සතීමතො සදා භද්දං සතිමා සුඛමෙධති, සතීමතො සුවෙ සෙය්යො වෙරා න පරිමුච්චති.
යස්ස සබ්බමහොරත්තං අහිංසාය රතො මනො, මෙත්තං සො සබ්බභූතෙසු වෙරං තස්ස න කෙනචීති.
10. 1. 5.
සානුසුත්තං.
239. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරිස්සා උපාසිකාය සානු{5} නාම පුත්තො යක්ඛෙන ගහිතො හොති. අථ ඛො සා උපාසිකා පරිදෙවමානා තායං වෙලායං ඉමා ගාථායො අභාසි:
චාතුද්දසිං පඤ්චදසිං යා ව{6} පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං{7}, උපොසථං උපවසන්ති බ්රහ්මචරියං චරන්ති යෙ.
න තෙහි යක්ඛා කීළන්ති ඉති මෙ අරහතං සුතං, සා දානි අජ්ජ පස්සාමි යක්ඛා කීළන්ති සානුනාති.
[යක්ඛො:]
චාතුද්දසිං පඤ්චදසිං යා ච පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාගතං, උපොසථං උපවසන්ති බ්රහ්මචරියං චරන්ති යෙ.
න තෙහි යක්ඛා කීළන්ති සාහු තෙ අරහතං සුතං, සානුං පබුද්ධං වජ්ජාසි යක්ඛානං වචනං ඉදං:
“මාකාසි පාපකං කම්මං ආවි{1} වා යදි වා රහො, යඤ්චෙව{2} පාපකං කම්මං කරිස්සසි කරොසි වා, න තෙ දුක්ඛා පමුත්යත්ථි උප්පච්චාපි පලායතො”ති.
[සානු:]
මතං වා අම්ම රොදන්ති යො වා ජීවං න දිස්සති, ජීවන්තං අම්ම පස්සන්තී කස්මා මං අම්ම රොදසීති?
[උපාසිකා:]
මතං වා පුත්ත{3} රොදන්ති{4} යො වා{5} ජීවං න දිස්සති, යො ච කාමෙ චජිත්වාන{6} පුනරාගච්ඡතෙ ඉධ, තං වාපි පුත්ත රොදන්ති පුන ජීවං මතො හි සො.
කුක්කුළා{7} උබ්භතො තාත කුක්කුළං{8} පතිතුමිච්ඡසි, නරකා උබ්භතො තාත නරකං පතිතුමිච්ඡසි.
අභිධාවථ භද්දං තෙ කස්ස උජ්ඣාපයාමසෙ, ආදිත්තා නීහටං{9} භණ්ඩං පුන ඩය්හිතුමිච්ඡසීති.
10. 1. 6.
පියඞ්කරසුත්තං.
240. එකං සමයං ආයස්මා අනුරුද්ධො සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා අනුරුද්ධො රත්තියා පච්චූසසමයං පච්චුට්ඨාය ධම්මපදානී භාසති. අථ ඛො පියඞ්කරමාතා යක්ඛිනී පුත්තකං එවං තොසෙසි:
මා සද්දං කරි පියඞ්කර භික්ඛු ධම්මපදානි භාසති, අපි ච ධම්මපදං විජානිය පටිපජ්ජෙම හිතාය නො සියා.
පාණෙසු ච සංයමාමසෙ සම්පජානමුසා න භණාමසෙ, සික්ඛෙම සුසීලමත්තනො{10} අපි මුච්චෙම පිසාචයොනියාති.
10. 1. 7.
පුනබ්බසුසුත්තං.
241. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
තෙන ඛො පන සමයෙන භගවා භික්ඛූ නිබ්බාණපටිසංයුත්තාය ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති. තෙ ච භික්ඛූ අට්ඨිකත්වා{1} මනසි කත්වා සබ්බචෙතසො සමන්නාහරිත්වා ඔහිතසොතා ධම්මං සුණන්ති.
අථ ඛො පුනබ්බසුමාතා යක්ඛිනී පුත්තකෙ එවං තොසෙසි:
තුණ්හී උත්තරිකෙ හොහි තුණ්හී හොහි පුනබ්බසු, යාවාහං බුද්ධසෙට්ඨස්ස ධම්මං සොස්සාමි සත්ථුනො.
නිබ්බානං භගවා ආහ සබ්බගන්ථප්පමොචනං, අතිවෙලා ච මෙ හොති අස්මිං ධම්මෙ පියායනා.
පියො ලොකෙ සකො පුත්තො පියො ලොකෙ සකො පති, තතො පියතරා{2} මය්හං අස්ස ධම්මස්ස මග්ගනා.
න හි පුත්තො පති වාපි පියො දුක්ඛා පමොචයෙ, යථා සද්ධම්මසවණං{3} දුක්ඛා මොචෙති පාණිනං.
ලොකෙ දුක්ඛපරෙතස්මිං ජරාමරණසංයුතෙ{4}, ජරාමරණමොක්ඛාය යං ධම්මං අභිසම්බුද්ධං{5}, තං ධම්මං සොතුමිච්ඡාමි තුණ්හී හොහි පුනබ්බසූති.
[පුනබ්බසු:]
අම්ම{6} න බ්යාහරිස්සාමි තුණ්හීභූතායමුත්තරා, ධම්මමෙව නිසාමෙහි සද්ධම්මසවණං{3} සුඛං,
සද්ධම්මස්ස අනඤ්ඤාය අම්ම දුක්ඛං චරාමසෙ, එස දෙවමනුස්සානං සම්මූළ්හානං පභඞ්කරො, බුද්ධො අන්තිමසාරීරො ධම්මං දෙසෙති චක්ඛුමාති.
[පුනබ්බසුමාතා:]
සාධු ඛො පණ්ඩිතො නාම පුත්තො ජාතො උරෙසයො, පුත්තො මෙ බුද්ධසෙට්ඨස්ස ධම්මං සුද්ධං පියායති.
පුනබ්බසු සුඛී හොහි අජ්ජාහම්හි සමුග්ගතා, දිට්ඨානි අරියසච්චානි උත්තරා පි සුණාතු මෙති.
10. 1. 8.
සුදත්තසුත්තං.
242. එකං සමයං භගවා රාජගහෙ විහරති සීතවනෙ. තෙන ඛො පන සමයෙන අනාථපිණ්ඩිකො ගහපති රාජගහං අනුප්පත්තො හොති. කෙනචිදෙව කරණීයෙන. අස්සොසි ඛො අනාථපිණ්ඩිකො ගහපති බුද්ධො කිර ලොකෙ උප්පන්නොති. තාවදෙව ච{7} පන භගවන්තං දස්සනාය උපසඞ්කමිතුකාමො අහොසි{8}.
අථ ඛො{1} අනාථපිණ්ඩිකස්ස ගහපතිස්ස එතදහොසි: අකාලො ඛො අජ්ජ භගවන්තං දස්සනාය උපසඞ්කමිතුං. ස්වෙදානාහං කාලෙන භගවන්තං දස්සනාය උපසඞ්කමිස්සාමීති, බුද්ධගතාය සතියා නිපජ්ජි. රත්තියා සුදං තික්ඛත්තුං වුට්ඨාසි පභාතන්ති මඤ්ඤමානො. අථ ඛො අනාථපිණ්ඩිකො ගහපති යෙන සීවථිකද්වාරං{2} තෙනුපසඞ්කමි. අමනුස්සා ද්වාරං විවරිංසු.
අථ ඛො අනාථපිණ්ඩිකස්ස ගහපතිස්ස නගරම්හා නික්ඛමන්තස්ස ආලොකො අන්තරධායි. අන්ධකාරො පාතුරහොසි. භයං ඡම්භිතත්තං ලොමහංසො උදපාදි. තතොව{3} පුන නිවත්තිතුකාමො අහොසි. අථ ඛො සීවකො{4} යක්ඛො අන්තරහිතො සද්දමනුස්සාවෙසි:
සතං හත්ථී සතං අස්සා සතං අස්සතරී{5} රථා, සතං කඤ්ඤාසහස්සානි ආමුත්තමණිකුණ්ඩලා, එකස්ස පදවීතිහාරස්ස කලං නාග්ඝන්ති සොළසිං.
අභික්කම ගහපති, අභික්කම ගහපති, අභික්කමනං තෙ සෙය්යො නො{6} පටික්කමනන්ති.
අථ ඛො අනාථපිණ්ඩිකස්ස ගහපතිස්ස අන්ධකාරො අන්තරධායි, ආලොකො පාතුරහොසි. යං අහොසි භයං ඡම්භිතත්තං ලොමහංසො සො පටිප්පස්සම්භි.
දුතියම්පි ඛො -පෙ-
තතියම්පි ඛො{7} අනාථපිණ්ඩිකස්ස ගහපතිස්ස{8} ආලොකො අන්තරධායි, අන්ධකාරො පාතුරහොසි, භයං ඡම්භිතත්තං ලොමහංසො උදපාදි. තතොව පුන නිවත්තිතුකාමො අහොසි. තතියම්පි ඛො සීවකො යක්ඛො අන්තරහිතො සද්දමනුස්සාවෙසි:
සතං හත්ථී සතං අස්සා සතං අස්සතරී{5} රථා, සතං කඤ්ඤාසහස්සානි ආමුත්තමණිකුණ්ඩලා, එකස්ස පදවීතිහාරස්ස කලං නාග්ඝන්ති සොළසිං.
අභික්කම ගහපති, අභික්කම ගහපති, අභික්කමනං තෙ සෙය්යො නො පටික්කමනන්ති.
අථ ඛො අනාථපිණ්ඩිකස්ස ගහපතිස්ස අන්ධකාරො අන්තරධායි, ආලොකො පාතුරහොසි. යං අහොසි භයං ඡම්භිතත්තං ලොමහංසො සො පටිප්පස්සම්භි. අථ ඛො අනාථපිණ්ඩිකො ගහපති යෙන සීතවනං{9} තෙනුපසඞ්කමි.
තෙන ඛො පන සමයෙන භගවා රත්තියා පච්චූසසමයං පච්චුට්ඨාය අබ්භොකාසෙ චඞ්කමති. අද්දසා ඛො භගවා අනාථපිණ්ඩිකං ගහපතිං දූරතොව ආගච්ඡන්තං. දිස්වාන චඞ්කමා ඔරොහිත්වා පඤ්ඤත්තෙ ආසනෙ නිසීදි. නිසජ්ජ ඛො භගවා අනාථපිණ්ඩිකං ගහපතිං එතදවොච: එහි සුදත්තාති.
අථ ඛො අනාථපිණ්ඩිකො ගහපති නාමෙන මං භගවා ආලපතීති{1}, තත්ථෙව භගවතො පාදෙසු සිරසා නිපතිත්වා භගවන්තං එතදවොච: කච්චි භන්තෙ භගවා සුඛමසයිත්ථාති{2}?
[භගවා:]
සබ්බදා වෙ සුඛං සෙති බ්රාහ්මණො පරිනිබ්බුතො, යො න ලිම්පති කාමෙසු සීතිභූතො නිරූපධි.
සබ්බා ආසත්තියො ඡෙත්වා විනෙය්ය හදයෙ දරං, උපසන්තො සුඛං සෙති සන්තිං පප්පුය්ය චෙතසොති.{3}
10. 1. 9.
පඨම සුක්කාසුත්තං.
243. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන සුක්කා භික්ඛුනී මහතියා පරිසාය පරිවුතා ධම්මං දෙසෙති.
අථ ඛො සුක්කාය භික්ඛුනියා අභිප්පසන්නො යක්ඛො රාජගහෙ රථිකාය රථිකං සිඞ්ඝාටකෙන සිඞ්ඝාටකං උපසඞ්කමිත්වා තායං වෙලායං ඉමා ගාථායො අභාසි:
කිම්මෙ කතා රාජගහෙ මනුස්සා මධුපීතාව සෙය්යරෙ{4}, යෙ සුක්කං න පයිරුපාසන්ති දෙසෙන්තිං අමතං පදං.
තඤ්ච පන අප්පටිවානීයං අසෙචනකමොජවං, පිවන්ති මඤ්ඤෙ සප්පඤ්ඤා වලාහකමිවද්ධගූති.{5}
10. 1. 10.
දුතිය සුක්කාසුත්තං.
244. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන අඤ්ඤතරො උපාසකො සුක්කාය භික්ඛුනියා භොජනං අදාසි. අථ ඛො සුක්කාය භික්ඛුනියා අභිප්පසන්නො යක්ඛො රාජගහෙ රථිකාය රථිකං සිඞ්ඝාටකෙන සිඞ්ඝාටකං උපසඞ්කමිත්වා තායං වෙලායං ඉමං ගාථං අභාසි:
පුඤ්ඤං වත පසවි බහුං සප්පඤ්ඤො වතායමූපාසකො, යො සුක්කාය අදාසි භොජනං සබ්බගන්ථෙහි විප්පමුත්තායාති{6}.
10. 1. 11.
චීරාසුත්තං.
245. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන අඤ්ඤතරො උපාසකො චීරාය භික්ඛුනියා චීවරං අදාසි. අථ ඛො චීරාය භික්ඛුනියා අභිප්පසන්නො යක්ඛො රාජගහෙ රථිකාය රථිකං සිඞ්ඝාටකෙන සිඞ්ඝාටකං උපසඞ්කමිත්වා තායං වෙලායං ඉමං ගාථං අභාසි:
පුඤ්ඤං වත පසවි බහුං සප්පඤ්ඤො වතායමුපාසකො, යො චීරාය අදාසි චීවරං සබ්බයොගෙහි විප්පමුත්තායාති.
10. 1. 12.
ආළවකසුත්තං.
246. එවං මෙ සුතං: එකං සමයං භගවා ආළවියං විහරති ආළවකස්ස යක්ඛස්ස භවනෙ. අථ ඛො ආළවකො යක්ඛො යෙන භගවා තෙනුපසඞ්කමි. උපසඞ්කමිත්වා භගවන්තං එතදවොච: නික්ඛම සමණාති, සාධාවුසොති භගවා නික්ඛමි. පවිස සමණාති, සාධාවුසොති භගවා පාවිසි.
දුතියම්පි ඛො ආළවකො යක්ඛො භගවන්තං එතදවොච: නික්ඛම සමණාති. සාධාවුසොති භගවා නික්ඛමි. පවිස සමණාති. සාධාවුසොති භගවා පාවිසි. තතියම්පි ඛො ආළවකො යක්ඛො භගවන්තං එතදවොච: නික්ඛම සමණාති. සාධාවුසොති භගවා නික්ඛමි. පවිස සමණාති. සාධාවුසොති භගවා පාවිසි. චතුත්ථම්පි ඛො ආළවකො යක්ඛො භගවන්තං එතදවොච: නික්ඛම සමණාති. න ඛ්වාහං ආවුසො නික්ඛමිස්සාමි. යං තෙ කරණීයං තං කරොහීති.
[ආළවකො:]
පඤ්හං තං සමණ පුච්ඡිස්සාමි. සචෙ මෙ න බ්යාකරිස්සසි, චිත්තං වා තෙ ඛිපිස්සාමි, හදයං වා තෙ ඵාලෙස්සාමි, පාදෙසු වා ගහෙත්වා පාරගඞ්ගාය ඛිපිස්සාමීති.
[භගවා:]
න ඛ්වාහං තං ආවුසො පස්සාමි සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය, යෙ මෙ චිත්තං වා ඛිපෙය්ය හදයං වා ඵාලෙය්ය පාදෙසු වා ගහෙත්වා පාරගඞ්ගාය ඛිපෙය්ය. අපි ච ත්වං ආවුසො පුච්ඡ යදාකඞ්ඛසීති.
අථ ඛො ආළවකො යක්ඛො භගවන්තං ගාථාය අජ්ඣභාසි{1}:
කිං සූධ විත්තං පුරිසස්ස සෙට්ඨං කිං සු සුචිණ්ණං සුඛමාවහාති, කිං සු හවෙ සාදුතරං{2} රසානං කථං ජීවී ජීවිතමාහු සෙට්ඨන්ති?
[භගවා:]
සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති, සච්චං හවෙ සාදුතරං රසානං පඤ්ඤාජීවිං{1} ජීවිතමාහු සෙට්ඨන්ති.
[ආළවකො:]
කථං සු තරති ඔඝං කථංසු තරති අණ්ණවං, කථං සු දුක්ඛං අච්චෙති කථං සු පරිසුජ්ඣතීති.
[භගවා:]
සද්ධාය තරති ඔඝං අප්පමාදෙන අණ්ණවං, විරියෙන දුක්ඛං අච්චෙති පඤ්ඤාය පරිසුජ්ඣතීති.{2}
[ආළවකො:]
කථං සු ලභතෙ පඤ්ඤං කථංසු වින්දතෙ ධනං, කථං සු කිත්තිං පප්පොති කථං මිත්තානි ගන්ථති, අස්මා ලොකා පරං ලොකං කථං පෙච්ච න සොචතීති?
[භගවා:]
සද්දහානො අරහතං ධම්මං නිබ්බාණපත්තියා, සුස්සූසා{3} ලභතෙ පඤ්ඤං අප්පමත්තො විචක්ඛණො.
පතිරූපකාරී{4} ධුරවා උට්ඨාතා වින්දතෙ ධනං, සච්චෙන කිත්තිං පප්පොති දදං මිත්තානි ගන්ථති.
යස්සෙතෙ චතුරො ධම්මා සද්ධස්ස ඝරමෙසිනො, සච්චං ධම්මො{5} ධිති චාගො ස චෙ පෙච්ච න සොචති, අස්මා ලොකා පරං ලොකං එවං පෙච්ච න සොචතීති.
ඉඞ්ඝ අඤ්ඤෙපි පුච්ඡස්සු පුථූ සමණබ්රාහ්මණෙ, යදි සච්චා දමා{6} චාගා ඛන්ත්යා භිය්යොධ විජ්ජතීති.
[ආළවකො:]
කථං නු දානි පුච්ඡෙය්යං පුථූ සමණබ්රාහ්මණෙ, සො’හං{7} අජ්ජ පජානාමි යො අත්ථො සම්පරායිකො.
අත්ථාය වත මෙ බුද්ධො වාසායාළවිමාගමා{8}, සො’හං අජ්ජ පජානාමි යත්ථ දින්නං මහප්ඵලං.
සො අහං විචරිස්සාමි ගාමා ගාමං පුරා පුරං, නමස්සමානො සම්බුද්ධං ධම්මස්ස ච සුධම්මතන්ති.
ඉන්දකවග්ගො පඨමො.
තත්රුද්දානං:
ඉන්දකො සක්ක සූචි ච මණිභද්දො ච සානු{1} ච, පියඞ්කර පුනබ්බසු සුදත්තො ච ද්වෙ සුක්කා චීරා ආළවකෙන{2} ද්වාදසාති.