359. යථාවාදී තථාකාරී අහු බුද්ධස්ස සාවකො, අච්ඡිදා මච්චුනො ජාලං තතං මායාවිනො දළ්හං.
360. අද්දස භගවා ආදිං උපාදානස්ස කප්පියො, අච්චගා වත කප්පායනො මච්චුධෙය්යං සුදුත්තරන්තී.
නිග්රොධකප්පසුත්තං නිට්ඨිතං.
2. 13.
සම්මාපරිබ්බාජනීය සුත්තං
361. පුච්ඡාමි මුනිං පහූතපඤ්ඤං තිණ්ණං පාරගතං පරිනිබ්බුතං ඨිතත්තං, නික්ඛම්ම ඝරා පනුජ්ජ කාමෙ කථං භික්ඛු සම්මා සො ලොකෙ පරිබ්බජෙය්ය.
362. යස්ස මඞ්ගලා සමූහතා (ඉති භගවා) උප්පාතසුපිනා ච ලක්ඛණා ච, සො මඞ්ගලදොසවිප්පහීනො භික්ඛු සම්මා සො ලොකෙ පරිබ්බජෙය්ය.
363. රාගං විනයෙථ මානුසෙසු දිබ්බෙසු කාමෙසු වාපි භික්ඛු, අතික්කම්ම භවං සමෙච්ච ධම්මං සම්මා සො ලොකෙ පරිබ්බජෙය්ය.
364. විපිට්ඨි කත්වාන පෙසුනානි කොධං කදරියං ජහෙය්ය භික්ඛු, අනුරොධවිරොධවිප්පහීනො සම්මා සො ලොකෙ පරිබ්බජෙය්ය.
365. හිත්වාන පියඤ්ච අප්පියඤ්ච අනුපාදාය අනිස්සිතො කුහිඤ්චි, සංයොජනියෙහි විප්පමුත්තො සම්මා සො ලොකෙ පරිබ්බජෙය්ය.
366. න සො උපධීසු සාරමෙති ආදානෙසු විනෙය්ය ඡන්දරාගං, සො අනිස්සිතො අනඤ්ඤනෙය්යො සම්මා සො ලොකෙ පරිබ්බජෙය්ය.
367. වචසා මනසා ච කම්මනා ච අවිරුද්ධො සම්මා විදිත්වා ධම්මං, නිබ්බානපදාභිපත්ථයානො සම්මා සො ලොකෙ පරිබ්බජෙය්ය.{1}
368. යො වන්දති මං{1} න උණ්ණමෙය්ය අක්කූට්ඨොපි න සන්ධියෙථ භික්ඛු, ලද්ධා පරභොජනං න මජ්ජෙ, සම්මා සො ලොකෙ පරිබ්බජෙය්ය.
369. ලොභඤ්ච භවඤ්ච විප්පහාය විරතො ඡෙදනබන්ධනාතො භික්ඛූ, සො තිණ්ණකථංකථො විසල්ලො සම්මා සො ලොකෙ පරිබ්බජෙය්ය.
370. සාරුප්පමත්තනො විදිත්වා න ච භික්ඛු හිංසෙය්ය කඤ්චි ලොකෙ, යථා තථියං විදිත්වා ධම්මං සම්මා සො ලොකෙ පරිබ්බජෙය්ය.
371. යස්සානුසයා න සන්ති කෙචි මූලා අකුසලා සමූහතා සෙ, සො නිරාසයො අනාසයානො සම්මා සො ලොකෙ පරිබ්බජෙය්ය.
372. ආසවඛීණො පහීනමානො සබ්බං රාගපථං උපාතිවත්තො, දන්තො පරිනිබ්බුතො ඨිතත්තො සම්මා සො ලොකෙ පරිබ්බජෙය්ය.
373. සද්ධො සුතවා නියාමදස්සී වග්ගගතෙසු න වග්ගසාරි ධීරො, ලොභං දොසං විනෙය්ය පටිඝං සම්මා සො ලොකෙ පරිබ්බජෙය්ය.
374. සංසුද්ධජිනො විවත්තච්ඡද්දො ධම්මෙසු වසී පාරගූ අනෙජො, සඞ්ඛාරනිරොධඤාණකුසලො සම්මා සො ලොකෙ පරිබ්බජෙය්ය.
375. අතීතෙසු අනාගතෙසු චාපි කප්පාතීතො අතිච්ච සුද්ධිපඤ්ඤො, සබ්බායතනෙහි විප්පමුත්තො සම්මා සො ලොකෙ පරිබ්බජෙය්ය.
376. අඤ්ඤාය පදං සමෙච්ච ධම්මං විවටං දිස්වාන පහානමාසවානං, සබ්බූපධිනං පරික්ඛයානො සම්මා සො ලොකෙ පරිබ්බජෙය්ය.
377. අද්ධා හි භගවා තථෙව එතං යො සො එවං විහාරි දන්තො භික්ඛූ, සබ්බසංයොජනියෙ{1} ච විතිචත්තො සම්මා සො ලොකෙ පරිබ්බජෙය්යා’ති.
සම්මාපරිබ්බාජනියසුත්තං නිට්ඨිතං.
2. 14.
ධම්මික සුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො ධම්මිකො උපාසකො පඤ්චහි උපාසකෙසතෙහි සද්ධිං යෙන භගවා තෙසුපසඞ්කමි, උපසඞ්ගමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ධම්මිකො උපාසකො භගවන්තං ගාථාය අජ්ඣභාසි.
378. පුච්ඡාමි තං ගොතම භූරිපඤ්ඤ කථංකරො සාවකො සාධු හොති, යො වා අගාරා අනගාරමෙති අගාරිනො වා පනුපාසකාසෙ.
379. තුවං හි ලොකස්ස සදෙවකස්ස ගතිං පජානාසි පරායනඤ්ච, න චත්ථි තුල්යො නිපුණත්ථදස්සී තුවං හි බුද්ධං පවරං වදන්ති.
380. සබ්බං තුවං ඤාණමවෙච්ච ධම්මං පකාසෙසි සත්තෙ අනුකම්පමානො, විවත්තච්ඡද්දොසි සමන්තචක්ඛු විරොචසී විමලො සබ්බලොකෙ.
381. ආගඤ්ඡි තෙ සන්තිකෙ නාගරාජා එරාවණො නාම ජිනොති සුත්වා, සො පි තයා මන්තයිත්වා අජ්ඣගමා සාධූති සුත්වාන පතීතරූපො.
382. රාජාපි තං වෙස්සවණො කුවෙරො උජෙති ධම්මං පරිපුච්ඡමානො, තස්සාපි ත්වං පුච්ඡිතො බ්රූසි ධීර සො චාපි සුත්වාන පතීතරූපො.
383. යෙ කෙචි මෙ තිත්ථියා වාදසීලා ආජීවකා වා යදි වා නිගණ්ඨා, පඤ්ඤාය තං නාතිතරන්ති සබ්බෙ ඨිතො වජන්තං විය සීඝගාමිං.
384. යෙ කෙචි මෙ බ්රාහ්මණා වාදසීලා වුද්ධා චාපි බ්රාහ්මණා සන්ති කෙචි, සබ්බෙ තයි අත්ථබද්ධා භවන්ති යෙ චාපි චඤ්ඤෙ වාදිනො මඤ්ඤමානා.
385. අයං හි ධම්මො නිපුණො සුඛො ච යොයං තයා භගවා සුප්පවුත්තො, තමෙව සබ්බෙ{1} සුස්සූසමානා තං නො වද පුච්ඡිතො බුද්ධසෙට්ඨ.
386. සබ්බෙපි මෙ භික්ඛවො සන්නිසින්නා උපාසකා චාපි තථෙව සොතුං, සුණන්තු ධම්මං විමලෙනානුබුද්ධං සුභාසිතං වාසවස්සෙව දෙවා.
387. සුණාථ මෙ භික්ඛවො සාචයාමි වො ධම්මං ධුතං තඤ්ච ධරාථ සබ්බෙ, ඉරියාපථං පබ්බජිතානුලොමිකං සෙවෙථ නං අත්ථදස්සී මුතීමා.
388. න වෙ විකාලෙ විචරෙය්ය භික්ඛු ගාමඤ්ච{1} පිණ්ඩාය චරෙය්ය කාලෙ, අකාලචාරිං හි සජන්ති සඞ්ගා තස්මා විකාලෙ න චරන්ති බුද්ධා.
389. රූපා ච සද්දා ච රසා ච ගන්ධා ඵස්සා ච යෙ සම්මදයන්ති සත්තෙ, එතෙසු ධම්මෙසු විනෙය්ය ඡන්දං කාලෙන සො පවිසෙ පාතරාසං.
390. පිණ්ඩඤ්ච භික්ඛු සමයෙන ලද්ධා එකො පටික්කම්ම රහො නිසීදෙ, අජ්ඣත්තචින්තී න මනො බහිද්ධා නිච්ඡාරයෙ සඞ්ගහිතත්තභාවො.
391. සචෙ පි සො සල්ලපෙ සාවකෙන අඤ්ඤෙන වා කෙනචි භික්ඛුනා වා, ධම්මං පණීතං තමුදාහරෙය්ය න පෙසුනං නොපි පරූපවාදං.
392. වාදං හි එකෙ පටිසෙනියන්ති න තෙ පසංසාම පරිත්තපඤ්ඤෙ, තතො තතො නෙ පසජන්ති සඞ්ගා චිත්තං හි තෙ තත්ථ ගමෙන්ති දූරෙ.
393. පිණ්ඩං විහාරං සයනාසනඤ්ච ආපඤ්ච සඞ්ඝාටිරජූපවාහනං, සුත්වාන ධම්මං සුගතෙන දෙසිතං සඞ්ඛාය සෙවෙ වරපඤ්ඤසාවකො.
394. තස්වා හි පිණ්ඩෙ සයනාසනෙ ච ආපෙ ච සංඝාටිරජූපවාහනෙ, එතෙසු ධම්මෙසු අනූපලිත්තො භික්ඛූ යථා පොක්ඛරෙ වාරිබින්දූ.
395. ගහට්ඨවත්තං පන වො වදාමි යථාකරො සාවකො සාධු හොති, නහෙස{1} ලබ්භා සපරිග්ගහෙන ඵස්සෙතුං සො කෙවලො භික්ඛු ධම්මො.
396. පාණං න හානෙ න ච ඝාතයෙය්ය න වානුජඤ්ඤා හනතං පරෙසං, සබ්බෙසු භූතෙසු නිධාය දණ්ඩං යෙ ථාවරා යෙ ව තසා සන්ති{2}ලොකෙ.
397. තතො අදින්නං පරිවජ්ජයෙය්ය කිඤ්චි ක්වචි සාවකො බුජ්ඣමානො, න හාරයෙ හරතං නානුජඤ්ඤා සබ්බං අදින්නං පරිවජ්ජයෙය්ය.
398. අබ්රහ්මචරියං පරිවජ්ජයෙය්ය අඞ්ගාරකාසුං ජලිතං ව විඤ්ඤූ, අසම්භුණන්තො පන බ්රහ්මචරියං පරස්ස දාරං නාතික්කමෙය්ය.
399. සභග්ගතො වා පරිසග්ගතො වා එකස්ස චෙකො න මුසා භණෙය්ය, න භාණයෙ භණතං නානුජඤ්ඤා සබ්බං අභූතං පරිවජ්ජයෙය්ය.
400. මජ්ජඤ්ච පානං න සමාචරෙය්ය ධම්මං ඉමං රොචයෙ යො ගහට්ඨො, න පායයෙ පිබතං නානුජඤ්ඤා උම්මාදනන්තං ඉති නං විදිත්වා.
401. මදා හි පාපානි කරොන්තී බාලා කරොන්ති චඤ්ඤෙපි ජනෙ පමත්තෙ, එතං අපුඤ්ඤායතනං විවජ්ජයෙ උම්මාදනං මොහනං බාලකන්තං.
402. පාණං න හානෙ න චදින්නමාදියෙ මුසා න භාසෙ න ච මජ්ජපො සියා, අබ්රහ්මචරියා විරමෙය්ය මෙථුනා රත්තිං න භුඤ්ජෙය්ය විකාලභොජනං.
403. මාලං න ධාරෙ න ච ගන්ධමාචරෙ මඤ්චෙ ඡමායං ව සයෙථ සන්ථතෙ, එතං හි අට්ඨඞ්ගිකමාහු පොසථං බුද්ධෙන දුක්ඛන්තගුනා පකාසිතං.
404. තතො ච පක්ඛස්සුපවස්සුපොසථං චාතුද්දසිං පඤ්චදසිඤ්ච අට්ඨමිං, පාටිහාරියපක්ඛඤ්ච පසන්නමානසො අට්ඨඞ්ගුපෙතං සුසමත්තරූපං.
405. තතො ච පාතො උපවුත්ථුපොසථො අන්නෙන පානෙන ච භික්ඛූ සඞ්ඝං, පසන්න චිත්තො අනුමොදමානො යථාරහං සංවිභජෙථ විඤ්ඤූ.
406. ධම්මෙන මාතා පිතරො භරෙය්ය පයොජයෙ ධම්මිකං සො වණිජ්ජං, එතං ගිහී වත්තයං අප්පමත්තො{1} සයං පභෙ නාම උපෙති දෙවෙති.
ධම්මික සුත්තං නිට්ඨිතං.
චුල්ලවග්ගො දුතියො.
තස්සඋද්දානං:
රතනං ආමගන්ධඤ්ච හිරිං මඞ්ගලමුත්තමං, සූචිලොමො කපිලංච පුන බ්රාහ්මණධම්මිකං. ධම්මසුත්තං කිංසීලං උට්ඨානං අථ රාහුලො, කප්පො ච පරිබ්බාජඤ්ච ධම්මිකො ච පුනාපරං, චුද්දසෙතානි සුත්තානි චුල්ලවග්ගොති වුච්චති.
3. මහාවග්ගො
3. 1.
පබ්බජ්ජා සුත්තං
407. පබ්බජ්ජං කිත්තයිස්සාමි යථා පබ්බජි චක්ඛුමා, යථා වීමංසමානො සො පබ්බජ්ජං සමරොචයි.
408. සම්බාධො’ යං ඝරාවාසො රජස්සායතනං ඉති, අබ්භොකාසො ව පබ්බජ්ජා ඉති දිස්වාන පබ්බජි.
409. පබ්බජිත්වාන කායෙන පාපං කම්මං විවජ්ජයි, වචීදුච්චරිතං හිත්වා ආජීවං පරිසොධයි.
410. අගමා රාජගහං බුද්ධො මගධානං ගිරිබ්බජං, පිණ්ඩාය අභිහාරෙසි ආකිණ්ණවරලක්ඛණො.
411. තමද්දසා බිම්බිසාරො පාසාදස්මිං පතිට්ඨිතො, දිස්වා ලක්ඛණසම්පන්නං ඉමමත්ථං අභාසථ.
412. ඉමං භොන්තො නිසාමෙථ අභිරූපො බ්රහා සුචි, චරණෙන චෙව සම්පන්නො යුගමන්නං ච පෙක්ඛති.
413. ඔක්ඛිත්තචක්ඛූ සතිමා නායං නීචා කුලාමිව, රාජදූතා විධාවන්තු කුහිං භික්ඛු ගමිස්සති.
414. තෙ පෙසිතා රාජදූතා පිට්ඨිතො අනුබන්ධිසුං, කුහිං ගමිස්සතී භික්ඛු කත්ථ වාසො භවිස්සති.
415. සපදානං චරමානො ගුත්තද්වාරො සුසංවුතො, ඛිප්පං පත්තං අපූරෙසි සම්පජානො පතිස්සතො.
416. පිණ්ඩචාරං චරිත්වාන{1} නික්ඛම්ම නගරා මුනි, පණ්ඩවං අභිහාරෙසි එත්ථ වාසො භවිස්සති.
417. දිස්වාන වාසූපගතං තතො{2} දූතා උපාවිසුං, එකොව දූතො{3} ආගන්ත්වා රාජිනො පටිවෙදයි.
418. එස භික්ඛු මාහාරාජ පණ්ඩවස්ස පුරක්ඛතො, නිසින්නො ව්යග්ඝුසභොව සීහොව ගිරිගබ්භරෙ.
419. සුත්වාන දූතවචනං භද්දයානෙන ඛත්තියො, තරමානරූපො නිය්යාසී යෙන පණ්ඩවපබ්බතො.
420. ස යානභූමිං යායිත්වා යානා ඔරුය්හ ඛත්තියො, පත්තිකො උපසඞ්කම්ම ආසජ්ජ තං උපාවිසි.
421. නිසජ්ජ රාජා සම්මොදි කථං සාරාණීයං තතො, කථං සො වීතිසාරෙත්වා ඉමමත්ථං අභාසථ.
422. යුවා ච දහරො චාසි පඨමුප්පතිතො සුසු, වණ්ණාරොහෙන සම්පන්නො ජාතිමා විය ඛත්තියො.
423. සොහයන්තො අණීකග්ගං නාගසංඝපුරක්ඛතො, දදාමි භොගෙ භුඤ්ජස්සු ජාතිං වක්ඛාහි පුච්ඡිතො.
424. උජුං ජානපදො රාජා හිමවන්තස්ස පස්සතො, ධනවිරියෙන සම්පන්නො කොසලෙසු{4} නිකෙතිනො.
425. ආදිච්චා නාම ගොත්තෙන සාකියා නාම ජාතියා, තම්හා කුලා පබ්බජිතොම්හි රාජ න කාමෙ අභිපත්ථයං.
426. කාමෙස්වාදීනවං දිස්වා නෙක්ඛම්මං දට්ඨු ඛෙමතො, පධානායගමිස්සාමි එත්ථ මෙ රජ්ජතී{5} මනොති.
පබ්බජ්ජාසුත්තං නිට්ඨිතං.
3. 2.
පධාන සුත්තං
427. තං මං පධානපහිතත්තං නදිං නෙරඤ්ජරං පති, විපරක්කම්ම ඣායන්තං යොගක්ඛෙමස්ස පත්තියා.
428. නමුචී කරුණං වාචං භාසමානො උපාගමී, කිසො ත්වමසි දුබ්බණ්ණො සන්තිකෙ මරණං තව.
429. සහස්සභාගො මරණස්ස එකංසො තව ජීවිතං, ජීව හො{1} ජීවිතං සෙය්යො ජීවං පුඤ්ඤානි කාහසි.
430. චරතො ව තෙ බ්රහ්මචරියං අග්ගිහුත්තඤ්ච ජුහනො, පහූතං චීයතෙ පුඤ්ඤං කිම්පධානෙන කාහසි.
431. දුග්ගො මග්ගො පධානාය දුක්කරො දුරභිසම්භවො, ඉමා ගාථා භණං මාරො අට්ඨා බුද්ධස්ස සන්තිකෙ.
432. තං තථාවාදීනං මාරං භගවා එතදබ්රවී, පමත්තබන්ධු පාපිම යෙනත්ථෙන ඉධාගතො.
433. අණුමත්තෙනපි පුඤ්ඤෙන අත්ථො මය්හං න විජ්ජති, යෙසං ච අත්ථො පුඤ්ඤානං තෙ මාරො වත්තුමරහති.
434. අත්ථි සද්ධා තථා විරියං පඤ්ඤා ච මම විජ්ජති, එවං මං පහිතත්තම්පි කිං ජීව මම පුච්ඡසි.
435. නදීනමපි සොතානි අයං වාතො විසොසයෙ, කිඤ්ච මෙ පහිතත්තස්ස ලොහිතං නූපසුස්සයෙ.
436. ලොහිතෙ සුස්සමානම්හි පිත්තං සෙම්හඤ්ච සුස්සති, මංසෙසු ඛීයමානෙසු භිය්යො චිත්තං පසීදති, භිය්යො සති ච පඤ්ඤා ච සමාධි මම තිට්ඨති.
437. තස්ස මෙවං විහරතො පත්තස්සුත්තමවෙදනං, කාමෙ නාපෙක්ඛතෙ චිත්තං පස්ස සත්තස්ස සුද්ධතං,
438. කාමා තෙ පඨමා සෙනා දුතියා අරති වුච්චති, තතියා ඛුප්පිපාසා තෙ චතුත්ථි තණ්හා පවුච්චති.
439. පඤ්චමී ථීනමිද්ධං තෙ ඡට්ඨා භීරු පවුච්චති, සත්තමී විචිකිච්ඡා තෙ මක්ඛො ථම්භො තෙ අට්ඨමී.{1}
440. ලාභො සිලොකො සක්කාරො මිච්ඡා ලද්ධො ච යො යසො, යො චත්තානං සමුක්කංසෙ පරෙ ච අවජානති.
441. එසා නමුචි තෙ සෙනා කණ්හස්සාභිප්පහාරිණී, න තං අසූරො ජිනාති ජෙත්වා ච ලභතෙ සුඛං.