1116. අජ්ඣත්තඤ්ච බහිද්ධා ච වෙදනං නාභිනන්දිතො, එවං සතස්ස චරතො විඤ්ඤාණං උපරුජ්ඣතීති.
උදයසුත්තං තෙරසමං{1}.
5. 14.
පොසාලසුත්තං{2}
1117. යො අතීතං ආදියති (ඉච්චායස්මා පොසාලො) අනෙජො ඡින්නසංසයො, පාරගුං සබ්බධම්මානං අත්ථිපඤ්හෙන ආගමං.
1118. විභූතරූපසඤ්ඤිස්ස සබ්බකායප්පහායිනො අජ්ඣත්තඤ්ච බහිද්ධා ච නත්ථි කිඤ්චීති පස්සතො, ඤාණං සක්කානු පුච්ඡාමි කථං නෙය්යො තථා විධො.
1119. විඤ්ඤාණට්ඨිතියො සබ්බා (පොසො ලාති භගවා) අභිජානං තථාගතො තිට්ඨන්තමෙනං ජානාති විමුත්තං තප්පරායණං.
1120. ආකිඤ්චඤ්ඤා සම්භවං ඤත්වා නන්දි සංයොජනං ඉති, එවමෙතං අභිඤ්ඤාය තතො තත්ථ විපස්සති: එතං ඤාණං තථං තස්ස බ්රාහ්මණස්ස වුසීමතොති.
පොසාලසුත්තං චුද්දසමං{3}.
5. 15.
මොඝරාජසුත්තං
1121. ද්වාහං සක්කං අපුච්ඡිස්සං (ඉච්චා යස්මි මොඝරාජා){1} න මෙ ව්යාකාසි චක්ඛුමා, යාව තතියඤ්ච දෙවීසි ව්යාකරොතීති මෙ සුතං.
1122. අයං ලොකො පරො ලොකො බ්රහ්මලොකො සදෙවකො, දිට්ඨිං තෙ නාභිජානාති ගොතමස්ස යසස්සිනො.
1123. එතං අභික්කන්තදස්සාවිං අත්ථි පඤ්හෙන ආගමං, කථං ලොකං අවෙක්ඛන්තං මච්චුරාජා න පස්සති.
1124. සුඤ්ඤතො ලොකං අවෙක්ඛස්සු මොඝරාජ සදා සතො, අත්තානුදිට්ඨිං ඌහච්ච එවං මච්චුතරො සියා: එවං ලොකං අවෙක්ඛ’න්තං මච්චුරාජා න පස්සතීති.
මොඝරාජසුත්තං පණ්ණරසමං{2}.
5. 16.
පිඞ්ගියසුත්තං
1125. ජිණ්ණො හමස්මි අබලො වීතවණ්ණො (ඉච්චා යස්මා පිඞ්ගියො){3} නෙත්තා න සුද්ධා සවනං න ඵාසු, මාහං නස්සං මොමුහො අන්තරාව ආචික්ඛ ධම්මං යමහං විජඤ්ඤං ජාතිජරාය ඉධ විප්පහානං.
1126. දිස්වාන රූපෙසු විහඤ්ඤමානෙ (පිඞ්ගියාති භගවා) රුප්පන්ති රූපෙසු ජනා පමත්තා, තස්මා තුවං පිඞ්ගිය අප්පමත්තො ජහස්සු රූපං අපුනබ්භවාය.
1127. දිසා චතස්සො විදිසා චතස්සො උද්ධං අධො දසදිසා ඉමායො න තුය්හං අදිට්ඨං අසුතං’ මුතං වා, අථො අවිඤ්ඤාණං කිඤ්චි න මත්ථි ලොකෙ ආචික්ඛ ධම්මං යමහං විජඤ්ඤං ජාති ජරාය ඉධ විප්පහානං.
1128. තණ්හාධිපන්නෙ මනුජෙ පෙක්ඛමානො (පිඞ්ගියාති භගවා) සන්තා පජා තෙ ජරසා පරෙතෙ, තස්මා තුවං පිඞ්ගිය අප්පමත්තො ජහස්සු තණ්හං අපුනබ්භවායාති.
පිඞ්ගියසුත්තං සොළසමං{1}.
ඉදමවොච භගවා මගධෙසු විහරන්තො පාසාණකෙ චෙතියෙ පරිචාරිකසොළසානං බ්රාහ්මණානං අජ්ඣිට්ඨො පුට්ඨො පුට්ඨො පඤ්හෙ ව්යාකාසි, එකමෙකස්ස චෙපි පඤ්හස්ස අත්ථමඤ්ඤාය ධම්මමඤ්ඤාය ධම්මානුධම්මං පටිපජ්ජෙය්ය ගච්ඡෙය්යෙව ජරා මරණස්සපාරං පාරඞ්ගමනියා ඉමෙ ධම්මාති. තස්මා ඉමස්ස ධම්මපරියායස්ස පාරායනන්තෙව{2} අධි වචනං:
1129. අජිතො තිස්ස මෙත්තෙය්යො පුණ්ණකො අථ මෙත්තගූ, ධොතකො උපසීවො ච නන්දො ච අථ හෙමකො.
1130. තොදෙය්යකප්පා දුභයො ජතුකණ්ණී ච පණ්ඩිතො, භද්රාවුධො උදයො ච පොසාලො චාපි බ්රාහ්මණො, මොඝරාජා ච මෙඛාවි පිඞ්ගියොව මහාඉසී.
1131. එතෙ බුද්ධං උපාගච්ඡුං සම්පන්න චරණං ඉසිං පුච්ඡන්තා නිපුණෙ පඤ්හෙ බුද්ධසෙට්ඨං උපාගමුං.
1132. තෙසං බුද්ධො ව්යාකාසි පඤ්හෙ පුට්ඨො යථාතථං, පඤ්හානං වෙය්යාකරණෙන තොසෙසි බ්රාහ්මණෙ මුනී,
1133. තෙ තොසිතා චක්ඛුමතා බුද්ධෙනාදිච්චබන්ධුනා, බ්රහ්මචරියමචරිංසු වරපඤ්ඤස්ස සන්තිකෙ.
1134. එකමෙකස්ස පඤ්හස්ස යථා බුද්ධෙන දෙසිතං, තථා යො පටිපජ්ජෙය්ය ගච්ඡෙ පාරං අපාරතො.
1135. අපාරා පරං ගච්ඡෙය්ය භාවෙන්තො මග්ගමුත්තමං, මග්ගො සො පාරං ගමනාය තස්මා පරායනං ඉති.
පාරායනානුගීතිගාථා
1136. පාරායනමනුගායිස්සං (ඉච්චා යස්මා පිඞ්ගියො) යථාද්දක්ඛි තථා අක්ඛාසි, විමලො භූරිමෙධසො, නික්කාමො නිබ්බනො{1} නාගො කිස්ස හෙතු මුසා භණෙ.
1137. පහීන මල මොහස්ස මානමක්ඛප්පහායිනො, හන්දාහං කිත්තයිස්සාමි ගිරං වණ්ණූපසංහිතං.
1138. තමොනුදො බුද්ධො සමන්තචක්ඛු ලොකන්තගූ සබ්බභවාතිවත්තො, අනාසවො සබ්බදුක්ඛප්පහීනො සච්චව්හයො බ්රහ්මෙ උපාසිතො මෙ.
1139. ද්විජො යථා කුබ්බනකං පහාය බහුප්ඵලං කානනං ආවසෙය්ය, එවංපහං අප්පදස්සෙ පහාය මහොදධිං හංසරිවජ්ඣපත්තො{2}
1140. යෙ මෙ පුබ්බෙ ව්යාකංසු හුරං ගොතමසාසනා, ඉච්චාසි ඉති භවිස්සති, සබ්බන්තං ඉතිහීතිහං සබ්බන්තං තක්කවඩ්ඪනං.
1141. එකො තමනුදාසීනො ජුතිමා සො පභංකරො, ගොතමො භූරිපඤ්ඤාණො ගොතමො භූරිමෙධසො.
1142. යො මෙ ධම්මමදෙසෙසි සන්දිට්ඨිකමකාලිකං, තණ්හක්ඛයමනීතිකං යස්ස නත්ථි උපමා කච්චි.
1143. කින්නු තම්හා විප්පවසසි මුහුත්තමපි පිඞ්ගිය, ගොතමො භූරිපඤ්ඤාණො ගොතමො භූරිමෙධසා.
1144. යො තෙ ධම්මමදෙසෙසි සන්දිට්ඨිකමකාලිකං, තණ්හක්ඛයමනීතිකං යස්ස නත්ථි උපමා ක්වචි.
1145. නාහං තම්හා{*} විප්පවසාමි මුහුත්තම්පි බ්රාහ්මණ, ගොතමො භූරිපඤ්ඤාණා ගොතමො භූරිමෙධසා.
1146. යො තෙ ධම්මමදෙසෙසි සන්දිට්ඨිකමකාලිකං, තණ්හක්ඛයමනීතිකං යස්ස නත්ථි උපමා ක්වචි.
1147. පස්සාමි නං මනසා චක්ඛුනා ච රත්තිං දිවං බ්රාහ්මණ අප්පමත්තො. නමස්සමානො විවසෙමි{1} රත්තිං තෙනෙව මඤ්ඤාමි අවිප්පවාසං.
1148. සද්ධා ච පීතී ච මනො සතී ච නාපෙන්ති මෙ ගොතමසාසනම්හා, යං යං දිසං වජති භූරිපඤ්ඤො ස තෙන තෙනෙව නතො හමස්මි.
1149. ජිණ්ණස්ස මෙ දුබ්බලථාමකස්ස තෙනෙව කායො න පලෙති තත්ථ, සඞ්කප්පසත්තාය{2} වජාමි නිච්චං මනො හි මෙ බ්රාහ්මණ තෙන සුත්තො
1150. පඞ්කෙ සයානො පරිඵන්දමානො දීපා දීපං උපප්ලවිං, අථද්දසාසිං සම්බුද්ධං ඔඝති ණ්ණමනාසවං.
1151. යථා අහු වක්කලි මුත්තසද්ධො භද්රාවුධො ආළවි ගොතමො ච, එවමෙව ත්වම්පි පමුඤ්චස්සු සද්ධං ගමිස්සසි ත්වං පිඞ්ගිය මච්චුධෙය්යස්ස පාරං.
1152. එස භිය්යො පසීදාමි සුත්වාන මුනිනො වචො, විවත්තච්ඡද්දො සම්බුද්ධො අඛිලො පටිභානවා.
1153. අධිදෙවෙ අභිඤ්ඤාය සබ්බං වෙදි පරොවරං, පඤහානන්නකාරො සත්ථා කඞ්ඛීනං පටිජානතං.
1154. අසංහීරං අසඞ්කුප්පං යස්ස නත්ථි උපමා ක්වචි, අද්ධා ගමිස්සාමි න මෙත්ථ කඞ්ඛා එවං පධාරෙහී අධිමුත්තචිත්තන්ති.
පාරායනවග්ගො නිට්ඨිතො.
සුත්තනිපාතො සමත්තො.