පුණ්ණකසුත්තං{4}
1047. අනෙජං මූල දස්සාවිං (ඉච්චායස්මා පුණ්ණකො) අත්ථි පඤ්හෙන ආගමං කිං නිස්සිතා ඉසයො මනුජා ඛත්තියා බ්රාහ්මණා දෙවතානං යඤ්ඤමකප්පයිංසු පුථු ඉධ ලොකෙ පුච්ඡාමි තං භගවා බ්රූහිමෙතං.
1048. යෙ කෙචිමෙ ඉසයො මනුජා (පුණ්ණකාති භගවා) ඛත්තියා බ්රාහ්මණා දෙවතානං යඤ්ඤමකප්පයිංසු පුථු ඉධ ලොකෙ, ආසිංමානා පුණ්ණක ඉත්ථභාවං ජරං සිතා යඤ්ඤමකප්පයි සු.
1049. යෙ කෙචි මෙ ඉසයො මනුජා (ඉච්චායස්මා පුණ්ණකො) ඛත්තියා බ්රාහ්මණා දෙවතානං යඤ්ඤමකප්පයිංසු පුථූ ඉධ ලොකෙ කච්චිස්සු තෙ භගවා යඤ්ඤපථෙ අප්පමත්තා ආතාරු ජාතිඤ්ච ජරං ච මාරිස පුච්ඡාමි තං භගවා බ්රූහි මෙතං.
1050. ආසිංසන්ති{1} ථොමයන්ති අභිජප්පන්ති ජුහන්ති (පුණ්ණකාති භගවා) කාමාභිජප්පන්ති පටිච්ච ලාභං, තෙ යාජයොගා භවරාගරත්තා නාතරිංසු ජාතිජරන්ති බ්රූමි.
1051. තෙ වෙ නාතරිංසු යාජයොගා (ඉච්චායස්මා පුණ්ණකො) යඤ්ඤෙහි ජාතිඤ්ච ජරඤ්ච මාරිස, අථ කො චරහි දෙව මනුස්සලොකෙ අතාරි ජාතිඤ්ඤ ජරඤ්ච මාරිස පුච්ඡාමි තං භගවා බ්රූහි මෙතං.
1052. සඞ්ඛාය ලොකස්මිං පරොවරානි{2} (පුණ්ණකාති භගවා) යස්සිඤ්ජිතං නත්ථි කුහිඤ්චි ලොකෙ, සන්තො විධූමො අනීඝො නිරාසො අතාරි සො ජාතිජරන්ති බ්රූමීති.
පුණ්ණකසුත්තං තතියං{3}.
5. 4.
මෙත්තගුසුත්තං{4}
1053. පුච්ඡාමි තං භගවා බ්රූහි මෙතං (ඉච්චායස්මා මෙත්තගූ) මඤ්ඤාමි තං වෙදගුං භාවිතත්තං, කුතො නු දුක්ඛා සමුදාගතා ඉමෙ යෙ කෙචි ලොකස්මිං අනෙකරූපා.
1054. දුක්ඛස්ස වෙ මං පභවං අපුච්ඡසි (මෙත්තගූති භගවා) තං තෙ පවක්ඛාමි යථා පජානං, උපධිනිදානා පභවන්ති දුක්ඛා යෙ කෙචි ලොකස්මිං අනෙකරූපා.
1055. යො වෙ අවිද්වා උපධිං කරොති පුනප්පුනං දුක්ඛමුපෙති මන්දො, තස්මා හි ජානං උපධිං න කයිරා දුක්ඛස්ස ජාතිප්පභවානුපස්සී.
1056. යන්තං අපුච්ඡිම්හ අකිත්තයී නො (ඉච්චායස්මා මෙත්තගු) අඤ්ඤං තං පුච්ඡාමි තදිඞ්ඝ බ්රූහි. කථන්නු ධීරා විතරන්ති ඔඝං ජාතිජරං සොකපරිද්දවඤ්ච, තං මෙ මුනි සාධු වියාකරොහි තථා හි තෙ විදිතො එස ධම්මො.
1057. කිත්තයිස්සාමි තෙ ධම්මං (මෙත්තගූති භගවා) දිට්ඨෙ ධම්මෙ අනීතිහං, යං විදිත්වා සතො චරං තරෙ ලොකෙ විසත්තිකං.
1058. තඤ්චාහං අභිනන්දාමි මහෙසි ධම්මමුත්තමං, යං විදිත්වා සතො චරං තරෙ ලොකෙ විසත්තිකං
1059. යං කිඤ්චි සම්පජානාසි (මෙත්තගූති භගවා) උද්ධං අධො තිරියඤ්චාපි මජ්ඣෙ, එතෙසු නන්දිඤ්ච නිවෙසනඤ්ච පනුජ්ජ විඤ්ඤාණං භවෙ න තිට්ඨෙ.
1060. එවංවිහාරී සතො අප්පමත්තො භික්ඛු චරං හිත්වා මමායිතානි, ජාතිං ජරං සොකපරිද්දවඤ්ච ඉධෙව විද්වා පජහෙය්ය දුක්ඛං.
1061. එතාභිනන්දාමි මචො මහෙසිනො, (ඉච්චායස්මා මෙත්තගූ) සුකිත්තිතං ගොතම නුපධිකං, අද්ධා හි භගවා පහාසි දුක්ඛං තථා හි තෙ විදිතො එස ධම්මො.
1062. තෙ චාපි නූන පජහෙය්යු දුක්ඛං යෙ ත්වං මුනි අට්ඨිතං ඔවදෙය්ය, තං තං නමස්සාමි සමෙච්ච නාග අප්පෙව මං භගවා අට්ඨිතං ඔවදෙය්ය.
1063. යං බ්රාහ්මණං වෙදගුං ආභිජඤ්ඤා (මෙත්තගූති භගවා) අකිඤ්චනං කාමභවෙ අසත්තං, අද්ධා හි සො ඔඝමිමං අතාරි තිණ්ණො ච පාරං අඛිලො අකඞ්ඛො.
1064. විද්වා ච සො වෙදගූ නරො ඉධ භවාභවෙ සඞ්ගමිමං විසජ්ජ, සො වීතතණ්හො අනිඝො නිරාසො අතාරි සො ජාති ජරන්ති බ්රූමීති.
මෙත්තගූමාණවසුත්තං චතුත්ථං{1}.
5. 5.
ධොතකසුත්තං{2}
1065. පුච්ඡාමි තං භගවා බ්රූහි මෙතං (ඉච්චායස්මා ධොතකො) වාචාභිකඞ්ඛාමි මහෙසි තුය්හං, තව සුත්වාන නිග්ඝොසං සිකෙඛ නිබ්බාන මත්තනො
1066. තෙන හාතප්පං කරොහි (ධොතකාති භගවා) ඉධෙව නිපකො සතො, ඉතො සුත්වාන නිග්ඝොසං සික්ඛෙ නිබ්බානමත්තනො
1067. පස්සාමහං දෙවමනුස්ස ලොකෙ (ඉච්චායස්මාධොතකො) අකිඤ්චනං බ්රාහ්මණං ඉරියමානං, තං තං නමස්සාමි සමන්තචක්ඛු පමුඤ්ච මං සක්ක කථංකථාහි
1068. නාහං ගමිස්සාමි{1} පමොචනාය (ධොතකාති භගවා) කථංකථිං ධොතක කඤ්චි ලොකෙ, ධම්මඤ්ච සෙට්ඨං ආජානමානො{2} එවං තුවං ඔඝමිමං තරෙසි.
1069. අනුසාස බ්රහ්මෙ කරුණායමානො (ඉච්චායස්මා ධොතකා) විවෙකධම්මං යමහං විජඤ්ඤං, යථාහං ආකාසොව අව්යාපජ්ජමානො ඉධෙව සන්තො අසිතො චරෙය්යං.
1070. කිත්තයිස්සාමි තෙ සත්තිං (ධොතකාති භගවා) දිට්ඨෙ ධමෙම අනීතිහං, යං විදිත්වා සතො චරං තරෙ ලොකෙ විසත්තිකං.
1071. තං වාහං අභිනන්දාමි (ඉච්චායස්මා ධොතකො) මහෙසි සන්තිමුත්තමං, යං විදිත්වා සතො චරං තරෙ ලොකෙ විසත්තිකං.
1072. යං කිඤ්චි සම්පජානාසි (ධොතකාති භගවා) උද්ධං අධො තිරියඤ්චාපි මජ්ඣෙ: එතං විදිත්වා සඞ්ගොති ලොකෙ භවාභවාය මාකාසි තණ්හන්ති.
ධොතකසුත්තං පඤ්චමං{3}
5. 6.
උපසීවසුත්තං{1}
1073. එකො අහං සක්ක මහන්තමොඝං (ඉච්චායස්මා උපසීවො) අනිස්සිතො නො විසහාමි තාරිතුං, ආරම්මණං බ්රූහි සමන්තචක්ඛු. යං නිස්සිතො ඔඝමිමං තරෙය්යං.
1074. ආකිඤ්චඤ්ඤං පෙක්ඛමානො සතීමා (උපසීවාති භගවා) නත්ථීති නිස්සාය තරස්සු ඔඝං, කාමෙ පහාය විරතො කථාහි තණ්හක්ඛයං නත්තමහාභිපස්ස{2}.
1075. සබ්බෙසු කාමෙසු යො වීතරාගො (ඉච්චායස්මා උපසීවො) ආකිඤ්චඤ්ඤං නිස්සිතො හිත්ව{3} යඤ්ඤං, සඤ්ඤා විමොක්ඛෙ පරමෙ විමුත්තො තිට්ඨෙ නු සො තත්ථ අනානුයායී{4}.
1076. සබ්බෙසු කාමෙසු යො වීතරාගො (උපසීවාති භගවා ) ආකිඤ්චඤ්ඤං නිස්සිතො හිත්ව{3} මඤ්ඤං සඤ්ඤා විමොක්ඛෙ පරමෙ ධිමුත්තො තිට්ඨෙය්ය සො තත්ථ අනානුයායී.
1077. තිට්ඨෙ වෙ සො තත්ථ අනානුයායී (ඉච්චායස්මා උපසීවො) යුගම්පි වස්සානං සමන්තචක්ඛු, තත්ථෙව සො සීති සියා විමුත්තො චවෙථ විඤ්ඤාණං තථා විධස්සි.
1078. අච්චි යථා වාතවෙගෙන ඛිත්තා (උපසීවාති භගවා) අත්ථං ජලෙති න උපෙති සඞ්ඛං, එවං මුනී නාමකායා විමුත්තො අත්ථං පලෙති න උපෙති සඞ්ඛං.
1079. අත්ථංගතො සො උද වා සො නත්ථි (ඉච්චායස්මා උපසීවො) උදාහු වෙ සස්සතියා අරොගො, තං මෙ මුනී සාදු වියාකරොහි තථා හි තෙ විදිතො එස ධම්මො
1080. අත්ථංගතස්ස න පමාණමත්ථි (උපසීවාති භගවා) යෙන නං වජ්ජුං තං තස්ස නත්ථි, සබ්බෙසු ධම්මෙසු සමූහතෙසු සමූහතා වාදපථාපි සබ්බෙති.
උපසීවසුත්තං{1}
5. 7.
නන්දසුත්තං{2}
1081. සන්ති ලොකෙ මුනයො (ඉච්චායස්මා නන්දො) ජනා වදන්ති තයිදං කථංසු’ ඤාණූපපන්නං නො මුනිං වදන්ති උදාහු චෙ ජීවිතෙනූපපන්නං.
1082. න දිට්ඨියා න සුතියා න ඤාණෙන{3} (නන්දාති භගවා) මුනීධ නන්ද කුසලා වදන්තී, විසෙනිකත්වා අනීඝා නිරාසා චරන්ති යෙ තෙ මුනයොති බ්රූමි.
1083. යෙ කෙචිමෙ සමණබ්රාහ්මණා සෙ (ඉච්චායස්මා නන්දො) දිට්ඨෙන සුතෙනාපි{3} වදන්ති සුද්ධිං, සීලබ්බතෙනාපි වදන්ති සුද්ධිං අනෙකරූපෙන වදන්ති සුද්ධිං කච්චිස්සු තෙ භගවා තත්ථ යථා චරන්තා අතාරු ජාතිඤ්ච ජරඤ්ච මාරිස පුච්ඡාමි තං භගවා බ්රූහි මෙතං.
1084. යෙ කෙචිමෙ සමණබ්රාහ්මණා සෙ (නන්දාති භගවා) දිට්ඨෙන සුතෙනාපි{1} වදන්ති සුද්ධිං, සීලබ්බතෙනාපි වදන්ති සුද්ධිං අනෙකරූපෙන වදන්ති සුද්ධිං, කිඤ්චාපි තෙ තත්ථ යථා වදන්තී නාතරිංසු ජාතිජරන්ති බ්රූමි.
1085. යෙ කෙචිමෙ සමණබ්රාහ්මණා සෙ (ඉච්චායස්මා නන්දො) දිට්ඨෙන සුතෙනාපි{1} වදන්ති සුද්ධිං සීලබ්බතෙනාපි වදන්ති සුද්ධිං අනෙකරූපෙන වදන්ති සුද්ධිං.
1086. තෙචෙ{2} මුනි බ්රූසි අනොඝතිණ්ණො අථ කො චරහි දෙවමනුස්සලොකෙ, අතාරි ජාතිඤ්ච ජරඤ්ච මාරිස පුච්ඡාමි තං භගවා බ්රූහි මෙතං.
1087. නාහං සබ්බෙ සමණබ්රාහ්මණා සෙ (නන්දාති භගවා) ජාතිජරාය නිවුතාති බ්රූමි යෙ සූධ දිට්ඨං ව සුතං මුතං වා සීලබ්බතං වාපි පහාය සබ්බං අනෙකරූපම්පි පහාය සබ්බං, තණ්හං පරිඤ්ඤාය අනාසවා සෙ තෙ වෙ නරා ඔඝතිණ්ණාති බ්රූමි.
1088. එතාහි නන්දාමි වචො මහෙසිනො (ඉච්චායස්මා නන්දො) සුකිත්තිතං ගොතමං නූපධීකං යෙ සූධ දිට්ඨං ව සුතං මුතං වා සීලබ්බතං වාපි පහාය සබ්බං අනෙක රූපම්පි පහාය සබ්බං තණ්හං පරිඤ්ඤාය අනාසවා සෙ අහම්පි තෙ වෙ ඔඝතිණ්ණාති බ්රූමීති.
නන්දසුත්තං සත්තමං{3}.
5. 8.
හෙමකසුත්තං{1}
1089. යෙ මෙ පුබ්බෙ වියාකංසු (ඉච්චායස්මා හෙමකො) හුරං ගොතම සාසනං, ඉච්චාසි ඉති භවිස්සති සබ්බං තං ඉතිහීතිහං සබ්බං තං තක්කවඩ්ඪනං නාහං තත්ථ අභිරමිං.
1090. ත්වඤ්ච මෙ ධම්ම මක්ඛාහි තඤ්හා නිග්ඝාතනං මුනි, යං විදිත්වා සතො චරං තරෙ ලොකෙ විසත්තිකං.
1091. ඉධ දිට්ඨ සුත මුත විඤ්ඤාතෙසු පියරූපෙසු හෙමක, ඡන්දරාග විනොදනං නිබ්බාන පද මච්චුතං.
1092. එතදඤ්ඤාය යෙ සතා දිට්ඨධම්මාභිනිබ්බුතා, උපසන්තා ච තෙ සදා තිණ්ණා ලොකෙ විසත්තිකන්ති.
හෙමකසුත්තං අට්ඨමං{2}
5. 9.
තොදෙය්යසුත්තං{3}
1093. යස්මිං කාමා න වසන්ති (ඉච්චායස්මා තොදෙය්යා) තණ්හා යස්ස න විජ්ජති, කථංකථා ච යො තිණ්ණො විමොඛො තස්ස කීදිසො.
1094. යස්මිං කාමා න වසන්ති (තොදෙය්යාති භගවා) තණ්හා යස්ස න විජ්ජති, කථංකථා ච යො තිණ්ණො විමොඛො තස්ස නාපරො.
1095. නිරාසසො සො උදි ආසසානො පඤ්ඤාණවා සො උදපඤ්ඤකපපී, මුනිං අහං සක්ක යථා විජඤ්ඤං තං මෙ වියාචික්ඛ සමන්තචක්ඛු.
1096. නිරාසසො සො න සො ආසසානො පඤ්ඤාණවා සො න ච පඤ්ඤකප්පී, එවම්පි තොදෙය්ය මුනිං විජාන අකිඤ්චනං කාමභවෙ අසත්තන්ති.
තොදෙය්යසුත්තං නවමං{1}
5. 10.
කප්පසුත්තං
1097. මජ්ඣෙ සරස්මිං තිට්ඨතං (ඉච්චායස්මා කප්පො.) ඔඝෙ ජාතෙ මහබ්භයෙ, ජරාමච්චුපරෙතානං දීපං පබ්රූහි මාරිස; ත්වඤ්ච මෙ දීපමක්ඛාහි යථායිදං නාපරා සියා
1098. මජ්ඣෙ සරස්මිං තිට්ඨතං (කප්පාති භගවා) ඔඝෙ ජාතෙ මහබ්භයෙ, ජරාමච්චුපරෙතානං දීපං පබ්රූමි කප්ප තෙ.
1099. අකිඤ්චනං අනාදානං එතං දීපං අනාපරං, නිබ්බානමිති තං බ්රූමි ජරාමච්චුපරික්ඛයං.
1100. එතදඤ්ඤාය යෙ සතා දිට්ඨධම්මාභිනිබ්බුතා, න තෙ මාරවසානුගා න තෙ මාරස්ස පද්ධගූති.
කප්පසුත්තං දසමං{2}.
5. 11.
ජතුකණ්ණිසුත්තං{1}
1101. සුත්වාන’හං චිරං අකාමකාමිං (ඉච්චායස්මා ජතුකණ්ණි) ඔඝාතිගං පුට්ඨු මකාමමාගමං, සන්තිපදං බ්රූහි සහාජනෙත්ත යථාතච්ඡං භගවා බ්රූහි මෙතං.
1102. භගවා හි කාමෙ අභිභුය්ය ඉරීයති ආදිච්චොව පඨවිං තෙජි තෙජසා, පරිත්තපඤ්ඤස්ස මෙ භූරිපඤ්ඤ, ආචික්ඛ ධම්මං යමහං විජඤ්ඤං ජාතිජරාය ඉධ විප්පහානං.
1103. කාමෙසු විනය ගෙධං (ජතුකණ්ණීති භගවා) නෙක්ඛම්මං දට්ඨු ඛෙමතො, උග්ගහීතං නිරත්තං වා මා තෙ විජ්ජිත්ථ කිඤ්චනං.
1104. යං පුබ්බෙ තං විසොසෙහි පච්ඡා තෙ මාහු කිඤ්චනං, මජ්ඣෙ චෙ නො ගහෙස්සසි උපසන්තො චරිස්සසි.
1105. සබ්බසො නාම රූපස්මිං වීතගෙධස්ස බ්රාහ්මණ, ආසවාස්ස න විජ්ජන්ති යෙහි මච්චු වසං වජෙති.
ජතුකණ්ණීසුත්තං එකාදසමං{2}.
5. 12.
භද්රාවුධසුත්තං{3}
1106. ඔකං ජහං තණ්හච්ඡිදං අනෙජං (ඉච්චායස්මා භද්රාවුධො) නන්දිං ජහං ඔඝතිණ්ණං විමුත්තං, කප්පං ජහං අභියාචෙ සුමෙධං සුත්වාන නාගස්ස අපනමිස්සන්ති ඉතො.
1107. නානා ජනා ජනපදෙහි සඞ්ගතා තව වීර වාක්යං අභිකඞ්ඛ මානා, තෙසං තුවං සාධු වියාකරොහි තථා හි තෙ විදිතො එස ධම්මො.
1108. ආදානතණ්හං විනයෙථ සබ්බං (භද්රාවුධාති භගවා) උද්ධං අධො තිරියඤ්චාපි මජ්ඣෙ, යං යං හි ලොකස්මිං උපාදියන්ති තෙනෙව මාරො අන්වෙති ජන්තුං.
1109. තස්මා පජානං න උපාදියෙථ භික්ඛු සතො කිඤ්චනං සබ්බලොකෙ, ආදානසත්තෙ ඉති පෙක්ඛමානො පජං ඉමං මච්චුධෙය්යෙ විසත්තංන්ති.
භද්රාවුධසුත්තං ද්වාදසමං{1}.
5. 13.
උදයසුත්තං{2}
1110. ඣායිං විරජමාසීනං (ඉච්චා යස්මා උදයො) කතකිච්චං අනාසවං පාරගුං සබ්බධම්මානං අත්ථි පඤ්හෙන ආගමං, අඤ්ඤා විමොක්ඛං පබ්රූහි අවිජ්ජාය පභෙදනං.
1111. පහානං කාමච්ඡන්දානං (උදයාති භගවා) දොමනස්සානං චූභයං, ථිනස්ස ච පනූදනං කුක්කුච්චානං නිවාරණං.
1112. උපෙඛා සති සංසුද්ධං ධම්මතක්කපුරෙජවං, අඤ්ඤා විමොක්ඛං පබ්රූමි අවිජ්ජාය පභෙදනං.
1113. කිංසු සංයොජනො ලොකො (ඉච්චායස්මා උදයො) කිංසු තස්ස විචාරණා, කිස්සස්ස විප්පහානෙන නිබ්බානමිති වුච්චති.
1114. නන්දි සංයොජනො ලොකො (උදයාති භගවා) විතක්කස්ස විචාරණා, තණ්හාය විප්පහානෙන නිබ්බානමිති වුච්චති.
1115. කථං සතස්ස චරතො (ඉච්චායස්මා උදයං) විඤ්ඤාණං උපරුජ්ඣති, භගවන්තං පුට්ඨුමාගම්ම තං සුණොම වචො තව: