අථ ඛො තා දෙවතා{2} භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං ගාථං අභාසි:
මහාසමයො පවනස්මිං දෙවකායා සමාගතා, ආගතම්හ ඉමං ධම්මසමයං දක්ඛිතායෙ අපරාජිතසඞ්ඝන්ති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
තත්ර භික්ඛවො සමාදහංසු චිත්තං අත්තනො{8} උජුකමකංසු, සාරථීව නෙත්තානි ගහෙත්වා ඉන්ද්රියානි රක්ඛන්ති පණ්ඩිතාති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
ඡෙත්වා ඛීලං{9} ඡෙත්වා පලිඝං{10} ඉන්දඛීලං ඌහච්ච මනෙජා, තෙ චරන්ති සුද්ධා විමලා චක්ඛුමතා සුදන්තා සුසුනාගාති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
යෙ කෙචි බුද්ධං සරණං ගතා සෙ න තෙ ගමිස්සන්ති අපායං,{11} පහාය මානුසං දෙහං දෙවකායං පරිපූරෙස්සන්තීති.
1. 4. 8.
සකලිකසුත්තං.
38. එවං මෙ සුතං එකං සමයං භගවා රාජගහෙ විහරති මද්දකුච්ඡිස්මිං මිගදායෙ.
තෙන ඛො පන සමයෙන භගවතො පාදො සකලිකාය ඛතො හොති. භුසා{12} සුදං භගවතො වෙදනා වත්තන්ති සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා. තා සුදං භගවා සතො සම්පජානො අධිවාසෙති අවිහඤ්ඤමානො.
අථ ඛො භගවා චතුග්ගුණං සඞ්ඝාටිං පඤ්ඤාපෙත්වා දක්ඛිණෙන පස්සෙන සීහසෙය්යං කප්පෙති{13} පාදෙ පාදං අච්චාධාය සතො සම්පජානො.
අථ ඛො සත්තසතා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං මද්දකුච්ඡිං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං උදානං උදානෙසි:
නාගො වත භො සමණො ගොතමො. නාගවතා{1} ච පනුප්පන්නා{2} සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සීහො වත භො සමණො ගොතමො. සීහවතා{1} ච පනුප්පන්නා{2} සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
ආජානීයො වත භො සමණො ගොතමො. ආජානීයවතා{1} ච පනුප්පන්නා{2} සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
නිසභො වත භො සමණො ගොතමො. නිසභවතා ච පනුප්පන්නා සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
ධොරය්හො වත භො සමණො ගොතමො. ධොරය්හවතා ච පනුප්පන්නා සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
දන්තො වත භො සමණො ගොතමො. දන්තවතා ච පනුප්පන්නා සාරීරිකා වෙදනා දුක්ඛා තිබ්බා ඛරා කටුකා අසාතා අමනාපා සතො සම්පජානො අධිවාසෙති අවිහඤ්ඤමානොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
පස්ස සමාධිං සුභාවිතං චිත්තඤ්ච සුවිමුත්තං{1} නචාභිනතං නචාපනතං න ච සසංඛාරනිග්ගය්හවාරිතවතං{2}. යො එවරූපං පුරිසනාගං පුරිසසීහං පුරිසාජානීයං පුරිසනිසභං පුරිසධොරය්හං පුරිසදන්තං අතික්කමිතබ්බං මඤ්ඤෙය්ය, කිමඤ්ඤත්ර අදස්සනාති.
පඤ්චවෙදා සතං සමං තපස්සී බ්රාහ්මණා චරං, චිත්තඤ්ච නෙසං න සම්මා විමුත්තං හීනත්තරූපා න පාරඞ්ගමා තෙ.
තණ්හාධිපන්නා වත සීලබද්ධා ලූඛං තපං වස්සසතං චරන්තා, චිත්තඤ්ච නෙසං න සම්මා විමුත්තං හීනත්තරූපා න පාරඞ්ගමා තෙ.
න මානකාමස්ස දමො ඉධත්ථි න මොනමත්ථි අසමාහිතස්ස, එකො අරඤ්ඤෙ විහරං පමත්තො න මච්චුධෙය්යස්ස තරෙය්ය පාරන්ති.
[භගවා:]
මානං පහාය සුසමාහිතත්තො සුචෙතසො සබ්බධි විප්පමුත්තො, එකො අරඤ්ඤෙ විහරං අප්පමත්තො ස මච්චුධෙය්යස්ස තරෙය්ය පාරන්ති.
1. 4. 9.
පජ්ජුන්නධීතුසුත්තං
39. එවං මෙ සුතං එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො කොකනදා පජ්ජුන්නස්ස ධීතා අභික්කන්තාය රත්තියා අභික්කන්තවණ්ණා කෙවලකප්පං මහාවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො කොකනදා{3} පජ්ජුන්නස්ස ධීතා භගවතො සන්තිකෙ ඉමා ගාථායො අභාසි.
වෙසාලියං වනෙ{4} විහරන්තං අග්ගං සත්තස්ස සම්බුද්ධං, කොකනදාහමස්මි අභිවන්දෙ කොකනදා පජ්ජුන්නස්ස ධීතා.
සුතමෙව මෙ{5} පුරෙ ආසි ධම්මො චක්ඛුමතානුබුද්ධො, සාහංදානි සක්ඛී ජානාමි මුනිනො දෙසයතො සුගතස්ස.
යෙ කෙචි අරියධම්මං{1} විගරහන්තා චරන්ති දුම්මෙධා, උපෙන්ති රොරුවං ඝොරං චිරරත්තං දුක්ඛමනුභවන්ති.
යෙ ච ඛො අරියධම්මෙ{2} ඛන්තියා උපසමෙන උපෙතා, පහාය මානුසං දෙහං දෙවකායං පරිපූරෙස්සන්තී’ති.
1. 4. 10.
චුල්ලපජ්ජුන්නධීතුසුත්තං
40. එවං මෙ සුතං: එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො චුල්ල{3}කොකනදා පජ්ජුන්නස්ස ධීතා අභික්කන්තාය රත්තියා අභික්කන්තවණ්ණා කෙවලකප්පං මහාවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො චුල්ලකොකනදා පජ්ජුන්නස්ස ධීතා භගවතො සන්තිකෙ ඉමා ගාථායො අභාසි:
ඉධාගමා විජ්ජුපභාසවණ්ණා කොකනදා පජ්ජුන්නස්ස ධීතා, බුද්ධඤ්ච ධම්මඤ්ච නමස්සමානා ගාථා චිමා අත්ථවතී අභාසි.
බහුනාපි ඛො තං විභජෙය්යං පරියායෙන තාදිසො ධම්මො, සංඛිත්තමත්තං ලපයිස්සාමි යාවතා මෙ මනසා පරියත්තං.
පාපං න කයිරා වචසා මනසා කායෙන වා කිඤ්චන සබ්බලොකෙ, කාමෙ පහාය සතිමා සම්පජානො දුක්ඛං න සෙවෙථ අනත්ථසංහිතන්ති.
සතුල්ලපකායිකවග්ගො චතුත්ථො.
තත්රුද්දානං:
සබ්භි මච්ඡරිනා සාධු නසන්තුජ්ඣානසඤ්ඤිනො, සද්ධා සමයො සකලිකං උභො පජ්ජුන්නධීතරො’ති.
5. ආදිත්තවග්ගො
1. 5. 1.
ආදිත්තසුත්තං.
41. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවතො සන්තිකෙ ඉමා ගාථායො අභාසි:
ආදිත්තස්මිං අගාරස්මිං යං නීහරති භාජනං, තං තස්ස හොති අත්ථාය නො ච යං තත්ථ ඩය්හති.
එවමාදිපිතො{1} ලොකො ජරාය මරණෙන ච, නීහරෙථෙව දානෙන දින්නං හොති සුනීහතං.
දින්නං සුඛඵලං හොති නාදින්නං හොති තං තථා, චොරා හරන්ති රාජානො අග්ගි ඩහති නස්සති.
අථ අන්තෙන ජහති සරීරං සපරිග්ගහං, එතදඤ්ඤාය මෙධාවී භුඤ්ජෙථ ච දදෙථ ච. දත්වා ච භුත්වා ච යථානුභාවං අනින්දිතො සග්ගමුපෙති ඨානන්ති.
1. 5. 2.
කිංදදසුත්තං.
[දෙවතා:]
42. කිංදදො බලදො හොති කිංදදො හොති වණ්ණදො. කිංදදො සුඛදො හොති කිංදදො හොති චක්ඛුදො. යො ච{2} සබ්බදදො හොති තං මෙ අක්ඛාහි පුච්ඡිතොති.
[භගවා:]
අන්නදො බලදො හොති වත්ථදො හොති වණ්ණදො, යානදො සුඛදො හොති දීපදො හොති චක්ඛුදො. සො ච සබ්බදදො හොති යො දදාති උපස්සයං, අමතංදදො ච සො හොති යො ධම්මමනුසාසතීති.
1. 5. 3.
අන්නසුත්තං
[දෙවතා:]
43. අන්නමෙවාභිනන්දන්ති උභයෙ දෙවමානුසා, අථ කො නාම සො යක්ඛො යං අන්නං නාභිනන්දතීති.
[භගවා:]
යෙ නං දදන්ති සද්ධාය විප්පසන්නෙන චෙතසා තමෙව අන්නං භජති අස්මිං ලොකෙ පරම්හි ච.
තස්මා විනෙය්ය මච්ඡෙරං දජ්ජා දානං මලාභිභූ, පුඤ්ඤානි පරලොකස්මිං පතිට්ඨා හොන්ති පාණිනන්ති.
1. 5. 4.
එකමූලසුත්තං
[දෙවතා:]
44. එකමූලං ද්විරාවට්ටං තිමලං පඤ්චපත්ථරං, සමුද්දං ද්වාදසාවට්ටං පාතාලං අතරී ඉසීති.
1. 5. 5.
අනොමසුත්තං
[දෙවතා:]
45. අනොමනාමං නිපුණත්ථදස්සිං පඤ්ඤාදදං කාමාලයෙ අසත්තං තං පස්සථ සබ්බවිදුං සුමෙධං අරියෙ පථෙ කමමානං මහෙසින්ති.
1. 5. 6.
අච්ඡරාසුත්තං.
[දෙවතා:]
46. අච්ඡරාගණසඞ්ඝුට්ඨං පිසාචගණසෙවිතං, වනන්තං මොහනං නාම කථං යාත්රා භවිස්සතීති.
[භගවා:]
උජුකො නාම සො මග්ගො අභයා නාම සා දිසා, රථො අකූජනො{1} නාම ධම්මචක්කෙහි සංයුතො.
හිරි තස්ස අපාලම්බො සතස්ස{2} පරිවාරණං, ධම්මාහං සාරථිං බ්රූමි සම්මාදිට්ඨිපුරෙජවං.
යස්ස එතාදිසං යානං ඉත්ථියා පුරිසස්ස වා, ස වෙ එතෙන යානෙන නිබ්බාණස්සෙව සන්තිකෙති.
1. 5. 7.
වනරොපසුත්තං
[දෙවතා:]
47. කෙසං දිවා ච රත්තො ච සදා පුඤ්ඤං පවඩ්ඪති, ධම්මට්ඨා සීලසම්පන්නා කෙ ජනා සග්ගගාමිනොති.
[භගවා:]
ආරාමරොපා වනරොපා යෙ ජනා සෙතුකාරකා, පපඤ්ච උදපානඤ්ච යෙ දදන්ති උපස්සයං.
තෙසං දිවා ච රත්තො ච සදා පුඤ්ඤං පවඩ්ඪති, ධම්මට්ඨා සීලසම්පන්නා තෙ ජනා සග්ගගාමිනොති.
1. 5. 8.
ජෙතවනසුත්තං
[දෙවතා:]
48. ඉදඤ්හි තං ජෙතවනං ඉසිසඞ්ඝනිසෙවිතං, ආවුත්ථං ධම්මරාජෙන පීතිසඤ්ජනනං මම.
[භගවා:]
කම්මං විජ්ජා ච ධම්මො ච සීලං ජීවිතමුත්තමං, එතෙන මච්චා සුජ්ඣන්ති න ගොත්තෙන ධනෙන වා.
තස්මා හි පණ්ඩිතො පොසො සම්පස්සං අත්ථමත්තනො, යොනිසො විචිනෙ ධම්මං එවං තත්ථ විසුජ්ඣති.
සාරිපුත්තොව පඤ්ඤාය සීලෙන උපසමෙන ච, යොපි පාරගතො{1} භික්ඛු එතාව පරමො සියා’ති.