යක්ඛසංයුත්තං සමත්තං.
11. සක්කසංයුත්තං
1. සුවීරවග්ගො
11. 1. 1.
සුවීරසුත්තං.
247. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ අසුරා දෙවෙ අභියංසු. අථ ඛො භික්ඛවෙ සක්කො දෙවානමින්දො සුවීරං දෙවපුත්තං ආමන්තෙසි. එතෙ තාත සුවීර, අසුරා දෙවෙ අභියන්ති. ගච්ඡ, තාත සුවීර, අසුරෙ පච්චුය්යාහීති. වං භද්දං තවාති ඛො භික්ඛවෙ සුවීරො දෙවපුත්තො සක්කස්ස දෙවානමින්දස්ස පටිස්සුත්වා පමාදං ආපාදෙසි.
දුතියම්පි ඛො භික්ඛවෙ සක්කො දෙවානමින්දො සුවීරං දෙවපුත්තං ආමන්තෙසි: එතෙ තාත සුවීර, අසුරා දෙවෙ අභියන්ති. ගච්ඡ තාත සුවීර, අසුරෙ පච්චුය්යාහීති. එවං භද්දං තවාති ඛො භික්ඛවෙ සුවීරො දෙවපුත්තො සක්කස්ස දෙවානමින්දස්ස පටිස්සුත්වා දුතියම්පි{3} පමාදං ආපාදෙසි.
තතියම්පි ඛො භික්ඛවෙ සක්කො දෙවානමින්දො සුවීරං දෙවපුත්තං ආමන්තෙසි: එතෙ තාත සුවීර, අසුරා දෙවෙ අභියන්ති. ගච්ඡ තාත සුවීර, අසුරෙ පච්චුය්යාහීති. එවං භද්දං තවාති ඛො භික්ඛවෙ සුවීරො දෙවපුත්තො සක්කස්ස දෙවානමින්දස්ස පටිස්සුත්වා තතියම්පි{4} පමාදං ආපාදෙසි.
අථ ඛො භික්ඛවෙ සක්කො දෙවානමින්දො සුවීරං දෙවපුත්තං ගාථාය අජ්ඣභාසි:
අනුට්ඨහං අවායමං{1} සුඛං යත්රාධිගච්ඡති, සුවීර තත්ථ ගච්ඡාහි මඤ්ච තත්ථෙව පාපයාති.
[සුවීරො:]
අලසස්ස{2} අනුට්ඨාතා න ච කිච්චානි කාරයෙ, සබ්බකාමසමිද්ධස්ස තම්මෙ සක්ක වරං දිසාති{3}.
[සක්කො:]
යත්ථාලසො අනුට්ඨාතා අච්චන්තං{4} සුඛමෙධති, සුවීර තත්ථ ගච්ඡාහි මඤ්ච තත්ථෙව පාපයාති.
[සුවීරො:]
අකම්මුනා{5} දෙවසෙට්ඨ සක්ක වින්දෙමු යං සුඛං, අසොකං අනුපායාසං තං මෙ සක්ක වරං දිසාති.
[සක්කො:]
සචෙ අත්ථි අකම්මෙන කොචි ක්වචි න ජීවති, නිබ්බානස්ස හි සො මග්ගො සුවීර තත්ථ ගච්ඡාහි මඤ්ච තත්ථෙව පාපයාති.
සො හි නාම භික්ඛවෙ, සක්කො දෙවානමින්දො සකං පුඤ්ඤඵලං උපජීවමානො දෙවානං තාවතිංසානං ඉස්සරියාධිපච්චං රජ්ජං කාරෙන්තො{6} උට්ඨානවිරියස්ස වණ්ණවාදී භවිස්සති. ඉධ ඛො තං භික්ඛවෙ සොභෙථ, යං තුම්හෙ එවං ස්වාක්ඛාතෙ ධම්මවිනයෙ පබ්බජිතා සමානා උට්ඨහෙය්යාථ ඝටෙය්යාථ වායමෙය්යාථ අප්පත්තස්ස පත්තියා අනධිගතස්ස අධිගමාය අසච්ඡිකතස්ස සච්ඡිකිරියායාති.
11. 1. 2.
සුසීමසුත්තං.
248. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ අසුරා දෙවෙ අභියංසු. අථ ඛො භික්ඛවෙ සක්කො දෙවානමින්දො සුසීමං{7} දෙවපුත්තං ආමන්තෙසි: එතෙ තාත සුසීම, අසුරා දෙවෙ අභියන්ති. ගච්ඡ තාත සුසීම, අසුරෙ පච්චුය්යාහීති. එවං භද්දන්තවාති ඛො භික්ඛවෙ සුසීමො දෙවපුත්තො සක්කස්ස දෙවානමින්දස්ස පටිස්සුත්වා පමාදං ආපාදෙසි.
දුතියම්පි ඛො භික්ඛවෙ සක්කො දෙවානමින්දො සුසීමං දෙවපුත්තං ආමන්තෙසි -පෙ- දුතියම්පි පමාදං ආපාදෙසි.
තතියම්පි ඛො භික්ඛවෙ සක්කො දෙවානමින්දො සුසීමං දෙවපුත්තං ආමන්තෙසි -පෙ- තතියම්පි පමාදං ආපාදෙසි. අථ ඛො භික්ඛවෙ සක්කො දෙවානමින්දො සුසීමං දෙවපුත්තං ගාථාය අජ්ඣභාසි:
අනුට්ඨහං අවායමං සුඛං යත්රාධිගච්ඡති, සුසීම තත්ථ ගච්ඡාහි මඤ්ච තත්ථෙව පාපයාති.
[සුසීමො:]
අලසස්ස අනුට්ඨාතා න ච කිච්චානි කාරයෙ, සබ්බකාමසමිද්ධස්ස තම්මෙ සක්ක වරං දිසාති.
[සක්කො:]
යත්ථාලසො අනුට්ඨාතා අච්චන්තං සුඛමෙධති, සුසීම තත්ථ ගච්ඡාහි මඤ්ච තත්ථෙව පාපයාති.
[සුසීමො:]
අකම්මුනා දෙවසෙට්ඨ සක්ක වින්දෙමු යං සුඛං, අසොකං අනුපායාසං තම්මෙ සක්ක වරං දිසාති.
[සක්කො:]
සචෙ අත්ථි අකම්මෙන කොචි ක්වචි න ජීවති, නිබ්බානස්ස හි සො මග්ගො සුසීම තත්ථ ගච්ඡාහි මඤ්ච තත්ථෙව පාපයාති.
සො හි නාම භික්ඛවෙ සක්කො දෙවානමින්දො සකං පුඤ්ඤඵලං උපජීවමානො දෙවානං තාවතිංසානං ඉස්සරියාධිපච්චං රජ්ජං කාරෙන්තො උට්ඨානවීරියස්ස වණ්ණවාදී භවිස්සති. ඉධ ඛො තං භික්ඛවෙ සොභෙථ, යං තුම්හෙ එවං ස්වාක්ඛාතෙ ධම්මවිනයෙ පබ්බජිතා සමානා උට්ඨහෙය්යාථ ඝටෙය්යාථ වායමෙය්යාථ අප්පත්තස්ස පත්තියා අනධිගතස්ස අධිගමාය අසච්ඡිකතස්ස සච්ඡිකිරියායාති.
11. 1. 3.
ධජග්ගසුත්තං.
249. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ දෙවාසුරසඞ්ගාමො සමුපබ්බූළ්හො අහොසි. අථ ඛො භික්ඛවෙ සක්කො දෙවානමින්දො දෙවෙ තාවතිංසෙ ආමන්තෙසි: සචෙ මාරිසා දෙවානං සඞ්ගාමගතානං උප්පජ්ජෙය්ය භයං වා ඡම්භිතත්තං වා ලොමහංසො වා මමෙව තස්මිං සමයෙ ධජග්ගං උල්ලොකෙය්යාථ. මමං හි වො ධජග්ගං උල්ලොකයතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
නො චෙ මෙ ධජග්ගං උල්ලොකෙය්යාථ, අථ පජාපතිස්ස දෙවරාජස්ස ධජග්ගං උල්ලොකෙය්යාථ. පජාපතිස්ස හි වො දෙවරාජස්ස ධජග්ගං උල්ලොකයතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
නො චෙ පජාපතිස්ස දෙවරාජස්ස ධජග්ගං උල්ලොකෙය්යාථ, අථ වරුණස්ස දෙවරාජස්ස ධජග්ගං උල්ලොකෙය්යාථ. වරුණස්ස හි වො දෙවරාජස්ස ධජග්ගං උල්ලොකයතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
නො චෙ වරුණස්ස දෙවරාජස්ස ධජග්ගං උල්ලොකෙය්යාථ, අථ ඊසානස්ස දෙවරාජස්ස ධජග්ගං උල්ලොකෙය්යාථ. ඊසානස්ස හි වො දෙවරාජස්ස ධජග්ගං උල්ලොකයතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
තං ඛො පන භික්ඛවෙ සක්කස්ස වා දෙවානමින්දස්ස ධජග්ගං උල්ලොකයතං, පජාපතිස්ස වා දෙවරාජස්ස ධජග්ගං උල්ලොකයතං, වරුණස්ස වා දෙවරාජස්ස ධජග්ගං උල්ලොකයතං, ඊසානස්ස වා දෙවරාජස්ස ධජග්ගං උල්ලොකයතං, යං භවිස්සති භයං වා ඡම්භිතත්තං වා ලොමහංසො වා, සො පහීයෙථාපි නොපි පහීයෙථ. තං කිස්ස හෙතු? සක්කො හි භික්ඛවෙ දෙවානමින්දො අවීතරාගො අවීතදොසො අවීතමොහො භීරුච්ඡම්භී{1} උත්රාසී පලායීති.
අහං ච ඛො භික්ඛවෙ එවං වදාමි: සචෙ තුම්හාකං භික්ඛවෙ අරඤ්ඤගතානං වා රුක්ඛමූලගතානං වා සුඤ්ඤාගාරගතානං වා උප්පජ්ජෙය්ය භයං වා ඡම්භිතත්තං වා ලොමහංසො වා, මමෙව තස්මිං සමයෙ අනුස්සරෙය්යාථ: “ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථි සත්ථා දෙවමනුස්සානං බුද්ධො භගවා”ති. මමං හි වො භික්ඛවෙ අනුස්සරතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
නො චෙ මං අනුස්සරෙය්යාථ, අථ ධම්මං අනුස්සරෙය්යාථ: “ස්වාක්ඛාතො භගවතා ධම්මො සන්දිට්ඨිකො අකාලිකො එහිපස්සිකො ඔපනයිකො{2} පච්චත්තං වෙදිතබ්බො විඤ්ඤූහී”ති. ධම්මං හි වො භික්ඛවෙ අනුස්සරතං යං භවිස්සති භයං වා ඡම්භිතත්තං වා ලොමහංසො වා, සො පහීයිස්සති.
නො චෙ ධම්මං අනුස්සරෙය්යාථ, අථ සඞ්ඝං අනුස්සරෙය්යාථ: “සුපටිපන්නො භගවතො සාවකසඞ්ඝො. උජුපටිපන්නො භගවතො සාවකසඞ්ඝො. ඤායපටිපන්නො භගවතො සාවකසඞ්ඝො. සාමීචිපටිපන්නො භගවතො සාවකසඞ්ඝො. යදිදං චත්තාරි පුරිසයුගානි, අට්ඨපුරිස පුග්ගලා, එස භගවතො සාවකසඞ්ඝො, ආහුනෙය්යො පාහුනෙය්යො දක්ඛිණෙය්යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්සා”ති. සඞ්ඝං හි වො භික්ඛවෙ අනුස්සරතං යං භවිස්සති භයං වා ඡම්භිතත්තං වා ලොමහංසො වා සො පහීයිස්සති.
තං කිස්ස හෙතු? තථාගතො හි භික්ඛවෙ අරහං සම්මාසම්බුද්ධො වීතරාගො වීතදොසො වීතමොහො අභීරු අච්ඡම්භී අනුත්රාසී අපලායීති.
ඉදමවොච භගවා. ඉදං වත්වාන සුගතො අථාපරං එතදවොච සත්ථා:
අරඤ්ඤෙ රුක්ඛමූලෙ වා සුඤ්ඤාගාරෙව{1} භික්ඛවො, අනුස්සරෙථ සම්බුද්ධං භයං තුම්හාක{2} නො සියා.
නො චෙ බුද්ධං සරෙය්යාථ ලොකජෙට්ඨං නරාසභං, අථ ධම්මං සරෙය්යාථ නිය්යානිකං සුදෙසිතං.
නො චෙ ධම්මං සරෙය්යාථ නිය්යානිකං සුදෙසිතං, අථ සඞ්ඝං සරෙය්යාථ පුඤ්ඤක්ඛෙත්තං අනුත්තරං.
එවං බුද්ධං සරන්තානං ධම්මං සඞ්ඝඤ්ච භික්ඛවො, භයං වා ඡම්භිතත්තං වා ලොමහංසො න හෙස්සතීති.
11. 1. 4.
වෙපචිත්තිසුත්තං.
250. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. -පෙ- භගවා එතදවොච:
භූතපුබ්බං භික්ඛවෙ දෙවාසුරසඞ්ගාමො සමුපබ්බූළ්හො අහොසි. අථ ඛො භික්ඛවෙ වෙපචිත්ති අසුරින්දො අසුරෙ ආමන්තෙසි: සචෙ මාරිසා දෙවාසුරසඞ්ගාමෙ{3} සමුපබ්බූළ්හෙ අසුරා ජිනෙය්යුං, දෙවා පරාජෙය්යුං.{4} යෙන තං{5} සක්කං දෙවානමින්දං කණ්ඨපඤ්චමෙහි{6} බන්ධනෙහි බන්ධිත්වා මම සන්තිකෙ ආනෙය්යාථ අසුරපුරන්ති.
සක්කොපි ඛො භික්ඛවෙ දෙවානමින්දො දෙවෙ තාවතිංසෙ ආමන්තෙසි:
සචෙ මාරිසා දෙවාසුරසඞ්ගාමෙ සමුපබ්බූළ්හෙ දෙවා ජිනෙය්යුං, අසුරා පරාජෙය්යුං. යෙන තං වෙපචිත්තිං අසුරින්දං කණ්ඨපඤ්චමෙහි බන්ධනෙහි බන්ධිත්වා මම සන්තිකෙ ආනෙය්යාථ සුධම්මං සභන්ති{1}.
තස්මිං ඛො පන භික්ඛවෙ සඞ්ගාමෙ දෙවා ජිනිංසු. අසුරා පරාජිංසු. අථ ඛො භික්ඛවෙ දෙවා තාවතිංසා වෙපචිත්තිං අසුරින්දං කණ්ඨපඤ්චමෙහි බන්ධනෙහි බන්ධිත්වා සක්කස්ස දෙවානමින්දස්ස සන්තිකෙ ආනෙසුං සුධම්මසභං.
තත්ර සුදං භික්ඛවෙ වෙපචිත්ති අසුරින්දො කණ්ඨපඤ්චමෙහි බන්ධනෙහි බද්ධො සක්කං දෙවානමින්දං සුධම්මං සභං පවිසන්තඤ්ච නික්ඛමන්තඤ්ච අසබ්භාහි ඵරුසාහි වාචාහි අක්කොසති, පරිභාසති.
අථ ඛො භික්ඛවෙ මාතලී සඞ්ගාහකො සක්කං දෙවානමින්දං ගාථාය{2} අජ්ඣභාසි:
භයා නු මථවා{3} සක්ක දුබ්බල්යා{4} නො තිතික්ඛසි, සුණන්තො ඵරුසං වාචං සම්මුඛා වෙපචිත්තිනොති.
[සක්කො:]
නාහං භයා න දුබ්බල්යා ඛමාමි වෙපචිත්තිනො, කථඤ්හි මාදිසො විඤ්ඤූ බාලෙන පටිසංයුජෙති.
භිය්යො බාලා පභිජ්ජෙය්යුං{5} නො චස්ස පටිසෙධකො තස්මා භුසෙන දණ්ඩෙන ධීරො බාලං නිසෙධයෙති.
එතදෙව අහං මඤ්ඤෙ බාලස්ස පටිසෙධනං, පරං සංකුපිතං ඤත්වා යො සතො උපසම්මතීති.
[මාතලි:]
එතදෙව තිතික්ඛාය වජ්ජං පස්සාමි වාසව, යදා නං මඤ්ඤති බාලො භයා ම්යායං තිතික්ඛති, අජ්ඣාරූහති{6} දුම්මෙධො ගො’ව භිය්යො පලායිනන්ති.
[සක්කො:]
කාමං මඤ්ඤතු වා මා වා භයා ම්යායං තිතික්ඛති, සදත්ථපරමා අත්ථා ඛන්ත්යා භිය්යො න විජ්ජති.
යො හවෙ බලවා සන්තො දුබ්බලස්ස තිතික්ඛති, තමාහු පරමං ඛන්තිං නිච්චං ඛමති දුබ්බලො.
අබලන්තං බලං ආහු යස්ස බාලබලං බලං, බලස්ස{7} ධම්මගුත්තස්ස පටිවත්තා න විජ්ජති.
තස්සෙව තෙන පාපියො යො කුද්ධං පටිකුජ්ඣති, කුද්ධං අප්පටිකුජ්ඣන්තො සඞ්ගාමං ජෙති දුජ්ජයං.
උභින්නමත්ථං චරති අත්තනො ච පරස්ස ච, පරං සංකුපිතං ඤත්වා යො සතො උපසම්මති.
උභින්නං තිකිච්ඡන්තානං{1} අත්තනො ච පරස්ස ච, ජනා මඤ්ඤන්ති බාලොති යෙ ධම්මස්ස අකොවිදාති.
සො හි නාම භික්ඛවෙ සක්කො දෙවානමින්දො සකං පුඤ්ඤඵලං උපජීවමානො දෙවානං තාවතිංසානං ඉස්සරියාධිපච්චං රජ්ජං කාරෙන්තො ඛන්තිසොරච්චස්ස වණ්ණවාදී භවිස්සති. “ඉධ ඛො තං භික්ඛවෙ සොභෙථ, යං තුම්හෙ එවං ස්වාක්ඛාතෙ ධම්මවිනයෙ පබ්බජිතා සමානා ඛමා ච භවෙය්යාථ සොරතා චා”ති.
11. 1. 5.
සුභාසිතජයසුත්තං.
251. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. -පෙ- භගවා එතදවොච:
භූතපුබ්බං භික්ඛවෙ දෙවාසුරසඞ්ගාමො සමුපබ්බූළ්හො අහොසි. අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: හොතු දෙවානමින්ද, සුභාසිතෙන ජයොති. හොතු වෙපචිත්ති, සුභාසිතෙන ජයොති.
අථ ඛො භික්ඛවෙ දෙවා ච අසුරා ච පාරිසජ්ජෙ ඨපෙසුං: ඉමෙ නො සුභාසිතං දුබ්භාසිතං{2} ආජානිස්සන්තීති.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද, ගාථන්ති.
එවං වුත්තෙ භික්ඛවෙ සක්කො දෙවානමින්දො වෙපචිත්ති අසුරින්දං එතදවොච: තුම්හෙ ඛ්වෙත්ථ{3} වෙපචිත්ති, පුබ්බදෙවා. භණ වෙපචිත්ති, ගාථන්ති. එවං වුත්තෙ භික්ඛවෙ වෙපචිත්ති අසුරින්දො ඉමං ගාථං අභාසි:
භිය්යො බාලා පභිජ්ජෙය්යුං නො චස්ස පටිසෙධකො, තස්මා භුසෙන දණ්ඩෙන ධීරො බාලං නිසෙධයෙති.
භාසිතාය ඛො පන භික්ඛවෙ වෙපචිත්තිනා අසුරින්දෙන ගාථාය අසුරා අනුමොදිංසු. දෙවා තුණ්හී අහෙසුං.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද, ගාථන්ති. එවං වුත්තෙ භික්ඛවෙ සක්කො දෙවානමින්දො ඉමං ගාථං අභාසි:
එතදෙව අහං මඤ්ඤෙ බාලස්ස පටිසෙධනං, පරං සංකුපිතං ඤත්වා යො සතො උපසම්මතීති.
භාසිතාය ඛො පන භික්ඛවෙ සක්කෙන දෙවානමින්දෙන ගාථාය දෙවා අනුමොදිංසු. අසුරා තුණ්හී අහෙසුං.
අථ ඛො භික්ඛවෙ සක්කො දෙවානමින්දො වෙපචිත්තිං අසුරින්දං එතදවොච: භණ වෙපචිත්ති ගාථන්ති. එවං වුත්තෙ භික්ඛවෙ වෙපචිත්ති අසුරින්දො ඉමං ගාථං අභාසි:
එතදෙව තිතික්ඛාය වජ්ජං පස්සාමි වාසව, යදා නං මඤ්ඤති බාලො භයා ම්යායං තිතික්ඛති, අජ්ඣාරුහති දුම්මෙධො ගො’ව භිය්යො පලායිනන්ති.
භාසිතාය ඛො පන භික්ඛවෙ වෙපචිත්තිනා අසුරින්දෙන ගාථාය අසුරා අනුමොදිංසු. දෙවා තුණ්හී අහෙසුං.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද ගාථන්ති.
එවං වුත්තෙ භික්ඛවෙ සක්කො දෙවානමින්දො ඉමා ගාථායො අභාසි:
කාමං මඤ්ඤතු වා මා වා භයා ම්යායං තිතික්ඛති, සදත්ථපරමා අත්ථා ඛන්ත්යා භිය්යො න විජ්ජති.
යො හවෙ බලවා සන්තො දුබ්බලස්ස තිතික්ඛති, තමාහු පරමං ඛන්තිං නිච්චං ඛමති දුබ්බලො.
අබලන්තං බලං ආහු යස්ස බාලබලං බලං, බලස්ස ධම්මගුත්තස්ස පටිවත්තා න විජ්ජති.
තස්සෙව තෙන පාපියො යො කුද්ධං පටිකුජ්ඣති, කුද්ධං අප්පටිකුජ්ඣන්තො සඞ්ගාමං ජෙති දුජ්ජයං.
උභින්නමත්ථං චරති අත්තනො ච පරස්ස ච, පරං සඞ්කුපිතං ඤත්වා යො සතො උපසම්මති.
උභින්නං තිකිච්ඡන්තානං අත්තනො ච පරස්ස ච, ජනා මඤ්ඤන්ති බාලොති යෙ ධම්මස්ස අකොවිදාති.