[භගවා:]
චත්තාරො ච පටිපන්නා චත්තාරො ච ඵලෙ ඨිතා, එස සඞ්ඝො උජුභූතො පඤ්ඤාසීලසමාහිතො.
යජමානානං මනුස්සානං පුඤ්ඤපෙක්ඛාන පාණිනං, කරොතං ඔපධිකං පුඤ්ඤං සඞ්ඝෙ දින්නං මහප්ඵලන්ති.
11. 2. 7.
වන්දනාසුත්තං.
263. සාවත්ථියං–
තෙන ඛො පන සමයෙන භගවා දිවාවිහාරගතො හොති, පටිසල්ලීනො. අථ ඛො සක්කො ච දෙවානමින්දො බ්රහ්මා ච සහම්පතී යෙන භගවා තෙනුපසඞ්කමිංසු, උපසඞ්කමිත්වා පච්චෙකං ද්වාරබාහං නිස්සාය අට්ඨංසු. අථ ඛො සක්කො දෙවානමින්දො භගවතො සන්තිකෙ ඉමං ගාථං අභාසි:
උට්ඨෙහි{1} වීර විජිතසඞ්ගාම පන්නභාර අනණ විචර ලොකෙ, චිත්තඤ්ච තෙ සුවිමුත්තං චන්දො යථා පණ්ණරසාය රත්තින්ති.
[භගවා:]
න ඛො දෙවානමින්ද තථාගතා එවං වන්දිතබ්බා. එවඤ්ච ඛො දෙවානමින්ද තථාගතා වන්දිතබ්බා:
උට්ඨෙහි{1} වීර විජිතසඞ්ගාම සත්ථවාහ අනණ විචර ලොකෙ, දෙසස්සු{2} භගවා ධම්මං අඤ්ඤාතාරො භවිස්සන්තීති.
11. 2. 8.
සක්ක නමස්සන සුත්තං{3}
264. සාවත්ථියං–
භූතපුබ්බං භික්ඛවෙ සක්කො දෙවානමින්දො මාතලිං සඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං. උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ මාතලි සඞ්ගාහකො සක්කස්ස දෙවානමින්දස්ස පටිස්සුත්වා සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො. යස්ස දානි කාලං මඤ්ඤසීති.
අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො{4} සුදං පුථුද්දිසා නමස්සති. අථ ඛො භික්ඛවෙ මාතලිසඞ්ගාහකො සක්කං දෙවානමින්දං ගාථාය අජ්ඣභාසි:
තං නමස්සන්ති තෙවිජ්ජා සබ්බෙ භුම්මා ච ඛත්තියා, චත්තාරො ච මහාරාජා තිදසා ච යසස්සිනො, අථ කො නාම සො යක්ඛො යං ත්වං සක්ක නමස්සසීති.
[සක්කො:]
මං නමස්සන්ති තෙවිජ්ජා සබ්බෙ භුම්මා ච ඛත්තියා, චත්තාරො ච මහාරාජා තිදසා ච යසස්සිනො.
අහඤ්ච සීලසම්පන්නෙ චිරරත්තසමාහිතෙ, සම්මාපබ්බජිතෙ වන්දෙ බ්රහ්මචරියපරායනෙ.
යෙ ගහට්ඨා පුඤ්ඤකරා සීලවන්තො උපාසකා, ධම්මෙන දාරං පොසෙන්ති තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි, අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං වත්වාන මඝවා දෙවරාජා සුජම්පති, පුථුද්දිසා නමස්සිත්වා පමුඛො රථමාරුහීති.
11. 2. 9.
දුතියසක්කනමස්සන සුත්තං{1}
265. සාවත්ථියං–{2}
භූතපුබ්බං භික්ඛවෙ සක්කො දෙවානමින්දො මාතලිසඞ්ගාහකං{3} ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං. උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ මාතලිසඞ්ගාහකො සක්කස්ස දෙවානමින්දස්ස පටිස්සුත්වා සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො යස්ස දානි කාලං මඤ්ඤසීති.
අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො{4} සුදං භගවන්තං නමස්සති.
අථ ඛො භික්ඛවෙ මාතලිසඞ්ගාහකො සක්කං දෙවානමින්දං ගාථාය අජ්ඣභාසි:
යං හි දෙවා මනුස්සා ච තං නමස්සන්ති වාසව, අථ කො නාම සො යක්ඛො යං ත්වං සක්ක නමස්සසීති?
[සක්කො:]
යො{5} ඉධ සම්මාසම්බුද්ධො අස්මිං ලොකෙ සදෙවකෙ, අනොමනාමං සත්ථාරං තං නමස්සාමි මාතලි.
යෙසං රාගො ච දොසො ච අවිජ්ජා ච විරාජිතා, ඛීණාසවා අරහන්තො තෙ නමස්සාමි මාතලි.
යෙ රාගදොසවිනයා අවිජ්ජාසමතික්කමා, සෙඛා{6} අපචයාරාමා අප්පමත්තානුසික්ඛරෙ, තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි, අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං වත්වාන මඝවා දෙවරාජා සුජම්පති, භගවන්තං නමස්සිත්වා පමුඛො රථමාරුහීති.
11. 2. 10.
තතිය සක්ක නමස්සන සුත්තං{7}
266. එවං මෙ සුතං:{8} එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ සක්කො දෙවානමින්දො මාතලිසඞ්ගාහකං ආමන්තෙසි: යොජෙහි සම්ම මාතලි, සහස්සයුත්තං ආජඤ්ඤරථං උය්යානභූමිං ගච්ඡාම සුභූමිං දස්සනායාති.
එවං භද්දන්තවාති ඛො භික්ඛවෙ, මාතලි සඞ්ගාහකො සක්කස්ස දෙවානමින්දස්ස පටිස්සුත්වා, සහස්සයුත්තං ආජඤ්ඤරථං යොජෙත්වා සක්කස්ස දෙවානමින්දස්ස පටිවෙදෙසි: යුත්තො ඛො තෙ මාරිස, සහස්සයුත්තො ආජඤ්ඤරථො, යස්ස’ දානි කාලං මඤ්ඤසීති. අථ ඛො භික්ඛවෙ සක්කො දෙවානමින්දො වෙජයන්තපාසාදා ඔරොහන්තො පඤ්ජලිකො සුදං භික්ඛුසඞ්ඝං නමස්සති. අථ ඛො භික්ඛවෙ මාතලි සඞ්ගාහකො සක්කං දෙවානමින්දං ගාථාහි{1} අජ්ඣභාසි:
තං හි එතෙ නමස්සෙය්යුං පූතිදෙහසයා නරා, නිමුග්ගා කුණපස්මෙතෙ{2} ඛුප්පිපාසා{3} සමප්පිතා.
කින්නු තෙසං පිහයසි අනාගාරාන වාසව, ආචාරං ඉසිනං{4} බ්රූහි තං සුණොම වචො තවාති.
[සක්කො:]
එතං තෙසං පිහයාමි අනාගාරාන මාතලි, යම්හා ගාමා පක්කමන්ති අනපෙක්ඛා වජන්ති තෙ.
න තෙසං කොට්ඨෙ ඔපෙන්ති න කුම්භෙ{5} න ඛලොපියං{6}, පරනිට්ඨිතමෙසානා{7} තෙන යාපෙන්ති සුබ්බතා, සුමන්තමන්තිනො ධීරා තුණ්හීභූතා සමඤ්චරා.
දෙවා විරුද්ධා අසුරෙහි පුථු මච්චා ච මාතලි, අවිරුද්ධා විරුද්ධෙසු අත්තදණ්ඩෙසු නිබ්බුතා, සාදානෙසු අනාදානා තෙ නමස්සාමි මාතලීති.
[මාතලි:]
සෙට්ඨා හි කිර ලොකස්මිං යෙ ත්වං සක්ක නමස්සසි, අහම්පි තෙ නමස්සාමි යෙ නමස්සසි වාසවාති.
[ථෙරා:]
ඉදං සුත්වාන මඝවා දෙවරාජා සුජම්පති, භික්ඛුසඞ්ඝං නමස්සිත්වා පමුඛො රථමාරුහීති.
සත්තවතවග්ගො දුතියො.
තත්රුද්දානං:
වතපදෙන{8} තයො වුත්තා දළිද්දඤ්ච රාමණෙය්යකං, යජමානඤ්ච වන්දනා තයො සක්කනමස්සනාති.
3. සක්කපඤ්චකං
11. 3. 1.
ඣත්වා{1}සුත්තං
267. {2}එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො සක්කො දෙවානමින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො සක්කො දෙවානමින්දො භගවන්තං ගාථාය අජ්ඣභාසි:
කිංසු ඣත්වා{3} සුඛං සෙති කිංසු ඣත්වා{3} න සොචති, කිස්සස්ස{4} එකධම්මස්ස වධං රොචෙසි ගොතමාති.
[භගවා:]
කොධං ඣත්වා{3} සුඛං සෙති කොධං ඣත්වා{3} න සොචති, කොධස්ස විසමූලස්ස මධුරග්ගස්ස වාසව, වධං අරියා පසංසන්ති තං හි ඣත්වා{3} න සොචතී ති.
11. 3. 2.
දුබ්බණ්ණියසුත්තං
268. සාවත්ථියං–{5}
භූතපුබ්බං භික්ඛවෙ, අඤ්ඤතරො යක්ඛො දුබ්බණ්ණො ඔකොටිමකො සක්කස්ස දෙවානමින්දස්ස ආසනෙ නිසින්නො අහොසි. තත්ර සුදං භික්ඛවෙ දෙවා තාවතිංසා උජ්ඣායන්ති ඛීයන්ති විපාචෙන්ති: අච්ඡරියං වත භො, අබ්භුතං වත භො, අයං යක්ඛො දුබ්බණ්ණො ඔකොටිමකො සක්කස්ස දෙවානමින්දස්ස ආසනෙ නිසින්නොති{6} යථා යථා ඛො භික්ඛවෙ, දෙවා තාවතිංසා උජ්ඣායන්ති ඛීයන්ති විපාචෙන්ති, තථා තථා සො යක්ඛො අභිරූපතරො චෙව හොති දස්සනීයතරො ච පාසාදිකතරො ච.
අථ ඛො භික්ඛවෙ දෙවා තාවතිංසා යෙන සක්කො දෙවානමින්දො තෙනුපසඞ්කමිංසු. උපසඞ්කමිත්වා සක්කං දෙවානමින්දං එතදවොචුං: ඉධ තෙ මාරිස අඤ්ඤතරො යක්ඛො දුබ්බණ්ණො ඔකොටිමකො තුම්හාකං{7} ආසනෙ නිසින්නො. තත්ර සුදං මාරිස දෙවා තාවතිංසා උජ්ඣායන්ති ඛීයන්ති විපාචෙන්ති: අච්ඡරියං වත භො අබ්භුතං වත භො අයං යක්ඛො දුබ්බණ්ණො ඔකොටිමකො සක්කස්ස දෙවානමින්දස්ස ආසනෙ නිසින්නොති. යථා යථා ඛො මාරිස දෙවා තාවතිංසා උජ්ඣායන්ති ඛීයන්ති විපාචෙන්ති, තථා තථා සො යක්ඛො අභිරූපතරො චෙව හොති දස්සනීයතරො ච පාසාදිකතරො චාති. සො හි නූන මාරිසා කොධභක්ඛො යක්ඛො භවිස්සතී ති.
අථ ඛො භික්ඛවෙ, සක්කො දෙවානමින්දො යෙන සො කොධභක්ඛො යක්ඛො තෙනුපසඞ්කමි. උපසඞ්කමිත්වා එකංසං උත්තරාසඞ්ගං කරිත්වා දක්ඛිණජාණුමණ්ඩලං පඨවියං නිහන්ත්වා යෙන සො කොධභක්ඛො යක්ඛො තෙනඤ්ජලිං පණාමෙත්වා තික්ඛත්තුං නාමං සාවෙති: සක්කො’හං{1} මාරිස දෙවානමින්දො, සක්කො’හං{2} මාරිස දෙවානමින්දොති.
යථා යථා ඛො භික්ඛවෙ, සක්කො දෙවානමින්දො නාමං සාවෙති තථා තථා සො යක්ඛො දුබ්බණ්ණතරො චෙව අහොසි ඔකොටිමකතරො ච දුබ්බණ්ණතරො චෙව හුත්වා ඔකොටිමකතරො ච තත්ථෙවන්තරධායීති.
අථ ඛො භික්ඛවෙ සක්කො දෙවානමින්දො සකෙ ආසනෙ නිසීදිත්වා දෙවෙ තාවතිංසෙ අනුනයමානො තායං වෙලායං ඉමා ගාථායො අභාසි:
න සූපහතචිත්තො’ම්හි නාවත්තෙන{3} සුවානයො, න වො චිරාහං කුජ්ඣාමි කොධො මයි නාවතිට්ඨති.
කුද්ධො’හං{4} ඵරුසං බ්රූමි න ච ධම්මානි කිත්තයෙ, සන්නිග්ගණ්හාමි අත්තානං සම්පස්සං අත්ථමත්තනොති.
11. 3. 3.
මායාසුත්තං{5}
269. සාවත්ථියං{6}–
භූතපුබ්බං භික්ඛවෙ, වෙපචිත්ති අසුරින්දො ආබාධිකො අහොසි, දුක්ඛිතො බාළ්හගිලානො. අථ ඛො භික්ඛවෙ, සක්කො දෙවානමින්දො යෙන වෙපචිත්ති අසුරින්දො තෙනුපසඞ්කමි ගිලානපුච්ඡකො.
අද්දසා ඛො භික්ඛවෙ, වෙපචිත්ති අසුරින්දො සක්කං දෙවානමින්දං දූරතො’ව ආගච්ඡන්තං. දිස්වාන සක්කං දෙවානමින්දං එතදවොච: තිකිච්ඡ මං දෙවානමින්දාති.
වාචෙහි මං වෙපචිත්ති සම්බරීමායන්ති. න තාවාහං වාචෙමි යාවාහං මාරිස අසුරෙ පටිපුච්ඡාමීති.
අථ ඛො භික්ඛවෙ වෙපචිත්ති අසුරින්දො අසුරෙ පටිපුච්ඡි: වාචෙමහං මාරිසා සක්කං. දෙවානමින්දං සම්බරීමායන්ති. මා ඛො ත්වං මාරිස වාචෙසි සක්කං දෙවානමින්දං සම්බරීමායන්ති.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං ගාථාය අජ්ඣභාසි:
මායාවී{7} මඝවා සක්ක දෙවරාජා{8} සුජම්පති, උපෙති නිරයං ඝොරං සම්බරො’ව සතං සමන්ති.
11. 3. 4.
අච්චයසුත්තං
270. {1}එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ද්වෙ භික්ඛූ සම්පයොජෙසුං. තත්රෙකො භික්ඛු අච්චසරා. අථ ඛො සො භික්ඛු තස්ස භික්ඛුනො සන්තිකෙ අච්චයං අච්චයතො දෙසෙති{2}. සො භික්ඛු න පටිගණ්හාති.{3}
අථ ඛො සම්බහුලා භික්ඛූ යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං: ඉධ භන්තෙ ද්වෙ භික්ඛූ සම්පයොජෙසුං. තත්රෙකො භික්ඛු අච්චසරා. අථ ඛො සො භන්තෙ භික්ඛු තස්ස භික්ඛුනො සන්තිකෙ අච්චයං අච්චයතො දෙසෙති. සො භික්ඛු න පටිගණ්හාතීති.
ද්වෙ මෙ භික්ඛවෙ බාලා: යො ච අච්චයං අච්චයතො න පස්සති, යො ච අච්චයං දෙසෙන්තස්ස යථාධම්මං න පටිගණ්හාති. ඉමෙ ඛො භික්ඛවෙ, ද්වෙ බාලා. ද්වෙ මෙ භික්ඛවෙ පණ්ඩිතා: යො ච අච්චයං අච්චයතො පස්සති, යො ච අච්චයං දෙසෙන්තස්ස යථාධම්මං පටිගණ්හාති. ඉමෙ ඛො භික්ඛවෙ ද්වෙ පණ්ඩිතා.
භූතපුබ්බං භික්ඛවෙ සක්කො දෙවානමින්දො සුධම්මායං සභායං දෙවෙ තාවතිංසෙ අනුනයමානො තායං වෙලායං ඉමං ගාථං අභාසි:
කොධො වො වසමායාතු මා ච මිත්තෙ හි වො ජරා, අගරහියං මා ගරහිත්ථ මා ච භාසිත්ථ පෙසුණං, අථ පාපජනං කොධො පබ්බතො වාභිමද්දතීති.
11. 3. 5.
අක්කොධසුත්තං
271. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන{4} ඛො පන සමයෙන ද්වෙ භික්ඛූ සම්පයොජෙසුං -පෙ-
භූතපුබ්බං භික්ඛවෙ සක්කො දෙවානමින්දො සුධම්මායං සභායං දෙවෙ තාවතිංසෙ අනුනයමානො තායං වෙලායං ඉමං ගාථං අභාසි:
මා වො කොධො අජ්ඣභවි මා ච කුජ්ඣිත්ථ කුජ්ඣතං, අක්කොධො අවිහිංසා ච අරියෙසු වසතී සදා,{5} අථ පාපජනං කොධො පබ්බතො වාභිමද්දතීති.
සක්කපඤ්චකං.
තත්රුද්දානං: