961. තං බුද්ධං අසිතං තාදිං අකුහං ගණිමාගතං, බහුන්නමිධ{2} බද්ධානං අත්ථි පඤ්හෙන ආගමං.
962. භික්ඛුනො විජිගුච්ඡතො භජතො රිත්තමාසනං, රුක්ඛමූලං සුසානං වා පබ්බතානං ගුහාසු වා.
963. උච්චාවචෙසු සයනෙසු කීවන්තො තත්ථ භෙරවා, යෙහි භික්ඛු න වෙධෙය්ය නිග්ඝොසෙ සයනාසනෙ.
964. කතී පරිස්සයා ලොකෙ ගච්ඡතො අගතං{3} දිසං, යෙ භික්ඛු අභිසම්භ වෙ පන්තම්හි සයනාසනෙ.
965. ක්යාස්ස ව්යප්පථයො{4} අස්සු ක්යාස්සස්සු ඉධ ගොචරා, කානි සීලබ්බතානස්සු පහිතත්තස්ස භික්ඛුනො.
966. කං සො සික්ඛං සමාදාය එකොදි නිපකො සතො, කම්මාරො රජතස්සෙව නිද්ධමෙ මලමත්තනො.
967. විජිගුච්ඡමානස්ස යදිදං ඵාසු (සාරිපුත්තාති භගවා) රිත්තාසනං සයනං සෙවතො චෙ, සම්බොධිකාමස්ස යථානුධම්මං තං තෙ පවක්ඛාමි යථා පජානං.
968. පඤ්චන්නං ධීරො භයානං න භායෙ භික්ඛු සතො සප්පරියන්නචාරිං,{1} ඩංසාධිපාතානං සිරිංසපානං{2} මනුස්සඵස්සානං චතුප්පදානං.
969. පරධම්මිකානම්පි න සන්තසෙය්ය දිස්වාපි තෙසං බහුභෙරවානි, අථාපරානි අභිසම්භවෙය්ය පරිස්සයානි කුසලානු එසී.
970. ආතඞ්කඵස්සෙන ඛුදාය ඵුට්ඨො සීතං අථුණ්හං{3} අධිවාසයෙය්ය, සො තෙහි ඵුට්ඨො බහුධා අනොකො විරියං පරක්කම්ම දළ්හං කරෙය්ය.
971. ථෙය්යං න කරෙය්ය{4} න මුසා භණෙය්ය මෙත්තාය ඵස්සෙ තසථාවරානි, යදා විලත්තං මනසො විජඤ්ඤා කණ්හස්ස පක්ඛොති විනොදයෙය්ය.
972. කොධාතිමානස්ස වසං න ගච්ඡෙ මූලම්පි තෙසං පලිඛඤ්ඤ තිට්ඨෙ, අථප්පියං වා පන අප්පියං වා අද්ධා භවන්තො අභිසම්භවෙය්ය.
973. පඤ්ඤං පුරක්ඛත්වා කල්යාණපීති වික්ඛම්භෙය්ය තානි පරිස්සයානි, අරතිං සහෙථ සයනම්හි පන්තෙ චතුරො සහෙථ පරිදෙවධම්මෙ.
974. කිංසු අසිස්සාමි කුවං වා අසිස්සං දුක්ඛං වත සෙත්ථ කුවජ්ජ සෙස්සං, එතෙ විතක්කෙ පරිදෙවනෙය්යෙ විනයෙථ සෙඛො අනිකෙතසාරී.
975. අන්නඤ්ච ලද්ධා වසනඤ්ච කාලෙ මත්තං සො ජඤ්ඤා ඉධ තොසනත්ථං, සොතෙසු ගුත්තො යතචාරි ගාමෙ රුසිතොපි වාචං ඵරුසං න වජ්ජා.
976. ඔක්ඛිත්තචක්ඛු න ච පාදලොලො ඣානානුයුත්තො බහුජාගරස්ස, උපෙඛමාරබ්භ සමාහිතත්තො තක්කා සයං කුක්කුච්චඤ්චුපඡින්දෙ.
977. චුදිතො වචීහි සතිමාභිනන්දෙ සබ්රහ්මචාරීසු ඛිලං පභින්දෙ, වාචං පමුඤ්චෙ කුසලං නාතිවෙලං ජනවාදධම්මාය න චෙතයෙය්ය.
978. අථාපරං පඤ්චරජානි ලොකෙ යෙසං සතීමා විනයාය සික්ඛෙ, රූපෙසු සද්දෙසු අථො රසෙසු ගන්ධෙසු ඵස්සෙසු සහෙථ රාගං.
979. එතෙසු ධම්මෙසු විනෙය්ය ඡන්දං භික්ඛු සතීමා සුවිමුත්තචිත්තො, කාලෙන සො සම්මා ධම්මං පරිවීමංසමානො එකොදිභූතො විහනෙ තමං සොති.
සාරිපුත්තසුත්තං නිට්ඨිතං.
අට්ඨකවග්ගො චතුත්ථො.
තස්සුද්දානං:
කාමගුහට්ඨ දුට්ඨාව සුද්ධට්ඨ පරමා ජරා, මෙත්තෙය්යො ච පසූරො ච මාගන්දි පුරාභෙදනං. කලහං ද්වෙ ව ව්යුහානි පුනරෙව තුවට්ටකං අත්තදණ්ඩං ථෙරසුත්තං ථෙරපඤ්හෙන සොළස, තානි එතානි සුත්තානි සබ්බානට්ඨකවග්ගිකාති.
5. පාරායනවග්ගො
වත්ථුගාථා
980. කොසලානං පුරා රම්මා ආගමා දක්ඛිණාපථං, ආකිඤ්චඤ්ඤං පත්ථයානො බ්රාහ්මණො මන්තපාරගූ.
981. සො අසසකස්ස විසයෙ අළකස්ස සමාසනෙ, වසී ගොධාවරීකුලෙ උඤ්ඡෙන ච ඵලෙන ච.
982. තස්සෙ ව උපනිස්සාය ගාමො ච විපුලො අහූ, තතො ජාතෙන ආයෙන මහායඤ්ඤමකප්පයි.
983. මහායඤ්ඤං යජිත්වාන පුන පාවිසි අස්සමං, තස්මිං පති පවිට්ඨම්හි අඤ්ඤො ආගඤ්ඡි බ්රාහ්මණො.
984. උග්ඝට්ටපාදො තසිතො පඞ්කදන්තො රජස්සිරො, සො ච නං උපසඞ්කම්ම සතානි පඤ්ච යාචති.
985. තමෙනං බාවරී දිස්වා ආසනෙන නිමන්තයී, සුඛඤ්ච කුසලං පුච්ඡි ඉදං වචනමබ්රවි.
986. යං ඛො මමං දෙය්යධම්මං සබ්බං විස්සජ්ජිතං මයා, අනුජානාහි මෙ බ්රහ්මෙ නත්ථි පඤ්ච සතානි මෙ.
987. සචෙ මෙ යාචමානස්ස භවං නානුපදස්සති, සත්තමෙ දිවසෙ තුය්හං මුද්ධා ඵලතු සත්තධා.
988. අභිසඞ්ඛරිත්වා කුහකො භෙරවං සො අකිත්තයි, තස්ස තං වචනං සුත්වා බාවරී දුක්ඛිතො අහූ.
989. උස්සුස්සති අනාහාරො සොකසල්ලසමප්පිතො, අථොපි එවං චිත්තස්ස ඣානෙ න රමතී මනො.
990. උත්රස්තං දුක්ඛිතං දිස්වා දෙවතා අත්ථකාමිනී, බාවරිං උපසඞ්කම්ම ඉදං වචනමබ්රවී.
991. න සො මුද්ධං පජානාති කුහකො සො ධනත්ථිකො, මුද්ධනි මුද්ධපාතෙ වා ඤාණං තස්ස න විජ්ජති.
992. භොතී චරහි ජානාති තං මෙ අක්ඛාහි පුච්ඡිතා, මුද්ධං මුද්ධාධිපාතඤ්ච තං සුණොම වචො තව.
993. අහං පෙතං න ජානාමි ඤාණං එත්ථ න විජ්ජති, මුද්ධං මුද්ධාධිපාතෙ වා ජිනානං හෙත්ථ{1} දස්සනං.
994. අථ ඛො චරහි ජානාති අස්මිං පුථුවි{2} මණ්ඩලෙ, මුද්ධං මුද්ධාධිපාතඤ්ච තං මෙ අක්ඛාහි දෙවතෙ.
995. පුරා කපිලවත්ථුම්හා නික්ඛන්තො ලොකනායකො, අපච්චො ඔක්කාකරාජස්ස සක්යපුත්තො පභඞ්කරො.
996. සො හි බ්රාහ්මණ සම්බුද්ධො සබ්බධම්මානපාරගූ, සබ්බාභිඤ්ඤාබලප්පත්තො සබ්බධම්මෙසු චක්ඛුමා. සබ්බකම්මක්ඛයංපත්තො විමුත්තො උපධික්ඛයා.
997. බුද්ධො සො භගවා ලොකෙ ධම්මං දෙසෙති චක්ඛුමා, තං ත්වං ගන්ත්වාන පුච්ඡස්සු සො තෙ තං ව්යාකරිස්සති.
998. සම්බුද්ධොති වචො සුත්වා උදග්ගො බාවරී අහූ, සොකස්ස තනුකො ආසි පීතිඤ්චි විපුලං ලභි.
999. සො බාවරී අත්තමනො උදග්ගො තං දෙවතං පුච්ඡති වෙදජාතො, කතමම්හි ගාමෙ නිගමම්හි වා පන කතමම්හි වා ජනපදෙ ලොකනාථො. යත්ථ ගන්ත්වා නමස්සෙමු සම්බුද්ධං දිපදුත්තමං.
1000. සාවත්ථියං කොසලමන්දිරෙ ජිනො පහුතපඤ්ඤො වරභූරිමෙධසො, සො සක්යපුත්තො විධුරො අනාසවො මුද්ධාධිපාතස්ස විදූ නරාසභො.
1001. තතො ආමන්තයී සිස්සෙ බ්රාහ්මණෙ මත්තපාරගෙ, එථ මාණවා අක්ඛිස්සං සුණාථ වචනං මම.
1002. යස්සෙසො දුල්ලභො ලොකෙ පාතුභාවො අභිණ්හසො, ස්වාජ්ජ ලොකම්හි උප්පන්නො සම්බුද්ධො ඉති විස්සුතො ඛිප්පං ගන්ත්වාන සාවත්ථියං පස්සව්හො දිපදුත්තමං.
1003. කථං චරහි ජානෙමු දිස්වා බුද්ධොති බ්රාහ්මණ, අජානතං නො පබ්රූහි යථා ජානෙමු තං මයං.
1004. ආගතානි හි මන්තෙසු මහාපුරිසලක්ඛණා, ද්වත්තිංසානි{1} ච ව්යාඛ්යාතා සමන්තා අනුපුබ්බසො.
1005. යස්සෙතෙ හොන්ති ගත්තෙසු මහාපුරිසලක්ඛණා, දුවෙව{2} තස්ස ගතියො තතියා හි න විජ්ජති.
1006. සචෙ අගාරං අජ්ඣාවසති{3} විජෙය්ය පඨවිං ඉමං, අදණ්ඩෙන අසත්ථෙන ධම්මෙන මනුසාසාති.
1007. සචෙ ච සො පබ්බජති අගාරා අනගාරියං, විවත්තච්ඡදෙදා{4} සම්බුද්ධො අරහා භවති අනුත්තරො.
1008. ජාතිං ගොත්තඤ්ච ලක්ඛණං මන්තෙ සිස්සෙ පුනාපරෙ, මුද්ධං මුද්ධාධිපාතඤ්ච මනසායෙව පුච්ඡථ.
1009. අනාවරණදස්සාවී යදි බුද්ධො භවිස්සති, මනසා පුච්ඡිතෙ පඤ්හෙ වාචාය විස්සජෙස්සති.
1010. බාවරිස්ස වචො සුත්වා සිස්සා සොළස බ්රාහ්මණා, අජිතො තිස්සමෙත්තෙය්යො පුණ්ණකො අථ මෙත්තගු.
1011. ධොතකො උපසීවො ච නන්දො ච අථ හෙමකො, තොදෙය්යකප්පා දුභයො ජතුකණ්ණී ච පණ්ඩිතො
1012. භද්දාවුධො උදයො ච පොසාලො චාපි බ්රාහ්මණො, මොඝරාජා ච මෙධාවී පිඞ්ගියො ච මහාඉසි.
1013. පච්චෙකගණිනො සබ්බෙ සබ්බලොකස්ස විස්සුතා, ඣායී ඣානරතා ධීරා පුබ්බවාසනවාසිතා.
1014. බාවරිං අභිවාදෙත්වා කත්වා ච නං පදක්ඛිණං, ජටාජිනධරා සබ්බෙ පක්කාමුං උත්තරාමුඛා.
1015. මූලකස්ස පතිට්ඨානං පුරිමං මාහිස්සතිං{1} තදා, උජ්ජෙනිඤ්චාපි ගොනද්ධං වෙදිසං වනසව්හයං.
1016. කොසම්බියං චාපි සාකෙතං සාවත්ථිඤ්ච පුරුත්තමං, සෙතව්යං{2} කපිලං වත්ථුං කුසිනාරඤ්ච මන්දිරං.
1017. පාවඤ්ච භොගනගරං වෙසාලිං මාගධං පුරං, පාසාණකං චෙතියඤ්ච රමණීයං මනොරමං.
1018. තසිතො වුදකං සීතං මහාලාභංව වාණිජො, ඡායං ඝම්මාභිතත්තොව තුරිතා පබ්බතමාරුහුං.
1019. භගවා තම්හි සමයෙ භික්ඛුසඞ්ඝපුරක්ඛතො, භික්ඛූනං ධම්මං දෙසෙති සීහොව නදති වනෙ.
1020. අජිතො අද්දස සම්බුද්ධං සතරංසීව{3} භානුමං, චන්දං යථා පණ්ණරසෙ පරිපුරිං උපාගතං.
1021. අථස්ස ගත්තෙ දිස්වාන පරිපූරඤ්ච ව්යඤ්ජනං, එකමන්තං ඨිතො හට්ඨො මනොපඤ්හෙ අපුච්ඡථ.
1022. ආදිස්ස ජම්මනං බ්රූහි ගොත්තං බ්රූහි සලක්ඛණං, මන්තෙසු පාරමිං බ්රූහි කති වාචෙති බ්රාහ්මණො.
1023. විසංවස්සසතං ආයු සො ච ගොත්තෙන බාවරී, තීණස්ස{4} ලක්ඛණා ගත්තෙ තිණ්ණං වෙදාන පාරගු.
1024. ලක්ඛණෙ ඉතිහාසෙව සනිඝණ්ඩුසකෙටුභෙ, පඤ්ච සතානි වාචෙති සධම්මෙ පාරමිං ගතො.
1025. ලක්ඛණානං පවිචයං බාවරිස්ස නරුත්තම, තණ්හච්ඡිද{5} පකාසෙහි මා නො කංඛායිතං අහූ.
1026. මුඛං ජිව්හාය ඡාදෙති උණ්ණස්ස භමුකන්තරෙ, කොසොහිතං වත්ථගුය්හං එවං ජානාහි මාණව.
1027. පුච්ඡං හි කිඤ්චි අසුණන්තො සුත්වා පඤ්හෙ වියාකතෙ, විචින්තෙති ජනො සබ්බො වෙදජාතො කතඤ්ජලී.
1028. කො නු දෙවෙ ව බ්රහ්මා වා ඉන්දො වාපි සුජම්පති, මනසා පුච්ඡිතෙ පඤ්හෙ තමෙනං පටිභාසති.
1029. මුද්ධං මුද්ධාධිපාතඤ්ච බාවරී පරිපුච්ඡති, තං ව්යාකරොහි භගවා කඞ්ඛං විනය නො ඉසෙ.
1030. අවිජ්ජා මුද්ධාති ජානාහි විජ්ජා මුද්ධාධිපාතිනී, සද්ධා සතිසමාධීහි ඡන්දවිරියෙන සංයුතා.
1031. තතො වෙදෙන මහතා සන්ථමහිත්වාන මාණවො, එකංසං අජිනං කත්වා පාදෙසු සිරසා පති.
1032. බාවරී බ්රාහ්මණො භොතො සහසිස්සෙහි මාරිස, උදග්ගචිත්තො සුමනො පාදෙ වන්දති චක්ඛුම.
1033. සුඛිතො බාවරී හොතු සහසිස්සෙහි බ්රාහ්මණො, ත්වඤ්චාපි සුඛිතො හොහි චිරං ජීවාහි මාණව.
1034. බාවරිස්ස ව තුය්හං වා සබ්බෙසං සබ්බසංසයං, කතාවකාසා පුච්ඡවෙහා යං කිඤ්චි මනසිච්ඡථ.
1035. සම්බුද්ධෙන කතොකාසො නිසීදිත්වාන පඤ්ජලී, අජිතො පඨමං පඤ්හං තත්ථ පුච්ඡි තථාගතං.
වත්ථුගාථා නිට්ඨිතා.
5. 1.
අජිතසුත්තං{1}
1036. කෙනස්සු නිවුතො ලොකො (ඉච්චා යස්මා අජිතො) කෙනස්සු නප්පකාසතී, කිස්සාභිලෙපනං බ්රූසි කිංසු තස්ස සහබ්භයං.
1037. අවිජ්ජාය නිවුතො ලොකො (අජිතාති භගවා) වෙවිච්ඡා පමාදා නප්පකාසති, ජප්පාභිලෙපනං බ්රූමි දුක්ඛමස්ස මහබ්භයං.
1038. සවන්ති සබ්බධි සොතා (ඉච්චා යස්මා අජිතො) සොතානං කිං නිවාරණං සොතානං සංවරං බ්රූහි කෙන සොතා පිථියරෙ{2}
1039. යානි සොතානි ලොකස්මිං (අජිතාති භගවා) සති තෙසං නිවාරණං, සොතානං සංවරං බ්රූමි පඤ්ඤායෙතෙ පිථියරෙ{2}
1040. පඤ්ඤා චෙව සතී චෙව (ඉච්චායස්මා අජිතො.) නාමරූපඤ්ච මාරිස, එතං මෙ පුට්ඨො පබ්රූහි කත්ථෙතං උපරුජ්ඣති
1041. යමෙතං පඤ්හං අපුච්ඡි අජිත තං වදාමි තෙ, යත්ථ නාමඤ්ච රූපඤ්ච අසෙසං උපරුජ්ඣති, විඤ්ඤාණස්ස නිරොධෙන එත්ථෙතං උපරුජ්ඣති.
1042. යෙ ච සඞ්ඛාතධම්මා සෙ යෙ ච සෙඛා පුථූ ඉධ, තෙසං මෙ නිපකො ඉරියං පුටෙඨා පබ්රූහි මාරිස.
1043. කාමෙසු නාභිගිජ්ඣෙය්ය මනසා නාවිලො සියා, කුසලො සබ්බධම්මානං සතො භික්ඛු පරිබ්බජෙති.
අජිතසුත්තං පඨමං{3}
5. 2.
තිස්සමෙත්තෙය්යසුත්තං{1}
1044. කොධං සංතුසිතො ලොකෙ (ඉච්චායස්මා තිස්ස මෙතතය්යො.) කස්ස නො සන්ති ඉඤ්ජිතා, කො උභන්තම්භි ඤ්ඤාය මජ්ඣෙ මන්තා න ලිප්පති, කං බ්රූසි මහාපුරිසොති කො ඉධ සිබ්බනී මච්චගා?
1045. කාමෙසු බ්රහ්මචරියවා (මෙත්තෙය්යාති භගවා) වීතතණ්හො සදා සතො, සඞ්ඛාය නිබ්බුතො භික්ඛු තස්ස නො සන්ති ඉඤ්ජිතා.
1046. සො උභන්තමභිඤ්ඤාය මජ්ඣෙ මන්තා න ලිප්පති, තං බ්රූමි මහාපුරිසොති සොධ{2} සිබ්බනි මච්චගාති.
තිස්සමෙත්තෙය්යසුත්තං දුතියං{3}.
5. 3.