පරාභවො.
93. ඉති හෙතං විජානාම පඨමො සො පරාභවො, දුතියං භගවා බ්රූහි කිං පරාභවතො මුඛං.
94. අසන්තස්ස පිසා හොන්තී සන්තෙ න කුරුතෙ පියං, අසතං ධම්මං රොචෙති තං පරාභවතො මුඛං.
95. ඉති හෙතං විජානාම දුතියො සො පරාභවො, තතියං භගවා බ්රූහි කිං පරාභවතො මුඛං.
96. නිද්දාසීලී සභාසීලී අනුට්ඨාතා ච යො නරො, අලසො කොධපඤ්ඤාණො තං පරාභවතො මුඛං.
97. ඉති හෙතං විජානාම තතියො සො පරාභවො, චතුත්ථං භගවා බ්රූහි කිං පරාභවතො මුඛං.
98. යො මාතරං වා පිතරං වා ජිණ්ණකං ගතයොබ්බනං, පහූ සන්තො න භරති තං පරාභවතො මුඛං.
99. ඉති හෙතං විජානාම චතුත්ථො සො පරාභවො, පඤ්චමං භගවා බ්රූහි කිං පරාභවතො මුඛං.
100. යො බ්රාහ්මණං වා සමණං වා අඤ්ඤං වාපි වණිබ්බකං, මුසාවාදෙන වඤ්චෙති තං පරාභවතො මුඛං,
101. ඉති හෙතං විජානාම පඤ්චමො සො පරාභවො, ඡට්ඨමං භගවා බ්රූහී කිං පරාභවතො මුඛං.
102. පහූතවිත්තො පුරිසො සහිරඤ්ඤො සහොජනො, එකො භුඤ්ජති සාදූනි තං පරාභවතො මුඛං.
103. ඉති හෙතං විජානාම ඡට්ඨමො සො පරාභවො, සත්තමං භගවා බ්රූහී කිං පරාභවතො මුඛං.
104. ජාතිත්ථද්ධො ධනත්ථද්ධො ගොත්තත්ථද්ධො ච යො නරො, සඤ්ඤාතිං අතිමඤ්ඤෙති තං පරාභවතො මුඛං.
105. ඉති හෙතං විජානාම සත්තමො සො පරාභවො, අට්ඨමං භගවා බ්රූහි කිං පරාභවතො මුඛං.
106. ඉත්ථිධුත්තො සුරාධුත්තො අක්ඛධුත්තො ච යො නරො, ලද්ධං ලද්ධං විනාසෙති තං පරාභවතො මුඛං.
107. ඉති හෙතං විජානාම අට්ඨමො සො පරාභවො, නවමං භගවා බ්රූහි කිං පරාභවතො මුඛං.
108. සෙහි දාරෙහසන්තුට්ඨො වෙසියාසු පදිස්සති, දිස්සති පරදාරෙසු තං පරාභවතො මුඛං.
109. ඉති හෙතං විජානාම නවමො සො පරාභවො, දසමං භගවා බ්රූහි කිං පරාභවතො මුඛං.
110. අතීතයොබ්බනො පොසො ආනෙති තිම්බරුත්ථනිං, තස්සා ඉස්සා න සුපති තං පරාභවතො මුඛං.
111. ඉති හෙතං විජානාම දසමො සො පරාභවො, එකාදසමං භගවා බ්රූහි කිං පරාභවතො මුඛං.
112. ඉත්ථිසොණ්ඩිං විකිරණිං පුරිසං වාපි තාදිසං, ඉස්සරීයස්මීං ඨාපෙති තං පරාභවතො මුඛං.
113. ඉති හෙතං විජානාම එකාදසමො සො පරාභවො, ද්වාදසමං භගවා බ්රූහි කිං පරාභවතො මුඛං.
114. අප්පභොගො මහාතණ්හො ඛත්තියෙ ජායතෙ කුලෙ, සොධ රජ්ජං පත්ථයති තං පරාභවතො මුඛං.
115. එතෙ පරාභවෙ ලොකෙ පණ්ඩිතො සමවෙක්ඛිය, අරියො දස්සනසම්පන්නො ස ලොකං භජතෙ සිවන්ති.
පරාභව සුත්තං නිට්ඨිතා.
1. 7.
වසල සුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ, අථ ඛො භගවා පුබ්බන්හ සමයං නිවාසෙත්වා පත්තචීවරං ආදාය සාවත්ථියං පිණ්ඩාය පාවිසි. තෙන ඛො පන සමයෙන අග්ගික භාරද්වාජස්ස බ්රාහ්මණස්ස නිවෙසනෙ අග්ගි පජ්ජලිතො භොති ආහුති පග්ගහිතා. අථ ඛො භගවා සාවත්ථියං සපදානං පිණ්ඩායචරමානො යෙන අග්ගිකභාරද්වාජස්ස බ්රාහ්මණස්ස නිවෙසනං තෙනුපසඞ්කමි. අද්දසා ඛො අග්ගිකභාරද්වාජො බ්රාහ්මණො භගවන්තං දූරතො’ව ආගච්ඡන්තං. දිස්වාන භගවන්තං එතදවොච: තත්රෙව මුණ්ඩක තත්රෙව සමණක තත්රෙව වසලක: තිට්ඨාහීති.
එවං වුත්තෙ භගවා අග්ගිකභාරද්වාජං බ්රාහ්මණං එතදවොච: ජානාසි පනාත්වං බ්රාහ්මණ වසලං වා වසලකරණෙ වා ධම්මෙති,
නඛ්වාහං භො ගොතම ජානාමි වසලං වා වසලකරණෙ වා ධම්මෙ. සාධු මෙ භවං ගොතමො තථා ධම්මං දෙසෙතු යථාහං ජානෙය්යං වසලං වා වසලකරණෙ වා ධම්මෙති.
තෙන හි බ්රාහ්මණ සුණාහි සාධුකං මනසි කරොහි භාසිස්සාමීති. එවං හොති ඛො අග්ගිකභාරද්වාජො බ්රාහ්මණො භගවතො පච්චස්සොසී, භගවා එතදවොච:
116. කොධනො උපනාහී ච පාපමක්ඛී ච යො නරො, විපන්නදිට්ඨි මායාවී තං ජඤ්ඤා වසලො ඉති.
117. එකජං ව ද්වීජං වාපි යොධ පාණානි හිංසති, යස්ස පාණෙ දයා නත්ථි තං ජඤ්ඤා වසලො ඉති.
118. යො හන්ති පරිරුන්ධති ගාමානි නිගමානි ච, නිග්ගාහකො සමඤ්ඤාතො තං ජඤ්ඤා වසලො ඉති.
119. ගාමෙ වා යදි වා රඤ්ඤෙ යං පරෙසං මමායිතං, ථෙය්යා ආදින්නං ආදියති තං ජඤ්ඤා වසලො ඉති.
120. යො හවෙ ඉණමාදාය චුජ්ජමානො පලායති, න හි තෙ ඉණමත්ථිති තං ජඤ්ඤා වසලො ඉති.
121. යො චෙ කිඤ්චික්ඛකම්යතා පන්ථස්මිං වජතං ජනං, හන්ත්වා කිඤ්චීක්ඛමාදෙති තං ජඤ්ඤා වසලො ඉති.
122. යො අත්තහෙතු පරහෙතු ධනභෙතූ ච යො නරො, සක්ඛිපුට්ඨො මුසා බ්රූති තං ජඤ්ඤා වසලො ඉති.
123. යො ඤාතිනං සඛානං වා දාරෙසු පතිදිස්සති, සහසා සම්පියෙන වා තං ජඤ්ඤා වසලො ඉති.
124. යො මාතරං වා පිතරං වා ජිණ්ණකං ගතයොබ්බනං, පහූ සන්තො න භරති තං ජඤ්ඤා වසලො ඉති.
125. යො මාතරං වා පිතරං වා භාතරං භගිනිං සසුං, හන්ති රොසෙති වාචාය තං ජඤ්ඤා වසලො ඉති.
126. යො අත්ථං පුච්ඡිතො සන්තො අනත්ථමනුසාසති, පටිච්ඡන්නෙන මන්තෙති තං ජඤ්ඤා වසලො ඉති.
127. යො කත්වා පාපකං කම්මං මා මං ජඤ්ඤාති ඉච්ඡති, යො පටිච්ඡන්නකම්මන්තො තං ජඤ්ඤා වසලො ඉති.
128. යො වෙ පරකුලං ගන්ත්වා භුත්වාන සුචිභොජනං, ආගතං න පටිපූජෙති තං ජඤ්ඤා වසලො ඉති.
129. යො බ්රාහ්මණං වා සමණං වා අඤ්ඤං වාපි වණිබ්බකං, මුසාවාදෙන වඤ්චෙති තං ජඤ්ඤා වසලො ඉති.
130. යො බ්රාහ්මණං වා සමණං වා භත්තකාලෙ උපට්ඨිතෙ, රොසෙති වාචා න ච දෙති තං ජඤ්ඤා වසලො ඉති.
131. අසතං යොධ පබ්රූති මොහෙන පළිගුණ්ඨිතො, කිඤ්චික්ඛං නිජිගිංසානො තං ජඤ්ඤා වසලො ඉති.
132. යො චත්තානං සමුක්කංසෙ පරඤ්ච මවජානති, නිහීනො සෙන මානෙන තං ජඤ්ඤා වසලො ඉති.
133. රොසකො කදරියො ච පාපිච්ඡො මච්ඡරී සඨො, අහිරිකො අනොත්තාපී තං ජඤ්ඤා වසලො ඉති.
134. යො බුද්ධං පරිභාසති අථ වා තස්ස සාවකං, පරිබ්බාජං ගහට්ඨං වා තං ජඤ්ඤා වසලො ඉති.
135. යො චෙ අනරහා සන්තො අරහං පටිජානාති, චොරො සබ්රහ්මකෙ ලොකෙ එස ඛො වසලාධමො, එතෙ ඛො වසලා වුත්ථා මයා චො යෙ පකාසිතා.
136. න ජච්චා වසලො හොති න ජච්චා හොති බ්රාහ්මණො, කම්මනා වසලො හොති කම්මනා හොති බ්රාහ්මණො.
137. තදමිනාපි ජානාථ යථා මෙදං නිදස්සනං, චණ්ඩාලපුත්තො සොපාකො මාතඞ්ගො ඉති විස්සුතො.
138. සො යසං පරමං පත්තො මාතඞ්ගො යං සුදුල්ලභං, ආගඤ්ඡුං තස්සුපට්ඨානං ඛත්තියා බ්රාහ්මණා බහූ.
139. සො දෙවයානමාරුය්හ විරජං සො මහාපථං, කාමරාගං විරාජෙත්වා බ්රහ්මලොකූපගො අහූ.
140. න නං ජාති නිවාරෙසි බ්රහ්මලොකූපපත්තියා, අජ්ඣායකකුලෙ ජාතා බ්රාහ්මණා මත්තබන්ධූනො.
141. තෙ ව පාපෙසු කම්මෙසු අභිණ්හමුපදිස්සරෙ, අට්ඨෙව ධම්මෙ ගාරය්හා සම්පරායෙ ච දුග්ගතිං, න තෙ ජාති නිවාරෙති දුග්ගච්චා ගරහාය වා.
142. න ජච්චා වසලො හොති න ජච්චා හොති බ්රාහ්මණො, කම්මනා වසලො හොති කම්මනා හොති බ්රාහ්මණො.
එවං වුත්තෙ අග්ගිකභාරද්වාජො බ්රාහ්මණො භගවන්තං එතදවොච:
අභික්කන්තං භො ගොතම, අභික්කන්තං භො ගොතම, සෙය්යථාපි භො ගොතම නික්කුජ්ජිතං වා උක්කුජ්ජෙය්ය පටිච්ඡන්නං වා විවරෙය්ය මූළ්හස්ස වා මග්ගං ආචික්ඛෙය්ය අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්තීති, එවමෙව භොතා ගොතමෙන අනෙකපරියායෙන ධම්මො පකාසිතො. එසාහං භවන්තං ගොතමං සරණං ගච්ඡාමි, ධම්මඤ්ච භික්ඛුසඞ්ඝඤ්ච. උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
වසලසුත්තං නිට්ඨිතං.
1. 8.
මෙත්තසුත්තං
143. කරණීයමත්ථකුසලෙන යං තං සන්තං පදං අභිසමෙච්ච සක්කො උජූ ච සූජූ ච සුවචො චස්ස මුදු අනතිමානී.
144. සන්තුස්සකො ච සුභරො ච අප්පකිච්චො ච සල්ලහුකවුත්ති, සන්තින්ද්රියො ච නිපකො ච අප්පගබ්භො කුලෙසු අනනුගිද්ධො.
145. න ච ඛුද්දං සමාචරෙ කිඤ්චි යෙන විඤ්ඤූ පරෙ උපවදෙය්යුං, සුඛිනො වා ඛෙමිනො හොන්තු සබ්බෙ සත්තා භවන්තු සුඛිතත්තා
146. යෙ කෙචි පාණභූතත්ථි තසා වා ථාවරා වා අනවසෙසා, දීඝා වා යෙ මහන්තා වා මජ්ඣිමා රස්සකාණුකථූලා.
147. දිට්ඨා වා යෙ ව අද්දිට්ඨා යෙ ච දූරෙ වසන්ති අවිදූරෙ භූතා වා සම්භවෙසී වා සබ්බෙ සත්තා භවන්තු සුඛිතත්තා
148. න පරො පරං නිකුබ්බෙථ නාතිමඤ්ඤෙථ කත්ථචි නං කඤ්චි බ්යාරොසනා පටිඝසඤ්ඤා නාඤ්ඤමඤ්ඤස්ස දුක්ඛමිච්ඡෙය්ය
149. මාතා යථා නියං පුත්තං ආයුසා එකපුත්තමනුරක්ඛෙ, එවම්පි සබ්බභූතෙසු මානසං භාවයෙ අපරිමාණං
150. මෙත්තං ච සබ්බලොකස්මිං මානසං භාවයෙ අපරිමාණං, උද්ධං අධො ච තිරියඤ්ච අසම්බාධං අවෙරං අසපත්තං
151. තිට්ඨං චරං නිසින්නො වා සයානො වා යාව තස්ස විගතමිද්ධො එතං සතිං අධිට්ඨෙය්ය බ්රහ්මමෙතං විහාරං ඉධමාහු,
152. දිට්ඨිඤ්ච අනුපගම්ම සීලවා දස්සනෙන සම්පන්නො, කාමෙසු විනෙය්ය ගෙධං න හි ජාතු ගබ්භසෙය්යං පුනරෙතීති.
මෙත්තසුත්තං නිට්ඨිතං.