අථ ඛො අපරා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය ඤාතිමජ්ඣෙ විරොචතීති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය සත්තා ගච්ඡන්ති සුග්ගතින්ති.{2}
අථ ඛො අපරා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය සත්තා තිට්ඨන්ති සාතතන්ති.
අථ ඛො අපරා දෙවතා භගවන්තං එතදවොච: කස්ස නු ඛො භගවා{3} සුභාසිතන්ති.
[භගවා:]
සබ්බාසං වො සුභාසිතං පරියායෙන. අපි ච මමාපි{4} සුණාථ:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය සබ්බදුක්ඛා පමුච්චතීති.
ඉදමවොච භගවා. අත්තමනා තා දෙවතායො භගවන්තං අභිවාදෙත්වා පදක්ඛිණං කත්වා තත්ථෙවන්තරධායිංසූති.{5}
1. 4. 2.
මච්ඡරිසුත්තං
32. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං ගාථං අභාසි:
මච්ඡෙරා ච පමාදා ච එවං දානං න දීයති, පුඤ්ඤමාකඞ්ඛමානෙන{1} දෙය්යං හොති විජානතාති.
අථ ඛො අපරා දෙවතා භගවතො සන්තිකෙ ඉමා ගාථායො අභාසි:
යස්සෙව භීතො න දදාති මච්ඡරී තදෙවාදදතො{2} භයං, ජිඝච්ඡා ච පිපාසා ච යස්ස භායති මච්ඡරී, තමෙව බාලං ඵුසති අස්මිං ලොකෙ පරම්හි ච.
තස්මා විනෙය්ය මච්ඡෙරං දජ්ජා දානං මලාභිභූ, පුඤ්ඤානි පරලොකස්මිං පතිට්ඨා හොන්ති පාණිනන්ති.
අථ ඛො අපරා දෙවතා භගවතො සන්තිකෙ ඉමා ගාථායො අභාසි:
තෙ මතෙසු න මීයන්ති{3} අද්ධානං{4} ව සහබ්බජං{5}, අප්පස්මිං යෙ පවෙච්ඡන්ති එස ධම්මො සනන්තනො.
අප්පස්මෙකෙ පවෙච්ඡන්ති බහුනෙකෙ නදිච්ඡරෙ, අප්පස්මා දක්ඛිණා දින්නා සහස්සෙන සමං මිතා.
අථ ඛො අපරා දෙවතා භගවතො සන්තිකෙ ඉමා ගාථායො අභාසි:
දුද්දදං දදමානානං දුක්කරං කම්ම කුබ්බතං, අසන්තො නානුකුබ්බන්ති සතං ධම්මො දුරන්නයො{6}.
තස්මා සතඤ්ච අසතඤ්ච{7} නානා හොති ඉතො ගති, අසන්තො නිරයං යන්ති සන්තො සග්ගපරායණාති.
අථ ඛො අපරා දෙවතා භගවන්තං{8} එතදවොච: කස්ස නු ඛො භගවා සුභාසිතන්ති?
[භගවා:]
සබ්බාසං වො සුභාසිතං පරියායෙන. අපි ච මමාපි සුණාථ:
ධම්මං චරෙ යොපි සමුඤ්ඡකං{9} චරං{10} දාරඤ්ච පොසං දදමප්පකස්මිං, සතං සහස්සානං සහස්සයාගිනං කලම්පි නාග්ඝන්ති තථාවිධස්ස තෙති
අථ ඛො අපරා දෙවතා භගවන්තං ගාථාය අජ්ඣභාසි:
කෙනෙස යඤ්ඤො විපුලො මහග්ගතො සමෙන දින්නස්ස න අග්ඝමෙති, කථං{1} සතං සහස්සානං{2} සහස්සයාගිනං, කලම්පි නාග්ඝන්ති තථාවිධස්ස තෙති.
අථ ඛො භගවා තං දෙවතං ගාථාය අජ්ඣභාසි:
දදන්ති හෙකෙ{3} විසමෙ නිවිට්ඨා ඡෙත්වා{4} වධිත්වා අථ සොචයිත්වා, සා දක්ඛිණා අස්සුමුඛා සදණ්ඩා සමෙන දින්නස්ස න අග්ඝමෙති. එවං සතං සහස්සානං{2} සහස්සයාගිනං කලම්පි නාග්ඝන්ති තථාවිධස්ස තෙති.
1. 4. 3.
සාධුසුත්තං
33. සාවත්ථියං–
අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං.
මච්ඡෙරා ච පමාදා ච එවං දානං න දීයති, පුඤ්ඤමාකඞ්ඛමානෙන දෙය්යං හොති විජානතාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අපි ච අප්පස්මිම්පි{5} සාධු{6} දානං.
අප්පස්මෙකෙ පවෙච්ඡන්ති බහුනෙකෙ න දිච්ඡරෙ, අප්පස්මා දක්ඛිණා දින්නා සහස්සෙන සමං මිතාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු{6} දානං. අපි ච සද්ධායපි සාධු{6} දානං.
දානඤ්ච යුද්ධඤ්ච සමානමාහු අප්පාපි සන්තා බහුකෙ ජිනන්ති, අප්පම්පි චෙ සද්දහානො දදාති තෙනෙව සො හොති සුඛී පරත්ථාති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු{1} දානං. සද්ධායපි සාධු{1} දානං. අපි ච ධම්මලද්ධස්සපි සාධු{1} දානං.
යො ධම්මලද්ධස්ස දදාති දානං උට්ඨානවීරියාධිගතස්ස ජන්තු, අතික්කම්ම සො{2} වෙතරණිං යමස්ස දිබ්බානි ඨානානි උපෙති මච්චොති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු{1} දානං. සද්ධායපි සාධු{1} දානං. ධම්මලද්ධස්ස පි සාධු{1} දානං. අපි ච විචෙය්ය දානම්පි සාධු.{3}
විචෙය්ය දානං සුගතප්පසත්ථං යෙ දක්ඛිණෙය්යා ඉධ ජීවලොකෙ, එතෙසු දින්නානි මහප්ඵලානි බීජානි වුත්තානි යථා සුඛෙත්තෙති.
අථ ඛො අපරා දෙවතා භගවතො සන්තිකෙ ඉමං උදානං උදානෙසි:
සාධු ඛො මාරිස දානං. අප්පස්මිම්පි සාධු දානං. සද්ධායපි සාධු{1} දානං. ධම්මලද්ධස්සපි සාධු{1} දානං. විචෙය්ය දානම්පි සාධු.{1} අපි ච පාණෙසුපි සාධු සංයමො.
යො පාණභූතෙසු{4} අහෙඨයං චරං පරූපවාදා න කරොති පාපං, භීරුං පසංසන්ති න හි තත්ථ සූරං භයා හි සන්තො න කරොන්ති පාපන්ති.
අථ ඛො අපරා දෙවතා භගවන්තං එතදවොච: කස්ස නු ඛො භගවා සුභාසිතන්ති?
[භගවා:]
සබ්බාසං වො සුභාසිතං පරියායෙන. අපි ච මමාපි සුණාථ:
සද්ධාහි දානං බහුධා පසත්ථං දානා ච ඛො ධම්මපදංව සෙය්යො, පුබ්බෙ ච හි{5} පුබ්බතරෙ ච සන්තො නිබ්බාණමෙවජ්ඣගමුං සපඤ්ඤාති.
1. 4. 4.
නසන්තිසුත්තං.
34. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙ ඉමං ගාථායො අභාසි:
න සන්ති කාමා මනුජෙසු නිච්චා සන්තීධ කමනීයානි යෙසු බද්ධො, යෙසු පමත්තො අපුනාගමනං අනාගන්තා පුරිසො මච්චුධෙය්යාති. ඡන්දජං අඝං ඡන්දජං දුක්ඛං ඡන්දවිනයා අඝවිනයො අඝවිනයා දුක්ඛවිනයොති.
න තෙ කාමා යානි චිත්රානි ලොකෙ සඞ්කප්පරාගො පුරිසස්ස කාමො, තිට්ඨන්ති චිත්රානි තථෙව ලොකෙ අථෙත්ථ{1} ධීරා විනයන්ති ඡන්දං.
කොධං ජහෙ විප්පජහෙය්ය මානං සංයොජනං සබ්බමතික්කමෙය්ය, තං නාමරූපස්මිමසජ්ජමානං{2} අකිඤ්චනං නානුපතන්ති දුක්ඛා.
පහාසි සඞ්ඛං න ච මානමජ්ඣගා අච්ඡෙච්ඡි තණ්හං ඉධ නාමරූපෙ, තං ඡින්නගන්ථං අනිඝං නිරාසං පරියෙසමානා නාජ්ඣගමුං දෙවා මනුස්සා ඉධ වා හුරං වා සග්ගෙසු වා සබ්බනිවෙසනෙසූති.
තඤ්චෙ හි නාද්දක්ඛුං තථා විමුත්තං (ඉච්චායස්මා මොඝරාජා:) දෙවා මනුස්සා ඉධ වා හුරං වා, නරුත්තමං අත්ථචරං නරානං යෙ තං නමස්සන්ති පසංසියා තෙති?
පසංසියා තෙපි භවන්ති භික්ඛූ (මොඝරාජා’ති භගවා:) යෙ තං නමස්සන්ති තථා විමුත්තං, අඤ්ඤාය ධම්මං විචිකිච්ඡං පහාය සඞ්ගාතිගා තෙපි භවන්ති භික්ඛූති.
1. 4. 5.
උජ්ඣානසඤ්ඤිසුත්තං.
35. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො සම්බහුලා උජ්ඣානසඤ්ඤිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා වෙහාසං අට්ඨංසු. වෙහාසං ඨිතා ඛො එකා දෙවතා භගවතො සන්තිකෙ ඉමං ගාථං අභාසි:
අඤ්ඤථා සන්තමත්තානං අඤ්ඤථා යො පවෙදයෙ, නිකච්ච කිතවස්සෙ’ව භුත්තං ථෙය්යෙන තස්ස තං
[භගවා:]
යං හි කයිරා තං හි වදෙ යං න කයිරා න තං වදෙ, අකරොන්තං භාසමානානං{1} පටිජානන්ති පණ්ඩිතාති.
නයිදං භාසිතමත්තෙන එකන්තසවණෙන වා, අනුක්කමිතවෙ{2} සක්කා යායං පටිපදා දළ්හා, යාය ධීරා පමුච්චන්ති ඣායිනො මාරබන්ධනා.
න වෙ ධීරා පකුබ්බන්ති විදිත්වා ලොකපරියායං, අඤ්ඤාය නිබ්බුතා ධීරා තිණ්ණා ලොකෙ විසත්තිකන්ති.
අථ ඛො තා දෙවතායො පඨවියං පතිට්ඨහිත්වා භගවතො පාදෙසු සිරසා නිපතිත්වා භගවන්තං එතදවොචුං. අච්චයො නො භන්තෙ, අච්චගමා යථාබාලං යථාමූළ්හං යථාඅකුසලං,{3} යා මයං භගවන්තං ආසාදෙතබ්බං{4} අමඤ්ඤිම්හා. තාසං නො භන්තෙ භගවා අච්චයං අච්චයතො පතිගණ්හාතු{5} ආයතිං සංවරායා’ති.
අථ ඛො භගවා සිතං පාත්වාකාසි.
අථ ඛො තා දෙවතායො භීයොසොමත්තාය උජ්ඣායන්තියො වෙහාසං අබ්භුග්ගඤ්ඡුං.
එකා දෙවතා භගවතො සන්තිකෙ ඉමං ගාථං අභාසි:{6}
අච්චයං දෙසයන්තීනං යො චෙ{7} න පටිගණ්හති, කොපන්තරො දොසගරු ස වෙරං පටිමුච්චති.
[භගවා:]
අච්චයො චෙ න විජ්ජෙථ නො චිධාපගතං{8} සියා, වෙරානි ච සම්මෙය්යුං තෙනීධ කුසලො සියා.
[දෙවතා:]
කස්සච්චයා න විජ්ජන්ති කස්ස නත්ථි අපාගතං{9} කො සම්මොහමාපාදි කො වා{10} ධීරො සදා සතොති.
[භගවා:]
තථාගතස්ස බුද්ධස්ස සබ්බභූතානුකම්පිනො, තස්සච්චයා න විජ්ජන්ති තස්ස නත්ථි අපාගතං, සො න සම්මොහමාපාදි සොව{1} ධීරො සදා සතො.
අච්චයං දෙසයන්තීනං යො චෙ න පටිගණ්හති, කොපන්තරො දොසගරු ස වෙරං{2} පටිමුච්චති, තං වෙරං නාභිනන්දාමි පතිගණ්හාමි වොච්චයන්ති.
1. 4. 6.
සද්ධාසුත්තං.
36. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතා ඛො එකා දෙවතා භගවතො සන්තිකෙඉමං ගාථං අභාසි:
සද්ධා දුතියා පුරිසස්ස හොති නො චෙ අස්සද්ධියං අවතිට්ඨති යසො ච කිත්තී ච තත්වස්ස හොති. සග්ගඤ්ච සො ගච්ඡති සරීරං පහායාති.{3}
අථ ඛො අපරා දෙවතා භගවතො සන්තිකෙ ඉමා ගාථායො අභාසි:
කොධං ජහෙ විප්පජහෙය්ය මානං සංයොජනං සබ්බමතික්කමෙය්ය, තං නාමරූපස්මිමසජ්ජමානං අකිඤ්චනං නානුපතන්ති සඞ්ගාති.
පමාදමනුයුඤ්ජන්ති බාලා දුම්මෙධිනො ජනා අප්පමාදඤ්ච මෙධාවී ධනං සෙට්ඨං’ව{4} රක්ඛති.
මා පමාදමනුයුඤ්ජෙථ මා කාමරතිසන්ථවං අප්පමත්තො හි ඣායන්තො පප්පොති පරමං සුඛන්ති.
1. 4. 7.
සමයසුත්තං.
37. එවං මෙ සුතං: එකං සමයං භගවා සක්කෙසු විහරති කපිලවත්ථුස්මිං මහාවනෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සබ්බෙහෙව අරහන්තෙහි. දසහි ච ලොකධාතූහි දෙවතා යෙභුය්යෙන සන්නිපතිතා හොන්ති භගවන්තං දස්සනාය භික්ඛුසඞ්ඝඤ්ච.
අථ ඛො චතුන්නං සුද්ධාවාසකායිකානං දෙවානං{1} එතදහොසි. අයං ඛො භගවා සක්කෙසු විහරති කපිලවත්ථුස්මිං මහාවනෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සබ්බෙහෙව අරහන්තෙහි. දසහි ච ලොක ධාතූහි දෙවතා{2} යෙභුය්යෙන සන්නිපතිතා හොන්ති භගවන්තං දස්සනාය භික්ඛුසඞ්ඝඤ්ච. යන්නූන මයම්පි{3} යෙන භගවා තෙනුපසඞ්කමෙය්යාම. උපසඞ්කමිත්වා භගවතො සන්තිකෙ පච්චෙකගාථං{4} භාසෙය්යාමාති.
අථ ඛො තා දෙවතා{2} සෙය්යථාපි නාම බලවා පුරිසො සම්මිඤ්ජිතං{5} වා බාහං පසාරෙය්ය, පසාරිතං වා බාහං සම්මිඤ්ජෙය්ය{6}, එවමෙවං සුද්ධාවාසෙසු දෙවෙසු අන්තරහිතා භගවතො පුරතො පාතුරහංසු.{7}