Saṁyutta Nikāya

Pali BJTදුස්සමාදහං වාපි සමාදහන්ති (කාමදාති භගවා) ඉන්ද්රියූපසමෙ රතා, තෙ ඡෙත්වා මච්චුනො ජාලං අරියා ගච්ඡන්ති කාමදාති.

Pali BJTදුග්ගමො භගවා විසමො මග්ගොති.

Pali BJT[භගවා:]

Pali BJTදුග්ගමෙ විසමෙ වාපි අරියා ගච්ඡන්ති කාමද, අනරියා විසමෙ මග්ගෙ පපතන්ති අවංසිරා, අරියානං සමො මග්ගො අරියා හි විසමෙ සමාති.

Pali BJT2. 1. 7.

Pali BJTපඤ්චාලචණ්ඩසුත්තං

Pali BJT88. සාවත්ථියං–

Pali BJTඑකමන්තං ඨිතො ඛො පඤ්චාලචණ්ඩො දෙවපුත්තො භගවතො සන්තිකෙ ඉමං ගාථං අභාසි:

Pali BJTසම්බාධෙ වත ඔකාසං අවින්දි භූරිමෙධසො, යො ඣානමබුධා{1} බුද්ධො පතිලීනනිසභො මුනීති.

Pali BJTසම්බාධෙ වාපි වින්දන්ති{2} (පඤ්චාලචණ්ඩාති භගවා) ධම්මං නිබ්බාණපත්තියා, යෙ සතිං පච්චලත්ථුං සු{3} සම්මා තෙ සුසමාහිතාති.

Pali BJT2. 1. 8.

Pali BJTතායනසුත්තං

Pali BJT89. සාවත්ථියං–

Pali BJTඅථ ඛො තායනො දෙවපුත්තො පුරාණතිත්ථකරො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො තායනො දෙවපුත්තො භගවතො සන්තිකෙ ඉමා ගාථායො අභාසි:

Pali BJTඡින්ද සොතං පරක්කම්ම කාමෙ පනුද{4} බ්රාහ්මණ, නප්පහාය මුනී කාමෙ නෙකත්තමුපපජ්ජති.

Pali BJTකයිරා චෙ කයිරාථෙනං දළ්හමෙනං පරක්කමෙ, සිථිලො හි පරිබ්බාජො භිය්යො ආකිරතෙ රජං.

Pali BJTඅකතං දුක්කතං{5} සෙය්යො පච්ඡා තපති{6} දුක්කතං, කතඤ්ච සුකතං සෙය්යො යං කත්වා නානුතප්පති.

Pali BJTකුසො යථා දුග්ගහිතො හත්ථමෙවානුකන්තති, සාමඤ්ඤං දුප්පරාමට්ඨං නිරයායූපකඩ්ඪති.

Pali BJTයං කිඤ්චි සිථිලං කම්මං සංකිලිට්ඨඤ්ච යං වතං සංකස්සරං බ්රහ්මචරියං න තං හොති මහප්ඵලන්ති.

Pali BJTඉදමවොච තායනො දෙවපුත්තො. ඉදං වත්වා භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.

Pali BJTඅථ ඛො භගවා තස්සා රත්තියා අච්චයෙන භික්ඛූ ආමන්තෙසි: ඉමං භික්ඛවෙ රත්තිං තායනො නාම දෙවපුත්තො පුරාණතිත්ථකරො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං අට්ඨාසි. එකමන්තං ඨිතො භික්ඛවෙ තායනො{1} දෙවපුත්තො මම සන්තිකෙ ඉමා ගාථායො අභාසි:

Pali BJT“ඡින්ද සොතං පරක්කම්ම කාමෙ පනුද බ්රාහ්මණ, නප්පහාය මුනී කාමෙ නෙකත්ත මුපපජ්ජති.

Pali BJTකයිරා චෙ කයිරාථෙනං දළ්හමෙනං පරක්කමෙ, සිථිලො හි පරිබ්බාජො භිය්යො ආකිරතෙ රජන්ති.

Pali BJTඅකතං දුක්කතං සෙය්යො පච්ඡා තපති දුක්කතං, කතඤ්ච සුකතං සෙය්යො යං කත්වා නානුතප්පති.

Pali BJTකුසො යථා දුග්ගහිතො හත්ථමෙවානුකන්තති, සාමඤ්ඤං දුප්පරාමට්ඨං නිරයායූපකඩ්ඪති.

Pali BJTයං කිඤ්චි සිථිලං කම්මං සංකිලිට්ඨඤ්ච යං වතං, සඞ්කස්සරං බ්රහ්මචරියං න තං හොති මහප්ඵලන්ති.”

Pali BJTඉදමවොච තායනො දෙවපුත්තො, ඉදං වත්වා මං අභිවාදෙත්වා පදක්ඛිණං කත්වා තත්ථෙවන්තරධායි.

Pali BJTඋග්ගණ්හාථ භික්ඛවෙ, තායනගාථා. පරියාපුණාථ භික්ඛවෙ, තායනගාථා. ධාරෙථ භික්ඛවෙ, තායනගාථා. අත්ථසංහිතා භික්ඛවෙ, තායනගාථා. ආදිබ්රහ්මචරියිකාති.{2}

Pali BJT2. 1. 9.

Pali BJTචන්දිමසුත්තං.

Pali BJT90. සාවත්ථියං–

Pali BJTතෙන ඛො පන සමයෙන චන්දිමා දෙවපුත්තො රාහුනා අසුරින්දෙන ගහිතො හොති. අථ ඛො චන්දිමා දෙවපුත්තො භගවන්තං අනුස්සරමානො තායං වෙලායං ඉමං ගාථං අභාසි:

Pali BJTනමො තෙ බුද්ධ වීරත්ථු විප්පමුත්තොසි සබ්බධි, සම්බාධපටිපන්නොස්මි තස්ස මෙ සරණං භවාති.”

Pali BJTඅථ ඛො භගවා චන්දිමං දෙවපුත්තං ආරබ්භ රාහුං අසුරින්දං ගාථාය අජ්ඣභාසි:

Pali BJT“තථාගතං අරහන්තං චන්දිමා සරණං ගතො, රාහු චන්දං පමුඤ්චස්සු බුද්ධා ලොකානුකම්පකාති.”

Pali BJTඅථ ඛො රාහු අසුරින්දො චන්දිමං දෙවපුත්තං මුඤ්චිත්වා තරමානරූපො යෙන වෙපචිත්ති අසුරින්දො තෙනුපසඞ්කමි. උපසඞ්කමිත්වා සංවිග්ගො ලොමහට්ඨජාතො එකමන්තං අට්ඨාසි. එකමන්තං ඨිතං ඛො රාහුං අසුරින්දං වෙපචිත්ති අසුරින්දො ගාථාය අජ්ඣභාසි:

Pali BJTකින්නු සන්තරමානොව රාහු චන්දං පමුඤ්චසි, සංවිග්ගරූපො ආගම්ම කින්නු භීතො ව තිට්ඨසීති.

Pali BJTසත්තධා මෙ ඵලෙ මුද්ධා ජීවන්තො න සුඛං ලභෙ, බුද්ධගාථාභිගීතොම්හි නො චෙ මුඤ්චෙය්ය චන්දිමන්ති.

Pali BJT2. 1. 10.

Pali BJTසූරිය{1}සුත්තං

Pali BJT91. සාවත්ථියං–

Pali BJTතෙන ඛො පන සමයෙන සුරියො{1} දෙවපුත්තො රාහුනා අසුරින්දෙන ගහිතො හොති. අථ ඛො සුරියො{1} දෙවපුත්තො භගවන්තං අනුස්සරමානො තායං වෙලායං ඉමං ගාථං අභාසි:

Pali BJT“නමො තෙ බුද්ධවීරත්ථු විප්පමුත්තොසි සබ්බධි, සම්බාධපටිපන්නොස්මි තස්ස මෙ සරණං භවාති.”

Pali BJTඅථ ඛො භගවා සුරියං{1} දෙවපුත්තං ආරබ්භ රාහුං අසුරින්දං ගාථාහි{2} අජ්ඣභාසි:

Pali BJT“තථාගතං අරහන්තං සුරියො{1} සරණං ගතො, රාහු සුරියං{1} පමුඤ්චස්සු බුද්ධා ලොකානුකම්පකාති.

Pali BJTයො අන්ධකාරෙ තමසී{3} පභඞ්කරො වෙරොචනො මණ්ඩලී උග්ගතෙජො, මා රාහු ගිලී චරං අන්තලික්ඛෙ{4} පජං මම රාහු පමුඤ්ච සූරියන්ති.”

Pali BJTඅථ ඛො රාහු අසුරින්දො සුරියං{1} දෙවපුත්තං මුඤ්චිත්වා තරමානරූපො යෙන වෙපචිත්ති අසුරින්දො තෙනුපසඞ්කමි. උපසඞ්කමිත්වා සංවිග්ගො ලොමහට්ඨජාතො එකමන්තං අට්ඨාසි. එකමන්තං ඨිතං ඛො රාහුං අසුරින්දං වෙපචිත්ති අසුරින්දො ගාථාය අජ්ඣභාසි:

Pali BJT“කින්නු සන්තරමානොව රාහු සුරියං පමුඤ්චසි, සංවිග්ගරූපො ආගම්ම කින්නු භීතොව තිට්ඨසීති.”

Pali BJT“සත්තධා මෙ ඵලෙ මුද්ධා ජීවන්තො න සුඛං ලභෙ, බුද්ධගාථාභිගීතොම්හි නො චෙ මුඤ්චෙය්ය සූරියන්ති.”

Pali BJTසුරියවග්ගො පඨමො

Pali BJTද්වෙ කස්සපා ච මාඝො ච මාගධො දාමලි කාමදො, පඤ්චාලචණ්ඩො තායනො චන්දිමසුරියෙන තෙ දසාති.

Pali BJT2. අනාථපිණ්ඩිකවග්ගො

Pali BJT2. 2. 1.

Pali BJTචන්දිමසසුත්තං.

Pali BJT92. සාවත්ථියං–

Pali BJTඅථ ඛො චන්දිමසො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො චන්දිමසො දෙවපුත්තො භගවතො සන්තිකෙ ඉමං ගාථං අභාසි:

Pali BJTතෙ හි සොත්ථිං ගමිස්සන්ති කච්ඡෙවාමකසෙ මගා, ඣානානි උපසම්පජ්ජ එකොදි නිපකා සතාති.

Pali BJT[භගවා:]

Pali BJTතෙ හි පාරං ගමිස්සන්ති ඡෙත්වා ජාලං ව අම්බුජො, ඣානානි උපසම්පජ්ජ අප්පමත්තා රණඤ්ජහාති.

Pali BJT2. 2. 2.

Pali BJTවෙණ්හු{1}සුත්තං

Pali BJT93. සාවත්ථියං–

Pali BJTඑකමන්තං ඨිතො ඛො වෙණ්හු{1} දෙවපුත්තො භගවතො සන්තිකෙ ඉමං ගාථං අභාසි:

Pali BJTසුඛිතා වත{2} තෙ මනුජා සුගතං පයිරුපාසිය, යුඤ්ජං{3} ගොතම සාසනෙ අප්පමත්තානුසික්ඛරෙති.

Pali BJTයෙ මෙ පවුත්තෙ{4} සත්ථිපදෙ{5} (වෙණ්හොති භගවා) අනුසික්ඛන්ති ඣායිනො, කාලෙ තෙ අප්පමජ්ජන්තා න මච්චුවසගා{6} සියුන්ති.

Pali BJT2. 2. 3.

Pali BJTදීඝලට්ඨිසුත්තං.

Pali BJT94. සාවත්ථියං–

Pali BJTඑවං මෙ සුතං එකං සමයං භගවා රාජගහෙ විහරති වෙළුවනෙ කලන්දකනිවාපෙ.

Pali BJTඅථ ඛො දීඝලට්ඨි දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං වෙළුවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො දීඝලට්ඨි දෙවපුත්තො භගවන්තං ගාථාය අජ්ඣභාසි{7}:

Pali BJTභික්ඛු සියා ඣායී විමුත්තචිත්තො ආකඞ්ඛෙ චෙ හදයස්සානුපත්තිං, ලොකස්ස ඤත්වා උදයබ්බයඤ්ච සුචෙතසො අනිස්සිතො තදානිසංසොති.

Pali BJT2. 2. 4.

Pali BJTනන්දනසුත්තං.

Pali BJT95. සාවත්ථියං–

Pali BJTඑකමන්තං ඨිතො ඛො නන්දනො දෙවපුත්තො භගවන්තං ගාථාය අජ්ඣභාසි:

Pali BJTපුච්ඡාමි තං ගොතම භූරිපඤ්ඤ අනාවටං භගවතො ඤාණදස්සනං කථංවිධං සීලවන්තං වදන්ති, කථංවිධං පඤ්ඤවන්තං{1} වදන්ති කථංවිධො දුක්ඛමතිච්ච ඉරීයති.{2} කථංවිධං දෙවතා පූජයන්තීති.

Pali BJT[භගවා:]

Pali BJTයො සීලවා පඤ්ඤවා භාවිතත්තො සමාහිතො ඣානරතො සතීමා, සබ්බස්ස සොකා විගතා පහීණා ඛීණාසවො අන්තිමදෙහධාරී.

Pali BJTතථාවිධං සීලවන්තං වදන්ති තථාවිධං පඤ්ඤවන්තං{3} වදන්ති, තථාවිධො දුක්ඛමතිච්ච ඉරීයති තථාවිධං දෙවතා පූජයන්තීති.

Pali BJT2. 2. 5.

Pali BJTචන්දනසුත්තං.

Pali BJT96. සාවත්ථියං–

Pali BJTඑකමන්තං ඨිතො ඛො චන්දනො දෙවපුත්තො භගවන්තං ගාථාය අජ්ඣභාසි:–

Pali BJTකො සූ{4} ධ තරති ඔඝං රත්තින්දිවමතන්දිතො, අප්පතිට්ඨෙ අනාලම්බෙ කො ගම්භීරෙ න සීදතීති.

Pali BJT[භගවා:]

Pali BJTසබ්බදා සීලසම්පන්නො පඤ්ඤවා සුසමාහිතො, ආරද්ධවිරියො පහිතත්තො ඔඝං තරති දුත්තරං.

Pali BJTවිරතො කාමසඤ්ඤාය රූපසඤ්ඤොජනාතිගො, නන්දිරාගපරික්ඛීණො{5} සො ගම්භීරෙ න සීදතීති.

Pali BJT2. 2. 6.

Pali BJTවසුදත්තසුත්තං.{6}

Pali BJT97. සාවත්ථියං–

Pali BJTඑකමන්තං ඨිතො ඛො වසුදත්තො{6} දෙවපුත්තො භගවතො සන්තිකෙ ඉමං ගාථං අභාසි:–

Pali BJTසත්තියා විය ඔමට්ඨො ඩය්හමානොව{1} මත්ථකෙ, කාමරාගප්පහාණාය සතො භික්ඛු පරිබ්බජෙති.

Pali BJT[භගවා:]

Pali BJTසත්තියා විය ඔමට්ඨො ඩය්හමානොව මත්ථකෙ, සක්කායදිට්ඨිප්පහාණාය සතො භික්ඛු පරිබ්බජෙති.

Pali BJT2. 2. 7.

Pali BJTසුබ්රහ්මසුත්තං.

Pali BJT98. සාවත්ථියං–

Pali BJTඑකමන්තං ඨිතො ඛො සුබ්රහ්මා දෙවපුත්තො භගවන්තං ගාථාය අජ්ඣභාසි:–

Pali BJTනිච්චං උත්රස්තමිදං චිත්තං නිච්චං උබ්බිග්ගමිදං මනො අනුප්පන්නෙසු කිච්ඡෙසු{2} අථො උප්පතිතෙසු ච සචෙ අත්ථි අනුත්රස්තං තංමෙ අක්ඛාහි පුච්ඡිතො ති.