731. උපධිනිදානා පභවන්ති දුක්ඛා යෙකෙචි ලොකස්මිං අනෙකරූපා, යො වෙ අවිද්වා උපධිං කරොති. පුනප්පුනං දුක්ඛමුපෙති මන්දො, තස්මා පජානං උපධිං න කයිරා දුක්ඛස්ස ජාතිප්පභවානුපස්සී’ති.
සියා අඤ්ඤෙනපි පරියායෙන සම්මා ද්වයතානුපසස්නාති ඉති චෙ භික්ඛවෙ, පුච්ඡිතාරො අස්සු සියාතිසසු වචනීයා. කථඤ්ච සියා: යං කිඤ්චි දුක්ඛං සම්භොති. සබ්බං අවිජ්ජාපච්චයාති, අයමෙකානුපස්සනා, අවිජ්ජාය ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථා පරං එතදවොච සත්ථා:
732. ජාතිමරණසංසාරං යෙ වජන්ති පුනප්පුනං, ඉත්ථභාවඤ්ඤථාභාවං අවිජ්ජායෙව සා ගති.
733. අවිජ්ජා හයං මහාමොහො යෙනිදං සංසිතං චිරං, විජ්ජාගතාව යෙ සත්තා නාගච්ඡන්ති{1} පුනබ්භවන්ති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති සබ්බං සඞ්ඛාරපච්චයාති අයමෙකානුපස්සනා. සඞ්ඛාරනංත්වෙව අසෙස විරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
734. යං කිඤ්චි දුක්ඛං සම්භොති සබ්බං සඞ්ඛාරපච්චයා, සඞ්ඛාරානං නිරොධෙන නත්ථි දුක්ඛස්ස සම්භවොති.
735. එතමාදීනවං ඤත්වා දුක්ඛං සඞ්ඛාරපච්චයා, සබ්බසඞ්ඛාරසමථා සඤ්ඤාය උපරොධනා, එවං දුක්ඛක්ඛයො හොති එතං ඤත්වා යථාතථං.
736. සම්මද්දසා වෙදගුනො සම්මදඤ්ඤාය පණ්ඩිතා, අභිභුය්ය මාරසංයොගං නාගච්ඡන්ති පුනබ්භවන්ති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති. සබ්බං විඤ්ඤාණපච්චයාති, අයමෙකානුපස්සනා, විඤ්ඤාණස්ස ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
737. යං කිඤ්චි දුක්ඛං සම්භොති සබ්බං විඤ්ඤාණපච්චයා, විඤ්ඤාණස්ස නිරොධෙන නත්ථි දුක්ඛස්ස සම්භවො.
738. එතමාදීනවං ඤත්වා දුක්ඛං විඤ්ඤාණපච්චයා, විඤ්ඤාණුපසමා භික්ඛු නිච්ඡාතො පරිනිබ්බුතො’ති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති සබ්බං ඵස්සපච්චයාති. අයමෙකානුපස්සනා, ඵස්සස්ස ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
739. තෙසං ඵස්සපරෙතානං භවසොතානුසාරිනං, කුම්මග්ගපටිපන්නානං ආරා සංයොජනක්ඛයො.
740. යෙ ච ඵස්සං පරිඤ්ඤාය අඤ්ඤාය උපසමෙ රතා{1}, තෙ චෙ ඵස්සාභිසමයා නිච්ඡාතා පරිනිබ්බුතා’ති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති සබ්බං වෙදනාපච්චයාති, අයමෙකානුපස්සනා, වෙදනානං ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
741. සුඛං වා යදි වා දුක්ඛං අදුක්ඛමසුඛං සහ අජ්ඣත්තඤ්ච බහිද්ධා ච යං කිඤ්චි අත්ථි වෙදිතං.
742. එවං දුක්ඛන්ති ඤත්වාන මොසධම්මං පලොකිතං{2} ඵුස්ස ඵුස්ස වයං පස්සං එවං තත්ථි විජානාති{3} වෙදනානං ඛයා භික්ඛු නිච්ඡාතො පරිනිබ්බුතො’ති.
සියා අඤ්ඤෙනපි -පෙ- කථඤ්ච සියා යං කිඤ්චි දුක්ඛං සම්භොති සබ්බං තණ්හාපච්චයාති, අයමෙකානුපස්සනා, තණ්හාය ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
743. තණ්හා දුතියො පුරිසො දීඝමද්ධානං සංසරං, ඉත්ථභාවඤ්ඤථාභාවං සංසාරං නාතිවත්තති.
744. එතමාදීනවං ඤත්වා තණ්හාදුක්ඛස්ස සම්භවං, වීතතණ්හො අනාදානො සතො භික්ඛු පරිබ්බජෙ’ති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති සබ්බං උපාදානපච්චයාති, අයමෙකානුපස්සනා. උපාදානානං ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
745. උපාදානං පච්චයා භවො භූතො දුක්ඛං නිගච්ඡති, ජාතස්ස මරණං හොති ඵසො දුක්ඛස්ස සම්භවො.
746. තස්මා උපාදානක්ඛයා සම්මදඤ්ඤාය පණ්ඩිතා, ජාතික්ඛයං අභිඤ්ඤාය නාගච්ඡන්ති පුනබ්භවන්ති{1},
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති සබ්බං ආරම්භපච්චයාති, අයමෙකානුපස්සනා, ආරම්භානං ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
747. යං කිඤ්චි දුක්ඛං සම්භොති සබ්බං ආරම්භපච්චයා, ආරම්භානං නිරොධෙන නත්ථි දුක්ඛස්ස සම්භවො.
748. එතමාදීනවං ඤත්වා දුක්ඛං ආරම්භපච්චයා, සබ්බාරම්භං පටිනිස්සජ්ජ අනාරම්භවිමුත්තිනො.{2}
749. උච්ඡින්නභවතණ්හස්ස සන්තචිත්තස්ස භික්ඛුනො, විතිණ්ණො ජාතිසංසාරො නත්ථි තස්ස පුනබ්භවොති.
සියා අඤ්ඤෙනපි -පෙ- කථඤ්ච සියා. යංකිඤ්චි දුක්ඛං සම්භොති සබ්බං ආහාරපච්චයාති අයමෙකානුපස්සනා, ආහාරානං ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
750. යං කිඤ්චි දුක්ඛං සම්භොති සබ්බං ආහාරපච්චයා, ආහාරානං නිරොධෙන නත්ථි දුක්ඛස්ස සම්භවො.
751. එතමාදීනවං ඤත්වා දුක්ඛං ආහාරපච්චයා, සබ්බාහාරං පරිඤ්ඤාය සබ්බාහාරමනිස්සිතො.
752. ආරොග්යං සම්මදඤ්ඤාය ආසවානං පරික්ඛයා, සඞ්ඛාය සෙවි ධම්මට්ඨො සඞ්ඛං නොපෙති වෙදගූති.
සියා අඤ්ඤෙනපි -පෙ- කථඤ්ච සියා: යං කිඤ්චි දුක්ඛං සම්භොති. සබ්බං ඉඤ්ජිතපච්චයාති අයමෙකානුපස්සනා, ඉඤ්ජිතානං ත්වෙව අසෙසවිරාගනිරොධා නත්ථි දුක්ඛස්ස සම්භවොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
753. යං කිඤ්චි දුක්ඛං සම්භොති සබ්බං ඉඤ්ජිතපච්චයා, ඉඤ්ජිතානං නිරොධෙන නත්ථි දුක්ඛස්ස සම්භවො.
754. එතමාදීනවං ඤත්වා දුක්ඛං ඉඤ්ජිතපච්චයා, තස්මා හි එජං වොස්සජ්ජ සඞ්ඛාරෙ උපරුන්ධිය, අනෙජො අනුපාදානො සතො භික්ඛු පරිබ්බජෙති.
සියා අඤ්ඤෙනපි -පෙ- කථඤ්ච සියා: නිස්සිතස්ස චලිතං හොතීති අය මෙකානුපස්සනා, අනිස්සිතො න චලතීති අයං දුතියානුපස්සනා. එවං සම්මා -පෙ- වත්වා සුගතො අථාපරං එතදවොච සත්ථා:
755. අනිස්සිතො න චලති නිස්සිතො ච උපාදියං, ඉත්ථභාවඤ්ඤථාභාවං සංසාරං නාතිවත්තති.
756. එතමාදීනවං ඤත්වා නිස්සයෙසු මහබ්භයං, අනිස්සිතො අනුපාදානො සතො භික්ඛු පරිබ්බජෙති.
සියා අඤ්ඤෙනපි -පෙ- කථඤ්ච සියා: රූපෙහි භික්ඛවෙ ආරුප්පා{1} සන්තතරාති අයමෙකානුපස්සනා, ආරුප්පෙහි{2} නිරොධො සන්තතරොති අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
757. යෙ ච රූපූපගා සත්තා යෙ ව ආරුප්පවාසිනො{3} නිරොධං අප්පජානන්තා ආගන්තාරො පුනබ්භවං
758. යෙ ච රූපෙ පරිඤ්ඤාය අරූපෙසු සුසණ්ඨිතා, නිරොධෙ යෙ විමුච්චන්ති තො ජන මච්චු හායිනොති.
සියා අඤ්ඤෙනපි -පෙ- කථඤ්ච සියා: යං භික්ඛවෙ සදෙවකස්ස ලොකස්ස සමාරකස්ස සබ්රහ්මකස්ස සස්සමණබ්රාහ්මණියා පජාය සදෙව මනුස්සාය ඉදං සච්චන්ති උපනිජ්ඣායිතං තද’මරියානං එතං මුසාති යථා භූතං සම්මප්පඤ්ඤාය සුදිට්ඨං අයමෙකානුපස්සනා, යං භික්ඛවෙ සදෙවකස්ස -පෙ- සදෙවමනුස්සාය ඉදං මුසාති උපනිජ්ඣායිතං තදමරියානං එතං සච්චන්ති යථාභූතං සම්මප්පඤ්ඤාය සුදිට්ඨං, අයං දුතියානුපස්සනා. එවං සම්මා -පෙ- අථාපරං එතදවොච සත්ථා:
759. අනත්තනි අත්තමානිං පස්ස ලොකං සදෙවකං, නිවිට්ඨං නාමරූපස්මිං ඉදං සච්චන්ති මඤ්ඤති.
760. යෙන යෙන හි මඤ්ඤන්ති තතො තං හොති අඤ්ඤථා. තං හි තස්ස මුසා හොති මොසධම්මං හි ඉත්තරං.
761. අමොසධම්මං නිබ්බානං තදරියා සච්චතො විදුං තෙ වෙ සච්චාභිසමයා නිච්ඡාතා පරිනිබ්බුතාති.
සියා අඤ්ඤෙනපි පරියායෙන සම්මා ද්වයතානුපසස්නාති, ඉති චෙ භික්ඛවෙ පුච්ඡිතාරො අස්සු, සියාතිස්සු වචනීයා. කථඤ්ච සියා: යං භික්ඛවෙ සදෙවකස්ස -පෙ- සදෙවමනුස්සාය ඉදං දුක්ඛන්ති උපනිජ්ඣායිතං තදමරියානං එතං දුක්ඛන්ති යථාභූතං සම්මප්පඤ්ඤාය සුදිට්ඨං අයමෙකානුපස්සනා, යං භික්ඛවෙ සදෙවකස්ස -පෙ- සදෙවමනුස්සාය ඉදං දුක්ඛන්ති උපනිජ්ඣායිතං තදමරියානං එතං සුඛන්ති යථාභූතං සම්මප්පඤ්ඤාය සුදිට්ඨං, අයං දුතියානුපස්සනා.
එවං සම්මා ද්වයතානුපස්සිනො ඛො භික්ඛවෙ, භික්ඛුනො අප්පමත්තස්ස ආතාපිනො පහිතත්තස්ස විහරතො ද්වින්නං ඵලානං අඤ්ඤතරං ඵලං පාටිකඞ්ඛං දිට්ඨෙව ධම්මෙ අඤ්ඤා, සති වා උපාදිසෙසෙ අනාගාමිතාති. ඉදමවොච භගවා ඉදං වත්වා සුගතො අථාපරං එතදවොච සත්ථා:
762. රූපා සද්දා රසා ගන්ධා ඵස්සා ධම්මා ච කෙවලා, ඉට්ඨා කන්තා මනාපා ච යාවතත්ථිති වුච්චති.
763. සදෙවකස්ස ලොකස්ස එතෙ වො සුඛසම්මතා, යත්ථ චෙ තෙ නිරුජ්ඣන්ති තං තෙසං දුක්ඛසම්මතං.
764. සුඛන්ති දිට්ඨමරියෙහි සක්කායස්සුපරොධනං, පච්චනීකමිදං හොති සබ්බලොකෙන පස්සතං
765. යං පරෙ සුඛතො ආහු තදරියා ආහු දුක්ඛතො, යං පරෙ දුක්ඛතො ආහු තදරියා සුඛතො විදුං.
766. පස්ස ධම්මං දුරාජානං සම්පමූළ්හෙත්ථ අවිද්දසු, නිවුතානං තමො හොති අන්ධකාරො අපස්සතං.
767. සතඤ්ච විවටං හොති ආලොකො පස්සතාමිව, සන්තිකෙ න විජානන්ති මගා ධම්මස්ස’කොවිදා,
768. භවරාගපරෙතෙහි භවසොතානුසාරිභි, මාරධෙය්යානුපත්තෙහි නායං ධම්මො සුසම්බුධො.
769. කො නු අඤ්ඤත්ර මරියෙහි පදං සම්බුද්ධුමරහති, යං පදං සම්මදඤ්ඤාය පරිනිබ්බන්ති අනාසවාති.
ඉදමවොච භගවා, අත්තමනා තෙ භික්ඛු භගවතො භාසිතං අභිනන්දුන්ති - ඉමස්මිං ඛො පන වෙය්යාකරණස්මිං භඤ්ඤමානෙ සට්ඨිමත්තානං භික්ඛූනං අනුපාදාය ආසවෙහි චිත්තානි විමුච්චිංසූති.
ද්වයතානුපස්සනා සුත්තං නිට්ඨිතං.
තස්සුද්දානං:
සච්චං උපධි අවිජ්ජා ච සඞ්ඛාර විඤ්ඤාණ පඤ්චමං, ඵස්සවෙදනියා තණ්හා උපාදානරම්හා ආහාරා; ඉඤ්ජිතං චලිතං රූපං සච්චං දුක්ඛෙන සොළසාති.
මහාවග්ගො තතියො.
තස්සවග්ගස්සුද්දානං:
පබ්බජ්ජා ච පධානඤ්ච සුභාසිතඤ්ච පූරළාසං. මාඝසුත්තඤ්ච සභියො ච සෙලො සල්ලං ච වුච්චති, වාසෙට්ඨොචාපි කොකාලි නාලකො ද්වයතානුපස්සනා, ද්වාදසෙතානි සුත්තානි මහාවග්ගොති වුච්චතීති.
4. අට්ඨකවග්ගො
4. 1.
කාමසුත්තං
770. කාමං කාමයමානස්ස තස්ස චෙතං සමිජ්ඣති, අද්ධා පීතිමනො හොති ලද්ධා මච්චො යදිච්ඡති.
771. තස්ස චෙ කාමයානස්ස{1} ඡන්දජාතස්ස ජන්තුනො, තෙ කාමා පරිහායන්ති සල්ලවිද්ධොව රුප්පති.
772. යො කාමෙ පරිවජ්ජෙති සප්පස්සෙව පදා සිරො, සො’මං{2} විසත්තිකං ලොකෙ සතො සමතිවත්තති.
773. ඛෙත්තං වත්ථුං හිරඤ්ඤං වා ගවාස්සං{3} දාසපොරිසං, ථියො බන්ධූ පුථුකාමෙ යො නරො අනුගිජ්ඣති.
774. අබලා නං බලීයන්ති මද්දන්තෙ නං පරිස්සයා, තතො නං දුක්ඛමන්වෙති නාවං භින්නමිවොදකං.
775. තස්මා ජන්තු සදා සතො කාමානි පරිවජ්ජයෙ, තෙ පහාය තරෙ ඔඝං නාවං සිත්වාව{4} පාරගූති.
කාමසුත්තං නිට්ඨිතං
4. 2.
ගුහට්ඨකසුත්තං
776. සත්තො ගුහායං බහුනාභිඡන්නො තිට්ඨං නරො මොහනස්මිං පගාළ්හො, දූරෙ විවෙකා හි තථාවිධො සො කාමා හි ලොකෙ න හි සුප්පහායා.
777. ඉච්ඡානිදානා භවසාතබද්ධා තෙ දුප්පමුඤ්චා න හි අඤ්ඤමොක්ඛා, පච්ඡා පුරෙ වාපි අපෙක්ඛමානා ඉමෙ ව කාමෙ පුරිමෙ ව ජප්පං.
778. කාමෙසු ගිද්ධා පසුතා පමූළ්හා අවදානියා තෙ විසමෙ නිවිට්ඨා, දුක්ඛූපනීතා පරිදෙවයන්ති කිං සු භවිස්සාම ඉතො චුතාසෙ.
779. තස්මා හි සික්ඛෙථ ඉධෙව ජන්තු යං කිඤ්චි ජඤ්ඤා විසමන්ති ලොකෙ, න තස්ස හෙතු විසමං චරෙය්ය අප්පං හිදං ජීවිතං ආහු ධීරා.
780. පස්සාමි ලොකෙ පරිඵන්දමානං පජං ඉමං තණ්හාගතං භවෙසු, හීනා නරා මච්චුමුඛෙ ලපන්ති අවීතතණ්හා සෙ භවාභවෙසු.
781. මමායිතෙ පස්සථ ඵන්දමානෙ මච්ඡෙව අප්පොදකෙ ඛීණසොතෙ, එතම්පි දිස්වා අමමො චරෙය්ය භවෙසු ආසත්තිමකුබ්බමානො.
782. උභොසු අන්තෙසු විනෙය්ය ඡන්දං ඵස්සං පරිඤ්ඤාය අනානුගිද්ධො, යදත්තගරහී තදකුබ්බමානො න ලිප්පතී{1} දිට්ඨසුතෙසු ධීරො.
783. සඤ්ඤං පරිඤ්ඤාවිතරෙය්ය ඔඝං පරිග්ගහෙසු මුනි නොපලිත්තො, අබ්බූළ්හසල්ලො චරං අප්පමත්තො නාසිංසතී ලොකමිමං පරඤ්චාති.
ගුහට්ඨකසුත්තං නිට්ඨිතං
4. 3.
දුට්ඨට්ඨක සුත්තං
784. වදන්ති වෙ දුට්ඨමනාපි එකෙ අථොපි වෙ සච්චමනා වදන්ති, වාදඤ්ච ජාතං මුනිනො උපෙති තස්මා මුනි නත්ථි ඛිලො කුහිඤ්චි.
785. සකං හි දිට්ඨිං කථමච්චයෙය්ය ඡන්දානුනීතො රුචියා නිවිට්ඨො, සයංසමත්තානි පකුබ්බමානො යථා හි ජානෙය්ය තථා වදෙය්ය.
786. යො අත්තනො සීලවතානි ජන්තු අනානුපුට්ඨො ච පරෙස{2} පාවා,{3} අනරීයධම්මං කුසලා තමාහු යො ආතුමානං සයමෙව පාවා{3}
787. සන්තො ච භික්ඛු අභිනිබ්බුතත්තො ඉති’හන්ති සීලෙසු අකත්ථමානො, තමරියධම්මං කුසලා වදන්ති යස්සුස්සදා නත්ථි කුහිඤ්චි ලොකෙ
788. පකප්පිතා සඞ්ඛතා යස්ස ධම්මා පුරක්ඛතා සන්ති අවීවදාතා, යදත්තනී පස්සති ආනිසංසං තං නිස්සිතො කුප්පපටිච්චසන්තිං.
789. දිට්ඨිනිවෙසා න හි ස්වාතිවත්තා ධම්මෙසු නිච්ඡෙය්ය සමුග්ගහීතං, තස්මා නරො තෙසු නිවෙසනෙසු නිරස්සතී ආදිසතිච්ච{1} ධම්මං.
790. ධොනස්ස හි නත්ථි කුහිඤ්චි ලොකෙ පකප්පිතා දිට්ඨි භවාභවෙසු, මායඤ්ච මානඤ්ච පහාය ධොනො සකෙන ගච්ඡෙය්ය අනූපයො සො.
791. උපයො හි ධම්මෙසු උපෙති වාදං අනූපයං{2} කෙන කථං වදෙය්ය, අත්තං නිරත්තං න හි තස්ස අත්ථි අධොසි සො දිට්ඨිමිධෙව සබ්බන්ති.
දුට්ඨට්ඨකසුත්තං නිට්ඨිතං.
4. 4.
සුද්ධටඨකසුත්තං
792. පස්සාමි සුද්ධං පරමං අරොගං දිට්ඨෙන සංසුද්ධි නරස්ස හොති, එතාභිජානං{3} පරමන්ති ඤත්වා සුද්ධානුපස්සීති පච්චෙති ඤාණං
793. දිට්ඨෙන චෙ සුද්ධි නරස්ස හොති ඤාණෙන වා සො පජහාති දුක්ඛං, අඤ්ඤෙන සො සුජ්ඣති සොපධීකො දිට්ඨි හි නං පාව තථාවදානං.
794. න බ්රාහ්මණො අඤ්ඤතො සුද්ධිමාහ දිට්ඨෙ සුතෙ සීලවතෙ මුතෙ වා, පුඤ්ඤෙ ච පාපෙ ච අනූපලිත්තො අත්තඤ්ජහො නයිධ පකුබ්බමානො.
795. පුරිමං පහාය අපරං සිතාසෙ එජානුගා තෙ න තරන්ති සඞ්ගං, තෙ උග්ගහායන්ති නිරස්සජන්ති කපීව සාඛං පමුඛං ගහාය.{1}
796. සයං සමාදාය වතානි ජන්තු උච්චාවචං ගච්ඡති සඤ්ඤසත්තො, විද්වා ච වෙදෙහි සමෙච්ච ධම්මං න උච්චාවචං ගච්ඡති භූරිපඤ්ඤො.