442. එස මුඤ්ජං පරිහරෙ ධීරත්ථු මම ජීවිතං, සඞ්ගාමෙ මෙ මතං සෙය්යො යඤ්චෙ ජීවෙ පරාජිතො.
443. පගාළ්හා එත්ථ{2} න දිස්සන්ති එකෙ සමණබ්රාහ්මණා. තඤ්ච මග්ගං න ජානන්ති යෙන ගච්ඡන්ති සුබ්බතා.
444. සමන්තා ධජිනිං දිස්වා යුත්තං මාරං සවාහිනිං, යුද්ධාය පච්චුග්ගච්ඡාමි මා මං ඨානා අචාවයි.
445. යන්තෙතං නප්පසහති සෙනං ලොකො සදෙවකො, තන්තෙ පඤ්ඤාය ගච්ඡාමි ආමං පත්තංව අස්මනා.
446. වසිං කරිත්වා සංකප්පං සතිඤ්ච සුප්පතිට්ඨිතං, රට්ඨා රට්ඨං විචරිස්සං{3} සාවකෙ විනයං පුථු.
447. තෙ අප්පමත්තා පහිතත්තා මම සාසනකාරකා, අකාමස්ස තෙ ගමිස්සන්ති යත්ථ ගන්ත්වා න සොචරෙ.
448. සත්තවස්සානි භගවන්තං අනුබන්ධිං පදා පදං, ඔතාරං නාධිගච්ඡිස්සං සම්බුද්ධස්ස සතීමතො.
449. මෙදවණ්ණංව පාසාණං වායසො අනුපරියගා, අපෙත්ථ මුදු වින්දෙම අපි අස්සාදනා සියා.
450. අලද්ධා තත්ථ අස්සාදං වායසෙත්තො අපක්කමි, කාකොව සෙලං ආසජ්ජ නිබ්බිජ්ජාපෙම ගොතමං.
451. තස්ස සොකපරෙතස්ස වීණා කච්ඡා අභස්සථ, තතො සො දුම්මනො යක්ඛො තත්ථෙවන්තරධායථාති.
පධානසුත්තං නිට්ඨිතං.
3. 3.
සුභාසිත සුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ -පෙ- භගවා එතදවොච:
චතූහි භික්ඛවෙ අඞ්ගෙහි සමන්නාගතා වාචා සුභාසිතා හොති න දුබ්භාසිතා, අනවජ්ජා ච අනනුවජ්ජා ච විඤ්ඤූනං, කතමෙහි චතූහි:
ඉධ භික්ඛවෙ භික්ඛු සුභාසිතං යෙව භාසති නො දුබ්භාසිතං ධම්මං යෙව භාසති නො අධම්මං, පියං යෙව භාසති නො අප්පියං, සච්ච යෙව භාසති නො අලිකං. ඉමෙහි ඛො භික්ඛවෙ චතූහි අඞ්ගෙහි සමන්නාගතා වාචා සුභාසිතා හොති න දුබ්භාසිතා, අනවජ්ජා ච අනනුවජ්ජා ච විඤ්ඤූනන්ති. ඉදමවොච භගවා ඉදං වත්වා සුගතො අථාපරං එතදවොච සත්ථා:
452. සුභාසිතං උත්තමමාහු සන්තො ධම්මං භණෙ නාධම්මං තං දුතියං, පියං භණෙ නාප්පියං තං තතියං සච්චං භණෙ නාලිකං තං චතුත්ථන්ති.
අථ ඛො ආයස්මා වංගීසො උපට්ඨායාසනා එකංසං චීවරං කත්වා යෙන භගවා තෙනඤ්ජලිං පණාමෙත්වා භගවන්තං එතදවොච: පටිභාති මං භගවා පටිභාති මං භගවාති.
පටිභාතු තං වංගීසා’ති භගවා අවොච.
අථ ඛො ආයස්මා වංගීසො භගවන්තං සම්මුඛා සාරුප්පාහි ගාථාහි අභිත්ථවි.
453. තමෙව භාසං භාසෙය්ය යායත්තානං න තාපයෙ, පරෙච න විහිංසෙය්ය සා වෙ වාචා සුභාසිතා.
454. පියවාචමෙව භාසෙය්ය යා වාචා පතිනන්දිතා, යං අනාදාය පාපානි පරෙසං භාසතෙ පියං.
455. සච්චං වෙ අමතා වාචා එස ධම්මො සනන්තනො, සච්චෙ අත්ථෙ ච ධම්මෙ ච ආහු සන්තො පතිට්ඨිතා.
456. යං බුද්ධො භාසතී වාචං ඛෙමං නිබ්බානපත්තියා, දුක්ඛස්සන්තකිරියාය සා වෙ වාචානමුත්තමාති.
සුභාසිතසුත්තං නිට්ඨිතං.
3. 4.
සුන්දරිකභාරද්වාජ සුත්තං
එවං මෙ සුතං: එකං භගවා කොසලෙසු විහරති සුන්දරිකාය නදියා තීරෙ. තෙන ඛො පන සමයෙන සුන්දරිකභාරද්වාජො බ්රාහ්මණො සුන්දරිකාය නදියා තීරෙ අග්ගිං ජුහති, අග්ගිහුත්තං පරිචරති, අථ ඛො සුන්දරිකභාරද්වාජො බ්රාහ්මණො අග්ගිං ජුහිත්වා අග්ගිහුත්තං පරිචරිත්වා උට්ඨායාසනා සමන්තා චතුද්දිසා අනුවිලොකෙසි කො නු ඛො ඉමං හව්යසෙසං භුඤ්ජෙය්යාති. අද්දසා ඛො සුන්දරිකභාරද්වාජො බ්රාහ්මණො භගවන්තං අවිදූරෙ අඤ්ඤතරස්මිං රුක්ඛමූලෙ සසීසං පාරුතං නිසින්නං දිස්වාන වාමෙන හත්ථෙන හව්යසෙසං ගහෙත්වා දක්ඛිණෙන හත්ථෙන කමණ්ඩලුං ගහෙත්වා යෙන භගවා තෙනුපසඞ්කමි.
අථ ඛො භගවා සුන්දරික භාරද්වාජස්ස බ්රාහ්මණස්ස පදසද්දෙන සීසං විවරි, අථ ඛො සුන්දරිකභාරද්වාජො බ්රාහ්මණො “මුණ්ඩො අයං භවං මුණ්ඩකො අයං භවන්ති” තතො ව පුන නිවත්තිතුකාමො අහොසි, අථ ඛො සුන්දරිකභාරද්වාජස්ස බ්රාහ්මණස්ස එතදහොසි.
මුණ්ඩාපි භි ඉධෙකච්චෙ බ්රාහ්මණා භවන්ති යන්නූනාහං උපසඞ්කමිත්වා ජාතිං පුච්ඡෙය්යන්ති, අථ ඛො සුන්දරිකභාරද්වාජො බ්රාහ්මණො යෙන භගවා තෙනුපසඞ්කමි, උපසඞ්කමිත්වා භගවන්තං එතදවොච කිංජච්චො භවන්ති, අථ ඛො භගවා සුන්දරිකභාරද්වාජං බ්රාහ්මණං ගාථාහි අජ්ඣභාසි.
457. න බ්රාහ්මණො නො’ම්හි න රාජපුත්තො න වෙස්සායනො උද කොචි නො’ම්හි, ගොත්තං පරිඤ්ඤාය පුථුජ්ජනානං අකිඤ්චනො මන්ත චරාමි ලොකෙ.
458. සඞ්ඝාටිවාසී අගහො චරාමි නිවුත්තකෙසො අභිනිබ්බුතත්තො, අලිප්පමානො ඉධ මානවෙහි අකල්ලං මං බ්රාහ්මණ පුච්ඡසි ගොත්තපඤ්හං.
459. පුච්ඡන්ති වෙ භො බ්රාහ්මණා බ්රාහ්මණෙහි සහ බ්රාහ්මණො නො භවන්ති බ්රාහ්මණො, වෙ ත්වං බ්රූසි මඤ්ච බ්රූසි අබ්රාහ්මණන්තං සාචිත්තිං පුච්ඡාමි තිපදං චතුවීසතක්ඛරං.
460. කිං නිස්සිතා ඉසයො මනුජා ඛත්තියා බ්රාහ්මණා දෙවතානං යඤ්ඤමකප්පයිංසු පුථු ඉධ ලොකෙ, යදන්තගු වෙදගූ යඤ්ඤ කාලෙ, යස්සාහුතිං තස්සිජ්ඣෙති බ්රූමි.
461. අද්ධා හි තස්ස හුතමිජ්ඣෙ (ඉති බ්රාහ්මණො) යං තාදිසං වෙදගුං අද්දසාමි, තුම්හාදිසානං හි අදස්සනෙන අඤ්ඤො ජනො භුඤ්ජති පූරළාසං.
462. තස්මාතිහ ත්වං බ්රාහ්මණ අත්ථෙන අත්ථිකො උපසඞ්කම්ම පුච්ඡ, සන්තං විධූමං අනිඝං නිරාසං අප්පෙවිධ අභිවින්දෙ සුමෙධං.
463. යඤ්ඤෙ රතාහං භො ගොතම යඤ්ඤං යට්ඨු කාමො නාහං පජානාමි අනුසාසතු මං භවං යත්ථ හුතං ඉජ්ඣෙ බ්රූහි මෙතං.
464. තෙන හි ත්වං බ්රාහ්මණ ඔදහස්සු සොතං ධම්මං තෙ දෙසිස්සාමි,
465. මා ජාතිං පුච්ඡි චරණඤ්ච පුච්ඡ කට්ඨා හවෙ ජායති ජාතවෙදො, නීචා කුලීනොපි මුනී ධිතිමා ආජානියො හොති හිරීනිසෙධො.
466. සච්චෙන දන්තො දමසා උපෙතො වෙදන්තගූ වුසිතබ්රහ්මචරියො, කාලෙන තම්හි හව්යං පවෙච්ඡෙ යො බ්රාහ්මණො පුඤ්ඤපෙඛො{1} යජෙථ.
467. යෙ කාමෙ හිත්වා අගහා චරන්තී සුසඤ්ඤතත්තා තසරං ව උජ්ජුං, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
468. යෙ වීතරාගා සුසමාහිතින්ද්රියා චන්දො’ව රාහුග්ගහණා පමුත්තා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
469. අසජ්ජමානා විචරන්ති ලොකෙ සදා සතා හිත්වා මමායිතානි, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
470. යෙ කාමෙ හිත්වා අභිභුය්යචාරි යො වෙදි ජාතිමරණස්ස අන්තං, පරිනිබ්බුතො උදකරහදොව සීතො තථාගතො අරහති පූරළාසං.
471. සමො සමෙහි විසමෙහි දූරෙ තථාගතො හොති අනන්තපඤ්ඤො, අනූපලිත්තො ඉධ වා හුරං වා තථාගතො අරහති පූරළාසං.
472. යම්හි න මාහා වසතී න මානො යො වීතලොභො අමමො නිරාසො, පනුණ්ණ කොධො අභිනිබ්බුතත්තො යො බ්රාහ්මණො සොකමලං අභාසි තථාගතො අරහති පූරළාසං.
473. නිවෙසනං යො මනසො අහාසි පරිග්ගහා යස්ස න සන්ති කෙචි, අනුපාදියානො ඉධ වා හුරං වා තථාගතො අරහති පූරළාසං.
474. සමාහිතො යො උදතාරි ඔඝං ධම්මං චඤ්ඤාසි පරමාය දිට්ඨියා, ඛීණාසවො අන්තිමදෙහධාරී තථාගතො අරහති පූරළාසං.
475. භවාසවා යස්ස වචීඛරා ච විධූපිතා අත්ථගතා න සන්ති, ස වෙදගූ සබ්බධි විප්පමුත්තො තථාගතො අරහති පූරළාසං.
476. සඞ්ගාතිගො යස්ස න සන්ති සඞ්ගා සො මානසත්තෙසු අමානසත්තො දුක්ඛං පරිඤ්ඤාය සඛෙත්තවත්ථුං තථාගතො අරහති පූරළාසං.
477. ආසං අනිස්සාය විවෙකදස්සී පරවෙදියං දිට්ඨිමුපාතිවත්තො, ආරම්මණා යස්ස න සන්ති කෙචි තථාගතො අරහති පූරළාසං.
478. පරොවරා යස්ස සමෙච්ච ධම්මා විධූපිතා අත්ථගතා න සන්ති, සන්තො උපාදානඛයෙ විමුත්තො තථාගතො අරහති පූරළාසං.
479. සංයොජනං ජාතිඛයන්තදස්සී යොපානුදි රාගපථං අසෙසං, සුද්ධො නිද්දොසො විමලො අකාචො{1} තථාගතො අරහති පූරළාසං.
480. යො අත්තනාත්තානං නානුපස්සති සමාහිතො උජජුගතො ඨිතත්තො, ස වෙ අනෙජො අඛිලො අකඞ්ඛො තථාගතො අරහති පූරළාසං.
481. මොහන්තරා යස්ස න සන්ති කෙචි සබ්බෙසු ධම්මෙසු ච ඤාණදස්සී, සරීරඤ්ච අන්තිමං ධාරෙති පත්තො ච සම්බොධිමනුත්තරං සිවං එත්තාවතා යක්ඛස්ස සුද්ධී තථාගතො අරහති පූරළාසං.
482. හුතං ච මය්හං හුතමත්ථු සච්චං යං තාදිසං වෙදගුනං අලත්ථං, බ්රහ්මා හි සක්ඛි පතිගණ්හාතු මෙ භගවා භුඤ්ජතු මෙ භගවා පූරළාසං.
483. ගාථාභිගීතං මෙ අභොජනෙය්යං සම්පස්සතං බ්රාහ්මණ නෙස ධම්මො, ගාථාභිගීතං පනුදන්ති බුද්ධා ධම්මෙ සතී බ්රාහ්මණ වුත්තිරෙසා.
484. අඤ්ඤෙන ච කෙවලිනං මහෙසිං ඛීණාසවං කුක්කුච්චවූපසන්තං, අන්නෙන පානෙන උපට්ඨහස්සු ඛෙත්තං හි තං පුඤ්ඤපෙඛස්ස හොති.
485. සාධාහං භගවා තථා විජඤ්ඤං යො දක්ඛිණං භුඤ්ජෙය්ය මාදිසස්ස, යං යඤ්ඤකාලෙ පරියෙසමානො පප්පුය්ය තව සාසනං.
486. සාරම්භා යස්ස විගතා චිත්තං යස්ස අනාවිලං, විප්පමුත්තො ච කාමෙහි ථිනං යස්ස පනූදිතං.
487. සීමන්තානං විනෙතාරං ජාතිමරණකොවිදං, මුනිං මොනෙය්යසම්පන්නං තාදිසං යඤ්ඤමාගතං
488. භුකුටිං විනයිත්වාන පඤ්ජලිකා නමස්සථ, පූජෙථ අන්නපානෙන එවං ඉජ්ඣන්ති දක්ඛිණා.
489. බුද්ධො භවං අරහති පූරළාසං පුඤ්ඤක්ඛෙත්තමනුත්තරං, ආයාගො සබ්බලොකස්ස භොතො දින්නං මහප්ඵලන්ති.
අථ ඛො සුන්දරිකභාරද්වාජො බ්රාහ්මණො භගවන්තං එතදවොච: අභික්කන්තං භො ගොතම, අභික්කන්තං භො ගොතම, සෙය්යථාපි භො ගොතම නික්කුජ්ජිතං වා උක්කුජ්ජෙය්ය, පටිච්ඡන්නං වා විවරෙය්ය, මූළ්හස්ස වා මග්ගං ආචික්ඛෙය්ය, අන්ධකාරෙ වා තෙල පජ්ජොතං ධාරෙය්ය චක්ඛුමන්තො රූපානි දක්ඛිනන්ති, එවමෙවං භොතා ගොතමෙන අනෙකපරියායෙන ධම්මො පකාසිතො. එසාහං භවන්තං ගොතමං සරණං ගච්ඡාමිධම්මඤ්ච භික්ඛුසඞ්ඝඤ්ච. ලභෙය්යාහංභොතො ගොතමස්ස සන්තිකෙ පබ්බජ්ජං ලභෙය්යං උපසම්පදන්ති, අලත්ථ ඛො සුන්දරිකභාරද්වාජො බ්රාහ්මණො -පෙ- අරහතං අහොසීති.
සුන්දරිකභාරද්වාජසුත්තං නිට්ඨිතං
3. 5.
මාඝසුත්තං
එවං මෙ සුතං එකං සමයං භගවා රාජගහෙ විහරති ගිජ්ඣකූටෙ පබ්බතෙ. අථ ඛො මාඝො මාණවො යෙන භගවා තෙනුපසඞ්කමි උපසඞ්කමිත්වා භගවතා සද්ධිං සම්මොදි, සම්මොදනීයං කථං සාරාණීයං{1} වීතිසාරෙත්වා එකමන්තං නිසීදි, එකමන්තං නිසින්නො ඛො මාඝො මාණවො භගවන්තං එතදවොච:
අහං හි භො ගොතම, දායකො දානපති වදඤ්ඤූ යාචයොගො ධම්මෙන භොගෙ පරියෙසාමි, ධම්මෙන භොගෙ පරියෙසිත්වා ධම්මලද්ධෙහි භොගෙහි ධම්මාධිගතෙහි එකස්සාපි දදාමි දවින්නම්පි දදාමි තිණ්ණම්පි දදාමි චතුන්නම්පි දදාමි පඤ්චන්නම්පි දදාමි ඡන්නම්පි දදාමි සත්තන්නම්පි දදාමි අට්ඨන්නම්පි දදාමි නවන්නම්පි දදාමි දසන්නම්පි දදාමි වීසායපි දදාමි තිංසායපි දදාමි චත්තාරීසායපි දදාමි පඤ්ඤාසායපි දදාමි සතස්සපි දදාමි භිය්යොපි දදාමි. කච්චාහං ගොතම එකං දදන්තො එවං යජන්තො බහුං පුඤ්ඤං පසවාමිති,
තග්ඝ ත්වං මාණව, එවං දදන්තො එවං යජන්තො පරියෙසිත්වා ධම්මලද්ධෙහි භොගෙහි ධම්මාධිගතෙහි එකස්සපි දදාති -පෙ- සතස්සපි දදාති භිය්යො පි දදාමි බහුං පුඤ්ඤං පසවතීති,
අථ ඛො මාඝො මාණවො භගවන්තං ගාථාය අජ්ඣභාසි.
490. පුච්ඡාමහං ගොතමං වදඤ්ඤුං (ඉති මාඝො මාණවො) කාසායවාසිං අගිහං{2} චරන්තං යො යාචයොගො දානපතී ගහට්ඨො, දදං පරෙසං ඉධ අන්නපානං කත්ථ හුතං යජමානස්ස සුජ්ඣෙ.
491. යො යාචයොගො දානපතී ගහට්ඨො (මාඝාති භගවා) පුඤ්ඤත්ථිකො යජති පුඤ්ඤපෙඛො දදං පරෙසං ඉධ අන්නපානං ආරාධයෙ දක්ඛිණෙය්යෙ හි තාදි.
492. යො යාචයොගො දානපතී ගහට්ඨො (ඉති මාඝො මාණවො) පුඤ්ඤත්ථිකො යජති පුඤ්ඤපෙඛො, දදං පරෙසං ඉධ අන්නපානං අක්ඛාහි මෙ භගවා දක්ඛිණෙය්යෙ.
493. යෙ චෙ අසත්තා විචරන්ති ලොකෙ අකිඤ්චනා කෙවලිනො යතත්තා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
494. යෙ සබ්බංසයොජනබන්ධනච්ඡිදා දන්තා විමුත්තා අනීඝා නිරාසා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
495. යෙ සබ්බසංයොජනවිප්පමුත්තා දන්තා විමුත්තා අනීඝා නිරාසා කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
496. රාගඤ්ච දොසඤ්ච පහාය මොහං ඛීණාසවා වුසිතබ්රහ්මචරියා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
497. යෙසු න මායා වසති න මානො යෙ වීතලොභා අමමා නිරාසා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
498. යෙ වෙ න තණ්හාසු උපාතිපන්නා විතරෙය්ය ඔඝං අමමා චරන්ති. කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
499. යෙසං තණ්හා නත්ථි කුහිඤ්චි ලොකෙ භවාභවාය ඉධ වා හුරං වා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
500. යෙ කාමෙ හිත්වා අගිහා{1} චරන්ති සුසඤ්ඤතත්තා තසරංව උජ්ජුං කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
501. යෙ වීතරාගා සුසමාහිතින්ද්රියා චන්දොව රාහුග්ගහණා පමුත්තා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
502. සමිතාවිනො වීතරාගා අකොපා යෙසං ගතී නත්ථි ඉධ විප්පහාය, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
503. ජහිත්වා ජාතිමරණං අසෙසං කථංකථිං සබ්බමුපාතිවත්තා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
504. යෙ අත්තදීපා විවරන්ති ලොකෙ අකිඤ්චනා සබ්බධි විප්පමුත්තා, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
505. යෙ හෙත්ථ ජානන්ති යථා යථා ඉදං අයමන්තිමා නත්ථි පුනබ්භවොති, කාලෙන තෙසු හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
506. යො වෙදගූ ඣානරතො සතීමා සම්බොධිපත්තො සරණං බහුන්නං, කාලෙන තම්හි හව්යං පවෙච්ඡෙ යො බ්රාහ්මණො පුඤ්ඤපෙඛො යජෙථ.
507. අද්ධා අමොඝා මම පුච්ඡානා අහු (ඉති මාඝොමාණවො) අක්ඛාසි මෙ භගවා දක්ඛිණෙය්යො, ත්වං හෙත්ථ ජානාසි යථා තථා ඉදං තථා හි තෙ විදිතො එස ධම්මො.
508. යො යාචයොගො දානපතී ගහට්ඨො පුඤ්ඤත්ථිකො යජති පුඤ්ඤපෙඛො, දදං පරෙසං ඉධ අන්නපානං අක්ඛාහි මෙ භගවා යඤ්ඤසම්පදං.
509. යජස්සු යජමානො මාඝාති (භගවා) සබ්බත්ථ ච විප්පසාදෙහි චිත්තං, ආරම්මණං යජමානස්ස යඤ්ඤං එත්ථ පතිට්ඨාය ජහාති දොසං.
510. සො වීතරාගො පවිනෙය්ය දොසං මෙත්තං චිත්තං භාවයං අප්පමාණං,{1} රත්තින්දිවං සතතං අප්පමත්තො සබ්බාදිසා ඵරතෙ අප්පමඤ්ඤං.
511. කො සුජ්ඣති මුච්චති බජ්ඣතී ච කෙනත්තනා ගච්ඡති බ්රහ්මලොකං, අජානතො මෙ මුනි බ්රූහි පුට්ඨො භගවා හි මෙ සක්ඛි බ්රහ්මජ්ජ දිට්ඨො තුවං හි නො බ්රහ්මසමොති සච්චං කථං උපපජ්ජති බ්රහ්මලොකං ජුතීමා.
512. යො යජති තිවිධං පුඤ්ඤසම්පදං (මාඝාති භගවා) ආරාධයෙ දක්ඛිණෙය්යෙති තාදී, එවං යජිත්වා සම්මා යාචයොගො උපපජ්ජති බ්රහ්මලොකන්ති බ්රූමි.
එවං වුත්තෙ මාඝො මාණවො භගවන්තං එතදවොච: අභික්කන්තං භො ගොතම -පෙ- අජ්ජතග්ගෙ පාණුපෙතං සරණං ගතන්ති.
මාඝසුත්තං නිට්ඨිතං.
3. 6.
සභිය සුත්තං
එවං මෙ සුතං එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන සභියස්ස පරිබ්බාජකස්ස පුරාණසාලොහිතාය දෙවතාය පඤ්හා උද්දිට්ඨා හොන්ති, යො තෙ සභිය සමණො වා බ්රාහ්මණො වා ඉමෙ පඤ්හෙ පුට්ඨො ව්යාකරොති, තස්ස සන්තිකෙ බ්රහ්මචරියං චරෙය්යාසීති.
අථ ඛො සභියො පරිබ්බජාකො තස්සා දෙවතාය සන්තිකෙ තෙ පඤ්හෙ උග්ගහෙත්වා යෙ තෙ සමණබ්රාහ්මණා සඞ්ඝිනො ගණිනො ගණාචරියා ඤාතා යසස්සිනො තිත්ථකරා සාධුසම්මතා බහුජනස්ස, සෙය්යථිදං: පූරණො කස්සපො{1} මක්ඛලි ගොසාලො අජිතො කෙසකම්බලො පකුධො කච්චායනො සඤ්ජයො බෙල්ලට්ඨි පුත්තො නිගණ්ඨොනාතපුත්තො. තෙ උපසඞ්කමිත්වා තෙ පඤ්හෙ පුච්ඡති, තෙ සභියෙන පරිබ්බාජකෙන පඤ්හෙ පුට්ඨා න සම්පායන්ති. අසම්පායන්තා කොපඤ්ච දොසඤ්ච අප්පච්චයඤ්ච පාතුකරොන්ති, අපි ච සභියඤ්ඤෙව පරිබ්බාජකං පටිපුච්ඡන්ති. අථ ඛො සභියස්ස පරිබ්බාජකස්ස එතදහොසි: යෙ ඛො තෙ භොන්තො සමණබ්රාහ්මණා සඞ්ඝිනො ගණිනො ගණාචරියා ඤාතා යසස්සිනො තිත්ථකරා සාධුසම්මතා බහුජනස්ස, සෙය්යථීදං. පූරණො කස්සපො -පෙ- නිගණ්ඨො නාතපුත්තො. තෙ මයා පඤ්හෙ පුට්ඨා න සම්පායන්ති අසම්පායන්තා කොපඤ්ච දොසඤ්ච අප්පච්චයඤ්ච පාතුකාරොන්ති, අපි ච මමඤ්ඤෙවෙත්ථ පටිපුච්ඡන්ති, යන්නූනාහං හීනායාවත්තිත්වා කාමෙ පරිභුඤ්ජෙය්යන්ති.